Te haapapu ra te Bibilia e nehenehe Iehova e tohu eaha te tupu a muri aˈe. (Isa. 45:21) Aita i horoahia pauroa te haamaramaramaraa e nafea aore ra afea o ˈna e na reira ˈi. Aita atoa tatou i ite i te hohonuraa o to ˈna ite. No reira, eita e haere ia tatou ia taa maitai roa i to ˈna mana e faaite atea eaha te tupu a muri aˈe. E hiˈopoa anaˈe râ i to muri nei mau manaˈo.

Aita to Iehova e taotiaraa. Tei ia ˈna ra te paari mau, e aita e hopearaa to te reira. E nehenehe ïa o ˈna e tohu i te mau mea atoa ta ˈna e hinaaro. (Roma 11:33) I te mea râ e haavî o ˈna ia ˈna iho ma te tia roa, e nehenehe ta ˈna e maiti i te ore e ite i te mau mea atoa o te tupu a muri aˈe.—A hiˈo atoa i te Isaia 42:14.

E ohipa Iehova ia tupu to ˈna hinaaro. Eaha te tuatiraa i rotopu i teie parau e to ˈna mana e ite atea eaha te tupu a muri aˈe? Te faataa ra te Isaia 46:10: “Mai te haamataraa, e tohu vau i te hopearaa, e mai mutaa iho ra, te mau mea aita â i ravehia ˈtura. E parau vau: ‘E tupu ta ˈu faaotiraa, e e rave au i te mau mea atoa tei au ia ˈu.’ ”

E faaite atea Iehova eaha te tupu a muri aˈe no te mea e mana to ˈna no te faatupu i te reira. Eita e titauhia ia Iehova ia ite i te hopearaa mai ta tatou e rave nei no te hoê hohoˈa teata, e mataitai tatou i te hopearaa o te reira. E nehenehe râ ta Iehova e faaoti ia tupu te tahi ohipa i te taime ta ˈna i faataa ê na, a faatupu roa ˈtu ai te reira i te taime tano.—Exo. 9:5, 6; Mat. 24:36; Ohi. 17:31.

No reira te Bibilia e faaohipa ˈi i te mau taˈo “faaineine” e “opua” no te faataa i ta Iehova e rave nei no nia i te tahi mau ohipa e tupu a muri aˈe. (Arii 2, 19:25, nota; Isa. 46:11) No roto mai teie mau taˈo i te tahi atu taˈo e tuati ra i te parau hurihia “potera.” (Ier. 18:4) Mai te hoê potera aravihi o te nehenehe e rave i te araea no te hamani i te hoê farii nehenehe, e nehenehe atoa Iehova e hamani aore ra e faaohipa i te mau mea atoa no te faatupu i to ˈna hinaaro.—Eph. 1:11.

E vaiiho Iehova i te taata tataitahi ia rave i ta ˈna iho mau faaotiraa. Eita o ˈna e faatere i te mau tuhaa atoa o to tatou oraraa. Eita atoa oia e turai i te taata maitai ia rave i te tahi mea a roohia ˈtu ai ratou i te ati. E vaiiho o ˈna i te taata atoa ia maiti eaha ta ratou e hinaaro e rave a faaitoito atu ia ratou ia maiti i te rave i te mea maitai.

E hiˈopoa anaˈe e piti hiˈoraa. E hiˈo na mua tatou i tei tupu no to Nineve. Ua tohu Iehova e e haamou o ˈna i teie oire no ta ratou mau ohipa ino. I te tatarahaparaa râ to Nineve, “taui ihora [Iehova] i ta ˈna i opua e aita ˈtura i tuu faahou mai i te ati ta ˈna i parau e tuu mai oia.” (Iona 3:1-10) Ua taui Iehova i ta ˈna opuaraa no te mea ua faaoti to Nineve i te tatarahapa i to ratou faarooraa i te faaararaa a Iehova.

Te piti o te hiˈoraa no nia ïa i te parau tohu e faaora Kuro i te ati Iuda tei hopoi-ê-hia e e patu-faahou-hia te hiero o Iehova. (Isa. 44:26–45:4) Ua rave iho â te arii Peresia ra o Kuro mai tei tohuhia. (Ezr. 1:1-4) Tera râ, aita Kuro i haamori ia Iehova, te Atua mau. Ua faaohipa Iehova ia Kuro no te faatupu i te tahi mau parau tohu, ua vaiiho râ oia ia Kuro ia maiti o vai ta ˈna e haamori.—Mas. 21:1.

Parau mau, ua hiˈopoa tatou i te tahi noa mau tuhaa no nia i to Iehova mana e faaite atea eaha te tupu a muri aˈe. Te tanoraa mau, aita hoê aˈe taata e nehenehe e taa i te taatoaraa o ta Iehova mau raveraa. (Isa. 55:8, 9) Te mea papu râ, maoti ta Iehova i faaite mai, ua puaihia to tatou tiaturi e mea tano ta ˈna mau raveraa atoa, oia atoa ta ˈna e tohu no a muri aˈe.