1. E nafea tatou e anaanatae atu â i te haapii i te mau parau tohu Bibilia?

 “MEA au na ˈu e haapii i te mau parau tohu Bibilia,” ta Ben ïa, faahitihia i roto i te tumu parau haapiiraa na mua ˈtu, e parau ra. Tera atoa anei to outou manaˈo? Aore ra mea fifi e mea haumani anei no outou ia haapii i te reira? E taui paha to outou manaˈo ia ite outou no te aha Iehova i tuu ai i te mau parau tohu i roto i ta ˈna Parau.

2. Eaha ta tatou e haapii mai i roto i teie tumu parau haapiiraa?

² I roto i teie tumu parau haapiiraa, e haapii tatou no te aha e tia ˈi ia tatou ia tuatapapa i te mau parau tohu Bibilia e e nafea ia haapii i te reira. I muri iho, e hiˈo tatou e piti parau tohu i roto i te buka a Daniela e e nafea tatou e faufaahia ˈi i te reira.

3. Eaha te rave no te taa i te hoê parau tohu Bibilia?

³ No te taa i te hoê parau tohu Bibilia, e tia ia ani i te tauturu. Ei hiˈoraa, ia tere outou i te hoê vahi aita outou i matau, e painu outou. Mai te peu râ e hoa to outou tei matau maitai i tera vahi e te purumu i reira, e oaoa ïa outou ia aratai mai o ˈna. Hoê â huru no Iehova. Ua ite oia teihea roa tatou i roto i ta ˈna tarena e eaha to mua ia tatou. No reira, no te taa i te hoê parau tohu Bibilia, e ani haehaa tatou ia Iehova i ta ˈna tauturu.—Dan. 2:28; Pet. 2, 1:19, 20.

4. No te aha Iehova i haapapai ˈi te mau parau tohu? (Ieremia 29:11) (A hiˈo atoa i te hohoˈa.)

⁴ E au Iehova i te hoê metua here o te hinaaro ra ia  oaoa ta ˈna mau tamarii. (A taio i te Ieremia 29:11.) Taa ê râ i te mau taata, e nehenehe Iehova e tohu i te ohipa e tupu a muri aˈe. Ua tuu oia i te tahi mau parau tohu i roto i ta ˈna Parau ia ite tatou eaha te mau tupuraa faufaa te fatata i te tupu. (Isa. 46:10) E ô mau â te mau parau tohu no ǒ mai i te Atua ra. E nafea râ tatou e papu ai e e tupu iho â te reira?

5. Eaha ta te feia apî e haapii mai i te hiˈoraa o Max?

⁵ I te fare haapiiraa, te haaatihia ra te feia apî e te taata o te ore e tiaturi ra i te Bibilia. E nehenehe te mau taurearea Ite no Iehova e feaa ia ite ratou i te haerea o tera mau taata e ia faaroo i ta ratou mau parau. Teie ta te hoê taeae apî, o Max te iˈoa, e parau ra: “I to ˈu taurearearaa, ua haamata vau i te feaa. Mea mau anei ta to ˈu na metua e haapii mai ra? Ta matou anei te haapaoraa mau? No ǒ mai iho â anei te Bibilia i te Atua?” A hiˈo na ua nafea to ˈna na metua. Te faatia ra o ˈna: “Aita raua i riri noa ˈˈe, ua ite râ vau e ua haapeapea raua no ˈu.” Ua faaohipa to ˈna na metua i te Bibilia no te pahono i ta ˈna mau uiraa atoa. Ua rave atoa râ Max i ta ˈna tuhaa. Te na ô ra oia: “Ua faahohonu atu â vau i to ˈu ite no nia i te mau parau tohu Bibilia e ua aparau vau e te tahi atu mau taurearea o te amuiraa.” A na reira ˈi, ua papu roa ia Max e no ǒ mai te Bibilia i te Atua.

6. Eaha te rave ia feaa outou e no te aha?

⁶ Eiaha e faahapa ia outou mai te peu te feaa ra outou no nia i te mau pue parau mau Bibilia. Mai ia Max, e tuhaa atoa ta tatou. E au te manaˈo feaa i te tutae auri. Ia ore ia haapaohia, e tuino mǎrû te reira i to outou faaroo. A ui ïa ia outou iho: ‘Te tiaturi ra anei au i ta te Bibilia e faaite ra no a muri aˈe?’ Ia ore, a tuatapapa i te mau parau tohu Bibilia tei tupu aˈena.

