1, 2. (a) Eaha na toru taoˈa faahiahia no ǒ mai ia Iehova ra? (b) Eaha ta tatou e hiˈopoa mai i roto i teie tumu parau?

 O IEHOVA te mea taoˈa roa ˈˈe i roto i te ao nui. Na ˈna te mau mea atoa. (Par. 1, 29:11, 12) E Atua horoa noa râ Iehova no te mau taata atoa. Auê tatou i te mauruuru no to ˈna horoaraa mai e rave rahi taoˈa pae varua! Eaha te tahi o tera mau taoˈa? Te vai ra (1) ta te Atua Faatereraa arii, (2) ta tatou taviniraa, (3) te pue parau mau faahiahia itehia i roto i ta ˈna Parau. Ia ore râ tatou e haapao, a mairi ai te tau, e moˈe paha ia tatou te faufaaraa o teie mau taoˈa. Ia tamau tatou i te haamanaˈo i to ratou faufaaraa a faahohonu atu ai i to tatou here no te reira no te mea, mai ta Iesu i parau: “Te vahi . . . to reira ta oe taoˈa, to reira atoa to oe aau.”—Luka 12:34.

² E feruri anaˈe e nafea to tatou here e mauruuru no te Faatereraa arii, te taviniraa, e te parau mau ia puai noa. A na reira ˈi tatou, a feruriruri e nafea oe iho e faahohonu ai i to here no teie mau taoˈa pae varua.

3. Ua ineine te taata i roto i ta Iesu aamu i te aha no te hoo mai i te hoê poe? (A hiˈo i te hohoˈa matamua.)

³ A taio i te Mataio 13:45, 46. Ua faatia Iesu i te hoê aamu no nia i te hoê taata o te hoohoo ra i te poe. I te hoê mahana, ua itea mai ia ˈna te hoê poe moni rahi aˈe i te tahi atu mau poe ta ˈna i ite aˈenei. Ua hinaaro teie taata i taua poe ra, hoo atura o ˈna pauroa ta ˈna mau mea no te hoo mai i teie poe. E nehenehe anei oe e feruri i te faufaaraa o tera poe no ˈna?

4. Eaha ta tatou e hinaaro e rave no te Faatereraa arii?

⁴ Eaha te haapii mai i te aamu a Iesu? E au te parau mau o te Faatereraa arii a te Atua i tera poe moni rahi. Ia haafaufaa tatou i te Faatereraa arii mai ta tera taata i haafaufaa i te poe, e hinaaro roa tatou e vaiiho i te mau mea atoa, no te riro e a vai noa ˈtu ai, ei huiraatira o te Faatereraa arii. (A taio i te Mareko 10:28-30.) E hiˈo anaˈe mea nafea e piti taata i te na reiraraa.

5. Eaha ta Zakaio i ineine i te rave no te Faatereraa arii?

⁵ E taata titau tute o Zakaio. Ua monihia o ˈna i te taviri-noa-raa i te taata. (Luka 19:1-9) I te hoê râ mahana, ua faaroo Zakaio ia Iesu i te paraparauraa no nia i te Faatereraa arii. Ua au roa o ˈna i ta ˈna i faaroo, hinaaro roa aˈera o ˈna e taui. Ua parau oia: “E te Fatu, te horoa nei au i te afaraa o ta ˈu mau faufaa na te feia veve, e te taata ta ˈu i taviri, e tataimaha ïa ta ˈu e faahoˈi na ˈna.” Ua faahoˈi Zakaio i te moni ta ˈna i eiâ i te taata e ua faaea i te nounou.

