1. Mea nafea Iehova i te faaiteraa ia Mose o vai o ˈNa? No te aha e mea faufaa ˈi?

 I TE hoê taime, ua faaite te Atua ia Mose o vai o ˈNa ma te faahiti i to ˈna iˈoa e te tahi o to ˈna mau huru maitatai. Ua nehenehe Iehova e faahiti na mua i to ˈna puai aore ra paari, ua haamata râ oia ma te faahiti i to ˈna aroha hamani maitai e to ˈna aumauiui. (A taio i te Exodo 34:5-7.) Ua hinaaro Mose e ite e e turu mau iho â anei Iehova ia ˈna. Ua faahiti ïa Iehova i to ˈna mau huru maitatai o te faaite atu e te hinaaro mau ra oia e tauturu i ta ˈna mau tavini. (Exo. 33:13) Eaha to oe huru a ite ai oe e te tâuˈa mau ra Iehova ia tatou? Ua niuhia teie tumu parau i nia i te aumauiui, oia hoi, te aumihi no te mauiui o vetahi ê e te hinaaro e tauturu ia ratou.

2, 3. (a) Eaha te faaite ra e e faatupu iho â te taata i te aumauiui? (b) No te aha mea maitai ia anaanatae ˈtu â oe i ta te Bibilia e parau ra no te aumauiui?

² E aumauiui to Iehova, e ua hamanihia te taata ia au i to ˈna huru. No reira iho â ïa te taata e tâuˈa ˈi te tahi i te tahi. E pinepine atoa te feia o te ore i ite o vai Iehova i te faaite i te aumauiui. (Gen. 1:27) I roto i te Bibilia, mea rahi te faatiaraa no nia i te feia o tei faaite i te aumauiui. Ei hiˈoraa, no  te ite o vai te mama o te pêpe i rotopu i na vahine e piti, ua tamata Solomona ia raua ma te faaue ia tapuhia te pêpe na ropu. Ua aumauiui roa te mama no to ˈna pêpe, taparu atura oia i te arii ia horoa i te pêpe na te tahi atu vahine. (Arii 1, 3:23-27) Te vai atoa ra te hiˈoraa o te tamahine a Pharao. I to ˈna iteraa i te pêpe ra o Mose, ua taa ia ˈna e e pêpe Hebera teie e mea titauhia ia haapohehia oia. Tera râ, ua “aroha . . . oia ia ˈna,” faaoti atura oia i te faaamu ia ˈna mai ta ˈna iho tamaiti.—Exo. 2:5, 6.

³ No te aha mea maitai ia haapii tatou hau atu â no nia i te aumauiui? No te mea te hinaaro ra Iehova ia pee tatou i to ˈna hiˈoraa. (Eph. 5:1) Noa ˈtu ua hamanihia tatou no te faaite i te aumauiui, mea tia ore tatou e, i te tahi taime, e haapao noa tatou ia tatou iho. E ere noa paha i te mea ohie ia faaoti e tauturu anei tatou i te tahi atu aore ra e haapao noa ia tatou iho. Eaha te nehenehe e tauturu mai ia anaanatae atu â ia vetahi ê? A tahi, e hiˈo mai tatou mea nafea Iehova e te tahi atu mau taata i faaite ai i te aumauiui. A piti, e hiˈo mai tatou e nafea e nehenehe ai e pee i to te Atua hiˈoraa o te aumauiui e no te aha mea maitai no tatou ia na reira.

4. (a) No te aha Iehova i tono ai i te melahi i Sodoma? (b) Eaha te haapii mai i te hiˈoraa o to Lota utuafare?

