1. No te fanaˈo i te re, eaha te titauhia ia tatou paatoa ia rave?

 E HINAARO anei outou e horo i roto i te hoê hororaa fifi mau mai te peu mea maˈimaˈi aore ra mea paruparu outou? Eita paha! Tera râ, te parau ra te aposetolo Paulo tei roto te mau Kerisetiano mau i te hoê hororaa. (Heb. 12:1) E feia ruhiruhia tatou aore ra apî, e tino oraora aore ra paruparu, e titauhia ia tatou paatoa ia faaoromai tamau e tae noa ˈtu i te hopea no te fanaˈo i te re ta Iehova i faaineine no tatou.—Mat. 24:13.

2. Eaha tei tia ia Paulo ia parau i roto i te Timoteo 2, 4:7, 8?

² Ua tia ia Paulo ia parau: “Ua hope ia ˈu te hororaa.” (A taio i te Timoteo 2, 4:7, 8.) Eaha te hororaa ta Paulo e manaˈo ra?

3. Eaha te hororaa ta Paulo e manaˈo ra?

³ I te tahi taime, ua faahiti Paulo i te mau tataˈuraa i tupu na i Heleni tahito no te horoa i te tahi mau haapiiraa faufaa. (Kor. 1, 9:25-27; Tim. 2, 2:5) E rave rahi taime, ua faahohoˈa oia i te huru oraraa o te Kerisetiano i te hoê hororaa. (Kor. 1, 9:24; Gal. 2:2; Phil. 2:16) E faaô te tahi taata i roto i tera “hororaa” a pûpû ai o ˈna i to ˈna ora ia Iehova e a bapetizohia ˈi. (Pet. 1, 3:21) E hope ta ˈna hororaa i te taime a horoa ˈtu ai Iehova i te re o te ora mure ore.—Mat. 25:31-34, 46; Tim. 2, 4:8.

4. Eaha ta tatou e hiˈopoa mai i roto i teie haapiiraa?

⁴ Te vai ra te tahi mau tuearaa i roto i te hoê hororaa atea e te oraraa o te hoê Kerisetiano. E toru ta tatou e hiˈopoa mai. A tahi, e titauhia ia haapao i te mau faatureraa. A piti, mea titauhia ia tiatonu noa i nia i te reni tapaeraa.  E te toru, mea titauhia ia faaoromai tamau i te fifi i te roaraa o te hororaa.

5. Eaha te mau faatureraa tei titauhia i te hoê Kerisetiano ia pee e no te aha?

⁵ Ia noaa te re i roto i te hoê hororaa, e titauhia i te feia horo ia pee maite i te mau faatureraa a te feia i faanaho i te hororaa. Hoê â huru atoa no tatou, mai te peu e hinaaro tatou e fanaˈo i te re o te ora mure ore, mea titauhia ia pee maite tatou i te hiˈoraa ta te Mesia i vaiiho i te mau Kerisetiano. (Ohi. 20:24; Pet. 1, 2:21) Tera râ, te hinaaro nei Satani e to ˈna mau taata ia hahi ê tatou a “horo faahou” atu ai tatou e o ratou. (Pet. 1, 4:4) Te faaino nei ratou i to tatou huru oraraa ma te parau, to ratou eˈa te mea maitai aˈe e te aratai i te tiamâraa. E parau hape râ te reira!—Pet. 2, 2:19.

6. Eaha ta outou e haapii mai i te hiˈoraa o Brian?

⁶ E ite atu iho â te taata o te horo e te feia o te ao a Satani, eita tera eˈa e aratai i te tiamâraa, i te faatîtîraa râ. (Roma 6:16) Ta te hiˈoraa ïa o Brian e haapapu ra. Ua faaitoito to ˈna na metua ia ˈna ia maiti i te eˈa e aratai i te ora. Tera râ i to ˈna apîraa, aita o ˈna i papu tera te eˈa maitai. Ua faaoti Brian e pee i te oraraa o te feia o teie nei ao. Te na ô ra Brian: “Aita vau i manaˈo noa ˈˈe e aratai te tiamâraa ta ˈu i hinaaro noa i roto roa i te peu ino. . . . Ua rahi atu â ta ˈu peu iino mai te raveraa i . . . te raau taero e te inu-hua-raa i te ava. I te mau matahiti i muri aˈe, ua rave au i te mau raau taero puai atu â a riro roa mai ai ei tîtî. . . . Haamata ˈtura vau i te hoo i te raau taero ei imiraa moni.” I muri mai râ, ua faaoti Brian i te pee i ta Iehova mau ture aveia. Faarue aˈera oia i te eˈa o teie nei ao e haamata ˈtura i ta ˈna hororaa Kerisetiano i to ˈna bapetizoraahia i 2001. Te oaoa nei Brian i te huru oraraa ta ˈna i maiti i teie nei. *