6. Eaha ta te hoê vahine i rave, e no te aha oia i na reira ˈi?

⁶ A faaroo ai te hoê vahine no nia i te Faatereraa arii tau matahiti i teie nei, te faaea noa ra o ˈna i te hoê vahine. O ˈna atoa te peretiteni o te hoê faanahonahoraa o te turu i te mau tiaraa o te feia mahu. A haapii ai râ oia i te Bibilia e a ite ai i te faufaaraa o te Faatereraa arii a te Atua, taa aˈera ia ˈna e e titauhia ia rave oia i te mau tauiraa rahi i roto i to ˈna oraraa. (Kor. 1, 6:9, 10) No to ˈna here ia Iehova, ua faarue oia i tera faanahonahoraa e ua faaea i te rave i te peu mahu. Ua bapetizohia oia i 2009 e i te matahiti i muri iho, ua riro mai oia ei pionie. Ua rave oia i teie mau tauiraa rarahi no te mea ua puai aˈe to ˈna here ia Iehova i te tahi atu o to ˈna mau hiaai tia ore.—Mar. 12:29, 30.

7. E nafea tatou ia puai noa to tatou here no te Faatereraa arii a te Atua?

⁷ No te riro mai ei huiraatira o te Faatereraa arii a te Atua, ua titauhia ia taui roa e rave rahi i rotopu ia tatou i to ratou oraraa. (Roma 12:2) Aita râ ta tatou aroraa i hope. Eiaha tatou e vaiiho i to tatou here no te Faatereraa arii ia haaparuparuhia e te tahi noa ˈˈe mea, mai te here no te mau taoˈa materia aore ra te mau hinaaro i te mau peu taotoraa tia ore. (Mas. 4:23;  Mat. 5:27-29) No te tauturu ia tatou ia puai noa to tatou here no te Faatereraa arii a te Atua, ua horoa mai Iehova i te tahi atu taoˈa faufaa roa.

8. (a) No te aha te aposetolo Paulo i parau ai e e “taoˈa” ta tatou taviniraa i “roto i te farii repo”? (b) Mea nafea Paulo i te faaiteraa e ua haafaufaa o ˈna i te taviniraa?

⁸ Ua horoa mai Iesu i te hopoia e poro e e haapii i te taata te mau parau apî oaoa o te Faatereraa arii a te Atua. (Mat. 28:19, 20) Ua parau te aposetolo Paulo e e taoˈa tuuhia i roto i te farii repo, aore ra farii araea, te pororaa. (Kor. 2, 4:7; Tim. 1, 1:12) No te mea e feia tia ore tatou, mai tera mau farii araea ïa tatou. E au râ te poroi ta tatou e faaite ra i te hoê taoˈa moni rahi no te mea e nehenehe tatou e te feia e faaroo mai e ora e a muri noa ˈtu. No reira Paulo i parau ai: “No te parau apî oaoa e no te poro i taua parau ra ia vetahi ê i faariro ai au ia ˈu mai te mau huru taata atoa.” (Kor. 1, 9:23) Ua haa rahi Paulo no te haapii ia vetahi ê no nia i ta te Atua Faatereraa arii. (A taio i te Roma 1:14, 15; Timoteo 2, 4:2.) Ua tauturu te here no te mau parau apî oaoa ia Paulo ia tamau noa i te poro noa ˈtu te hamani-ino-raa uˈana. (Tes. 1, 2:2) E nafea tatou e pee ai i to Paulo haafaufaaraa i te taviniraa?

9. Eaha te tahi mau ravea e nehenehe ai tatou e faaite e te haafaufaa ra tatou i te taviniraa?

⁹ Hoê ravea i faaite ai Paulo e ua haafaufaa oia i te taviniraa, mea na roto ïa i te faaohiparaa i te mau ravea atoa no te paraparau ia vetahi ê. Mai ia Paulo e te mau Kerisetiano matamua, te faaite nei tatou i te parau apî oaoa i te taata i tera e tera fare, i te mau vahi taata, e i te mau vahi atoa e ite ai tatou i te taata. (Ohi. 5:42; 20:20) Te imi nei tatou i te ravea no te poro i e rave rahi taata. Mai te peu e nehenehe, e rave paha tatou i te taviniraa pionie tauturu aore ra pionie tamau. Aore ra e haapii paha tatou i te hoê reo ê, tere i te hoê vahi atea i roto i to tatou iho fenua aore ra i te hoê fenua ê.—Ohi. 16:9, 10.

