Eita Iehova e faaoromai noa i teie ao ino. Fatata te mau haapaoraa hape atoa i te haamouhia. E aro te mau faatereraa o teie ao i te mau tavini a te Atua e e haamou roa Iehova i te feia ino i Aramagedo. Te tiai ru nei tatou i teie mau tupuraa faufaa mau.

Papu maitai, aita tatou i ite pauroa i te mau haamaramaramaraa no nia i te ati rahi. Ei hiˈoraa, aita tatou i ite papu afea te reira e haamata ˈi. Aita atoa tatou i ite eaha te mau ravea ta te mau faatereraa e faaohipa no te aro i te mau haapaoraa. Aita tatou i ite ehia maororaa e aro ai Goga no Magoga i te nunaa o te Atua e eaha mau na te tupu. Aita atoa tatou i ite maitai e nafea Iehova e haamou ai i te feia ino i Aramagedo.

Tera râ, te horoa ra te Bibilia i te tahi mau haamaramaramaraa no te tauturu ia tatou ia faaruru i te mau tupuraa no a muri aˈe ma te tiaturi e te itoito. Ei hiˈoraa, ua ite tatou e te ora nei tatou “i te mau mahana hopea.” (Ti2 3:1) Ua ite tatou e e “haapotohia” te aroraa i nia i te mau haapaoraa, ia ore te haamoriraa mau e haamouhia. (Mt 24:22) Hau atu, ua papu ia tatou e e faaora iho â Iehova i ta ˈna mau tavini. (Pe2 2:9) Ua ite atoa tatou e ua maiti Iehova ia Iesu no te haamou i te feia ino e no te faaora i te nahoa rahi i Aramagedo. Mea tia e mea puai mau hoi o ˈna.​—Apo 19:11, 15, 16.

Papu maitai, e “riaria roa te taata” i mua i tera mau tupuraa. Area tatou, maoti te feruriruriraa i nia i ta Iehova i rave no te faaora i ta ˈna mau tavini i tahito ra e i nia i ta ˈna i faaite no a muri aˈe, e nehenehe tatou e tia e e “faateitei i to [tatou] upoo, no te mea ua fatata to [tatou] faaoraraa.”​—Lu 21:26, 28.