Mea puai roa to ˈu na metua i roto i te faaroo Katolika. I to raua râ haapiiraa i te iˈoa o Iehova i roto i te Bibilia, riro atura raua ei Ite no Iehova itoito mau. Ua faaea to ˈu papa i te tarai i te mau hohoˈa o Iesu. Ua faaohipa râ o ˈna i tera aravihi no te faariro i te piha i raro aˈe i to matou fare ei Piha a te Basileia. Tera te Piha a te Basileia matamua i San Juan, i Manille te oire pu no Philipino.

I to ˈu fanauraahia i 1952, ua haapii to ˈu na metua ia ˈu no nia ia Iehova mai ta raua i rave no to ˈu mau taeae e tuahine. E pae tamaroa e e toru tamahine, o vau te hopea. A paari mai ai, ua faaitoito mai to ˈu papa ia taio vau hoê pene o te Bibilia i te mau mahana atoa. Ua haapii mâua papa e rave rahi atu â mau buka a te faanahonahoraa. I te tahi taime, e titau manihini to ˈu na metua i te mau tiaau haaati e te mau taeae o te Betela ia faaea i to matou fare. Ua oaoa e ua itoito roa matou a faaroo ai i ta ratou mau faatiaraa. Ua turai te reira ia matou ia tuu i te taviniraa ia Iehova i te parahiraa matamua i roto i to matou oraraa.

Mea rahi ta ˈu i haapii mai i te hiˈoraa o to ˈu na metua. I te poheraa to ˈu mama no te maˈi ino mau, ua rave mâua papa i te taviniraa pionie i te matahiti 1971. Teie râ i 1973, i te 20raa o to ˈu matahiti, ua pohe to ˈu papa. Ua moˈemoˈe roa vau inaha ua pohe to ˈu na metua. Ua tauturu mai râ te tiaturiraa “papu e te aueue ore” o te Bibilia ia tapea i te hoê feruriraa maitai e ia vai piri noa ia Iehova. (Heb. 6:19) I muri noa ˈˈe i te poheraa o to ˈu papa, ua tonohia vau ei pionie taa ê i te hoê motu atea i Coron, i te mataeinaa no Palawan.

E 21 matahiti to ˈu i to ˈu taeraa ˈtu i Coron. No te mea râ ua paari au i te oire rahi, ua huru ê roa vau i te iteraa e mea iti roa te uira, te pape, aore ra te faurao i taua motu ra. Noa ˈtu te vai ra te tahi mau taeae, aita e pionie no te apiti mai ia ˈu, e i te tahi taime, o vau anaˈe tei haere e poro. I te avaˈe matamua, ua mihi roa vau i to ˈu fetii e to ˈu  mau hoa. E taˈi noa vau i te po, a hiˈo noa ˈi te mau fetia. Ua hinaaro roa vau e faaea i ta ˈu taviniraa e e hoˈi i te fare.

Ia moˈemoˈe noa ˈtu vau, i reira vau e haamahora ˈi i to ˈu aau ia Iehova. E haamanaˈo vau i te mau manaˈo faaitoito ta ˈu i taio i roto i te Bibilia e i ta tatou mau papai. O te Salamo 19:14 ïa tei puta noa mai. Ua taa ia ˈu e e riro Iehova ei ‘Mato e ei Faaora’ no ˈu mai te peu e feruriruri noa vau i te mau manaˈo ta ˈna e au, ta ˈna mau ohipa e to ˈna mau huru maitatai. Ua tauturu rahi mai te tumu parau “E ere o oe anaˈe” a o Te Pare Tiairaa. Ehia taime to ˈu taio-noa-raa te reira. I te taime o vau anaˈe, e au ra e tei ia ˈu ra Iehova. Ua riro ïa te reira ei taime faufaa roa no ˈu no te pure, no te haapii e no te feruriruri.

I muri noa ˈˈe i to ˈu taeraa ˈtu i Coron, ua faatoroahia vau ei matahiapo. Inaha o vau anaˈe te matahiapo, na ˈu ïa e faatere i te Haapiiraa no te taviniraa Kerisetiano, te Putuputuraa no te taviniraa, te Haapiiraa buka a te amuiraa e te Haapiiraa o Te Pare Tiairaa. Na ˈu atoa e vauvau i te oreroraa parau i te mau hebedoma atoa. Te mea papu, no tera rahiraa ohipa pae varua ta ˈu, aita vau i moˈemoˈe faahou!