⁴ Mea rahi te hiˈoraa no nia i to Iehova aumauiui i roto i te Bibilia. Ei hiˈoraa, a hiˈo na eaha ta ˈna i rave no Lota. E taata parau-tia Lota o “tei mauiui roa” i te feia rave i te peu faufau i Sodoma e Gomora. Aita tera mau taata i faatura noa ˈˈe i te Atua, faaoti atura ïa Iehova e haapohe ia ratou. (Pet. 2, 2:7, 8) Ua tono Iehova i te melahi ia Lota ra no te parau atu e e haamouhia o Sodoma e Gomora e mea titauhia ia horo oia. Te parau ra te Bibilia: “E te faatautau noa ra [Lota], ua haru maira na [melahi] ra i tana rima, e te rima o ta ˈna vahine, e tona tamahine na ˈna ra. . . ; ua aratai raua ia ˈna i rapae au mai i taua oire ra, tuu atura.” (Gen. 19:16) Ua taa iho â ia Iehova i to Lota tupuraa, ia papu atoa ïa ia tatou e te taa ra ia ˈna te mau fifi atoa ta tatou e faaruru ra.—Isa. 63:7-9; Iak. 5:11, nota; Pet. 2, 2:9.

5. E nafea te Parau a te Atua e haapii mai ai e nafea ia faaite i te aumauiui?

⁵ Ua haapii atoa Iehova i to ˈna nunaa ia faaite i te aumauiui. A feruri na i te hoê ture ta ˈna i horoa ia Iseraela. Mai te peu ua tarahu hoê taata i te moni i te tahi atu, e nehenehe te taata o tei horoa i te moni e rave mai i te ahu o te taata tarahu ei haapapuraa e e faahoˈihia mai iho â ta ˈna moni. (A taio i te Exodo 22:26, 27.) Mea titauhia râ ia faahoˈi te taata o tei horoa i te moni i te ahu o te taata tarahu hou te mahana a mairi ai, ia nehenehe o ˈna e mahanahana noa ia po. Eita paha te hoê taata aumauiui ore e faahoˈi i te ahu.  Ua haapii râ Iehova i to ˈna nunaa ia faatupu i te aumauiui. Eaha ta te aratairaa niuhia i nia i teie ture e haapii mai ra? Eiaha roa ˈtu e tapo i te mata ia hinaaro hoê hoa Kerisetiano i te tauturu. Mai te peu e nehenehe ta tatou e tauturu i te hoê taeae aore ra tuahine o te mauiui ra, e na reira anaˈe ïa.—Kol. 3:12; Iak. 2:15, 16; a taio i te Ioane 1, 3:17.

6. Eaha te haapii mai i to Iehova aumauiui i nia i te mau Iseraela rave hara?

⁶ Ua faaite Iehova i te aumauiui i nia i te mau Iseraela noa ˈtu ua hara ratou ia ˈna. Te taio ra tatou: “Ua tono maira te Atua o to ratou mau metua o Iehova i te vea, aita i tuutuu; no te mea te aroha ra oia i to ˈna mau taata, e to ˈna ihora parahiraa.” (Par. 2, 36:15) Hoê â huru no tatou, mea tia ia faaite tatou i te aumauiui i nia i te feia o tei ore i ite atura o vai Iehova, o te nehenehe noa â râ e tatarahapa e e riro mai ei hoa no ˈna. Aita roa ˈtu Iehova e hinaaro ra ia haamouhia hoê noa ˈˈe taata i roto i te haavaraa o te piri mai ra. (Pet. 2, 3:9) No reira, e taime noa â to tatou, e haere ïa tatou e faaite i ta ˈna poroi faaararaa i te taata atoa, a tauturu atu ai ia ratou ia fanaˈo i to te Atua aumauiui.

7, 8. No te aha te hoê utuafare i tiaturi ai e ua faaite Iehova i te aumauiui i nia ia ratou?

