1. Eaha te tumu e oaoa mau ai tatou?

 TE HINAARO ra Iehova ia oaoa tatou, inaha, e huru maitai tera ta te varua moˈa e faatupu. (Gal. 5:22) Ua ite tatou e rahi aˈe te oaoa ia horoa ˈtu ia horoahia mai. E oaoa mau ïa tatou a tavini ai ia Iehova ma te aau atoa e a tauturu ai i to tatou mau taeae e tuahine na roto e rave rau ravea.—Ohi. 20:35.

2-3. (1) Ia au i te Galatia 6:4, eaha na ravea e piti o te tauturu mai ia oaoa noa i roto i ta tatou taviniraa ia Iehova? (2) Eaha ta tatou e hiˈopoa i roto i teie tumu parau haapiiraa?

² A taio i te Galatia 6:4. Ua faahiti te aposetolo Paulo e piti ravea o te tauturu ia tatou ia oaoa noa. Te ravea matamua, e haamau tatou i te fa e horoa i te mea maitai roa ˈˈe na Iehova. Ma te na reira, e oaoa ïa tatou. (Mat. 22:36-38) Te piti, eita tatou e faaau ia tatou ia vetahi ê. Noa ˈtu e ea maitai, e ite e e aravihi to tatou no te rave i te tahi ohipa, mea faufaa ia haamauruuru tatou ia Iehova. No ǒ mai hoi ia ˈna te mau mea atoa ta tatou e fanaˈo. Eaha ïa te rave mea aravihi aˈe te tahi atu ia tatou i roto i te tahi tuhaa o te taviniraa? E oaoa tatou no te mea te faaohipa ra ratou i to ratou aravihi no te arue ia Iehova, eiaha râ no te faahanahana ia ratou iho. Eiaha tatou e manaˈo e mea hau aˈe tatou ia ratou, e haapii râ tatou i to ratou hiˈoraa.

³ I roto i teie tumu parau haapiiraa, e ite tatou eaha te tauturu mai ia manaˈo tatou e mea iti ta tatou e nehenehe e rave i roto i te taviniraa. E hiˈopoa atoa tatou e nafea ia faaohipa maitai i te mau aravihi ta tatou i fanaˈo e eaha ta tatou e haapii mai i te hiˈoraa o vetahi ê.

4. Eaha te tahi mau tupuraa o te nehenehe e faatoaruaru ia tatou? A horoa i te hiˈoraa.

⁴ No te matahiti rahi aore ra no te maˈi, eita vetahi e nehenehe e tavini ia Iehova mai ta ratou e hinaaro ra. Teie te tupuraa o Carol. Ua tavini o ˈna i te vahi e hinaaro-rahi-hia te taata poro e ua faatere o ˈna e 35 haapiiraa Bibilia. Ua tauturu atoa o ˈna e rave rahi taata ia pûpû ia ratou iho e ia bapetizohia ratou. Mea rahi ta Carol i rave i roto i te taviniraa. Ua maˈihia râ o ˈna e ua titauhia ia ˈna ia faaea noa i te fare. Te na ô ra Carol: “Ua ite au e no to ˈu maˈi, aita vau e nehenehe e rave mai ia vetahi ê. No ˈu, e ere au i te hoê Kerisetiano maitai ia faaauhia ia ratou. Mea rahi te ohipa ta ˈu e hinaaro ra e rave, aita râ e haere ia ˈu. E toaruaru roa vau.” Te hinaaro ra Carol e horoa i te mea maitai roa ˈˈe na Iehova e mea faaitoito mau to ˈna hiˈoraa. Te oaoa ra to tatou Atua î i te aumihi a ite ai e te rave ra Carol i te maraa ia ˈna i roto i te taviniraa.

5. (1) Ia toaruaru tatou no to tatou tupuraa, eaha ta tatou e haamanaˈo? (2) Ia au i te mau hohoˈa, mea nafea te taeae i te tamauraa i te horoa i te mea maitai roa ˈˈe na Iehova?

