TUMU PARAU MATAMUA | TE AˈO A TE METUA I TEIE MAHANA
E nafea ia aˈo maitai?
E HOPOIA rahi te riroraa ei metua. Ia ore râ te tamarii ia aˈohia, e ino roa ˈtu â te tupuraa. Eaha te nehenehe e tupu? (1) E tamau oia i te faaroo ore e e rohirohi na metua. (2) Eita na metua e horoa i te aratairaa papu e eita te tamarii e taa faahou e nafea.
Ia aˈohia râ te tamarii ma te here e ma te tano, e tauturuhia o ˈna ia faaite i te manaˈo e te huru maitai. Eita atoa oia e taiâ a paari noa ˈi. Ihea râ e ite ai i te aratairaa papu no te aˈo i ta oe tamarii?
Te faufaaraa o te mau aratairaa Bibilia
Te tiaturi nei te mau Ite no Iehova, te feia i pia i teie vea, ua riro ta te Bibilia e parau ra “e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia.” (Timoteo 2, 3:16) E ere noa râ no te mau metua te Parau a te Atua. I roto atoa hoi e itehia ˈi te mau aratairaa papu no te utuafare taatoa. A hiˈo na te tahi mau hiˈoraa.
TA TE BIBILIA E PARAU RA: “Ua mau roa te maamaa i roto i te aau o te tamarii.”—Maseli 22:15.
Noa ˈtu mea maitai roa te tamarii, e nehenehe ratou e rave i te ohipa maamaa. E titauhia ïa ia aˈo atu. (Maseli 13:24) Ma te farii i tera manaˈo, mea ohie aˈe ia amo i ta oe hopoia ei metua.
TA TE BIBILIA E PARAU RA: “Eiaha e haamairi i te aˈo i te tamaiti.”—Maseli 23:13.
Eiaha ia manaˈo e nehenehe to tamarii e mauiui aore ra e inoino ia oe i muri aˈe ia aˈohia oia ma te tano. Ia ravehia te reira na roto i te here, e tauturuhia te tamarii ia farii ma te haehaa i te aˈo. E faufaa-atoa-hia o ˈna i tera huru ia riro oia ei taata paari.—Hebera 12:11.
TA TE BIBILIA E PARAU RA: “Ta te taata e ueue ra, o ta ˈna â ïa e ooti mai.”—Galatia 6:7.
E tia iho â ia hinaaro te metua ia paruru i ta ratou tamarii. E titauhia râ ia faaite i te manaˈo tano. Aita oe e tauturu atu ra mai te peu na oe noa anaˈe e amo i te mau faahopearaa o ta ˈna mau hape. Na reira atoa, ia turu noa oe ia ˈna ia faahapa te orometua aore ra te tahi atu taata i to ˈna haerea ino. A farii e nehenehe ratou e tauturu atu. Ma te na reira, te haapii ra oe i to tamarii ia faatura ia vetahi ê, oia atoa ia oe.—Kolosa 3:20.
TA TE BIBILIA E PARAU RA: “O te tamaiti râ i faatia noa hia tona ra mau hinaaro, e faatupu ïa i te haama no tona ra metua vahine.”—Maseli 29:15, Te Bibilia Moˈa V.C.J.S., 1976.
A aˈo ma te here, ma te papu e ma te tano
Eiaha te metua ia aˈo ma te etaeta. E titau-atoa-hia râ eiaha ia faatiatia noa. Ua papaihia i roto i te buka The Price of Privilege, “ia faatiatia-noa-hia te hinaaro o te tamarii, eita ratou e haapao na te taata paari i roto i te fare e faatere.” Mai te peu eita oe e faaite o oe te metua, e manaˈo te tamarii na ˈna e faatere. E riro o ˈna i te rave i te faaotiraa ino e ati ai o ˈna e oe atoa.—Maseli 17:25.
TA TE BIBILIA E PARAU RA: ‘E ati te taata i tana vahine; e riro hoi raua ei hoê.’—Mataio 19:5.
Ia au i te Bibilia, ua faaipoipo te tane e te vahine hou a tamariihia ˈi. E hoê noa raua a paari ai te tamarii e a faarue ai ratou i te fare. (Mataio 19:5, 6) E tane aore ra e vahine faaipoipo ïa oe na mua e muri aˈe, e metua atoa. Ma te haafaufaa na mua i to tamarii, te turai ra oe ia ˈna ia ore ia haapao i teie aˈoraa, “eiaha ia hau te manaˈo ia ˈna iho.” (Roma 12:3) E fifi atoa te taairaa o na hoa faaipoipo ia haafaufaa-aˈe-hia te tamarii.
Tauturu no te metua
No te amo i ta oe hopoia ei metua, a haapao i to muri nei mau aratairaa. A aˈo:
Ma te here. “Eiaha e faariri atu i ta outou tamarii, o te taiâ hoi ratou.”—Kolosa 3:21.
Ma te papu. “Ia riro râ ta outou oia ei oia, e ta outou aita ei aita.”—Mataio 5:37.
Ma te tano. “E aˈo [“tano,” Traduction du monde nouveau] noa ˈtura vau ia oe.”—Ieremia 30:11. a
a No te ite atu â, a hiˈo i nia jw.org. A pata i nia LA BIBLE ET VOUS > COUPLES & PARENTS. E ite oe i te mau tumu parau mai teie, “L’éducation des enfants,” “Comment gérer les caprices,” “Inculquez des valeurs morales à vos enfants” e “Comment discipliner votre adolescent.”