⁷ I teie mahana, mea rahi ta Iehova tavini o tei ite roa ˈtu i to ˈna aumauiui. Ei hiˈoraa, i te mau matahiti 1990 tae atu i 2000 i Bosnie, ua aro e ua haapohe e rave rau pǔpǔ nunaa ěê te tahi i te tahi. I roto i te hoê utuafare o tei ora i ǒ, te vai ra hoê tamaiti e 12 matahiti o ta tatou e pii Milan. Ua haere Milan, to ˈna taeae, to ˈna na metua e te tahi atu mau Ite no Iehova na nia i te pereoo mataeinaa i Serbie mai Bosnie atu. Ua haere ratou no te apiti atu i te hoê tairururaa, i reira to Milan na metua i opua ˈi i te bapetizo ia raua. I te otia fenua, ite atura te tahi mau faehau e no roto mai teie utuafare i te hoê pǔpǔ nunaa ê, haapauhia ˈtura te utuafare i te pereoo mataeinaa. Vaiiho atura ratou i te toea o te mau taeae ia haere atu. E piti mahana to te mau faehau tapearaa i te utuafare. I te pae hopea, tuô atura te faehau o tei haapao ia ratou i to ˈna raatira e ani atura eaha te rave ia ratou. A tia noa ˈi te utuafare i pihai iho mai, ua faaroo ratou i te raatira i te pahonoraa ˈtu, “A rave ia ratou e a pupuhi atu!”

⁸ A paraparau noa ˈi te mau faehau, e piti taata tei tapiri atu i te utuafare. Parau mǎrû atura raua e e Ite no Iehova atoa raua e na te mau taeae i roto i te pereoo mataeinaa i faaite atu eaha tei tupu. Ua parau na Ite no Iehova ia Milan raua to ˈna taeae ia pauma i roto i to raua pereoo no te haere i te tahi atu pae o te otia fenua, eita te mau faehau e ani i te papie a te mau tamarii. Parau atura na taeae i na metua ia haere na muri i te piha a te mau faehau a farerei atu ai ratou i te tahi atu pae. Ua riaria roa Milan, aita ˈtura oia i taa faahou e nafea. Ua ani to ˈna na metua, “Ua papu ia orua e e vaiiho ratou ia mâua ia haere noa mai tera?” A faaatea noa ˈi râ raua, e au ra e aita te mau faehau i ite aˈe ia raua. Farerei atura Milan raua to ˈna taeae i to raua na metua i te tahi atu pae o te otia fenua, e haere atura ratou i te tairururaa. Ua papu roa ia ratou e ua pahono Iehova i ta ratou mau pure! Ua ite tatou mai roto mai i te Bibilia e eita Iehova e paruru noa i ta ˈna mau tavini na roto i teie huru raveraa. (Ohi. 7:58-60) I roto râ i teie tupuraa, ua parau Milan: “E au ra e ua  haamatapo te mau melahi i te mau faehau e ua faaora Iehova ia matou.”—Sal. 97:10.

9. Eaha to Iesu manaˈo no nia i te nahoa taata tei pee ia ˈna? (A hiˈo i te hohoˈa matamua.)

⁹ E hiˈoraa maitai roa atoa o Iesu no te parau o te aumauiui. Ua aroha roa Iesu i te nahoa taata no te mea ua ite oia e “ua rave-ino-hia ratou e te tâuˈa-ore-hia mai te mau mamoe aore e tiai.” Eaha ïa ta ˈna i rave? “Haapii atura oia ia ratou e rave rahi parau mau.” (Mat. 9:36; a taio i te Mareko 6:34.) Area te mau Pharisea, aita ratou i faaite i te aumauiui e aita ratou i hinaaro e tauturu i te taata. (Mat. 12: 9-14; 23:4; Ioa. 7:49) Mai ia Iesu, mea puai anei to oe hinaaro e tauturu i te taata e e haapii atu ia ratou no nia ia Iehova?

10, 11. Mea tano anei ia faaite i te aumauiui i te mau taime atoa? A faataa.

