1-3. Eaha te huru tupuraa o te aˈoraa ta Iesu i horoa i te tau uaaraa tiare i 31 muri aˈe te tau o Iesu, e no te aha te feia e faaroo ra ia ˈna e maere ai?

 TEI te hoê mahana o te tau uaaraa tiare tatou i 31 muri aˈe te tau o Iesu. Tei pihai iho Iesu Mesia ia Kaperenaumi, te hoê oire ohipa roa i te pae tatahi apatoerau tooa o te râ o te miti o Galilea. I nia i te hoê mouˈa tapiri, ua pure Iesu o ˈna anaˈe hoê po taatoa. Ia poipoi, e pii oia i ta ˈna mau pǐpǐ, e e maiti oia i rotopu ia ratou 12 aposetolo. I taua taime atoa ra, ua apee te nahoa taata, mea atea vetahi i te haereraa mai, ia Iesu i reira e ua putuputu ratou i te hoê vahi papu i nia i te mouˈa. Te tiai ru ra ratou i te faaroo i ta ˈna e parau e ia faaorahia to ratou mau maˈi. E rave iho â Iesu mai ta ratou i tiai.—Luka 6:12-19.

² E faafatata ˈtu Iesu i te nahoa e e faaora i te feia maˈi atoa. I te pae hopea, ua ora pauroa anaˈe to ratou maˈi, e parahi oia e e haamata i te haapii ia ratou. a E maere te feia e faaroo i ta ˈna mau parau e faahiti i rapaeau i taua mahana puvaivai ra o te tau uaaraa tiare. Inaha, aita ratou i faaroo aˈenei i te hoê taata ia haapii mai ia ˈna. No te haafaufaa i ta ˈna mau haapiiraa, eita oia e faahiti i te mau parau tutuu e i te mau rabi ati Iuda matau-maitai-hia. E faahiti pinepine roa râ oia i te mau Papai Hebera. Mea ohie ta ˈna mau taˈo, e mea maramarama ta ˈna e haapii ra i te mau taata. Ia oti  ta ˈna paraparauraa, e maere te nahoa. E maere iho â ratou. No faaroo noa ˈtura hoi ratou i te taata paari roa ˈˈe i ora aˈenei!—Mataio 7:28, 29.

³ Ua papaihia taua aˈoraa ra e e rave rahi atu â mea ta Iesu i parau e i rave i roto i te Parau a te Atua. Mea maitai ia maimi tatou eaha ta te Bibilia e parau ra no nia ia Iesu, tei roto hoi ia ˈna “te taoˈa rau atoa o te paari.” (Kolosa 2:3) Te paari o te aravihi ïa i te faaohipa te ite e te maramarama no te faaafaro i te fifi. Nohea mai te paari o Iesu? Mea nafea to ˈna faaiteraa i te paari, e e nafea tatou e nehenehe ai e pee i to ˈna hiˈoraa?

4. Eaha ta te feia e faaroo ra ia Iesu i Nazareta i ui, e no te aha?

⁴ I roto i te hoê o to ˈna mau tere pororaa, ua haere Iesu i te oire o Nazareta, i reira oia i te paariraa, e haapii i roto i te sunago. Mea rahi o te taata e faaroo ra ia ˈna tei maere e tei ui: “Nohea mai te paari o teie taata?” Ua matau ratou i to ˈna utuafare, to ˈna na metua e to ˈna mau taeae e tuahine, e ua ite ratou e i ora na oia i te hoê oraraa haihai. (Mataio 13:54-56; Mareko 6:1-3) Ua ite maitai atoa ratou e aita teie tamuta mea ite i te haapii i haere i te haapiiraa tuiroo a te rabi. (Ioane 7:15) Ua tano ïa ta ratou uiraa ia hiˈohia ˈtu.

5. Nohea mai to ˈna paari i ta Iesu parauraa?

⁵ Te paari ta Iesu i faaite, e ere noa ïa i to ˈna iho mau manaˈo tia roa. I muri aˈe i roto i ta ˈna taviniraa, i to ˈna haapiiraa i mua i te taata i te hiero, ua faaite Iesu e no ǒ mai to ˈna paari i te hoê tumu teitei atu â. Ua parau o ˈna: “E ere na ˈu iho ta ˈu e haapii nei, na tei tono mai râ ia ˈu.” (Ioane 7:16) Oia, o te Metua tei tono mai i te Tamaiti, te tumu mau o te paari o Iesu. (Ioane 12:49) Mea nafea râ to Iesu fanaˈoraa i te paari no ǒ mai ia Iehova ra?

