Ua taue te hoê taata ia Annette i raro. Aita tera tamahine i taa eaha te tupu ra. Te parau ra o ˈna: “Ua tamata vau i te turai ia ˈna. Ua tamata vau i te tuô, aita râ te reo i matara mai. Ua turai au ia ˈna, ua tue, ua moto. I muri iho, patia mai nei o ˈna i te tipi. Aita ta ˈu e nehenehe faahou e hauti.”

Mai te peu e tei roto oe i tera huru tupuraa, eaha ta oe e rave?

Noa ˈtu e ua ineine oe, peneiaˈe ma te haapao maitai a hahaere ai na rapae i te po, e nehenehe te ohipa ino e tupu. Te parau ra te Bibilia: “Aore roa e taata i ite i ta ˈna e roohia mai.”—Koheleta 9:12.

Ua rave-ino-hia vetahi feia apî, mai ia Annette, na te feia ta ratou i ore i matau. E te tahi atu na te hoê taata matau aore ra te hoê mero utuafare. Ahuru noa matahiti to Natalie, a ravehia ˈi i nia ia ˈna te mau peu taotoraa tia ore e te hoê taurearea tei faaea i pihai iho i to ˈna fare. Te parau ra o ˈna: “Ua riaria e ua haama roa vau. Aita ïa vau i faaite oioi i tei tupu.”

E faahapa noa Annette ia ˈna. Te parau ra o ˈna: “E na nia iho noa vau i roto i to ˈu upoo i te ohipa i tupu i tera po. I nehenehe paha ta ˈu e turai puai atu â ia ˈna. Teie râ, i to ˈna patiaraa mai i te tipi, aita vau e nehenehe faahou e hautiuti no to ˈu riaria. Aita faahou! I to ˈu râ manaˈo, e nehenehe ta ˈu.”

E faahapa noa atoa Natalie ia ˈna. Te parau ra o ˈna: “Ahani vau aita i tiaturi noa ia ˈu iho. Ua parau noa mai to ˈu na metua ia mâua to ˈu tuahine ia faaea amui noa a hauti ai i rapae. Aita râ vau i faaroo. Ua rave te hoê taata tapiri i te hoê mea hairiiri i nia ia ˈu, na ˈu iho â ïa te hape. Ua mauiui atoa to ˈu utuafare i te ohipa i tupu, na ˈu atoa ïa te hape. O tera huru aau ta ˈu e aro noa ra.”

Mai te peu hoê â huru aau to oe i to raua, a haamanaˈo e aita te taata i maferahia i hinaaro i te reira. No te tahi mau taata e ere te reira i te mea ino, tera iho â ta te mau tamaroa e rave aore ra na tera mau tamahine iho â i imi. E ere roa ˈtu râ. Mai te peu e ua ravehia te peu taotoraa tia ore i nia ia oe, e ere na oe te hape!

Parau mau, mea ohie ia taio “e ere na oe te hape.” Mea fifi roa râ ia tiaturi i te reira. E tapea vetahi i to ratou mauiui no ratou, e faahapahapa ia ratou iho e e hepohepo. O vai râ te faufaahia ia mamû noa oe? O oe anei aore ra te taata tei hamani ino ia oe? Tei ia oe noa te feruriraa i te tahi atu ravea.

Te faatia maira te Bibilia i ta te taata haerea tia o Ioba i parau i roto i to ˈna hepohepo rahi: “E parau â vau ma te ati rahi.” (Ioba 10:1) E faufaahia oe ia na reira atoa oe. A paraparau i te hoê taata tiaturihia, e farii ïa oe i te ohipa ino i tupu e e tauturu atu te reira ia aro i te hepohepo.

Tera ta Annette i rave. Te na ô ra o ˈna: “Ua paraparau vau i te hoê hoa piri o tei faaitoito ia ˈu ia paraparau i na hoa faaipoipo Kerisetiano paari i roto i ta ˈu amuiraa. Oaoa roa vau i te na reiraraa. Ehia taime raua i te parahiraa ia ˈu ra e i te parauraa mai e e ere na ˈu te hape. E ere roa ˈtu na ˈu te hape.”

