UA TAPAO anei oe i teie mahana e mea rahi te taata e manaˈo ra e mea tano roa ia fanaˈo ratou i te tahi tiaraa aore ra toroa faahiahia aˈe? No ratou, eita e navai ta ratou e fanaˈo ê ra. E huru feruriraa miimii ïa tera e te mauruuru ore. Mai tera te huru o te taata i teie mau mahana hopea ta te Bibilia ïa e parau ra.​—Tim. 2, 3:2.

E ere no teie nei tera huru miimii. A hiˈo na ia Adamu raua Eva. Ua maiti raua e faaoti no raua iho eaha te mea maitai e te mea ino. O tatou pauroa râ te faaruru nei i te mau faahopearaa o ta raua faaotiraa. A hiˈo atoa na i te arii Uzia no Iuda. Ua manaˈo o ˈna e nehenehe ta ˈna e tutui i te mea noˈanoˈa i roto i te hiero. Aita râ to ˈna e tiaraa no te na reira. (Par. 2, 26:18, 19) Ua manaˈo atoa te mau Pharisea e te mau Sadukea e haamaitai-rahi-hia ratou e te Atua, no te mea o Aberahama to ratou tupuna.​—Mat. 3:9.

Te farerei nei tatou i te taata miimii o te haapao noa ia ratou iho. E nehenehe hoi tatou e peehia i to ratou huru. (Gal. 5:26) E haamata paha tatou i te manaˈo e mea tano roa ia fanaˈo tatou i te tahi tiaraa aore ra toroa faahiahia aˈe. E nafea ïa ia paruru ia tatou? Na mua roa, mea faufaa ia taa ia tatou to Iehova manaˈo. E tauturu mai ïa e piti aratairaa Bibilia.

Na Iehova e faaoti eaha te horoa mai. E hiˈo mai tatou i te tahi mau tupuraa.

•   No te hoê tane faaipoipo, e hinaaro o ˈna ia faatura ta ˈna vahine ia ˈna. No ta ˈna vahine, ia here ïa ta ˈna tane ia ˈna. (Eph. 5:33) No Iehova, mea tano iho â ia here na hoa faaipoipo te tahi i te tahi. (Kor. 1, 7:3) Mea tano atoa ia titau te mau metua ia faaroo ta ratou mau tamarii ia ratou, e mea tano ia hinaaro te mau tamarii ia here e ia aupuru to ratou mau metua ia ratou.​—Kor. 2, 12:14; Eph. 6:2.

• Mea tano roa ia faatura tatou i te mau matahiapo e rohi nei i roto i te amuiraa. (Tes. 1, 5:12) Teie râ, aita e tiaraa to ratou e faatere i to ratou mau taeae e tuahine.​—Pet. 1, 5:2, 3.

• Ua horoa te Atua i te mau hau faatere i te tiaraa e faaaufau i to ratou huiraatira i te tute e titau atoa ia faaturahia ratou.​—Roma 13:1, 6, 7.

E horoa mai Iehova hau aˈe ma te here. No te mea e taata hara tatou, e pohe iho â tatou. (Roma 6:23) Tera râ, te horoa mai ra Iehova e rave rahi haamaitairaa no to ˈna here taiva ore ia tatou. (Sal. 103:10, 11) No to ˈna hamani maitai rahi e fanaˈo ai tatou pauroa te haamaitairaa no ǒ mai ia Iehova ra.​—Roma 12:6-8; Eph. 2:8.

E vai ara tatou i te huru feruriraa o teie nei ao. Eita paha tatou e ite oioi e te haamata ra tatou i te manaˈo mai to teie nei ao. Mea ohie roa ia pee i to ratou huru feruriraa. Ta Iesu ïa i faaite na roto i te aamu ta ˈna i faatia no nia i te mau rave ohipa tei aufauhia hoê denari. I te poipoi roa to vetahi haamataraa i roto i te faaapu vine i raro aˈe i te mahana e ahiahi noa ˈtu. Area te tahi atu ra, hoê noa ïa hora ohipa ta ratou. Ua manaˈo te pǔpǔ matamua e hau aˈe ta ratou moni, no te mea ua fetu ratou te mahana taatoa. (Mat. 20:1-16) Na roto i teie aamu, ua hinaaro Iesu e faataa i ta ˈna mau pǐpǐ i te faufaaraa ia mauruuru ratou i ta Iehova e oaoa ra i te horoa ˈtu.

Ia mauruuru noa tatou, eiaha râ e titau atu â. (Tes. 1, 5:18) Ua vaiiho mai te aposetolo Paulo i te hiˈoraa maitai. Aita o ˈna i titau noa ˈˈe i to ˈna mau taeae i Korinetia ia  aupuru ia ˈna, noa ˈtu mea tano roa ia ani o ˈna. (Kor. 1, 9:11-14) Ia mauruuru atoa ïa tatou i tei horoahia mai, eiaha râ e titau atu â.

Ia haehaa noa tatou. Te taata o te manaˈo e mea faahiahia o ˈna, e titau o ˈna hau aˈe i ta ˈna e fanaˈo ê na ra. Na te haehaa ïa e paruru ia tatou i tera manaˈo tano ore.

E hiˈoraa maitai ta Daniela i vaiiho mai. Mea haehaa taua peropheta ra. E nehenehe hoi ta ˈna e titau i te tiaraa aore ra te toroa faahiahia aˈe. Inaha e tamaiti huiarii o ˈna, mea haviti, mea maramarama e mea ite. (Dan. 1:3, 4, 19, 20) Aita râ, ua vai haehaa noa o ˈna, e no reira Iehova i here roa ˈi ia ˈna.​—Dan. 2:30; 10:11, 12.

E patoi anaˈe ïa i te huru feruriraa miimii o teie nei ao. Ia tamau noa râ tatou i te mauruuru i te mau haamaitairaa atoa ta Iehova e horoa mai ra no to ˈna hamani maitai rahi.