⁵ Ia toaruaru outou no te mea mea iti ta outou e nehenehe e rave no Iehova, a ui ia outou iho, ‘Eaha ta Iehova e titau ra ia ˈu?’ Te hinaaro ra o ˈna ia horoa outou i te mea maitai roa ˈˈe na ˈna ia au i to outou tupuraa. Teie te tahi hiˈoraa. Te toaruaru ra te hoê tuahine e 80 matahiti no te mea aita o ˈna e nehenehe e tavini mai ta ˈna i rave i te 40raa o to ˈna matahiti. Noa ˈtu te horoa nei o ˈna i te mea maitai roa ˈˈe na Iehova, te manaˈo ra o ˈna aita Iehova e oaoa ra i te reira. Mea tano anei tera manaˈo? A feruri na. I te mea e ua horoa teie tuahine i te mea maitai roa ˈˈe i te 40raa o to ˈna matahiti e te tamau ra o ˈna i te na reira i te 80raa o to ˈna matahiti, aita roa ˈtu ïa o ˈna i faaea i te horoa i te mea maitai roa ˈˈe na Iehova. Ia manaˈo tatou aita Iehova e oaoa ra i ta tatou taviniraa, a haamanaˈo: E ere na tatou e parau eaha te faaoaoa ra ia Iehova, o ˈna anaˈe râ te ite. Ia horoa tatou i te mea maitai roa ˈˈe na Iehova, e parau mai iho â o ˈna e mea “maitai roa.”—A hiˈo atoa i te Mataio 25:20-23.

6. Eaha te haapii mai i te hiˈoraa o Maria?

⁶ Mea ohie aˈe paha no tatou ia oaoa mai te peu e tiatonu tatou i nia i ta tatou e nehenehe e rave, eiaha râ i nia i ta tatou e ore e nehenehe e rave. Teie te tupuraa o te tuahine Maria. Ua roohia o ˈna i te maˈi o te faaiti i ta ˈna e nehenehe e rave i roto i te taviniraa. I te omuaraa, ua hepohepo Maria e ua manaˈo e mea faufaa ore o ˈna. Ua ite râ o ˈna i te hoê tuahine i roto i te amuiraa o tei vai noa i nia i te roˈi. Faaoti atura Maria i te tauturu ia ˈna. Te parau ra o ˈna: “Ua rave au i te faanahoraa no te poro na muri ia ˈna maoti te niuniu paraparau e te rata. I te mau taime atoa i poro ai mâua, ua oaoa roa vau a hoˈi ai i te fare no te mea ua tauturu vau i to ˈu tuahine.” E rahi atoa to tatou oaoa ia tiatonu tatou i nia i ta tatou e nehenehe e rave, eiaha râ i nia i te ore e maraa ia tatou. E nafea râ tatou mai te peu e nehenehe ta tatou e rave hau atu â aore ra e mea aravihi tatou i roto i te tahi mau tuhaa o te taviniraa?

7. Eaha te aˈoraa ta te aposetolo Petero i horoa i te mau Kerisetiano?

⁷ I roto i ta ˈna rata matamua, ua faaitoito te aposetolo Petero i to ˈna mau taeae ia faaohipa i ta ratou mau ô e to ratou  mau aravihi no te faaitoito i to ratou mau hoa Kerisetiano. Ua papai Petero: “Ua fanaˈo outou tataitahi i te hoê ô, a faaohipa ïa i te reira no te tavini te tahi i te tahi mai te mau tiaau maitai roa tei fanaˈo i te hamani maitai rahi o te Atua.” (Pet. 1, 4:10) A tamau i te horoa i te mea maitai roa ˈˈe a faaohipa ˈi i to outou mau aravihi noa ˈtu e nehenehe vetahi ê e pohehae e e toaruaru. A na reira ˈi, e horoa noa outou i te mea maitai roa ˈˈe na Iehova.