6, 7. Mea nafea to Iesu fanaˈoraa i te paari no ǒ mai i to ˈna Metua ra?

⁶ Te ohipa ra te varua moˈa o Iehova i roto i te aau e te feruriraa  o Iesu. Teie ta Isaia i faaite atea no nia ia Iesu ei Mesia fafauhia: “E parahi te varua o Iehova i nia ia ˈna, e noaa ˈi ia ˈna te paari e te haroˈaroˈa, te aˈoraa maitai e te puai, te ite e te mǎtaˈu ia Iehova.” (Isaia 11:2) I te mea e tei nia ia ˈna te varua o Iehova o te aratai ra i to ˈna huru feruriraa e ta ˈna mau faaotiraa, e maere anei ïa tatou ia faaite Iesu na roto i te mau parau e te mau ohipa i te paari tia roa o Iehova?

⁷ Ua fanaˈo Iesu i te paari no ǒ mai i to ˈna Metua ra na roto i te tahi atu ravea hohonu. Mai ta tatou i ite i te pene 2, ua ora Iesu i te raˈi e to ˈna Metua e rave rahi matahiti hou oia a haere mai ai i te fenua, ua ite maitai Iesu i te mau manaˈo e huru aau o to ˈna Metua. Eita e haere ia tatou ia feruri i te hohonu o te paari ta te Tamaiti i fanaˈo i pihai iho i to ˈna Metua, a haa ˈi oia ei “rave ohipa aravihi” e o Iehova i roto i te poieteraa i te mau mea atoa. Inaha, ia faahiti te Bibilia ia Iesu hou oia a haere mai ai i te fenua, ua faaauhia oia i te “paari.” (Maseli 8:22-31; Kolosa 1:15, 16) I te roaraa o ta ˈna taviniraa, ua nehenehe Iesu e faaohipa i te paari ta ˈna i fanaˈo i pihai iho i to ˈna Metua i nia i te raˈi. b (Ioane 8:26, 28, 38) No reira, eiaha tatou e maere i te aano o te ite e te hohonu o te maramaramaraa e vai ra i roto i te mau parau a Iesu aore ra i te manaˈo tano i roto i ta ˈna mau ohipa atoa.

8. Ei pǐpǐ na Iesu, e nafea tatou e nehenehe ai e fanaˈo i te paari?

⁸ Ei pǐpǐ na Iesu, mea faufaa roa ia turui tatou i nia ia Iehova o te horoa mai i te paari. (Maseli 2:6) Parau mau, eita iho â Iehova e horoa semeio mai i te paari. Ia ani râ tatou i te paari, e pahono mai oia i ta tatou mau pure. E horoa mai oia i te paari titauhia no te ite eaha te rave ia fifihia tatou. (Iakobo 1:5) E titauhia ia tutava rahi tatou no te fanaˈo i taua paari ra. E mea tia ia tamau tatou i te imi i te reira “mai te taoˈa hunahia.” (Maseli 2:1-6) Oia, e titauhia ia tamau tatou i te haapii i te Parau a te Atua, tei reira hoi te  faaiteraahia to ˈna paari, e ia faaau i to tatou oraraa i nia i ta tatou e haapii ra. Mea faufaa iho â te hiˈoraa o te Tamaiti a Iehova no te tauturu ia tatou ia noaa mai te paari. E hiˈopoa mai tatou i te tahi mau tuhaa i reira to Iesu faaiteraa i te paari e e haapii mai tatou e nafea ia pee ia ˈna.

9. Na te aha i faariro i ta Iesu mau haapiiraa ei parau paari?

⁹ Mea rahi roa te taata i haere atu ia Iesu ra no te faaroo noa ia ˈna ia paraparau. (Mareko 6:31-34; Luka 5:1-3) E ere te reira i te mea maere, no te mea ia haapii Iesu, e parau paari ta ˈna i faahiti! Te faaite ra ta ˈna mau haapiiraa i te hoê ite hohonu i te Parau a te Atua e te taa ra ia ˈna te huru o te taata. E faufaahia te taata na te mau vahi atoa, i te tau tahito e i teie mahana i ta ˈna mau haapiiraa. E hiˈopoa mai tatou i te tahi mau hiˈoraa o te paari i roto i te mau parau a Iesu, te “Aˈo faahiahia” tei faaite-atea-hia.—Isaia 9:6.

