1, 2. (a) I roto i teihea tuhaa e au ai teie ao ino i te hoê taata ohipa ino o te fatata roa i te haapohehia? (A hiˈo i te hohoˈa matamua.) (b) Eaha te huru o te taatoaraa i te raˈi e te fenua ia haamouhia teie faanahoraa ino?

 A FERURI na i teie tupuraa. Ua faautua-pohe-hia te hoê taata ohipa ino atâta mau. I teie nei, te arataihia ra oia e te feia tiai o te fare tapearaa ia haapohehia o ˈna. Noa ˈtu te ora noa ra teie taata ohipa ino e mea pautuutu maitai o ˈna, fatata roa oia i te pohe.

² E au teie ao ino i tera taata ohipa ino o te fatata roa i te haapohehia. Te parau ra te Bibilia: “Fatata . . . teie nei ao i te mou.” (Ioa. 1, 2:17) Ua faaoti Iehova e fatata roa teie faanahoraa i te mou, mea papu ïa e e tupu iho â te reira. Te vai ra râ te hoê taa-ê-raa i rotopu i te hopea o teie faanahoraa e te haapoheraa o tera taata ohipa ino. E manaˈo paha te tahi mau taata e aita i tano te haavaraa o teie taata ohipa ino, e e patoi paha ratou i te reira a tiaturi atu ai e eita oia e haapohehia. Tera râ, e haava tia roa Iehova, e ta ˈna  faaotiraa e haamou i teie nei ao, mea tia atoa ïa. (Deut. 32:4) Eita ta ˈna haamouraa e taere. I muri aˈe teie faanahoraa e haamou-roa-hia ˈi, e parau te taatoaraa i te raˈi e te fenua e mea tano ta Iehova haavaraa. Auê ïa oaoa rahi!

3. Eaha na fifi e maha o te faaorehia ia tae mai te Faatereraa arii a te Atua?

³ Eaha te tahi mau mea e vai ra i roto i “teie nei ao” o te fatata roa i te “mou”? O te mau ohipa ino ïa o tei matauhia i teie mahana. Fatata roa tera mau ohipa i te faaorehia. E tuhaa teie o “te parau apî oaoa o te Faatereraa arii.” (Mat. 24:14) I roto i teie tumu parau, e hiˈopoa mai tatou e maha fifi o te faaorehia ia tae mai te Faatereraa arii a te Atua: te feia ino, te mau faanahonahoraa piˈo, te mau ohipa tano ore e te mau tupuraa ino. I roto i na tuhaa tataitahi, e haapii mai tatou (1) E nafea te reira e ohipa ˈi i nia ia tatou, (2) eaha ta Iehova e rave, e (3) e nafea Iehova e mono ai i te reira.

4. E nafea te feia ino e ohipa ˈi i nia ia tatou?

⁴ E nafea te feia ino e ohipa ˈi i nia ia tatou? Ua parau te aposetolo Paulo e e itehia te “tau ino mau . . . e te fifi ia faaruru” i te mau mahana hopea. E ua parau faahou oia: “E ino roa ˈtu â te feia ino e te feia haavare.” (Tim. 2, 3:1-5, 13) Ua farerei aˈena anei oe i te reira? E rave rahi o tatou tei faaruru i te ohipa a te feia ino mai te feia haavî uˈana, te feia au ore i te tahi atu nunaa o te faaite ra i te riri uˈana e te feia ohipa ino atâta mau. Eita vetahi o ratou e imi i te huna i te ohipa ino ta ratou e rave. E faahua tauturu vetahi ê i te taata, e feia ino râ ratou. Noa ˈtu e aita tatou i faaruru aˈenei i te ohipa ino, te ite noa ra tatou i ta te feia ino e rave ra. E peapea roa tatou ia faaroo eaha ta ratou i rave i te mau tamarii, te feia ruhiruhia e vetahi aita ta ratou e nehenehe e paruru ia ratou iho. E au te raveraa a teie feia ino i ta te mau animara oviri aore ra i ta te mau demoni. (Iak. 3:15) Auaˈe te horoa mai ra ta Iehova Parau i te tiaturiraa.

5. (a) Eaha ta te feia ino e nehenehe â e rave? (b) Eaha te tupu no te feia e patoi i te taui?