Ua paraparau Natalie i to ˈna na metua no nia i te ohipa ino ta ˈna i faaruru. Te na ô ra o ˈna: “Ua tauturu mai raua ia ˈu. E ua faaitoito mai ia paraparau no nia i tera ohipa. E ua tauturu mai te reira ia ore e hepohepo e e riri roa i roto ia ˈu.”

Ua ite atoa Natalie i te tamahanahanaraa i roto i te pure. Te parau ra o ˈna: “E paraparau vau i te Atua. Ua tauturu rahi mai te reira aita anaˈe e tae ia ˈu ia paraparau i te tahi atu taata. A pure ai, aita e mea ta ˈu e tapea na ˈu. E horoa mai te reira i te hau e te tamǎrûraa.”

E nehenehe atoa oe e ite e “e taime to te faaora.” (Koheleta 3:3) A haapao ia oe i te pae tino e i te pae aau. A haamâha i to oe rohirohi. E te mea faufaa roa ˈtu â, a tiaturi i te Atua no ˈna anaˈe te mahanahana, oia hoi o Iehova.—Korinetia 2, 1:3, 4.

Ei tamahine, ia turaihia oe ia pee i te haerea viivii, aita e ino ia parau atu oe ma te papu, “Faaea!” aore ra “Faanuu atu to oe rima!” Eiaha e mǎtaˈu ia taie ta oe here. Ia taie o ˈna i muri iho i tera tupuraa, aita e faufaa ia tapea ia ˈna! Mea au aˈe no oe te hoê taata o te faatura i to oe tino e i to oe mau tiaturiraa.

“I te fare haapiiraa tuarua, e huti noa te mau tamaroa i to ˈu pǎpǎ titi a faahiti atu ai i te mau parau faahaama. E parau mai ratou e e oaoa aˈe vau ia taoto vau ia ratou.”—Coretta.

I to oe manaˈo, ua aha teie mau tamaroa?

1. Ua hauti e o ˈna?

2. Ua faahinaaro ia ˈna?

3. Ua faahepo ia ˈna ia taoto ia ratou?

“I nia i te pereoo uta taata, ua haamata te hoê tamaroa i te parau mai i te mau mea faufau e ua haru ia ˈu. Ua turai taue au i to ˈna rima e ua tiahi ia ˈna. Ua hiˈo mai o ˈna ia ˈu mai te huru ra e mea maamaa vau.”—Candice.

I to oe manaˈo, ua aha teie tamaroa ia Candice?

1. Ua hauti e o ˈna?

2. Ua faahinaaro ia ˈna?

3. Ua faahepo ia Candice ia taoto ia ˈna?

“I te matahiti i mairi aˈenei, parau noa mai te hoê tamaroa e mea au na ˈna ia ˈu e ua hinaaro e haamatau ia ˈu noa ˈtu e ua parau noa vau ia ˈna aita. I te tahi taime, e haru o ˈna i to ˈu rima. Parau vau ia ˈna ia faaea, aita râ. I te hoê taime, a oomo ai au i to ˈu tiaa, ua tapea o ˈna i to ˈu ohure.”—Bethany.

I to oe manaˈo, ua aha teie tamaroa:

1. Ua hauti e o ˈna?

2. Ua faahinaaro ia ˈna?

3. Ua faahepo ia Bethany ia taoto ia ˈna?

O te numera 3 te pahonoraa tano i na uiraa e toru.

Na te aha e faataa ê ra i te faaheporaa e taoto i te hautiraa aore ra te faahinaaroraa?

No ǒ mai te faaheporaa e taoto i te hoê noa pae. E tamau noa te reira noa ˈtu e e parau atu te taata faahepohia i te tahi atu ia faaea.

E fifi ino mau te reira o te nehenehe e aratai i te maferaraa.