No teihea tau te sunago?

NO ROTO mai te taˈo “sunago” i te parau Heleni e “tairururaa” te auraa, aore ra “amuiraa.” Mea tano maitai tera parau no te mea ua riro te mau sunago ei vahi tairururaa no te haapiiraa e te haamoriraa na te mau pǔpǔ taata ati Iuda mai tahito mai â. Aita te mau Papai Hebera e parau ra no nia i te mau sunago, mea papu râ, ia au i te mau Papai Heleni Kerisetiano, ua haamau-aˈena-hia teie mau vahi putuputuraa hou i te senekele matamua.

Te tiaturi nei te rahiraa o te mau taata îite e no te tau a ora tîtî ai te feia ati Iuda i Babulonia te mau sunago. Teie te faataaraa a te Encyclopaedia Judaica: “No to ratou hinaaro i te tamahanahanaraa i roto i to ratou ati, e putuputu na te mau tîtî o tei ere i te Hiero i te hoê fenua ê, peneiaˈe i te mau Sabati, a taio atu ai i te mau Papai.” I te tiamâraa ratou i to ratou tîtîraa, e au ra e ua tamau noa te feia ati Iuda i te putuputu no te pure e no te taio i te mau Papai, e ua hamani ratou i te sunago i te mau vahi atoa i faaea ˈi ratou.

Riro atura ïa te mau sunago i te senekele matamua ei pu no te haapaoraa ati Iuda e ei vahi e farerei ai te mau pǔpǔ taata tei parare na te miti Rahi, na te pae Hitia o te râ no ropu, e na Iseraela iho. Te na ô ra te orometua haapii Lee Levine no te fare haapiiraa tuatoru Hebera no Ierusalema: “I riro na [te sunago] ei vahi no te haapii, no te amuraa maa moˈa, te haavaraa, ei vahi e vai ai te moni faataahia, ei vahi rururaa poritita e no te farerei te tahi i te tahi.” Te parau atoa ra oia e no te mau ohipa a te haapaoraa na mua roa tera vahi. Aita ïa tatou e maere ra no te aha Iesu i apiti pinepine ai i te mau putuputuraa i te mau sunago. (Mar. 1:21; 6:2; Luka 4:16) I reira, ua haapii e ua faaitoito oia i tei putuputu mai. I muri aˈe i te haamauraahia te amuiraa Kerisetiano, ua tutava te aposetolo Paulo i te haere e poro na te mau sunago. Ua haere te feia o tei hinaaro e faafatata ˈtu â i te Atua i te sunago. No reira, a tomo ai Paulo i roto i te hoê oire, i haere na oia na mua roa i te sunago a poro atu ai i reira.—Ohi. 17:1, 2; 18:4.