7. Ia au i te Mataio 7:13, 14, eaha na eˈa e vai ra i mua ia tatou?

⁷ Mea faufaa ia maiti maitai tatou i te eˈa. Te hinaaro nei Satani ia faarue tatou paatoa i te eˈa ôaôa “e tae atu ai i te ora” no te haere na nia i te eˈa aano tei reira te rahiraa o te taata. Aita e faatureraa i nia i tera eˈa, e aratai râ te reira i “te haamouraa.” (A taio i te Mataio 7:13, 14.) No te ore e hahi ê e no te faaea i nia i te eˈa o te ora, mea titauhia ia tiaturi tatou  ia Iehova e ia haapao i ta ˈna mau ture aveia.

8. Ia topa te hoê taata horo, eaha te titauhia ia ˈna ia rave?

⁸ I te tahi taime, e hiˈo te mau maona o te hoê hororaa atea i te purumu ia ore ratou ia topa. Ma te ore râ e haapao, e nehenehe te tahi maona e tote i nia i te tahi atu, aore ra e topa i roto i te apoo. Ia tupu noa ˈtu te reira, e tia oioi mai ratou a tamau atu ai i te horo. Eita ratou e haapao i te tumu i topa ˈi ratou, ta ratou fa, o te reni tapaeraa ïa e te re ta ratou e fanaˈo.

9. Ia hape tatou, eaha te titauhia ia rave?

⁹ I roto i ta tatou hororaa no te ora, e nehenehe tatou e hape na roto anei i te parau aore ra i te ohipa. Aore ra, e nehenehe to tatou mau hoa e rave i te tahi mea o te haapepe ia tatou. Eita tatou e maere! E feia tia ore anaˈe to nia i te eˈa ôaôa e aratai atu i te ora. I te tahi taime, e tote iho â ïa te tahi i te tahi. Te tumu ïa Paulo i parau ai e nehenehe te tahi e te tahi e hapa. (Kol. 3:13) Eiaha tatou e hiˈo noa i te mea i hapa ˈi tatou, e tiatonu anaˈe râ i te re e vai ra i mua. Ia hape tatou aore ra ia hapa noa mai vetahi ê, e tia anaˈe e e tamau anaˈe i te horo. Ia riri râ e ia inoino tatou a ore atu ai e tia mai, eita tatou e tae i te reni tapaeraa e e fanaˈo i te re. Hau atu â, e riro tatou ei haafifiraa no te tahi atu mau Kerisetiano e horo ra na nia i te eˈa ôaôa e aratai i te ora.

10. E nafea tatou ia ore e riro ei “ofai turoriraa” no vetahi ê?

¹⁰ No te ore e riro ei “ofai turoriraa” no to tatou mau hoa Kerisetiano, eita tatou e titau ia rave vetahi ê mai ta tatou e hinaaro. (Roma 14:13, 19-21; Kor. 1, 8:9, 13) Eiaha tatou ia riro mai te mau maona o teie nei ao o te tataˈu ra aore ra o te turai i te tahi atu ia noaa iho â te re ia ratou. E haapao noa tera mau maona ia ratou iho! Area tatou, eita tatou e tataˈu, e tauturu anaˈe râ i to tatou mau taeae ia tae i te reni tapaeraa e ia noaa atoa ia  ratou te re o te ora. (Gal. 5:26; 6:4) No reira, e pee anaˈe i te aˈoraa a Paulo ia imi i “to vetahi ê maitai, eiaha noa râ” i to tatou iho.—Phil. 2:4.

11. E tiatonu te feia horo i nia i te aha e no te aha?

¹¹ Eita te feia horo e hiˈo noa i te purumu, e tiatonu atoa râ ratou i nia i te reni tapaeraa. Noa ˈtu eita ratou e ite mata i tera reni, e nehenehe ratou e feruri mai te mea ra ua tapae e ua noaa te re ia ratou. E itoitohia ratou ia feruri noa i te re.

