TA TE TAATA E PARAU RA

No vetahi, e ere te reira i te mea faufaa roa. Area no te tahi atu, ia hoê â to tatou huru i nia i te animara e te taata.

• No te tahi taata turu i te parururaa animara, e ere i te mea tano ia faaohipa ia ratou ei imiraa moni anaˈe. Te na ô ra o ˈna: “E tia i te taata ia faaea i te manaˈo tei ia ratou te parau no ta ratou animara.”

• Ua tutuu te taata taoˈa rahi Leona Helmsley i ta ˈna urî 12 mirioni tara Marite (fatata 1 130 000 000 F CFP). Ua ani oia ia hunahia ta ˈna urî i pihai iho i to ˈna tino. No vetahi, ua rahi roa ïa ta ˈna!

E oe? Eaha ta oe e pahono i te uiraa i nia roa?

TA TE BIBILIA E PARAU RA

Ua parau te Atua poiete ra o Iehova i te taata ‘ia mana i nia iho i te iˈa o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.’ (Genese 1:28) Mea hau aˈe ïa te taata i te animara no te Atua.

Ua haapapuhia tera manaˈo i roto i te irava na mua ˈtu. Te parauhia ra: “Hamani ihora hoi te Atua i te taata ma to ˈna ihora huru, i hamani oia ia ˈna ma te hohoˈa o te Atua ra; i hamani oia ia raua, o te tane e te vahine.”—Genese 1:27.

I te mea ua hamani te Atua i te taata ma to ˈna huru, e nehenehe tatou e faaite i te mau huru maitatai mai te paari, te parau-tia e te here. Ua poiete-atoa-hia te taata e te hinaaro ia ite te mea maitai e te mea ino e ia faatupu i te taairaa e te Atua. Mea haihai te animara i te taata, aita hoi ratou i hamanihia “ma te hohoˈa o te Atua.” Ia taa ê ïa to tatou huru i nia i te animara e tia ˈi.

E ere râ te auraa e nehenehe ta te taata e rave ino i te animara.

• I roto i te ture ta ˈna i horoa i to Iseraela, ua vai ara te Atua ia faafaaea te mau animara, ia amu i te maa, ia tauturuhia ratou e ia ore ia hamani-ino-hia.—Exodo 23:4, 5; Deuteronomi 22:10; 25:4.

‘E rave oe i ta oe ohipa i na mahana e ono ra, area te mahana hitu ra, e faaea noa oe i te reira; ia faaea atoa to animara, e ta oe asini.’—Exodo 23:12.

TA TE TAATA E PARAU RA

No vetahi taata aˈuaˈu animara aore ra feia taiˈa, e faaanaanataeraa noa te reira. No te tahi atu râ, te tu ra to ratou manaˈo i to te taata papai buka no Rusia Leo Tolstoy. No ˈna, mea ino ia haapohe e ia amu i te animara.

TA TE BIBILIA E PARAU RA

E faatia te Atua ia haapohehia i te animara no te paruru i te taata aore ra no te hamani i te ahu. (Exodo 21:28; Mareko 1:6) Ia au i te Genese 9:3, e nehenehe atoa e rave ei maa. Ua amu atoa Iesu e ta ˈna mau pǐpǐ i te iˈa i noaa mai ia ratou.—Ioane 21:4-13.

Tera râ, te faaite atoa nei te Bibilia i to Atua manaˈo i te feia rave ino. Te parauhia ra: “Te rave parau ino ra, ua riri roa tana aau ia ˈna.” (Salamo 11:5) Eita ïa te Atua e hinaaro ia rave-ino-hia e ia haapohehia te animara no te faaanaanatae noa.

Te faaite ra te Bibilia mea faufaa mau te ora o te animara no te Atua.

• A poiete ai te Atua i te mau mea atoa, te na ô ra te Bibilia: ‘Hamani ihora hoi te Atua i te mau manu avae maha o te fenua ma to ratou huru, e te mau animara ma to ratou huru, e te mau mea o te repo e nee nei ma to ratou huru; hiˈo aˈera te Atua i te reira e e mea maitai.’—Genese 1:25.

• Te parau faahou ra te Bibilia te horoa ra Iehova i te maa i te animara. (Salamo 147:9) Ua faanaho maitai te Atua i to tatou fenua ia fanaˈo te animara i te vahi nohoraa e te maa e tano no ratou.

• Ua parau te arii no Iseraela Davida i roto i ta ˈna pure, ‘te ora nei te taata e te animara atoa ia oe, e Iehova!’ (Salamo 36:6) Ei hiˈoraa, hou Iehova a haamou ai i te feia ino i te Diluvi, ua faaora mai oia e vau taata e te mau huru animara atoa.—Genese 6:19.

Te ite-maitai-hia ra mea au na Iehova te animara e te titau ra oia eiaha ia hamani ino atu.

‘E haapao â te taata parau-tia ra i ta ˈna ra animara ia ora.’—Maseli 12:10.