Te paraparau ra oe e te tahi hoa a tae mai ai te tahi poroi vini. Eaha ta oe e tia ia rave?

1. E taio i ta oe poroi a paraparau noa ’i i to hoa.

2. E parau i to hoa “e e, tiai na” a taio atu ai i te poroi.

3. Eiaha e haapao i te poroi e e paraparau noa e to hoa.

Mea faufaa anei ta oe e faaoti i te rave? E!

A hapono aore ra a taio ai i te poroi a paraparau noa ’i ia vetahi ê, e au ra e te hauti ra oe i te tuaro ta oe e au roa ’‘e ma te ore râ e haapao i te mau faatureraa o te reira. E na ô paha oe, ‘e hoa hoi ratou no ’u.’ E mea tano roa ’tu â ia faaite i te peu maitai, e ere anei? Te auraa anei ia tia noa to haerea? E ere, mea papu râ to muri nei faaiteraa: Ia ore oe e faatura i to mau hoa, eita ratou e riro faahou ei hoa no oe i muri a‘e.

No te aha hoi? No te mea aita te taata e au ia ore ratou e faaturahia. Te na ô ra te tahi vahine apî o Beth * te i‘oa, “Mea au ore roa na ’u ia paraparau i te hoa e hi‘o noa i ta ’na vini mai te huru ra e mea maitai a‘e te faaitehia ’tu!” I to oe mana‘o, e faaoromai maoro anei Beth i te hoa mai tera?

A feruri na i ta oe i matau i te rave a haponohia ’tu ai te tahi poroi. A hi‘o faahou na i tei papaihia i raro a‘e i te upoo parau iti “Te fifi.” No oe, teihea te pahonoraa maitai a‘e? Ua taa paha oe aore te peu maitai e itehia ra i roto i te pahonoraa A. Eaha râ te parau no te mana‘o B e C? No oe, e mea ino anei ia faaea i te paraparau no te hi‘o i te tahi poroi aore ra i te ore e haapao i te reira no te paraparau noa e te hoa?

Mai ta oe e ite ra, e ere i te mea ohie ia taa e nafea ia faaite i te peu maitai. E tauturu atu râ te Bibilia. Te na ô ra: “O ta outou e hinaaro ia vetahi ê ra, e na reira atoa ’tu outou ia ratou.” (Luka 6:31) E nehenehe e haapao i tera a‘oraa no te ite i te rave ia haponohia ’tu te tahi poroi. E nafea?

A hapono i te taime tano. Te na ô ra Richard te tahi taurearea, “i te tahi taime, noa ’tu e e ere i te mea faufaa roa, e haponohia mai te poroi i te maororaa po. E faaara roa mai te reira ia ’u!” A uiui, ‘e hapono anei au i te poroi i te taime e faafaaea ’i te taata?”—Aratairaa Bibilia: Koheleta 3:1.

A faaite i te peu maitai. Mea faufaa te mau parau, te toparaa reo, te hoho‘a mata e te tino no te faaite i te tahi mana‘o. A papai ai râ i te poroi, eita te reira e itehia. E nafea ïa? Te na ô ra te tahi vahine apî o Jasmine te i‘oa, “a faaite i te peu maitai. A ani, ‘Eaha to oe huru?’ e a faaohipa i te mau parau mai ‘e e’ e ‘mauruuru.’”—Aratairaa Bibilia: Kolosa 4:6.

A feruri na mua. A hi‘o faahou na i tei papaihia i raro a‘e i te upoo parau iti “Te fifi.” Mai te peu e e haponohia ’tu te tahi poroi faufaa, e titauhia paha ia ani i to hoa ia tiai rii ia taio oe i te reira. E pinepine râ, e nehenehe e na reira i te tahi atu taime. Te na ô ra Amy e 17 matahiti, “eita ta oe vini e horo, area râ te mau hoa, ia oti oe i te taio i te poroi aita e taata faahou.” E nehenehe atoa e haapao i te reira a amui ai e vetahi ê. Te na ô ra Jane e 18 matahiti, “ma te hapono noa i te poroi, te parau ra oe ‘E ere outou i te mea faufaa no ’u, tei te vahi ê au.’”

A feruri hou a hapono ai i te poroi. Eita anei te taata e huru ê i ta oe poroi? E taa maitai a‘e anei te taata i to mana‘o ia tuu atu oe i te mau tapao faaite e vai ra i nia i ta oe matini? Te na ô ra Amber e 21 matahiti, “mai te peu e te hauti ra oe, a tuu atu i te tahi tapao faaite mai te hoho‘a rii faaata. Ia ore, e nehenehe te tahi e huru ê e e riri no te mea no ’na, te mana‘o mau ra oe i tei papaihia.”—Aratairaa Bibilia: Maseli 12:18.

Mea faufaa mau ïa te peu maitai no te hapono i te poroi, e ere anei?

A feruri: No te here oe e faaite ai i te peu maitai. E nafea te taata e ite ai i to here? Te na ô ra te Bibilia: “E faaoromairaa roa to te aroha, e te hamani maitai; e ore te aroha e feii: e ore te aroha e faarahi, e ore hoi e faaahaaha. Eita e rave i te mea au ore, eita e imi i te maitai no ’na iho, eita e riri vave.” (Korinetia 1, 13:4, 5) Eaha te titauhia ia oe ia taui no te faaite i te here?