Ua au roa vau i te pororaa i Coron. Ua bapetizohia vetahi o ta ˈu mau piahi. Ua faaruru atoa râ vau i te atu mau fifi. I te tahi taime, no te tapae i te tuhaa fenua no te pororaa, e titauhia afa mahana inaha mea na raro noa vau i te haere. Aita atoa vau i ite ihea e taoto ai ia tapae atu vau. I roto i teie mau tuhaa fenua, te vai atoa ra te mau motu nainai. Pinepine au i te tere na nia i te mau poti no te haere i taua motu ra, noa ˈtu mea puai te vavea e noa ˈtu aita vau i ite i te ˈau. I te roaraa o taua mau tupuraa ra, ua paruru e ua aupuru maitai Iehova ia ˈu. I muri iho roa to ˈu taaraa e ua faaineine Iehova ia ˈu no te faaruru i te tahi atu mau fifi.

I 1978, ua tonohia vau i Papua i te pae apatoerau i Auteralia. E fenua mouˈa roa Papua, hoê â faito rahi to teie fenua e to te fenua Paniora. Ua maere roa vau i te iteraa fatata e toru mirioni taata to reira e ua hau atu 800 reo tei paraparauhia ra. Auaˈe râ, e paraparau te rahiraa o te taata i te reo Mélanésie pii-atoa-hia Tok Pisin.

Ua tavini au i roto i te hoê amuiraa reo Beretane i te oire pu no Port Moresby no te hoê taime poto. I muri iho, ua tonohia vau i te hoê amuiraa Tok Pisin e ua apiti au i te hoê pǔpǔ no te haapii i tera reo. Ua faaohipa vau i ta ˈu i haapii mai no te pororaa. Ua tauturu mai te reira ia haapii oioi au i te reo. Aita i maoro, ua nehenehe au e horoa i te hoê oreroraa parau na roto i te reo Tok Pisin. Ua maere roa vau, aita hoi i raea hoê matahiti i to ˈu taeraa ˈtu i Papua e ua faatoroahia vau ei tiaau haaati no te faaitoito i te mau amuiraa reo Tok Pisin.

No te mea mea atea roa te mau amuiraa tataitahi, ua titauhia ia faanaho vau e rave rahi tairururaa haaati e ia ratere e rave rahi taime. I te omuaraa, ua moˈemoˈe roa vau no te mea e fenua apî, e reo apî, e mea taa ê atoa te peu tumu. No te mea e fenua mouˈa roa e aita e purumu, ua titauhia ia tere au na nia i te manureva fatata  pauroa te hebedoma no te farerei i te mau amuiraa. I te tahi taime, o vau anaˈe i roto i te hoê manureva pê. Aita iho â ïa i atea ˈtu i te riaria ta ˈu i faaruru a tere ai na nia i te poti!

Mea iti roa te taata e niuniu afaifai ta ratou, e hapono ïa vau i te mau rata i te mau amuiraa. Pinepine au i te tapae hou a tae mai ai ta ˈu mau rata, e ani ïa vau i to reira mau taata ihea te mau Ite no Iehova e faaea ˈi. E ia farerei ai au i te mau taeae, e farii maitai ratou ia ˈu, a faaite roa mai ai i to ratou here e mauruuru rahi. I reira vau e haamanaˈo ai i te tumu vau e rave ai i teie mau haapaeraa. Ua tauturu noa mai Iehova ia ˈu i roto e rave rahi tupuraa, e ua piri roa ˈtu â vau ia ˈna.

I te putuputuraa matamua i te hoê motu piihia Bougainville, ua farerei au i na hoa faaipoipo e mata oaoa to raua. Tapiri maira raua e ani maira ia ˈu: “Te haamanaˈo ra oe ia mâua?” Haamanaˈo atura vau e ua poro vau ia raua i to ˈu taeraa ˈtu i Port Moresby. Ua haamata vau i ta raua haapiiraa Bibilia e i muri iho, ua ani au i te hoê taeae ia faatere i ta raua haapiiraa. I teie nei, ua bapetizohia raua! Teie ïa hoê o te mau haamaitairaa ta ˈu i fanaˈo i to ˈu taviniraa e toru matahiti i Papua.