⁵ Eaha ta Iehova e rave? Te horoa ra Iehova i te taime i te feia ino no te taui. (Isa. 55:7) Noa ˈtu ua fatata teie faanahoraa i te haamouhia, aita â ratou i haavahia ˈtura. Eaha râ te tupu no te feia o te patoi i te taui e o te turu i teie faanahoraa e tae roa ˈtu i te tau o te ati rahi? Ua fafau Iehova i te haamou i te feia ino atoa i te fenua nei. (A taio i te Salamo 37:10.) I teie mahana, e rave rahi o tei haapii i te huna i te mau ohipa ino ta ratou i rave, e pinepine, eita ratou e faautuahia. (Ioba 21:7, 9) Te haamanaˈo mai ra râ te Bibilia: “Te hiˈo maira oia [te Atua] i to te taata nei haerea, e te hiˈopoa maira i to ˈna ra mau taahiraa. Aita e pouri, aita e mǎrû pohe, ei tapuniraa no te feia . . . ino.” (Ioba 34:21, 22) Eita roa ˈtu ïa tatou e nehenehe e tapuni, ia ore Iehova e ite mai. E nehenehe oia e ite i te mau mea atoa ta te feia ino e rave ra. I muri aˈe Aramagedo, e hiˈo paha tatou i to ratou vahi na mua ˈˈe, eita râ tatou e ite ia ratou. E faaore-roa-hia ratou!—Sal. 37:12-15.

6. O vai te toe mai ia faaorehia te feia ino, e no te aha e parau apî maitai teie?

⁶ O vai te toe mai ia faaorehia te feia  ino? Ua fafau Iehova: “Te feia mǎrû ra, e parahi ïa i te fenua, e oaoa ratou i te rahi o te hau ra.” I roto noa â i teie salamo, te taio ra tatou: “E parahi te feia parau-tia i nia i te fenua, e parahi tamau â ratou i reira.” (Sal. 37:11, 29) O vai te “feia mǎrû” e te “feia parau-tia”? Te feia mǎrû, o te feia haehaa ïa o te haapii no nia ia Iehova e o te auraro ia ˈna. Te feia parau-tia, o te feia ïa o te au i te rave i ta te Atua e parau e mea tano. I roto i teie nei ao, ua rahi atu â te feia ino i te feia parau-tia. I roto râ i te ao apî, o te feia mǎrû e te feia parau-tia noa te itehia e e faariro ratou i te fenua ei paradaiso.

7. E nafea te mau faanahonahoraa piˈo e ohipa ˈi i nia ia tatou?

⁷ E nafea te mau faanahonahoraa piˈo e ohipa ˈi i nia ia tatou? Te tumu o te rahiraa o te ino na te ao nei, e ere te taata, o te mau faanahonahoraa râ. Ua haavare te mau haapaoraa i e mirioni taata. Ei hiˈoraa, ua haavare ratou no nia o vai mau te Atua, ua parau e eita e nehenehe e tiaturi i te Bibilia e ua haavare i te taata no nia i te a muri aˈe o te fenua e te huitaata. Te faaitoito ra te mau hau faatere piˈo i te tamaˈi e te haavîraa uˈana i rotopu i te mau nunaa ěê e te hamani-ino-raa i te feia veve e o te ore e nehenehe e paruru ia ratou iho. E moni-roa-hia e e puai-roa-hia tera mau hau faatere ma te faaiteraa i te pae tahi aore ra ma te fariiraa i te petaraa. Te mau taiete o te haapao noa i to ratou pute, te faaino ra ïa ratou i te heipuni e te mau faufaa o te natura, e te imi ra ratou i te maitai i nia i te tua o te taata ia nehenehe vetahi ia monihia. Mea papu, o te mau faanahonahoraa piˈo te tumu o te rahiraa o te mauiui e itehia ra na te ao atoa nei.

8. Eaha ta te Bibilia e parau ra no te mau faanahonahoraa e au ra e mea puai ratou?

⁸ Eaha ta Iehova e rave? E haamata te ati rahi ia aro te mau mana poritita i te mau haapaoraa hape atoa o ta te Bibilia e faataa ra mai te hoê vahine faaturi piihia Babulonia rahi. (Apo. 17:1, 2, 16; 18:1-4) E haamou-roa-hia tera mau haapaoraa. Eaha râ te tupu no te tahi atu mau faanahonahoraa piˈo? Te faaau ra te Bibilia ia ratou i te mau mouˈa e te mau motu no te mea e au ra e mea puai e mea aueue ore ratou. (A taio i te Apokalupo 6:14.) Te parau atoa ra râ te Bibilia e e haamouhia te mau hau faatere e te taatoaraa o te tahi atu mau faanahonahoraa o te ore e turu i te Faatereraa arii a te Atua. Tera te tuhaa hopea o te ati rahi. (Ier. 25:31-33) I muri aˈe i te reira, eita te mau faanahonahoraa piˈo e ite-faahou-hia!