8. Ia au i te Korinetia 1, 4:6, 7, no te aha mea faufaa ia ore e faatietie ia tatou no to tatou mau aravihi?

⁸ E titauhia ia tatou ia faaohipa maitai i to tatou mau aravihi. Mea tia râ ia vai ara ia ore tatou e riro ei taata teoteo. (A taio i te Korinetia 1, 4:6, 7.) Ei hiˈoraa, mea aravihi paha outou no te haamata i te mau haapiiraa Bibilia. E titauhia ia outou ia faaohipa i tera aravihi! Mea faufaa râ ia ore e faatietie ia outou. A feruri na i teie tupuraa. Ua haamata outou i te hoê haapiiraa Bibilia e ua hinaaro outou e faatia i te reira i ta outou pǔpǔ pororaa. I te taime râ i farerei ai outou i te pǔpǔ, te faatia ra te hoê tuahine mea nafea o ˈna i te pûpûraa i te hoê vea. Ua pûpû o ˈna i te hoê vea, area outou, ua haamata ïa i te hoê haapiiraa Bibilia. Eaha ïa ta outou e rave? Ua ite outou e itoitohia te pǔpǔ a faaroo ai i ta outou faatiaraa. E tiai râ paha outou i te tahi atu taime no te faatia ˈtu i te reira no te mea aita outou e hinaaro ia toaruaru te tuahine. E faaotiraa maitai te reira. E ere râ te auraa e faaea outou i te pûpû i te haapiiraa Bibilia. E aravihi to outou, a faaohipa ïa i te reira!

9. E nafea tatou e faaohipa ˈi i to tatou mau aravihi?

⁹ E haamanaˈo anaˈe, eita to tatou mau aravihi i tupu noa mai mai tera, no ǒ mai râ te reira i te Atua. E titauhia ia tatou ia faaohipa i tera mau aravihi no te faaitoito i te amuiraa, eiaha râ no te faateitei ia tatou. (Phil. 2:3) Ia faaohipa tatou i to tatou puai e aravihi no te rave i te hinaaro o te Atua, e oaoa tatou no te mea te faahanahana ra tatou ia Iehova, eiaha râ no te mea mea hau aˈe ta tatou e rave nei i ta vetahi ê.

10. No te aha e ere i te mea tano ia faaau ia tatou ia vetahi ê?

¹⁰ Ia ore te hoê taata e vai ara, e nehenehe o ˈna e faaau i to ˈna aravihi i te paruparu a te tahi atu taata. Ei hiˈoraa, mea aravihi paha te hoê taeae i te horoa i te mau oreroraa parau. E nehenehe o ˈna e  haafaufaa ore i te tahi atu taeae mea fifi no ˈna ia horoa i te mau oreroraa parau. Tera râ, e taata farii maitai teie taeae, e haapao maitai o ˈna i ta ˈna mau tamarii e mea itoito atoa i roto i te taviniraa. Auê ïa tatou i te oaoa a ite ai e rave rahi taeae e tuahine o te faaohipa ra i to ratou mau aravihi no te tavini ia Iehova e no te tauturu ia vetahi ê!

11. No te aha tatou e tutava ˈi i te pee i te hiˈoraa o Iesu?

¹¹ Noa ˈtu eita tatou e faaau ia tatou ia vetahi ê, e faufaahia tatou i te hiˈoraa o te tahi atu mau tavini a Iehova. E hiˈopoa anaˈe i te hiˈoraa o Iesu. Papu, e ere tatou i te taata tia roa mai ia ˈna. E faufaahia râ tatou i to ˈna mau huru maitatai e ta ˈna mau ohipa faahiahia mau. (Pet. 1, 2:21) Ia tutava tatou i te pee maite i to ˈna hiˈoraa, e riro tatou ei tavini maitai aˈe a Iehova e e aravihi atu â tatou i roto i te taviniraa.

12-13. Eaha te haapii mai i te hiˈoraa o te arii Davida?

¹² I roto i te Parau a te Atua, e ite tatou e rave rahi hiˈoraa o te mau tane e vahine haapao maitai ta tatou e nehenehe e pee, noa ˈtu mea tia ore ratou. (Heb. 6:12) A feruri na i te arii Davida ta Iehova i pii “te tahi taata e au i to ˈu aau.” (Ohi. 13:22) E taata tia ore Davida e ua rave o ˈna i te hara. Noa ˈtu râ, e hiˈoraa maitai o ˈna no tatou. No te aha? No te mea ua aˈohia o ˈna e aita o ˈna i imi i te otoheraa. Ua farii râ o ˈna i te reira e ua tatarahapa mau no ta ˈna i rave. Ei faahopearaa, ua faaore Iehova i ta ˈna mau hara.—Sal. 51:3, 4, 10-12.

