TE TAIO ra tatou i roto i te evanelia a Mataio: “Tomo ihora Iesu i roto i te hiero, tiahi atura i rapae i te feia atoa e hoo atu ra e e hoo mai ra i roto i te hiero, e huri ihora i te mau amuraa maa a te feia taui moni e te mau parahiraa a te feia hoo uupa. E na ô atura ia ratou: ‘Ua papaihia: “E parauhia to ˈu fare e fare no te pure,” te faariro nei râ outou i te reira ei ana no te eiâ.’”—Mat. 21:12, 13.

Te faaite ra te tuatapaparaa o te huitaata e ua haa te feia hoo i roto i te hiero ma te tano ore i nia i te taata ma te faaaufau ia ratou i te hoê faito moni rahi. Ei hiˈoraa, mea mâmâ te uuairao e nehenehe ïa te feia veve e hoo mai i te reira no te pûpû atu ei tusia. Tera râ, te parau ra te mau papai ati Iuda tahito e, i te hoê taime i te senekele matamua, ua titauhia ia aufau te taata hoê denari auro ia noaa mai e piti uuairao. Mea titauhia ia ohipa te hoê taata 25 mahana ia noaa mai tera tino moni. Aita ˈtura te feia veve i nehenehe e hoo faahou i te uuairao, no te moni rahi. (Lev. 1:14; 5:7; 12:6-8) No te mea ua riri Rabban Shimon ben Gamliel i teie tupuraa, ua faaiti atura oia i te rahiraa tusia tei titauhia i te mau ati Iuda ia pûpû. I tera iho â taime, topa mai nei te faito moni no e piti uuairao i te faito hoê tuhaa i nia i te hanere o te denari auro.

Mai ta tatou e ite ra, e feia nounou te feia e hoo i roto i te hiero e e punu atoa ratou i te taata. No reira Iesu i parau ai e e feia “eiâ” ratou.