Hou a faarue ai i te motu Coron i 1978, ua farerei au ia Adel, te hoê tuahine haviti mau e te itoito. E pionie tamau oia e e piti tamarii ta ˈna, o Samuel raua Shirley. Na ˈna atoa i aupuru i to ˈna metua vahine ruhiruhia. I Me 1981, ua hoˈi au i Philipino no te faaipoipo ia Adel. I to mâua faaipoiporaa, mâua toopiti ïa tei tavini ei pionie tamau e ua aupuru maitai mâua i te utuafare taatoa.

Noa ˈtu e utuafare to ˈu, ua faatoroa-faahou-hia vau ei pionie taa ê i 1983, e ua tonohia vau i te motu Linapacan, i Palawan. O matou pauroa ïa tei haere i taua vahi moˈemoˈe ra e aita e Ite no Iehova i reira. Hoê matahiti i muri mai, ua pohe te mama o Adel. Ua faaitoito râ mâua i roto i te pororaa e na te reira i tauturu mai ia faaoromai tamau i roto i teie ati. Ua haamata mâua e rave rahi haapiiraa Bibilia i Linapacan e ua nuu ratou i mua i te pae varua. Aita i maoro, ua hinaaro atoa ratou e haere i te putuputuraa. Aita râ e Piha a te Basileia. Ua patu ïa matou i te hoê piha nainai no matou. I muri aˈe noa e toru matahiti, ua oaoa roa matou i te iteraa 110 taata tei haere mai i te Oroa haamanaˈoraa. E rave rahi o ratou tei bapetizohia ia matou i faarue i taua vahi ra.

I 1986, ua tonohia vau i te motu no Culion, te hoê motu te vai ra te mau taata lepera. I muri iho, ua riro atoa Adel ei pionie taa ê. I te omuaraa, ua mǎtaˈu mâua ta ˈu vahine i te poro i te mau taata lepera. Ua tamǎrû râ te feia poro ia mâua ma te faaite mai e ua rapaauhia teie mau taata lepera e eita ïa mâua e peehia i tera maˈi. I haere mai atoa na vetahi feia maˈi i te mau putuputuraa i te fare o te hoê tuahine. Aita i maoro, aita mâua Adel i mǎtaˈu faahou i te poro ia ratou. Ua oaoa roa râ mâua i te faaite ia ratou i te tiaturiraa o te Bibilia. I manaˈo na ratou e aita te Atua e te taata e tâuˈa ra ia ratou. Mea putapû mau ia ite i teie mau taata maˈi e oaoa ra, inaha ua taa ia ratou e ia tae i  te hoê mahana e ore roa te mau maˈi atoa!—Luka 5:12, 13.

Mea nafea ta mâua na tamarii i te faatanoraa ia raua i te huru oraraa i Culion? Ua titau manihini ïa mâua Adel e piti tuahine apî no Coron ia apiti mai ia matou. E riro ïa raua ei hoa maitatai no ta mâua na tamarii. Ua oaoa roa Samuel, Shirley, e na piti tuahine i te poro i te taata. Ua haapii ratou i te Bibilia i e rave rahi tamarii, na mâua Adel ïa e faatere i te haapiiraa a to ratou mau metua. Ua faatere matou i te haapiiraa o ahuru ma hoê utuafare. Ua rahi roa mai te haapiiraa Bibilia e ua nuu te mau piahi i mua i te pae varua, ua nehenehe ïa matou e haamau i te hoê amuiraa apî!

I te omuaraa, o vau anaˈe te matahiapo i ǒ. No reira, ua ani mai te amaa ia faatere au i te putuputuraa hebedoma no na feia poro e vaˈu i Culion. E ia na reira atoa no na feia poro e iva i te oire iti o Marily. E tere ïa vau e toru hora na nia i te poti. I muri aˈe i te mau putuputuraa, e haere na avae noa matou pauroa na nia i te mouˈa no te faatere i te mau haapiiraa i te oire o Halsey. E titauhia e rave rahi hora no te tapae i taua oire ra.

Inaha, mea rahi tei farii i te parau mau i Marily e i Halsey, ua patu ïa matou e piti Piha a te Basileia i na piti vahi. Mai tei ravehia i Linapacan, ua horoa te mau taeae e te rima tauturu i tei hinaarohia no te paturaa. E nehenehe te Piha a te Basileia i Marily e farii 200 taata e e nehenehe matou e faarahi atu â no te mau tairururaa.