7. Eaha te haapii mai i te hiˈoraa o Daniela ia tuatapapa tatou i te hoê parau tohu Bibilia? (Daniela 12:10) (A hiˈo atoa i te hohoˈa.)

⁷ E hiˈoraa maitai ta Daniela i vaiiho mai. Ia ˈna i tuatapapa i te hoê parau tohu, ma te hoê ïa manaˈo turai tano, oia hoi ua hinaaro o ˈna e ite i te parau mau. E taata haehaa atoa oia. Ua ite o ˈna e na Iehova e haamaramarama i te feia tei matau ia ˈna e te haapao ra i ta ˈna mau ture aveia. (Dan. 2:27, 28; a taio i te Daniela 12:10.) Ua faaite o ˈna i to ˈna haehaa ma te turui noa i nia ia Iehova. (Dan. 2:18) Hau atu, mea haapao maitai Daniela, ua tuatapapa maite hoi o ˈna i te mau Papai ta ˈna i fanaˈo i to ˈna tau. (Ier. 25:11, 12; Dan. 9:2) E nafea ia pee i to ˈna hiˈoraa?

8. No te aha vetahi e tuatapapa ˈi i te mau parau tohu Bibilia?

⁸ Ua tano anei te manaˈo turai? Ia  tuatapapa outou i te parau tohu Bibilia no te ite i te parau mau, e tauturu Iehova ia outou. (Ioa. 4:23, 24; 14:16, 17) Area vetahi, te tuatapapa ra ratou i te reira no te imi i te tahi mau hape i roto, a parau atu ai e e ere te Bibilia no ǒ mai i Atua ra. Na ratou atura ïa e faaoti no ratou iho eaha te mea maitai e te mea ino. E tia râ ia tatou ia tuatapapa i te mau parau tohu Bibilia ma te manaˈo turai tano. Hau atu, e tia ia faatupu i te hoê huru maitai faufaa no te taa i te reira.

9. No te aha e titauhia te haehaa no te taa i te mau parau tohu Bibilia?

⁹ Te haehaa. Ua fafau Iehova i te tauturu i te taata haehaa. (Iak. 4:6) E tia ïa ia tatou ia ani i ta ˈna tauturu no te taa i te mau parau tohu Bibilia. Mai te peu e taata haehaa tatou, e farii tatou e o te tavini haapao maitai e te paari te ravea ta Iehova e faaohipa ra no te horoa mai i te maa pae varua i te taime tano. (Luka 12:42) Inaha e Atua naho Iehova, hoê noa ïa arai ta ˈna e faaohipa ra no te tauturu ia tatou ia taa i te mau pue parau mau Bibilia.—Kor. 1, 14:33; Eph. 4:4-6.

10. Eaha te haapii mai i te hiˈoraa o Esther?

¹⁰ Te haapao maitai. A maiti i te hoê parau tohu ta oe e hinaaro e faahohonu atu â. Ta Esther ïa, faahitihia i roto i te tumu parau haapiiraa na mua ˈtu, i rave. Ua anaanatae o ˈna i te mau parau tohu no nia i te taeraa mai o te Mesia. Te na ô ra o ˈna: “E 15 matahiti to ˈu i to ˈu imiraa i te haapapuraa e ua tohuhia tera mau parau hou te tau o Iesu.” I to ˈna tuatapaparaa i te mau otaro o te miti Pohe, papu roa ˈtura ia ˈna i te reira. Te faatia ra Esther: “Ua papaihia te rahiraa o teie mau otaro hou te tau o Iesu, mea papu ïa e no ǒ mai te Bibilia i te Atua ra.” Ua oaoa roa o ˈna no te mea na ˈna iho i rave i te mau maimiraa. No to ˈna haapao maitai, ua tuatapapa maite oia e rave rahi parau tohu Bibilia. Te na ô ra o ˈna: “Ua papu ia ˈu i teie nei e parau mau anaˈe ta te Bibilia!”

