“FATATA e 40 matahiti to ’u, e noa ’tu e ua tupu teie mau ohipa hau atu i te 30 matahiti i teie nei, te tamau noa ra te reira i te haamehameha ia ’u. Mea iria roa vau, e faahapa noa vau ia ’u iho e te peapea nei au i roto i to ’u utuafare. Noa ’tu to ratou mana‘o maitai, eita ta te mau taata e nehenehe e taa i te hohonuraa o to ’u mana‘o.” Eaha ïa te mea e haamauiui ra ia Hélène * mai teie te huru? Ua hamani-ino-hia oia i te pae taatiraa i to ’na nainairaa, e te faaoromai noa râ oia i te mau faahopearaa.

E ere o Hélène ana‘e i roto i teie huru tupuraa. Te faaite maira te mau maimiraa e te vai ra te hoê numera riaria mau o te mau vahine, e te mau tane atoa, o tei roohia i taua mau hamani-ino-raa ra. * E ere hoi teie i te haerea hape varavara, inaha, ua riro te hamani-ino-raa i te tamarii i te pae taatiraa ei ati e tupu ra na te mau vahi atoa, noa ’tu eaha te tiaraa totiare, te huru i te pae faanavairaa faufaa, te haapaoraa aore ra te nunaa taata.

Auaa râ hoi, eita te mana‘o e rave ino i te hoê tamarii mai teie te huru e puta noa ’‘e i roto i te feruriraa o te rahiraa o te mau tane e te mau vahine. Teie râ, te rave nei te hoê pǔpǔ iti taata atâta roa i teie peu hairiiri mau. E taa ê atu i tei mana‘o-noa-hia, mea varavara roa e na te feia taparahi taata maamaa e mata hinaaro faufau to ratou o te hahaere noa na te mau vahi hautiraa, e rave i te reira. Ia hi‘ohia ratou, aita ïa e taa-ê-raa e te tahi atu mau taata. Te haamâha nei ratou i to ratou hinaaro faufau na roto i te maitiraa i te mau tamarii hapa ore e te paruru-ore-hia—mea pinepine ta ratou iho mau tamahine. * I mua i te taata, mea maitai roa ratou e mea mǎrû roa, tera râ, ia toe noa mai o raua ana‘e ra, e faaohipa ïa ratou i te haamǎta‘uraa, te ino e te mau peu hamani ino hairiiri i te pae taatiraa.

Mea fifi roa ia mana‘o e e nehenehe teie mau ohipa hairiiri e ravehia i roto e rave rahi mau utuafare, e ia hi‘o-ana‘e-hia mea tura maitai. Teie râ, i te tau bibilia atoa, e faaohipahia na te mau tamarii no “te haamâha no te hoê tau i . . . te hinaaro u‘ana o te navenave o te tino.” (The International Critical Commentary, beretane; hi‘o Ioela 3:3.) Hau atu, ua faaite atea te Bibilia e: “E tupu te ati rahi i taua anotau hopea nei, ia ite mai oe. E riro te taata nei ei miimii, . . . e aroha ore, . . . e haapao ore, e iria, e te au ore i te taata maitatai ra.” No reira, eiaha ïa tatou e maere i mua i teie parareraa o te mau hamani-ino-raa i te pae taatiraa i nia i te mau tamarii i teie mahana.—Timoteo 2, 3:1, 3, 13.

Aita paha te mau pepe e itehia i nia i te tino o te hoê tamarii tei roohia i te mau hamani-ino-raa, e aita atoa paha te hoê taata paari tei hamani-ino-hia i to ’na nainairaa e faaite i te mau tapao o te hepohepo. Teie râ, te na ô ra te hoê maseli tahito e “ata noâ te taata, te oto ra te aau.” (Maseli 14:13) Inaha, e rave rahi mau taata i hamani-ino-hia o te faaoromai nei i te mau pepe ino roa i te pae no te here, te hoê pepe huna o te haamauiui ra i te hohonuraa o to ratou mana‘o. No te aha te mau hamani-ino-raa i te pae taatiraa e faatupu ai i teie mau huru faainoraa? No te aha eita te taime noa e navai no te rapaau i te pepe? Eita e nehenehe e tapo i te mata i mua i te hoê ohipa mai teie te ino, tei riro ei tumu no te mau mauiui e rave rahi. Oia mau, e ere paha i te mea ohie ia taio i te mau parau i muri nei, mai te peu iho â râ e ua roohia outou i te mau hamani-ino-raa i te pae taatiraa i to outou tamarii-rii-raa ra, teie râ, ia papu maitai ia outou e te vai ra te tiaturiraa, e e nehenehe outou e ora mai.