12. Eaha ta Iehova e haapapu mai ra no nia i ta tatou hororaa?

¹² I roto i ta tatou hororaa, te haapapu mai ra Iehova e noaa iho â i to ˈna nunaa te re, te ora mure ore i nia anei i te raˈi aore ra i nia i te fenua. Te faaite mai ra te mau Papai i te mau maitai e noaa mai ia fanaˈo tatou i te re. E nehenehe ïa tatou e feruri i te huru oraraa faahiahia te tiai mai ra. Ia vai noa tera tiaturiraa i roto i to tatou feruriraa e aau, eita tatou e faarue i te hororaa no te ora.

13. Eaha te taa-ê-raa e vai ra i rotopu ia tatou e te feia horo i tahito?

¹³ I Heleni i tahito, ua titauhia i te feia horo ia faaoromai i te tahi mau fifi mai te rohirohi e te mauiui. Ua titauhia ïa ia haamanaˈo i te faaineineraa ta ratou i fanaˈo e ia tiaturi i to ratou iho puai. Mai taua feia horo ra, ua faaineine-atoa-hia tatou no te hororaa. Te taa-ê-raa râ, e fanaˈo tatou i te puai no ǒ mai ia Iehova ra. Ia tiaturi tatou ia ˈna, e faaineine e e haapuai oia ia tatou no ta tatou hororaa.—Pet. 1, 5:10.

14. E nafea te Korinetia 2, 12:9, 10 e tauturu ai ia tatou ia faaruru i te fifi?

¹⁴ Ua titau-atoa-hia ia Paulo ia faaruru e rave rahi atu â fifi mai te faainoraa e te hamani-ino-raa. Ua toaruaru atoa râ Paulo i te tahi taime e ua faaoromai i te tahi mea tei riro mai ‘te hoê tara i roto i to ˈna nei tino.’ (Kor. 2, 12:7) Aita râ o ˈna i faarue i ta ˈna hororaa, ua faariro o ˈna i to ˈna mau fifi ei ravea no te turui atu â i nia ia Iehova. (A taio i te Korinetia 2, 12:9, 10.) E no te mea tera te manaˈo o Paulo, ua tauturu Iehova ia ˈna i roto i to ˈna mau fifi atoa.

15. Ia pee tatou i te hiˈoraa o Paulo, eaha ta tatou e ite?

¹⁵ E nehenehe atoa paha tatou e faainohia aore ra e hamani-ino-hia no to tatou faaroo. E roohia paha tatou i te hoê maˈi ino aore ra e faaoromai i te hepohepo rahi. Ia pee râ tatou i te hiˈoraa o Paulo, e faariro ïa tatou i tera mau fifi atoa ei ravea no te ite i te rima puai e î i te here o Iehova.

16. Noa ˈtu mea maˈimaˈi outou, eaha ta outou e nehenehe e rave?

¹⁶ Te tarava ra paha outou i nia i te hoê roˈi aore ra tei roto paha i te hoê parahiraa turairai. Ua paruparu paha to outou turi aore ra ua mohimohi te mata. Mai te peu tera to outou tupuraa, e nehenehe anei outou e tavini amui ia Iehova e te feia apî mea oraora maitai? E! E rave rahi feia ruhiruhia aore ra maˈimaˈi o te horo nei i roto i te hororaa no te ora. Eita râ ratou e turui i nia i to ratou iho puai. Te huti nei ratou i te puai na roto i te apeeraa i te mau putuputuraa Kerisetiano na roto i te niuniu aore ra ma te mataitai i te reira i muri aˈe. E te apiti atoa nei ratou i roto i te ohipa e faariro i te taata ei  pǐpǐ ma te poro i te mau taote, tuati maˈi aore ra fetii.

17. Eaha to Iehova manaˈo i te feia maˈimaˈi?

¹⁷ Eiaha e vaiiho i te maˈi ia faatoaruaru ia outou a manaˈo atu ai eita outou e nehenehe e tamau i te horo na nia i te eˈa e aratai atu i te ora. Te here nei Iehova ia outou e eita o ˈna e haamoˈe i to outou faaroo e faaoromai tamau. Teie te taime e hinaaro rahi ai outou i ta ˈna tauturu, eita roa oia e faarue ia outou, e faafatata mai râ. (Sal. 9:10) A tapao na i ta te hoê tuahine maˈimaˈi e parau ra: “Aita vau i poro rahi faahou a rahi mai ai to ˈu maˈi. Ua ite râ vau iti noa â ta ˈu e rave, te faaoaoa ra vau i to Iehova aau e ua topa roa to ˈu hau.” Ia hepohepo outou, a haamanaˈo tei pihai iho Iehova ia outou. A feruri i te hiˈoraa o Paulo e a haamanaˈo i ta ˈna mau parau faaitoito: “Te oaoa nei au i to ˈu nei mau paruparu. . . . Ia paruparu hoi au, i reira ïa vau e puai ai.”—Kor. 2, 12:10.