¹⁰ E ere râ te auraa e mea tano ia faaite tatou i te aumauiui i te mau taime atoa. Ei hiˈoraa, peneiaˈe ua manaˈo te arii Saula e te faaite ra oia i te aumauiui ma te ore e haapohe ia Agaga, arii o Amaleka e enemi o te nunaa o te Atua. Aita atoa Saula i haapohe pauroa te animara a te ati Amaleka. Ua faaue râ hoi Iehova ia Saula ia haapohe i te taatoaraa o te ati Amaleka e ta ratou mau animara atoa. No te faaroo ore o Saula, ua patoi Iehova ia ˈna ei arii. (Sam. 1, 15:3, 9, 15) O Iehova te Haava parau-tia. E nehenehe oia e ite eaha to roto i te aau o te taata, e ua ite oia i roto i teihea tupuraa e ere mea tano ia faaite i te aumauiui. (Oto 2:17; Ezk. 5:11) Fatata roa oia i te haava i te taata atoa o te ore e auraro ia ˈna. (Tes. 2, 1:6-10) I tera taime, eita Iehova e faaite i te aumauiui i te feia ino. Na roto râ i te haamouraa ia ratou, e faaite oia i te aumauiui i nia i te feia parau-tia, ta ˈna e faaora.

¹¹ Papu maitai, e ere na tatou e faaoti o vai te tano ia ora aore ra ia pohe. Mea tia râ ia rave tatou i te mau mea atoa i teie nei no te tauturu i te taata. Eaha te tahi mau ravea e faaite ai tatou i te aumauiui i nia ia vetahi ê? Teie te tahi mau manaˈo.

12. E nafea oe e faaite ai i te aumauiui na roto i to oe huru i nia ia vetahi ê?

¹² Tauturu i roto i te mau tupuraa o te mau mahana atoa. E titau Iehova ia faaite te mau Kerisetiano i te aumauiui i to ratou taata tupu e to ratou mau taeae. (Ioa. 13:34, 35; Pet. 1, 3:8) Hoê auraa o te aumauiui, o te “mauiuiraa ïa e vetahi ê.” E tamata te hoê taata o te faaite ra i te aumauiui i te tauturu i te feia o te mauiui ra. Mea maitai ïa ia imi tatou i te mau taime maitatai no te tauturu ia vetahi ê, peneiaˈe ma te rave i te hoê ohipa aore ra ma te haere e tii aore ra hoo mai i te tahi mea no ratou.—Mat. 7:12.

13. Eaha ta te nunaa o te Atua e rave i muri aˈe i te mau ati natura?

¹³ Tauturu i muri aˈe i te hoê ati natura. Ia ite tatou i te taata e mauiui ra i muri aˈe i te hoê ati, e hinaaro tatou e faaite atu i te aumauiui. Ua matauhia te mau Ite no Iehova no te tauturu ta ratou  e hopoi i roto i tera mau taime. (Pet. 1, 2:17) Ei hiˈoraa, ua ora te hoê tuahine Tapone i te hoê vahi o tei ino roa i te aueueraa fenua e te miti faaî i 2011. Ua parau oia e ua “faaitoito-rahi-hia e ua tamahanahana-rahi-hia” oia i to ˈna iteraa i te mau rima tauturu i te haereraa mai mai e rave rahi vahi no Tapone e te tahi atu mau fenua no te tataî i te mau fare e Piha a te Basileia. Ua na ô â oia: “Ua tauturu teie tupuraa ia ˈu ia taa e te tâuˈa ra Iehova ia tatou. E te tâuˈa atoa ra to tatou mau hoa Ite no Iehova te tahi i te tahi. E rave rahi taeae e tuahine na te ao nei o te pure ra no matou.”