10. Eaha te mau maitai ta Irene i ite no te ohipa rahi ta ˈna i rave no te faaite i te parau apî oaoa?

¹⁰ Ua hinaaro Irene, te hoê tuahine faaea taa noa i te fenua Marite, e poro i te parau apî oaoa i te feia e paraparau ra i te reo Rusia. No reira, i 1993, ua apiti oia i te hoê pǔpǔ reo Rusia i te oire no New York. I tera taime, e 20 noa taata poro i roto i tera pǔpǔ. E 20 matahiti i muri aˈe, ua parau Irene: “Aita â vau i paraparau maitai roa ˈtura i te reo Rusia.” Tera râ, ua tauturu Iehova ia ˈna e te tahi atu feia ia poro i te taata na roto i tera reo. I teie mahana, te vai ra e ono amuiraa reo Rusia i te oire no New York. Ua haapii Irene i te Bibilia i e rave rahi taata, e 15 o ratou tei bapetizohia. Te tavini ra vetahi o ratou i te Betela, ei pionie, e ei matahiapo. Te parau ra Irene: “Ia feruri au i te tahi mau fa ta ˈu i nehenehe e tapi, aita vau e manaˈo ra e nehenehe hoê noa ˈˈe e hopoi mai hau atu â oaoaraa.”  Ua haafaufaa mau â Irene i ta ˈna taviniraa!

11. Eaha te itehia ia tamau tatou i te poro noa ˈtu te hamani-ino-raa?

¹¹ Ia haafaufaa tatou i ta tatou taviniraa, e riro ïa tatou mai te aposetolo Paulo, a tamau atu ai i te poro noa ˈtu te hamani-ino-raa. (Ohi. 14:19-22) Ei hiˈoraa, i te area matahiti 1930 tae atu 1944, ua hamani-ino-hia to tatou mau taeae no Marite. Ua tamau noa râ ratou i te poro. A tamata ˈi te feia mana toroa i te tapea ia ratou, ua haere to tatou mau taeae i mua i te tiripuna e ua upootia mai i roto e rave rahi haavaraa. I 1943, ua faahiti taeae Knorr hoê o te mau haavaraa ta tatou i upootia i mua i te Tiripuna teitei no te Hau Amui no Marite. Ua parau oia e eita tatou e haere i mua i tera Tiripuna ahani te mau taeae i faaea i te poro. Ua parau â oia e no te mea ua tamau noa te mau taeae na te ao nei i te poro, ua faaite ratou e eita te patoiraa e manuïa. Ua upootia atoa te tahi mau taeae o te tahi atu mau fenua i te hoê â mau huru haavaraa. Papu maitai e ia haafaufaa tatou i te taviniraa, eita tatou e faaea i te poro i mua i te hamani-ino-raa.

12. Eaha ta oe e faaoti i te rave?

¹² Ia haafaufaa mau tatou i ta tatou taviniraa, eita tatou e haapao noa i te mau hora ta tatou e papai i nia i ta tatou tapura. E rave tatou i te mau mea atoa no te “faataa maitai i te parau apî oaoa.” (Ohi. 20:24; Tim. 2, 4:5) Eaha râ ta tatou e haapii atu ia vetahi ê? A hiˈo na i te tahi atu taoˈa no ǒ mai i te Atua ra.

13, 14. Eaha te mau “taoˈa” ta Iesu i faahiti i roto i te Mataio 13:52, e e nafea tatou e faaî ai i te reira?