10. Eaha te mau huru maitatai ta Iesu e faaitoito mai ra ia atuatu, e no te aha?

¹⁰ Te Aˈoraa i nia i te mouˈa i faahitihia i te omuaraa, o te haapueraa rahi roa ˈˈe ïa o te mau haapiiraa a Iesu. O te mau parau anaˈe a Iesu tei tuuhia i roto i teie aamu. I roto i teie aˈoraa, aita noa Iesu e faaitoito mai ra ia tapi i te haerea e te parau maitai. Mea hohonu atu â ta ˈna aˈoraa.  Ua ite maitai Iesu e no ǒ mai te mau parau e ohipa i te mau manaˈo e huru aau ra, no reira oia e faaitoito mai ai ia atuatu i te mau huru maitatai o te feruriraa e o te aau, mai te mǎrû, te hiaai i te parau-tia, te hinaaro i te aroha hamani maitai e te hau, e te here ia vetahi ê. (Mataio 5:5-9, 43-48) A atuatu ai tatou i taua mau huru maitatai ra, e itehia i roto i to tatou aau i te parau e te haerea maitai o te faaoaoa ia Iehova e o te paturu atoa i te mau auhoaraa maitai i rotopu i te taata.—Mataio 5:16.

11. Ia horoa Iesu i te aˈoraa no nia i te haerea ino, e nafea oia e faaite roa ˈi i te tumu o te fifi?

¹¹ Ia horoa Iesu i te aˈoraa no nia i te haerea ino, e faaite roa oia i te tumu o te fifi. Eita oia e parau noa mai e haapae i te mau ohipa haavî uˈana. E faaara atoa mai râ o ˈna eiaha e tamau i te riri ia vetahi ê. (Mataio 5:21, 22; Ioane 1, 3:15) Eita noa oia e opani i te faaturi. E faaara atoa râ oia e e haamata te hiaai i roto i te aau e o te taivaraa to muri iho. E aˈo mai oia eiaha e vaiiho i to tatou mata ia faatupu e ia faaaraara i te hiaai tia ore. (Mataio 5:27-30) No reira Iesu i haapii ai i te taata ia feruri i to ratou mau manaˈo turai, eiaha noa i to ratou haerea. E faaite roa oia eaha te mau haerea e hinaaro o te faatupu i te mau ohipa ino.—Salamo 7:14.

12. Eaha te manaˈo o te mau pǐpǐ a Iesu i ta ˈna mau aˈoraa, e no te aha?

¹² E paari mau â tei roto i te mau parau a Iesu! No reira “ua maere te nahoa i ta ˈna huru haapiiraa.” (Mataio 7:28) Ei pǐpǐ na ˈna, e faaohipa tatou i ta ˈna mau aˈoraa paari no te tauturu ia tatou i roto i to tatou oraraa. E tutava tatou i te faatupu i te mau huru maitatai ta ˈna i faahiti, mai te aroha hamani maitai, te hau, e te here. E ia na reira tatou e faaoaoa tatou ia Iehova. E faaitoito tatou i te haapae i roto i to tatou aau i te mau huru aau e hinaaro au ore, ta ˈna i faaara, mai te riri rahi e te mau hinaaro tia ore, ma te ite e tauturu te na reiraraa ia ape i te hoê haerea ino.—Iakobo 1:14, 15.

13, 14. Na te aha e faaite ra e ua faaohipa Iesu i te manaˈo tano i roto i te maitiraa i to ˈna huru oraraa?

¹³ Ua faaite Iesu i te paari eiaha noa i roto i te parau, i roto atoa râ i te ohipa. Na roto i to ˈna huru oraraa taatoa, ta ˈna mau faaotiraa, to ˈna manaˈo ia ˈna iho, e ta ˈna haaraa e vetahi ê, ua faaite oia eaha mau na te paari. E rave mai tatou i te tahi mau hiˈoraa o te faaite ra e te arataihia ra Iesu e “te paari mau e te aravihi ia feruri.”—Maseli 3:21.

