1. Eaha te huru maitai ta tatou e ite ra i rotopu i te nunaa o Iehova?

 E RAVE rahi matahiti na mua ˈˈe, ua tohu te Bibilia “e pûpû to [te Atua] nunaa ia ratou iho ma te aau tae” no te tavini ia Iehova i raro aˈe i te aratairaa a ta ˈna Tamaiti. (Sal. 110:3) Papu maitai, te tupu ra teie parau tohu i teie mahana. I te mau matahiti atoa, te poro ra te mau tavini itoito a Iehova hanere mirioni hora. Aita ratou e aufauhia no tera ohipa. E na reira ratou ma te aau tae. E rave atoa ratou i te taime no te tauturu i to ratou mau hoa Kerisetiano ia fanaˈo i ta ratou e hinaaro mau ra, ia itoitohia ratou e ia puai to ratou faaroo ia Iehova. E rave te mau taeae faatoroahia i te taime no te faaineine i te mau tuhaa o te putuputuraa, no te farerei i te mau taeae e tuahine e no te faaitoito atu. No te aha te nunaa o Iehova e na reira ˈi? No te mea te here ra ratou ia Iehova e i to ratou taata tupu.​—Mat. 22:37-39.

2. Ia au i te Roma 15:1-3, eaha te hiˈoraa ta Iesu i horoa?

² Ua faaite Iesu e mea faufaa aˈe no ˈna te hinaaro o vetahi ê i to ˈna iho. Te tutava nei tatou i te pee i to ˈna hiˈoraa. (A taio i te Roma 15:1-3.) A na reira ˈi, e haamaitaihia tatou. Ua parau Iesu: “E rahi aˈe te oaoa ia horoa ˈtu ia horoahia mai.”​—Ohi. 20:35.

3. Eaha ta tatou e hiˈopoa i roto i teie tumu parau haapiiraa?

³ I roto i teie tumu parau haapiiraa, e hiˈopoa faahou tatou  i te tahi mau haapaeraa ta Iesu i rave no te tauturu ia vetahi ê e e nafea ia pee i to ˈna hiˈoraa. E ite atoa tatou e nafea ia hinaaro rahi atu â e tauturu ia vetahi ê.

4. Mea nafea Iesu i te faaiteraa e mea faufaa aˈe to vetahi ê hinaaro i to ˈna iho?

⁴ Ua tauturu Iesu ia vetahi ê noa ˈtu ua rohirohi o ˈna. A feruri na i ta Iesu i rave a ite ai i te hoê nahoa tei apee ia ˈna i te tahi mouˈa i pihai iho ia Kaperenaumi. Na mua aˈe, ua pure Iesu i te po taatoa. Papu maitai, ua rohirohi roa o ˈna. A ite ai râ i te nahoa, ua aroha roa o ˈna i te feia veve e te feia maˈi ta ˈna i ite. Aita o ˈna i tamǎrû noa ia ratou. Ua horoa atoa râ o ˈna i te oreroraa parau faaitoito roa ˈˈe piihia te Aˈoraa i nia i te mouˈa.​—Luka 6:12-20.

5. E nafea te mau upoo utuafare e pee ai i to Iesu hiˈoraa noa ˈtu te rohirohi?

⁵ E nafea te mau upoo utuafare e pee ai i to Iesu hiˈoraa? A feruri na. I te hopea o te mahana ohipa, e hoˈi te upoo utuafare i te fare, ua rohirohi roa o ˈna. Eita paha o ˈna e hinaaro e rave i te haamoriraa utuafare faataahia i taua po ra. E ani râ o ˈna ia Iehova i te puai no te faatere i tera haamoriraa utuafare. E pahono Iehova i ta ˈna pure e e rave te upoo utuafare i te haapiiraa mai ta ˈna i matau pauroa te hebedoma. E huti mai te mau tamarii i teie haapiiraa faufaa roa i taua po ra: No to ratou na metua, mea faufaa aˈe ia haamori ia Iehova.

6. A faaite e nafea Iesu i haapae ai i to ˈna iho taime no te tauturu ia vetahi ê.

⁶ Ua rave Iesu i te taime no te tauturu ia vetahi ê, noa ˈtu ua hinaaro o ˈna e faaea o ˈna anaˈe. A feruri na i to Iesu huru a ite ai e ua tâpûhia te upoo o to ˈna hoa o Ioane Bapetizo. Papu maitai, ua mauiui roa Iesu. Te na ô ra te Bibilia: “I to Iesu faarooraa i te reira, faarue maira oia i taua vahi ra na nia i te poti e fano atura i te hoê vahi moˈemoˈe o ˈna anaˈe.” (Mat. 14:10-13) E taa ia tatou no te aha o ˈna i na reira ˈi. E hinaaro vetahi mau taata e oto o ratou anaˈe. Aita râ Iesu i faaea maoro o ˈna anaˈe no te mea ua haere atu te hoê nahoa i te vahi moˈemoˈe tei reira o  ˈna. Eaha to Iesu huru? Ua haapao o ˈna i te hinaaro o te nahoa e ua “aroha ˈtura ia ratou.” Ua taa ia Iesu e ua hinaaro mau ratou i te tamahanahanaraa no ǒ mai i te Atua e oioi atura o ˈna i te tauturu atu. “Haapii atura oia ia ratou e rave rahi parau mau,” eiaha râ maa parau mau iti.​—Mar. 6:31-34; Luka 9:10, 11.

7-8. A faaite e nafea te mau matahiapo î i te here e pee ai i to Iesu hiˈoraa ia hinaaro vetahi o te amuiraa i te tauturu.