9. No te aha i papu ai ia tatou e e faanaho-maitai-hia te fenua apî?

⁹ Na te aha e mono i te mau faanahonahoraa piˈo? I muri aˈe Aramagedo, e itehia anei te tahi faanahonahoraa i te fenua nei? Te parau ra te Bibilia: “Te tiai nei . . . tatou i te mau raˈi apî e te hoê fenua apî ia au i ta ˈna i fafau, e i reira e vai noa ˈi te parau-tia.” (Pet. 2, 3:13) Te raˈi e te fenua tahito, o te mau faatereraa piˈo ïa e te feia ta te reira e faatere ra. Ia faaorehia te reira, na te aha e mono? Na “te mau raˈi apî e te hoê fenua apî.” Te mau raˈi apî, o te hoê ïa faatereraa apî, te Faatereraa arii o Iesu  Mesia e na 144 000 apiti to roto. Te fenua apî, o te feia ïa e arataihia e te Faatereraa arii a te Atua. E pee Iesu e to ˈna mau apiti ma te tia roa i te Atua ra ia Iehova, te hoê Atua naho. (Kor. 1, 14:33) E faanaho-maitai-hia ïa te “fenua apî.” E ravehia te tahi mau tane no te haapao i te mau ohipa. (Sal. 45:16) E aratai te Mesia e na 144 000 i teie mau tane. A feruri na i tera taime e monohia ˈi pauroa te faanahonahoraa piˈo na te hoê faanahonahoraa otahi e te tahoê, o te ore roa ˈtu e nehenehe e haapiˈo!

10. Eaha te tahi mau ohipa tano ore i matauhia i te vahi e ora ˈi oe, e e nafea te reira e ohipa ˈi i nia ia oe e to oe utuafare?

¹⁰ E nafea te mau ohipa tano ore e ohipa ˈi i nia ia tatou? Te ora nei tatou i roto i te hoê ao ua matauhia te peu tia ore, te haavare e te haavîraa ino mau. Te faariro ra te mau faaanaanataeraa a teie nei ao i tera mau ohipa ei mea au ia hiˈo, a faaooo atu ai i te mau ture aveia a Iehova no nia i te maitai e te ino. (Isa. 5:20) Mea tia i te mau metua ia tutava no te paruru i ta ratou mau tamarii i tera mau ohipa ino. Inaha, mea tia ia haa rahi te mau Kerisetiano no te paruru i to ratou auhoaraa e o Iehova i roto i te hoê ao o te ore e faatura i te mau ture aveia a te Atua.

11. Eaha ta tatou e haapii mai i te haavaraa a Iehova i nia ia Sodoma e Gomora?

¹¹ Eaha ta Iehova e rave i te mau ohipa tano ore? A hiˈo na i ta Iehova i rave no te mau mea ino i tupu na i te oire o Sodoma e o Gomora. (A taio i te Petero 2, 2:6-8.) E taata parau-tia o Lota, ua mauiui roa oia e to ˈna utuafare no te mau ohipa ino ta te taata i haaati ia ratou i rave na. Ua haamou Iehova i tera tuhaa fenua taatoa no te faaore i te mau ohipa ino i tupu i reira. Ua rave atoa oia i te reira “ei faaararaa” no te feia ino i teie mahana. Mai ta Iehova i faaore i te taatoaraa o te mau ohipa tia ore i tera ra tau, e faaore atoa oia i te reira ia haamou oia i teie faanahoraa.

12. Eaha te tahi mau ohipa o ta tatou e tiai ru nei ia faaorehia teie faanahoraa?

¹² Na te aha e mono i te mau ohipa tano ore? I roto i te ao apî, mea rahi te ohipa oaoa mau ta tatou e rave. Ei hiˈoraa, e faariro tatou i te fenua ei paradaiso e e patu tatou i te fare no tatou iho e no te feia herehia e tatou. E farii popou atoa tatou i na mirioni taata o te faatiahia mai mai te pohe mai e e haapii tatou ia ratou no nia ia Iehova e te mau mea ta ˈna i rave no te taata. (Isa. 65:21, 22; Ohi. 24:15) I tera taime, e rave tatou i te mau ohipa e oaoa ˈi tatou e o te arue ia Iehova!