¹⁴ E ô atoa mai te manaˈo tano i roto i te paari. Ua faaohipa Iesu i te manaˈo tano i roto i te maitiraa i to ˈna huru oraraa. E nehenehe anei oe e feruri i te oraraa ta ˈna i nehenehe hoi e fanaˈo, te fare ta ˈna i nehenehe e hamani, te imiraa ta ˈna i nehenehe e rave, aore ra te tiaraa teitei o teie nei ao ta ˈna i nehenehe e fanaˈo? Ua ite Iesu te tapiraa i taua huru oraraa, “mea faufaa ore . . . te reira, e aˈuaˈuraa mataˈi.” (Koheleta 4:4; 5:10) E haerea maamaa ïa, tei taa ê roa i te paari. Ua maiti Iesu i te hoê oraraa haihai. Aita oia i hinaaro e imi i te moni aore ra e haaputu i te mau taoˈa materia. (Mataio 8:20) Ia au i ta ˈna i haapii, ua tiatonu oia i te hoê noa fa, te raveraa i te hinaaro o te Atua. (Mataio 6:22) Ma te paari, ua horoa Iesu i to ˈna taime e to ˈna itoito no te mau faufaa a te Faatereraa arii tei hau aˈe i te faufaa e te hoona i te mau mea materia. (Mataio 6:19-21) Te vaiiho mai ra ïa oia i te hoê hiˈoraa e tano ia pee.

15. E nafea te mau pǐpǐ a Iesu e faaite ai e te tuu ra ratou i te mau faufaa a te Faatereraa arii na mua roa, e no te aha e haerea paari ai te reira?

¹⁵ I teie mahana, te ite nei te mau pǐpǐ a Iesu mea faufaa ia tuu na mua roa i te Faatereraa arii a te Atua i roto i to ratou oraraa. No reira ratou e ape ai i te faateimaha ia ratou i te tarahu e te mau fa a teie nei ao o te rave rahi roa i te taime e te puai. (Timoteo 1, 6:9, 10) Mea rahi tei rave i te mau taahiraa no te faaohie i to ratou huru oraraa, ia nehenehe  ratou e horoa ˈtu â i te taime no te taviniraa, ma te tavini atoa paha ei feia poro taime taatoa i te Faatereraa arii. Aita ˈtu e faaotiraa maitai e te paari, no te mea e oaoa e e mauruuru rahi ia tuu tatou na mua roa i te mau faufaa a te Faatereraa arii.—Mataio 6:33.

16, 17. (1) Mea nafea to Iesu faaiteraa e mea faahaihai e mea tano noa ta ˈna tiairaa ia ˈna iho? (2) E nafea tatou e nehenehe ai e faaite e mea faahaihai e mea tano noa ta tatou tiairaa ia tatou iho?

¹⁶ Ua parau te Bibilia mea faahaihai atoa te taata e paari to ˈna, oia hoi te iteraa i to ˈna mau taotiaraa. (Maseli 11:2) Mea faahaihai e mea tano noa ta Iesu tiairaa ia ˈna iho. Ua ite o ˈna e eita oia e taui i te feia atoa i faaroo i ta ˈna poroi. (Mataio 10:32-39) Ua taa atoa ia ˈna e o te tahi noa mau taata ta ˈna e nehenehe e poro. No reira oia i faaineine ai ma te paari i ta ˈna mau pǐpǐ ia faariro atoa i te taata ei pǐpǐ. (Mataio 28:18-20) Ua faˈi oia ma te aau faahaihai e ‘ohipa rahi aˈe ta ratou e rave’ i ta ˈna iho, no te mea e farerei ratou i te taata e rave rahi atu â i te hoê tuhaa fenua aano atu â e no te hoê tau maoro atu â. (Ioane 14:12) Ua farii atoa Iesu e e hinaaro atoa oia i te tauturu. Ua farii oia i te tauturu a te mau melahi tei haere atu e tauturu ia ˈna i te medebara e a te melahi tei haere atu e faaitoito ia ˈna i Getesemane. I te taime a hinaaro roa ˈi oia i te tauturu, ua ani atu te Tamaiti a te Atua.—Mataio 4:11; Luka 22:43; Hebera 5:7.

¹⁷ E mea tia atoa ia faahaihai e ia tano noa ta tatou tiairaa ia tatou iho. E hinaaro iho â tatou e haa ma te aau atoa e e faaitoito i roto i te ohipa pororaa e faariroraa i te taata ei pǐpǐ. (Luka 13:24; Kolosa 3:23) I te hoê â taime, e mea tia ia haamanaˈo tatou e aita Iehova e faaau ra ia tatou te tahi i te tahi, eiaha atoa ïa tatou. (Galatia 6:4) E tauturu te paari ia tatou ia haamau i te mau fa tano noa ia au i to tatou mau aravihi e huru tupuraa. Hau atu â, e aratai te paari i te feia e hopoia ta ratou ia farii e e taotiaraa to ratou e e hinaaro ratou i te tauturu e te faaitoitoraa i te tahi taime. E tauturu  te aau faahaihai ia ratou ia farii maite i te tauturu ma te ite e na Iehova e faaohipa ra i te hoê hoa Kerisetiano ia “tamahanahana rahi” ia ratou.—Kolosa 4:11.

