I te 13raa o to ˈu matahiti, ua iti mai to ˈu here ia Iehova. Ia ite au i to ˈu mau hoa haapiiraa ia rave mai ta ratou e hinaaro, hinaaro atura vau i to ratou huru oraraa. No ˈu, mea etaeta roa to ˈu na metua e te mau ture a Iehova. E mea teimaha atoa ia tavini ia Iehova. Ua ite au e te vai mau ra te Atua, ua iti mai râ to ˈu here ia ˈna.

Aita vau i faaea roa i te poro. Eita râ vau e faaineine ia ˈu no te pororaa. E ia farerei au i te hoê taata, e maumau noa ta ˈu parau. Aita ïa te taata i anaanatae mai e aita vau i au faahou i te pororaa. E ua feruri au e nafea te mau taeae e tuahine e tamau noa ˈi i te poro.

I te 17raa o to ˈu matahiti, hinaaro atura vau e faarue i te fare. Reva ˈtura vau i Auteralia. Ua peapea roa to ˈu na metua. Ua tiaturi râ raua e tamau noa vau i te tavini ia Iehova.

I to ˈu haereraa i Auteralia, ua ino atu â to ˈu tupuraa. Mea varavara vau i te haere  i te mau putuputuraa. Ua faahoa vau i te tahi feia apî o tei haere atoa i te mau putuputuraa mai ia ˈu e o tei haere râ i muri iho e inu e e arearea. Aita râ vau i au i tera huru oraraa to ˈu: e tavini ia Iehova e i te tahi pae e rave mai ta teie nei ao.

E piti matahiti i muri iho, ua haaferuri mai te hoê tuahine ia ˈu no nia i to ˈu huru oraraa. E ono tuahine matou e ora ra i roto i te hoê fare. E ua titau manihini matou i te tiaau haaati e ta ˈna vahine o Tamara, ia faaea mai i to matou fare hoê hebedoma. A haapao ai ta ˈna tane i ta ˈna tuhaa ohipa no te amuiraa, e faaea mai Tamara ia matou nei. Ua au roa vau ia ˈna no to ˈna huru, e mea ohie ia paraparau atu ia ˈna. Aita vau i manaˈo mea arearea atoa te feia mai ia ˈna.

Mea au roa na Tamara i te parau mau e ta ˈna taviniraa. Mea oaoa roa na ˈna ia horoa i te mea maitai roa ˈˈe na Iehova, area o vau, mea iti noa ïa ta ˈu e horoa nei. Aita vau i oaoa. Ua ohipa râ te huru o Tamara i nia ia ˈu. Maoti to ˈna hiˈoraa, ua feruri au i te hoê irava e parau ra: Te hinaaro nei Iehova ia haamori tatou ia ˈna “ma te oaoa.”—Sal. 100:2.

Ua hinaaro vau e oaoa mai ia Tamara. E titauhia râ te tahi mau tauiraa rahi. E ere i te mea ohie, ua taui mǎrû noa râ vau. Ua haamata vau ma te faaineine ia ˈu no te pororaa e, i te tahi mau taime, ua rave au i te taviniraa pionie tauturu. Ua tauturu mai te reira ia ˈu ia ore e taiâ i mua i te taata. Ma te faaohipa pinepine i te Bibilia i roto i te taviniraa, ua oaoa roa ˈtu â vau i te haere e poro. I reira, ua rave au i te taviniraa pionie tauturu i te mau avaˈe atoa.

Ua maiti au i te tahi mau hoa mea puai i te pae varua. Ua tauturu mai to ratou hiˈoraa ia ˈu ia hiˈo, eaha te mea faufaa i roto i to ˈu oraraa, e ua haamata vau i te  taio i ta ˈu Bibilia i te mau mahana atoa. Ua rahi atu â to ˈu oaoa i roto i te taviniraa, e rave roa ˈtura vau i te taviniraa pionie tamau. A tahi ra vau i oaoa faahou ai i roto i te amuiraa.

Hoê matahiti i muri aˈe, ua farerei au ia Alex, hoê taata maitai roa e mea here na ˈna ia Iehova e te taviniraa. E tavini tauturu o ˈna, e a ono matahiti to ˈna taviniraa ei pionie tamau. Ua haere atoa o Alex e tavini i Malawi, i te hoê vahi e hinaaro-rahi-hia te taata poro. I ǒ, ua poro atoa o ˈna na muri i te mau mitionare, o tei horoa mai i te hoê hiˈoraa maitai, e o tei faaitoito ia ˈna ia tuu i te Faatereraa arii na mua roa i roto i to ˈna oraraa.