13. Eaha te faahopearaa o te orureraa hau i roto i te ô i Edene?

¹³ E nafea te mau tupuraa ino e ohipa ˈi i nia ia tatou? Ua aratai te hoê ao î i te feia ino, te mau faanahonahoraa piˈo e te mau ohipa tano ore i te mau tupuraa ino. Te faaruru ra tatou pauroa i te mau mea mai te tamaˈi, te veve, te au-ore-raa i te tahi atu nunaa, te maˈi e te pohe. Ua haamata teie mau tupuraa ino no te mea ua orure hau o Satani, Adamu e Eva ia Iehova. E ua ite tatou pauroa i te faahopearaa o ta ratou orureraa hau.

14. Eaha ta Iehova e rave no te mau tupuraa ino?

 ¹⁴ Eaha ta Iehova e rave no te mau tupuraa ino? A hiˈo na i te tahi mau hiˈoraa. Ua fafau Iehova i te faaore i te mau tamaˈi atoa. (A taio i te Salamo 46:8, 9.) E faaore oia i te maˈi. (Isa. 33:24) E haamou roa oia i te pohe e a muri noa ˈtu. (Isa. 25:8) Aita e veve faahou. (Sal. 72:12-16) E faaore Iehova i te taatoaraa o te mau tupuraa ino o te faaino ra i te oraraa i teie mahana. E e faaore roa atoa oia i te mana ino a Satani e a ta ˈna mau demoni!—Eph. 2:2.

15. Eaha te tahi mau mea o te faaorehia i muri aˈe Aramagedo?

¹⁵ A feruri na i te oaoa ia ora i roto i te hoê ao aita e tamaˈi, e maˈi aore ra e pohe! Eita e itehia te nuu faehau, mauhaa tamaˈi aore ra vahi haamanaˈoraa i te mau tamaˈi. Eita e titauhia te fare maˈi, te taote, te vahi vaiihoraa taata pohe aore ra vahi hunaraa. Eita roa ˈtu e ohipa ino e tupu faahou, eita ïa e faufaa faahou te mutoi, te mau ravea faaararaa e parururaa, te ponao opani aore ra te taviri! E ore roa teie mau tupuraa ino atoa o te faatupu nei i te ahoaho.

16, 17. (a) Eaha te huru o te feia e ora ˈtu i muri aˈe Aramagedo? A faataa. (b) E nafea tatou e papu ai e e ora tatou i muri aˈe teie ao tahito e faaorehia ˈi?

¹⁶ Mai te aha te oraraa ia faaorehia te mau tupuraa ino? E ere i te mea ohie ia feruri. Mea maoro tatou i te ora-noa-raa e te mau tupuraa ino e aita paha tatou i tapao i te ahoaho rahi o ta te reira i faatupu i nia ia tatou. Ei hiˈoraa, eita paha te taata o te ora ra i pihaiiho i te hoê vahi tapearaa pereoo auahi e haapao faahou i te maniania. No te mau taata e ora ra i pihaiiho i te hoê vahi faarueraa pehu, eita paha ratou e haapao faahou i te hauˈa. Ia faaore râ Iehova i te mau tupuraa ino atoa, auê ïa oaoa rahi!

¹⁷ Na te aha e mono i te mau ahoaho atoa ta tatou e ite nei i nia ia tatou? Te parau ra te Salamo 37:11: “E oaoa ratou i te rahi o te hau.” Mea tamahanahana ia ite e tera ta Iehova e hinaaro ra no tatou! I roto i teie tau ahoaho, a rave i te mau mea atoa ia vai piri noa tatou ia Iehova e i ta ˈna faanahonahoraa. Mea faufaa roa to tiaturiraa no a muri aˈe, a feruri maite ïa i te reira, ia papu ia oe e mea mau te reira no oe, e a faaite atu ia vetahi ê. (Tim. 1, 4:15, 16; Pet. 1, 3:15) Ma te na reira, e papu ia oe e, ia faaorehia teie faanahoraa, e ora noa oe ma te oaoa e a muri noa ˈtu!