11. No te aha mea faufaa ia papu ia tatou e mea mau te Bibilia?

¹¹ Ia ite tatou mea nafea te mau parau tohu Bibilia i te tupuraa, e tiaturi papu tatou ia Iehova e i ta ˈna aratairaa. Maoti te mau parau tohu Bibilia, ua papu ia tatou e noa ˈtu te rahi o te fifi i teie mahana, e maitai mai te oraraa a muri aˈe. E hiˈopoa anaˈe e piti parau tohu a Daniela o te tupu ra i to tatou nei tau. Ia taa ia tatou i te auraa o teie na parau tohu, e rave tatou i te mau faaotiraa paari.

12. Eaha ta te avae “auri anoihia i te araea” e faahohoˈa ra? (Daniela 2:41-43)

¹² A taio i te Daniela 2:41-43. I roto i ta ˈna moemoeâ, ua ite Nebukanesa  i te hoê tii ua hamanihia te avae i te “auri anoihia i te araea.” Ia faaauhia teie parau tohu i te tahi atu o te buka Daniela e te buka Apokalupo, e taa ia tatou e faahohoˈa te reira i te hau Beretane Marite, te hau puai roa ˈˈe ïa i teie mahana. Te parau ra Daniela e “e riro taua faatereraa arii ra i te puai, i te paruparu atoa râ.” No te aha? No te mea eita to ˈna huiraatira faahohoˈahia i te araea e auraro i ta ˈna faatereraa faahohoˈahia i te auri. b

13. Eaha te parau mau ta tatou e haapii mai maoti teie parau tohu?

¹³ E rave rahi parau faufaa te haapii mai i te tatararaa a Daniela no nia i te huru o te tii, i to ˈna avae iho â râ. A tahi, ua faaite te hau Beretane Marite i to ˈna puai na roto e rave rau ravea. Ua upootia o ˈna i te Tamaˈi rahi matamua e te piti atoa. Ua iti mai râ to ˈna puai e e iti mai â no te mea ua amahamaha to ˈna huiraatira e e patoi ratou i te hau faatere. A piti, o te hau Beretane Marite te puai hopea hou te Faatereraa arii a te Atua e haamou ai i te mau faatereraa taata atoa. Noa ˈtu e aro mai te tahi mau nunaa i te hau Beretane Marite, eita ratou e faataahuri ia ˈna. Inaha fatata roa “te ofai,” aore ra te Faatereraa arii a te Atua, i te tairi i te avae o te tii, oia hoi te hau Beretane Marite.—Dan. 2:34, 35, 44, 45.

14. E nafea teie parau tohu e tauturu ai ia tatou ia rave i te faaotiraa maitai?

¹⁴ Ua papu anei ia outou e mea mau te parau tohu a Daniela no nia i te avae auri anoihia i te araea? Mai te peu e e, e taui te reira i to outou oraraa. Ei hiˈoraa, eita outou e haapue i te taoˈa e te moni i roto i te hoê ao o te fatata roa i te haamouhia. (Luka 12:16-21; Ioa. 1, 2:15-17) E taa atoa ia outou te faufaaraa ia tutava i te poro e i te faariro i te taata ei pǐpǐ. (Mat. 6:33; 28:18-20) Ua tuatapapa anaˈe outou i teie parau tohu, a ui ia outou iho: ‘Ua papu anei ia ˈu e fatata roa te Faatereraa arii a te Atua i te haamou i te mau faatereraa taata atoa? Eaha ta ta ˈu mau faaotiraa e faaite ra?’

15. O vai “te arii no apatoerau” e “te arii no apatoa” i teie mahana? (Daniela 11:40)

¹⁵ A taio i te Daniela 11:40. E piti arii, aore ra hau faatere, ta te Daniela pene 11 e faahiti ra. Te aro ra raua no te ite o vai te hau puai roa ˈˈe. Ia faaau tatou i teie parau tohu Bibilia i te tahi atu, e taa ia tatou o Rusia e te mau fenua e turu ra ia ˈna “te arii no apatoerau” e o te hau Beretane Marite “te arii no apatoa.” c

16. Eaha ta te mau tavini a te Atua i raro aˈe i te faatereraa a “te arii no apatoerau” e faaruru ra?

¹⁶ E hamani ino “te arii no apatoerau” i te mau tavini a te Atua. Ua taparahihia e ua tuuhia vetahi mau Ite no Iehova i te fare auri no to ratou faaroo. Noa ˈtu râ, aita te mau taeae e tuahine i mǎtaˈu noa ˈˈe, ua puai atu â râ to ratou faaroo. No te aha? No te mea ua tohuhia i roto i te buka Daniela e e hamani-ino-hia te nunaa o te Atua. d (Dan. 11:41) A ite ai i  te reira, e puai atu â to tatou hinaaro e vai taiva ore ia Iehova.