I 1993, inaha ua paari te mau tamarii, ua haamata ïa mâua Adel i te tavini i roto i te tuhaa haaati i Philipino. I muri iho, i 2000, ua haere au i te Haapiiraa faaineineraa no te taviniraa no te faaineine ia ˈu ei taeae haapii. Ua manaˈo vau e eita e maraa ia ˈu tera hopoia, ua faaitoito noa râ Adel ia ˈu. Ua haamanaˈo mai o ˈna e e horoa Iehova i te puai no te amo i taua hopoia apî ra. (Phil. 4:13) Mea papu no Adel i teie parau no te mea ua rave o ˈna i ta ˈna tuhaa taviniraa noa ˈtu mea maˈi roa o ˈna.

I 2006, ua itehia e maˈi Parkinson to Adel. Ua hitimahuta roa mâua! I to ˈu aniraa ia ˈna ia faaea  i ta mâua taviniraa no te haapao ia ˈna, parau mai ra o ˈna: “Ee, a imi na i te hoê taote o te nehenehe e tauturu mai. Ua papu ia ˈu e tauturu mai iho â Iehova ia faaea tâua i roto i tera taviniraa.” I muri aˈe e ono matahiti, ua tutava noa Adel i roto i ta mâua taviniraa e aita o ˈna i amuamu noa ˈˈe. I te mea e eita ta ˈna e nehenehe faahou e hahaere, ua poro ïa o ˈna maoti to ˈna parahiraa turairai. Taeraa hoê taime mea fifi roa no ˈna ia paraparau, e faahiti noa ïa oia hoê aore e piti taˈo no te pahono i te putuputuraa. Mea rahi te taeae e tuahine tei hapono i te mau poroi haamauruururaa ia Adel, no to ˈna hiˈoraa maitai e to ˈna faaoromai tamau tae roa ˈtu i to ˈna poheraa i 2013. Ua tavini au fatata 30 matahiti e Adel, te hoê hoa faaipoipo here e te taiva ore. No reira, i to ˈna poheraa, ua oto roa vau e ua moˈemoˈe faahou vau.

Ua hinaaro Adel ia tamau noa vau i ta ˈu taviniraa, e tera iho â ta ˈu i rave. Ua haa rahi au i roto i te taviniraa, e ua tauturu te reira ia ˈu ia ore e moˈemoˈe. Mai 2014 tae atu i 2017, ua anihia vau ia farerei i te mau amuiraa reo Tagalog i te mau fenua ua opanihia ta tatou mau ohipa. I muri aˈe, ua farerei au i te mau amuiraa reo Tagalog i Taïwan, i Marite e i Kanada. I 2019, ua faatere au i te Haapiiraa no te feia poro evanelia na roto i te reo Beretane i Initia e i Thaïlande. Ua oaoa roa vau i te amoraa i teie mau hopoia. E oaoa roa vau ia rohi au no te tavini atu â ia Iehova.

I roto i ta ˈu taviniraa, ua rahi atu â to ˈu here i te mau taeae e tuahine ta ˈu i farerei, no reira e ere roa ˈtu i te mea ohie ia vaiiho ia ratou. I roto i tera mau tupuraa, ua titauhia ia tiaturi au ia Iehova. Ua turu noa mai o ˈna ia ˈu, e ua tauturu mai te reira ia ˈu ia farii ma to ˈu aau taatoa i te mau tauiraa e tupu mai. I teie mahana, te tavini ra vau ei pionie taa ê i Philipino. Ua au roa vau i ta ˈu amuiraa apî, e au i te utuafare tahoê e te haapao maitai. Ua haapeu atoa vau ia Samuel raua Shirley inaha te pee nei raua i te faaroo o Adel.—Ioa. 3, 4.

Parau mau, ua faaruru vau e rave rahi fifi, tae roa ˈtu i te iteraa i ta ˈu vahine ia mauiui a pohe atu ai no te maˈi ino mau. Ua titauhia atoa ia farii vau i te mau tauiraa apî i roto i to ˈu oraraa. Ua ite râ vau e “aita hoi [Iehova] i atea ia tatou tataitahi.” (Ohi. 17:27) E ere te rima o Iehova “i te mea poto roa” no te turu e no te haapuai i ta ˈna mau tavini noa ˈtu tei te vahi atea roa ratou. (Isa. 59:1) O Iehova to ˈu Mato, tei pihai iho noa mai oia ia ˈu i te roaraa o to ˈu oraraa, e te mauruuru rahi nei au ia ˈna. E ere roa ˈtu o vau anaˈe.