18. Eaha te fifi taa ê ta vetahi Kerisetiano e faaruru ra?

¹⁸ Te faaruru nei vetahi Kerisetiano i roto i te hororaa no te ora i te tahi fifi taa ê. Te hepohepo nei ratou i te pae aau e feruriraa, eita râ te taata e ite e e taa i to ratou tupuraa. No te aha râ teie mau tavini here a Iehova mai tera ˈi? Ia fati te rima o te tahi taata aore ra tei roto anaˈe oia i te parahiraa turairai, e ite te taata atoa i to ˈna fifi e e nehenehe ratou e tauturu atu ia ˈna. Area te feia e hepohepo i te pae feruriraa e aau, eita te reira e itehia na nia i to ratou huru rapaeau. Tera râ, te mauiui mau ra ratou mai te taata ua fati to ˈna rima, aita râ ratou e tauturuhia ra.

19. Eaha ta tatou e haapii mai i te hiˈoraa o Mephiboseta?

¹⁹ Mai te peu e tupuraa fifi to outou e aita te taata e taa ra ia outou, e nehenehe te hiˈoraa o Mephiboseta e faaitoito atu. (Sam. 2, 4:4) E tupuraa fifi to Mephiboseta no to ˈna pirioˈi e no te mea atoa ua hiˈo ino e ua rave te arii Davida i te ohipa tia ore i nia ia ˈna. Aita e hape ta Mephiboseta i rave. Ua tapea râ o ˈna i te feruriraa maitai ma te haapao noa i te mau mea maitai o to ˈna oraraa. Ua mauruuru oia i te mau maitai ta Davida i faaite atu ia ˈna i tahito ra. (Sam. 2, 9:6-10) A manaˈo ino ai Davida ia ˈna, aita Mephiboseta i tiatonu i nia i to ˈna mau fifi, aita o ˈna i inoino e aita atoa i faahapa ia Iehova. Ua tiatonu noa Mephiboseta i nia i tei maraa ia ˈna ia rave no te turu i te arii maitihia e Iehova. (Sam. 2, 16:1-4; 19: 24-30) Ua haapapai Iehova i te hiˈoraa maitai roa o Mephiboseta i roto i ta ˈna Parau ei haapiiraa no tatou.—Roma 15:4.

20. Eaha te tahi mau tupuraa e ahoaho ai vetahi e eaha te titauhia ia haamanaˈo ratou?

²⁰ Te ahoaho rahi nei vetahi taeae e tuahine i roto i te tahi mau tupuraa o te mau mahana atoa. Mea fifi paha no ratou ia haere i te vahi taata. Te tamau nei râ ratou i te tae i te mau putuputuraa a te amuiraa e i te mau tairururaa. Mea fifi paha no ratou ia paraparau i te feia ta ratou i ore i matau, te tutava nei râ ratou i te haere i roto i te taviniraa. Tera atoa anei to outou fifi? A haamanaˈo tei pihai iho Iehova ia outou e te mauruuru nei o ˈna i te mau tutavaraa ta outou e rave ra ma te aau atoa. Hau atu â, te faaruru atoa ra e rave rahi taeae e tuahine i te hoê â tupuraa. Ia faaoromai tamau outou, e ite-maitai-hia te puai ta Iehova e horoa ra ia outou. * (Phil. 4:6, 7; Pet. 1, 5:7) Ia tamau outou i te tavini ia Iehova noa ˈtu te maˈi, te hepohepo e te ahoaho, e mauruuru roa oia ia outou.

21. Maoti te tauturu a Iehova, eaha ta tatou paatoa e nehenehe e rave?

²¹ Te vai ra te taa-ê-raa i roto i te hororaa a teie nei ao e te hororaa a te mau Kerisetiano. I roto i te mau hororaa i faatupuhia na i Heleni, ua parau Paulo hoê anaˈe taata te haru i te re. No te upootia, mea titauhia ia oraora maitai te tino o te feia horo atoa. Area i roto i te hororaa Kerisetiano, noa ˈtu te tino maˈimaˈi, e fanaˈo te feia atoa e faaoromai tamau e tae noa ˈtu te hopea i te re o te ora mure ore. (Ioa. 3:16; Kor. 2, 4:16) Maoti te tauturu a Iehova, e hope roa ia tatou paatoa te hororaa no te ora!