17. Eaha ta te mau tavini a te Atua i raro aˈe i te faatereraa a “te arii no apatoa” e faaruru ra?

¹⁷ I tahito ra, i aro na “te arii no apatoa” i te mau tavini a Iehova. I te roaraa o te Tamaˈi rahi matamua e te piti atoa, e rave rahi taeae tei tapeahia no to ratou tiaraa amui ore e aita te mau tamarii Ite no Iehova i fariihia i te fare haapiiraa. I teie râ mau matahiti i mairi aˈenei, ua tamatahia te taiva ore o te mau tavini a Iehova na roto i te tahi atu ravea. Ei hiˈoraa, i te tau maitiraa, e faahemahia paha te Kerisetiano ia turu i te hoê pae poritita. Noa ˈtu eita o ˈna e haere tino roa e maiti, i roto râ i to ˈna aau e feruriraa, ua turu ïa o ˈna i te hoê pae. No reira e mea faufaa ia faaite i to tatou tiaraa amui ore i roto i ta tatou mau ohipa e to tatou mau manaˈo e aau.—Ioa. 15:18, 19; 18:36.

18. Eaha to tatou huru ia aro “te arii no apatoerau” i to ˈna enemi? (A hiˈo atoa i te hohoˈa.)

 ¹⁸ E hepohepo roa te taata o te ore e tiaturi ra i te mau parau tohu Bibilia ia ite ratou i “te arii no apatoa” e aro i “te arii no apatoerau.” (Dan. 11:40) I te mea e e paura atomi ta raua toopiti, e nehenehe ïa ta raua e haamou roa i te fenua taatoa. Ua ite râ tatou e eita Iehova e vaiiho i te reira ia tupu. (Isa. 45:18) Eita ïa tatou e haapeapea, e puaihia râ to tatou faaroo ia ite tatou i te au-ore-raa i rotopu i “te arii no apatoerau” e “te arii no apatoa.” Ua papu ia tatou e ua piri roa mai te hopea o teie nei ao.

19. Aita anaˈe tatou e taa ra i te hoê parau tohu Bibilia, eaha ta tatou e papu?

¹⁹ Aita tatou i ite e nafea te tahi mau parau tohu Bibilia e tupu ai. Aita atoa hoi Daniela i taa i te auraa o te mau parau atoa ta ˈna i papai. (Dan. 12:8, 9) Ia ore noa ˈtu râ tatou e taa e nafea te hoê parau tohu e tupu ai, te auraa anei ïa eita roa te reira e tupu? E ere! E nehenehe tatou e tiaturi e e faaite mai Iehova i te reira i te taime tano, mai ta ˈna i rave i tahito ra.—Am. 3:7.

20. Eaha te mau parau tohu Bibilia faahiahia mau te fatata i te tupu e eaha te tia ia tatou ia rave?

²⁰ Fatata roa e faaroohia ˈi te pii “te hau e te ati ore.” (Tes. 1, 5:3) I reira te mau faatereraa atoa o te fenua e haamou ai i te mau haapaoraa hape. (Apo. 17:16, 17) I muri iho, e aro ratou i te nunaa o te Atua. (Ezk. 38:18, 19) Ia oti taua mau ohipa ra, i reira te tamaˈi hopea ra o Aramagedo e tupu ai. (Apo. 16:14, 16) Papu maitai, fatata roa te reira i te tupu. A tiai noa ˈi râ, e tamau anaˈe i te faaite i to tatou mauruuru i to tatou Metua i te raˈi ma te vai ara i te mau parau tohu Bibilia e ma te tauturu ia vetahi ê ia taa i te reira.