I te matahiti 2003, ua faaipoipo vau ia Alex, e ua tamau mâua i roto i te taviniraa taime taatoa. Mea rahi ta mâua i haapii mai, e ua haamaitai mau Iehova ia mâua.

I te matahiti 2009, ua titau-manihini-hia mâua ia tavini ei mitionare i Timor hitia o te râ, hoê oire iti i Initonetia. Ua oaoa roa mâua e ua taiâ atoa râ. E pae avaˈe i muri aˈe, ua tae mâua i ǒ.

Mea taa ê te oraraa i ǒ. Ua titauhia ia haapii mâua i to ratou reo, ia haamatau i te maa e to ratou huru oraraa. I roto i te taviniraa, e ite na mâua i te feia veve, tei ore i haere i te haapiiraa e o tei haavîhia. E mea rahi tei pepehia e tei inohia te upoo no te tamaˈi e te haavîraa. *

I roto i te pororaa, ua farerei au i te hoê  tamahine 13 matahiti o Maria to ˈna iˈoa. * A tau matahiti i teie nei to ˈna mama i te poheraa e mea varavara o ˈna i te ite i to ˈna papa. Mai e rave rahi tamarii, aita ta Maria e fa i roto i te oraraa. I te hoê taime, ua taˈi o ˈna a faataa mai ai i to ˈna mau huru aau. Aita vau i taa maitai i ta ˈna e parau mai ra no te mea aita i papu roa ia ˈu i to ratou reo. Ua ani au ia Iehova i te tauturu no te faaitoito ia ˈna, e ua taio atu vau i te tahi mau irava no te tamahanahana ia ˈna. I te mau matahiti i muri mai, ua ite au i te parau mau i te tauiraa i te oraraa o Maria. Ua bapetizohia o ˈna e i teie nei, te faatere nei oia i ta ˈna iho mau haapiiraa Bibilia. I teie mahana, e utuafare pae varua to Maria ati aˈe te ao nei e te ite mau ra o ˈna i te here o to ˈna mau taeae e tuahine.

Ua haamaitai mau Iehova i te pororaa i Timor hitia o te râ. I na ahuru matahiti i mairi aˈenei, ua bapetizohia te rahiraa o te feia poro e te tavini nei e rave rahi ei pionie, ei tavini tauturu e ei matahiapo. Te ohipa nei vetahi i roto i te piha ohipa huriraa e te faaineine nei ratou i te maa pae varua na roto i to ratou mau reo. Auê au i te oaoa ia faaroo vau ia ratou ia himene i te mau putuputuraa, ia ite i te mata ataata e oia atoa i te mau tauiraa ta ratou i rave no te parau mau.

Mea taa ê roa ta mâua taviniraa i Timor hitia o te râ i ta mâua i matau i Auteralia. Ua oaoa mau râ vau i te taviniraa i ǒ. Te haamanaˈo ra vau i te tahi mau taime, e rave mâua i te pereoo mataeinaa, ua î i te taata e ta ratou iˈa e maa no ǒ mai i te matete. I te tahi mau mahana, e faatere mâua i te hoê haapiiraa Bibilia i roto i te hoê fare aita e tahua, mea haumi e mea rahi te moa ati aˈe ia matou. Noa ˈtu tera mau mea, ua oaoa noa vau!

Te mauruuru nei au i to ˈu na metua i to raua haapiiraa mai ia ˈu no nia ia Iehova, e no to raua turu-noa-raa ia ˈu, i roto iho â râ i te mau taime i paruparu ai au i te pae varua. Mea papu roa te parau a te Maseli 22:6 i roto i to ˈu tupuraa. Te oaoa nei papa raua mama i te ite ia mâua Alex ia tavini ia Iehova. Mai te matahiti 2016, tei roto mâua i te tuhaa haaati i te tuhaa fenua o te amaa o Auteralia.

I teie nei mea au roa na ˈu te pororaa! Ua papu roa ia ˈu noa ˈtu eaha te tupuraa, o te taviniraa ia Iehova ma te aau atoa te hopoi mai i te oaoa mau. Ua oaoa roa mâua Alex i te tavini-amui-raa ia Iehova i na 18 matahiti i mairi. I teie nei, te taa maitai ra ia ˈu i ta Davida i parau ia Iehova: “O te feia atoa ra e tiaturi ia oe ra, ia oaoa ïa, ia faateitei i te reo i te oaoa eiaha ia mure, . . . e te feia atoa i hinaaro ia oe ra, ia oaoa anaˈe ïa ia oe.”—Sal. 5:11.