¹³ Te toru o na taoˈa ta Iehova i horoa mai, o te pue parau mau atoa ïa ta tatou i haapii. O Iehova te tumu o te parau mau. (Sam. 2, 7:28; Sal. 31:5) E ei Metua horoa noa, te hinaaro nei oia e faaite mai i teie pue parau mau. Ua haapii mai tatou e rave  rahi parau mau ma te taioraa i ta ˈna Parau e ta tatou mau papai, e ma te apitiraa i ta tatou mau tairururaa e putuputuraa. A haaputu atu â ˈi tatou i te pue parau mau, e noaa ia tatou i ta Iesu i parau, te hoê pueraa “taoˈa” parau mau, “te mea apî e te mea tahito.” (A taio i te Mataio 13:52.) E tauturu Iehova ia tatou ia faaî i ta tatou mau “taoˈa” mai te peu e maimi tatou i te pue parau mau mai ta tatou e imi i te taoˈa huna. (A taio i te Maseli 2:4-7.) E nafea tatou e na reira ˈi?

¹⁴ Mea titauhia ia haapii tamau tatou i te Bibilia e ta tatou mau papai e ia rave atoa i te mau maimiraa. E tauturu te reira ia tatou ia ite mai i te pue parau mau “apî,” ta tatou i ore i ite aˈenei na mua ˈˈe. (Ios. 1:8, 9; Sal. 1:2, 3) I roto i te vea matamua o Te Pare Tiairaa piahia i Tiurai 1879 (Beretane), ua faaauhia te parau mau i te hoê tiare tei tupu i roto i te aihere. No te ite mai i te hoê tiare mai teie, mea tia i te hoê taata ia imi maitai. Ia itea mai ia ˈna hoê, eiaha oia e faaea i nia i teie noa tiare. Ia tamau râ oia i te imi no te ite mai hau atu â tiare. Hoê â huru no tatou, eiaha tatou e faaea i nia i te hoê noa parau mau. Ia tamau râ tatou i te imi i te tahi atu â pue parau mau.

15. No te aha e parau ai paha tatou e mea “tahito” te tahi pue parau mau, e eaha hoê parau mau ta oe e haafaufaa roa?

¹⁵ A haamata ˈi tatou i te haapii i te Bibilia, ua haapii mai tatou i te tahi pue parau mau faahiahia roa. E parau paha tatou e parau mau “tahito” te reira no te mea tera ta tatou i haapii na mua roa. Eaha te tahi pue parau mau ta tatou i haapii na mua roa? Ua haapii mai tatou e o Iehova to tatou Atua poiete e e opuaraa ta ˈna no te huitaata. Ua haapii atoa mai tatou e ua tono te Atua i ta ˈna Tamaiti i te fenua nei ia pohe oia ei tusia taraehara, ia nehenehe tatou e tiamâ mai i te hara e te pohe. E ua haapii mai tatou e e faaore te Faatereraa arii a te Atua i te mau mauiui atoa, a nehenehe atu ai tatou e ora e a muri noa ˈtu i nia i te fenua i roto i te hau e te oaoa.—Ioa. 3:16; Apo. 4:11; 21:3, 4.

16. Eaha te titauhia ia rave e faatanoraa anaˈe to roto i ta tatou i taa no nia i te pue parau mau Bibilia?

¹⁶ I te tahi taime, e faatanohia paha te haapiiraa no nia i te hoê parau tohu Bibilia aore ra irava. Ia na reirahia, mea faufaa ia rave i te taime no te hiˈopoa i te faatanoraa e ia feruriruri i te reira. (Ohi. 17:11; Tim. 1, 4:15) Eita noa e titauhia ia taa i te mau taa-ê-raa rahi i rotopu i te haamaramaramaraa tahito e te mea apî, ia haapao maitai atoa râ tatou i te mau tuhaa rii o te haamaramaramaraa apî. Ia na reira tatou, papu maitai e e ô te parau mau apî i roto i ta tatou pue parau mau Bibilia. No te aha e mea maitai ai no tatou ia tutava i te na reira?

17, 18. E nafea te varua moˈa e tauturu ai ia tatou?