¹³ E faufaahia tatou i te hiˈoraa o Davida a ui ai ia tatou iho: ‘Eaha to ˈu huru ia aˈohia mai au? E farii oioi anei au i ta ˈu mau hape aore ra e imi au i te otoheraa? Oioi anei au i te faahapa ia vetahi ê? Te tutava ra anei au ia ore e tapiti faahou i ta ˈu hape?’ E nehenehe outou e ui i tera mau uiraa a taio ai i te aamu o te mau tane e vahine haapao maitai i roto i te Bibilia. Ua faaruru anei ratou i te hoê â fifi i ta tatou? Eaha te mau huru maitatai ta ratou i faaite? No te mau aamu tataitahi, a ui ia outou iho: ‘E nafea ia pee maite atu â i te hiˈoraa o teie tavini haapao maitai a Iehova?’

14. E nafea tatou e faufaahia ˈi i te hiˈoraa o to tatou mau hoa Kerisetiano?

¹⁴ E nehenehe atoa tatou e faufaahia i te hiˈoraa o to tatou mau hoa Kerisetiano,  te mea apî e te mea paari aˈe. Ei hiˈoraa, ua matau paha outou i te hoê mero o ta outou amuiraa o te faaruru ra i te faaheporaa a vetahi ê, te patoiraa a te utuafare aore ra te maˈi. Te ite ra paha outou i te mau huru maitatai ta ˈna e faatupu ra e o ta outou e hinaaro ra e pee. Ma te feruri i to ˈna hiˈoraa maitai, e haapii outou e nafea ia faaoromai i ta outou mau fifi. Auê tatou i te mauruuru i te mau hiˈoraa maitai o te faaroo ta teie mau taeae e tuahine e horoa nei!—Heb. 13:7; Iak. 1:2, 3.

15. Eaha te aˈoraa ta te aposetolo Paulo i horoa o te tauturu mai ra ia oaoa noa i roto i te taviniraa ia Iehova?

¹⁵ No te faatupu i te hau e te auhoêraa i roto i te amuiraa, mea faufaa ia horoa tatou tataitahi i te mea maitai roa ˈˈe na Iehova. Teie te hiˈoraa o te mau Kerisetiano o te senekele matamua. Ua rau to ratou mau aravihi e ta ratou mau hopoia. (Kor. 1, 12:4, 7-11) Aita râ ratou i manaˈo e mea hau aˈe ratou ia vetahi ê aore ra i faatupu i te manaˈo tataˈu. Ua faaitoito râ Paulo ia ratou tataitahi ia rave i tei titauhia “no te patu i te tino o te Mesia.” Ua papai o ˈna i to Ephesia: “Ua ohipa maitai anaˈe te mero tataitahi atoa, e tupu maitai ïa te tino a patu noa ˈi ia ˈna iho i roto i te here.” (Eph. 4:1-3, 11, 12, 16) A pee ai i ta Paulo aˈoraa, ua faatupu ratou i te hau e te auhoêraa. E mau huru maitatai hoi tera ta tatou e ite nei i roto i te mau amuiraa i teie mahana.

16. Eaha ta tatou e faaoti papu i te rave? (Hebera 6:10)

¹⁶ E faaoti papu anaˈe i te ore roa ˈtu e faaau ia tatou ia vetahi ê. E faufaahia râ tatou i te hiˈoraa o Iesu e e tutava tatou i te pee i to ˈna mau huru maitatai. E haafaufaa anaˈe i te hiˈoraa o te mau tane e vahine haapao maitai i roto i te Bibilia. Oia atoa i te hiˈoraa o to tatou mau taeae e tuahine taiva ore. Ia tamau tatou i te horoa i te mea maitai roa ˈˈe na Iehova, e papu ia tatou e ere o ˈna “i te Atua parau-tia ore a moˈe ai ia ˈna ta [tatou] ohipa.” (A taio i te Hebera 6:10.) E tamau anaˈe ïa i te oaoa i te tavini ia Iehova a haamanaˈo ai e te oaoa ra o ˈna i te iteraa e te horoa ra tatou i te mea maitai roa ˈˈe na ˈna.