NO NA HOA FAAIPOIPO
1: Haafaufaa i te faaipoiporaa
EAHA TE AURAA?
No te mau tane e vahine faaipoipo e haafaufaa ra i to raua faaipoiporaa, e taatiraa vai tamau te reira, e nehenehe ïa raua e tiaturi te tahi i te tahi. Ua papu i na hoa faaipoipo tataitahi e faatura raua i to raua faaipoiporaa, noa ˈtu te fifi.
Te vai ra te tahi mau hoa faaipoipo, no te taata aore ra no to raua utuafare e faaea noa ˈi raua. Te mea hau aˈe râ, o te haafaufaaraa ïa i to raua faaipoiporaa a here e a faatura ˈi te tahi i te tahi.
ARATAIRAA BIBILIA: “Eiaha roa te hoê tane faaipoipo e faarue i ta ˈna iho vahine.”—Korinetia 1, 7:11.
“Ia haafaufaa oe i to orua faaipoiporaa, eita oe e inoino oioi. E faaore oioi oe i ta te tahi hapa e e parau roa ˈtu oe ua hape oe. Ia hiˈo oe i te fifi mai te mau haafifiraa, eiaha râ mai te hoê ravea no te faataa.”—Micah.
NO TE AHA MEA FAUFAA?
Ia tupu te fifi, e parau na hoa faaipoipo tei ore e haafaufaa i te faaipoiporaa, e ‘Eita mâua e tano’ a imi atu ai i te ravea no te faataa.
“Te parau nei e rave rahi feia o tei faaipoipo e te vai ra ta ratou te tahi atu ravea: te faataaraa. Ia manaˈo aˈena te feia faaipoipo i te faataaraa, te faaite ra te reira, e i te omuaraa, aita raua i haafaufaa i to raua faaipoiporaa.”—Jean.
EAHA TE NEHENEHE E RAVE?
A TAMATA
Ia tatamaˈi orua . . .
-
Ua ô mai tera manaˈo e ua hape roa oe i te faaipoiporaa i to oe apiti?
-
Ua moemoeâ anei oe e ua taui oe i te apiti?
-
E parau anei oe “E faarue vau ia oe” aore ra “E haere au e imi i te tahi taata mea haafaufaa aˈe na ˈna ia ˈu”?
Ia pahono oe ‘E’ hoê aore ra hau atu i teie na uiraa, teie ïa te taime no te haafaufaa ˈtu â i to orua faaipoiporaa.
A APARAU I TO OUTOU HOA FAAIPOIPO
-
Ua iti mai anei te haafaufaaraa i to mâua faaipoiporaa mai na mua ˈtu? Mai te peu e e, no te aha?
-
Eaha te ravea e nehenehe e rave i teie nei â no te haafaufaa ˈtu â i to mâua faaipoiporaa?
MANAˈO TAUTURU
-
I te tahi mau taime, a faaite i to oe hoa faaipoipo e ua here oe ia ˈna ma te papai atu
-
A faaite e te haafaufaa ra oe i to orua faaipoiporaa ma te tuu i te hohoˈa o to oe hoa faaipoipo i ta oe vahi raveraa ohipa
-
A niuniu i to oe hoa faaipoipo i te mau mahana atoa tei te ohipa anaˈe oe aore ra aita anaˈe o ˈna i pihai iho ia oe
ARATAIRAA BIBILIA: “Ta te Atua i taati, eiaha te taata e faataa ê.”—Mataio 19:6.