14. E nafea oe e tauturu ai i te feia maˈi e te feia ruhiruhia?

¹⁴ Tauturu i te feia maˈi e ruhiruhia. Ia ite tatou i te feia e mauiui ra no te maˈi aore ra te matahiti paari, e aumauiui tatou. Te tiai ru nei tatou i te taime e ore roa ˈi teie mau fifi, te pure nei ïa tatou ia tae mai te Faatereraa arii a te Atua. I te hoê â taime, e rave tatou i te mau mea atoa no te tauturu i te feia maˈi e ruhiruhia. Ua faatia te hoê taata papai e, i te hoê mahana, aita to ˈna mama ruhiruhia, e maˈi Alzheimer to ˈna, i tapae oioi i te vahi haumitiraa. A tamata ˈi oia i te horoi ia ˈna, pate mai nei te ôe. Tei te uputa na piti tuahine Ite no Iehova, o tei haere tamau na e farerei ia ˈna. Ua ani raua e e nehenehe anei ta raua e tauturu atu. Noa ˈtu ua haama o ˈna, ua farii te vahine. Tauturu atura na tuahine no te horoi ia ˈna. I muri iho, faaineine atura  raua i te tahi auˈa ti na ˈna e faaea noa ˈtura no te tauaparau ia ˈna. Ua mauruuru roa te tamaiti e ua parau no nia i te mau Ite no Iehova e “te rave ra iho â ratou i ta ratou e poro ra.” Te turai ra anei to oe aumauiui no te feia maˈi e ruhiruhia ia oe ia rave i te mau mea atoa no te tauturu ia ratou?—Phil. 2:3, 4.

15. E nafea ta tatou pororaa e tauturu ai ia vetahi ê?

¹⁵ Tauturu i te taata ia ite o vai Iehova. Te ravea maitai roa ˈˈe no te tauturu i te taata, o te haapiiraa ïa ia ratou no nia i te Atua e ta ˈna Faatereraa arii. Te tahi atu ravea, o te tautururaa ïa ia ratou ia ite no te aha mea maitai no ratou ia auraro i te mau ture aveia a Iehova. (Isa. 48:17, 18) E ravea faahiahia roa te pororaa no te faahanahana ia Iehova e no te faaite i te aumauiui no vetahi ê. E nehenehe anei ta oe e rave hau atu â i roto i te pororaa?—Tim. 1, 2:3, 4.

16. E nafea tatou e faufaahia ˈi i te aumauiui ta tatou e faaite?

¹⁶ Te parau ra te tahi mau taote rapaau i te pae feruriraa e e maitai aˈe to tatou ea e to tatou auhoaraa e vetahi ê ia faaite tatou i te aumauiui. Ia tauturu oe i te feia o te mauiui ra, e oaoa aˈe oe, e maitai atu â to oe huru hiˈoraa i te mau tupuraa, eita oe e moˈemoˈe atu â, e eita oe e faatupu atu â i te manaˈo faatoaruaru. Mea maitai no oe te faaiteraa i te aumauiui. (Eph. 4:31, 32) Ia turai te here ia tatou ia tauturu ia vetahi ê, e fanaˈo tatou i te hoê manaˈo haava maitai no te mea ua ite tatou e te rave ra tatou i te mea ta Iehova e hinaaro ra ia rave tatou. E tauturu te aumauiui ia riro mai ei metua, ei hoa faaipoipo e ei hoa maitai aˈe. Hau atu â, mea pinepine te feia o te faaite i te aumauiui i nia ia vetahi ê i te fanaˈo i te tauturu i te taime a hinaaro ai ratou i te reira.—A taio i te Mataio 5:7; Luka 6:38.

17. No te aha e hinaaro ai oe e faaite i te aumauiui?

¹⁷ Noa ˈtu mea maitai no tatou ia faaite i te aumauiui, te hinaaro ra tatou e pee i to Iehova hiˈoraa e e faahanahana ia ˈna, tera te tumu matamua e faaite ai tatou i te aumauiui. O ˈna te tumu o te here e te aumauiui. (Mas. 14:31) Ua horoa mai oia i te hiˈoraa tia roa no tatou. E rave anaˈe ïa i te mau mea atoa no te pee i to te Atua hiˈoraa na roto i te faaiteraa i te aumauiui. E piri atu â ïa tatou i to tatou mau taeae e tuahine e e maitai atu â to tatou mau auhoaraa e te feia ati aˈe ia tatou.—Gal. 6:10; Ioa. 1, 4:16.