¹⁷ Ua haapii Iesu e e nehenehe te varua moˈa e tauturu mai ia haamanaˈo i te tahi mau mea ta tatou i haapii na mua ˈˈe. (Ioa. 14:25, 26) E nafea te reira e nehenehe ai e tauturu mai ia poro tatou i te parau apî oaoa? A feruri na i te hiˈoraa o te hoê taeae o Peter te iˈoa. I 1970, e 19 noa matahiti to ˈna e ua haamata oia i te tavini i te Betela i Beretane. A poro ai Peter i tera e tera fare, ua farerei oia i te hoê papa piri i te 50 matahiti. Ua ui atu oia i taua taata ra e hinaaro anei oia e taa i te Bibilia. E orometua ati Iuda tera taata, e ua huru ê roa o ˈna a feruri ai e te haere mai ra teie taurearea  e haapii ia ˈna te Bibilia. No te tamata ia Peter, ua ani te orometua: “Ta ˈu tamaiti, ua papaihia te buka Daniela na roto i teihea reo?” Ua pahono Peter: “Ua papaihia te tahi tuhaa na roto i te reo Arama.” Te haamanaˈo ra Peter: “Ua maere roa te orometua ua ite au i te pahonoraa. Aita roa ˈtu râ vau i maere. Mea nafea vau i te iteraa i te pahonoraa? I to ˈu hoˈiraa i te fare e a hiˈo ai au i te mau vea o Te Pare Tiairaa e te A ara mai na! o te mau avaˈe na mua ˈtu, ua itea mai ia ˈu te tahi tumu parau o te faataa ra e ua papaihia te buka Daniela na roto i te reo Arama.” (Dan. 2:4) E nehenehe iho â te varua moˈa e haamanaˈo mai i te mau mea ta tatou i taio e i haaputu i roto i ta tatou mau taoˈa na mua ˈˈe.—Luka 12:11, 12; 21:13-15.

¹⁸ Ia haafaufaa tatou i te pue parau mau ta tatou e haapii nei ia Iehova ra e ia mauruuru tatou no te reira, e hinaaro ïa tatou e tamau i te haaputu i te reira i roto i ta tatou mau taoˈa. Hau atu â tatou i te na reira, hau atu â ïa tatou i te hinaaro e haapii ia vetahi ê.

19. No te aha mea tia ia paruru tatou i ta tatou mau taoˈa pae varua?

¹⁹ I roto i teie tumu parau, ua haapii mai tatou i te faufaaraa no tatou ia haafaufaa i te mau taoˈa pae varua. Mea tia râ ia vai ara tatou eiaha e vaiiho ia Satani e ta ˈna ao ia haaparuparu i to tatou hinaaro i teie mau taoˈa. Ia ore tatou e ara, e nehenehe tatou e faafariuhia e te tahi mau mea mai te parau e fanaˈo tatou i te hoê ohipa moni maitai roa, te moemoeâ e ite tatou i te hoê oraraa fanaˈo, aore ra te hiaai e faaiteite i ta tatou mau taoˈa materia. Te haamanaˈo mai ra te aposetolo Ioane ia tatou e fatata roa teie ao e te mau mea atoa ta ˈna e pûpû mai ra i te mou. (Ioa. 1, 2:15-17) No reira mea tia ia tamau tatou i te mauruuru no ta tatou mau taoˈa pae varua e ia paruru tatou i te reira.

20. Eaha ta oe e faaoti i te rave no te paruru i ta oe mau taoˈa pae varua?

²⁰ Ia ineine oe i te vaiiho i te mau mea atoa o te nehenehe e haaparuparu i to oe here no te Faatereraa arii a te Atua. A faaoti i te poro ma te itoito rahi, e eiaha roa oe e faaea i te haafaufaa i te taviniraa. A tamau i te imi i te pue parau mau Bibilia. Ia na reira oe, e haaputu ïa oe i te “taoˈa . . . i te raˈi, a ore atu ai e raea i te eiâ e e pau i te manumanu. Te vahi hoi to reira ta oe taoˈa, to reira atoa to oe aau.”—Luka 12:33, 34.