18, 19. (1) Na te aha e faaite ra e mea au noa Iesu e te maitai i roto i ta ˈna haaraa e ta ˈna mau pǐpǐ? (2) No te aha e tano ai ia maitai e ia au noa tatou i roto i ta tatou mau haaraa e te tahi e te tahi, e e nafea ïa tatou?

¹⁸ Ia au i te Iakobo 3:17, “te paari no nia mai, e mea . . . au noa.” Mea au noa Iesu e te maitai i roto i ta ˈna haaraa e ta ˈna mau pǐpǐ. Ua ite maitai oia i ta ratou mau hapa, tera râ ua imi oia i te mea maitai i roto ia ratou. (Ioane 1:47) Ua ite oia e e faarue ratou ia ˈna i te po e haruhia ˈi oia, tera râ aita oia i feaa i to ratou taiva ore. (Mataio 26:31-35; Luka 22:28-30) E toru taime to Petero haavareraa e ua matau o ˈna ia Iesu. Teie râ, ua taparuparu Iesu no Petero e ua tiaturi i to ˈna haapao maitai. (Luka 22:31-34) I te po hopea o to ˈna oraraa i nia i te fenua, a pure ai oia i to ˈna Metua, aita Iesu i haamau i to ˈna feruriraa i nia i te mau hape ta ta ˈna mau pǐpǐ i rave. Ua faahiti maitai râ oia i to ratou haerea e tae roa i taua po ra, ma te parau e: “Te haapao ra ratou i ta oe parau.” (Ioane 17:6) Noa ˈtu to ratou huru tia ore, ua tuu atu oia i roto i to ratou rima i te ohipa pororaa e faariroraa i te taata ei pǐpǐ. (Mataio 28:19, 20) Papu maitai e no to ˈna tiaturi e to ˈna faaroo ia ratou, ua itoitohia ratou no te rave i te ohipa ta ˈna i faaue atu.

¹⁹ E tano ia pee te mau pǐpǐ a Iesu i to ˈna hiˈoraa i roto i taua tuhaa ra. Ua faaoromai te Tamaiti tia roa a te Atua i roto i ta ˈna haaraa e ta ˈna mau pǐpǐ tia ore, e titauhia ˈtu â ïa ia mǎrû, aore ra ia au noa, tatou te taata hara i roto i ta tatou mau haaraa e te tahi e te tahi! (Philipi 4:5) Eiaha na tatou e haapao i te mau hapa a to tatou mau hoa Kerisetiano, e imi râ tatou i te mea maitai i roto ia ratou. E haerea paari ia haamanaˈo tatou e na Iehova i faatae ia ratou ia ˈna ra. (Ioane 6:44) Mea papu e ua ite oia i te tahi faito maitai i roto ia ratou, ia na reira atoa ïa tatou. E tauturu  te hoê huru feruriraa maitai ia tatou eiaha noa e “tâuˈa i te hara,” e imi atoa râ i te mau tuhaa e nehenehe ai tatou e haapopou ia vetahi ê. (Maseli 19:11) Ia tiaturi tatou i to tatou mau taeae e tuahine Kerisetiano, e tauturu tatou ia ratou ia tutava i te tavini ia Iehova e ia ite i te oaoa i roto i taua taviniraa ra.—Tesalonia 1, 5:11.

20. Ia aha tatou e tia ˈi i te taoˈa rahi i roto i te aamu o te mau Evanelia, e no te aha?

²⁰ E taoˈa rahi mau â te aamu o te mau Evanelia o te oraraa o Iesu e ta ˈna taviniraa no nia i te paari! Ia aha ïa tatou e tia ˈi i teie ô faito ore? I te hopea o te Aˈoraa i nia i te mouˈa, ua faaitoito Iesu i te feia e faaroo ra ia ˈna eiaha noa ia faaroo i ta ˈna mau parau paari, oia atoa râ ia haapao, aore ra ia faaohipa i te reira. (Mataio 7:24-27) Na roto i te faaauraa i to tatou mau manaˈo, manaˈo turai, e ta tatou mau ohipa i nia i te mau parau e ohipa paari a Iesu, e nehenehe tatou e ite i te oraraa maitai roa ˈˈe i teie nei e e faaea noa i nia i te eˈa e tae atu ai i te ora mure ore. (Mataio 7:13, 14) Papu maitai e tera anaˈe te ohipa maitai roa ˈˈe ta tatou e nehenehe e rave, aita ˈtu!