⁷ E nafea te mau matahiapo î i te here e pee ai i to Iesu hiˈoraa? Te mauruuru rahi nei tatou i te ohipa e te mau haapaeraa ta te mau matahiapo e rave ra no tatou! Aita te rahiraa o te mau taeae e tuahine e ite ra i ta ratou e rave nei. Ei hiˈoraa, ia utuutuhia te tahi Kerisetiano, oioi te mau mero o te Tomite tuatiraa e te fare maˈi i te tauturu ia ˈna. Pinepine te reira i te tupu i te po! No to ratou râ aumihi no te mau taeae e tuahine i roto i te ati, e haafaufaa aˈe teie mau matahiapo here e to ratou utuafare i te maitai o te mau hoa Kerisetiano i to ratou iho.

⁸ E apiti atoa te mau matahiapo i roto i te ohipa paturaa, mai te paturaa o te mau Piha a te Basileia. E horoa atoa ratou i te tauturu ia tupu te ati natura. Hau atu, e faaohipa ratou e rave rahi taime no te haapii e no te faaitoito ia tatou. Mea tano ia haapopou i teie mau taeae e to ratou utuafare. Ia haamaitai Iehova i te huru feruriraa ta ratou e faaite ra! Papu, mea faufaa ia faaite te mau matahiapo i te huru aifaito. Aita ratou e rave hau aˈe taime no te amuiraa a ore atu ai e haapao i te hinaaro o to ratou iho utuafare.

9. Ia au i te Philipi 2:4, 5, eaha te huru feruriraa e titauhia i te mau Kerisetiano atoa ia faaite?

⁹ A taio i te Philipi 2:4, 5. E ere o te mau matahiapo anaˈe te pee i to Iesu hiˈoraa e o te haafaufaa aˈe i te maitai o vetahi ê i to ratou iho. O tatou pauroa te na reira. Te parau ra te Bibilia “ua riro [Iesu] mai te hoê tavini ra te huru.” (Phil. 2:7) A feruri na i te auraa o tera irava. E imi te tavini haapao maitai i te ravea no te faaoaoa i to ˈna fatu. Ei tavini a Iehova e ei hoa no to tatou mau taeae, te hinaaro ra tatou e ohipa no Iehova e no to tatou mau taeae. E na reira tatou ma te pee i to muri nei mau manaˈo.

10. Eaha te mau uiraa ta tatou e ui ia tatou iho?

¹⁰ A hiˈopoa i to outou huru. A ui ia outou iho: ‘Te hinaaro mau ra anei au e rave i te taime no te tauturu ia vetahi ê? Ei hiˈoraa, eaha ta ˈu e rave mai te peu e anihia mai ia haere e hiˈo i te hoê taeae ruhiruhia i te fare ruau aore ra ia tii atu i te hoê tuahine paari aˈe no te haere i te mau putuputuraa? E oioi anei au i te ohipa ia hinaarohia te rima tauturu no te tamâ i te vahi tairururaa aore ra no te atuatu i te Piha a te Basileia?’ A pûpû ai i to tatou ora ia Iehova, ua euhe tatou i te faaohipa i te mau mea atoa no te tavini ia ˈna. Te hinaaro nei Iehova ia faaohipa tatou i to tatou taime, puai e taoˈa no te tauturu ia vetahi ê. E oaoa ïa o ˈna a ite ai e te na reira ra tatou ma te aau tae. Ia ite tatou e titauhia ia haamaitai i tera tuhaa, eaha ïa ta tatou e rave?

11. E nafea te pure e tauturu mai ai ia hinaaro rahi atu â tatou e tauturu ia vetahi ê?

¹¹ A pure ia Iehova ma te aau tae. E ite paha tatou i te tahi tuhaa e titauhia ia haamaitai, aita râ tatou e hinaaro ra e rave i te mau tauiraa. E nehenehe ïa tatou e ani ia Iehova ma te aau tae ia tauturu mai. A faaite i to outou huru mau. A parau ia Iehova eaha to outou manaˈo e a ani atu ia horoa mai i “te hinaaro e te puai no te rave i te mau mea atoa ta ˈna e au.”​—Phil. 2:13.

12. Eaha ta te hoê taeae apî e nehenehe e rave no te tauturu i roto i te amuiraa?

¹² E taeae apî anei outou? A ani ia Iehova i te tauturu no te hinaaro e rave hau atu â i roto i te amuiraa. I roto i te tahi mau fenua, mea rahi aˈe te matahiapo i te tavini tauturu. E mea paari e rave rahi o taua mau tavini tauturu ra. Inaha, te rahi noa ˈtu ra te faanahonahoraa, e hinaarohia rahi atu â taeae apî no te aupuru i to Iehova nunaa. Ia hinaaro outou e amo i te tahi noa ˈˈe hopoia i roto i te amuiraa, e oaoa outou. No te aha? No te mea e faaoaoa te reira ia Iehova, e fanaˈo outou i te hoê roo maitai e e fanaˈo outou i te haamaitairaa ia tauturu ia vetahi ê.

13-14. Eaha ta outou e nehenehe e rave no te tauturu i te mau taeae e tuahine? (A hiˈo i te hohoˈa i te api matamua.)

¹³ A tapao eaha ta vetahi ê e hinaaro mau nei. Ua faaue te aposetolo Paulo i te mau Kerisetiano i Iudea: “Eiaha e haamoˈe i te rave i te maitai e i te tufa i ta outou mau mea na vetahi ê, e mauruuru hoi te Atua i taua mau huru tusia ra.” (Heb. 13:16) E aˈoraa tano maitai te reira! I muri iti aˈe i te fanaˈoraa i taua rata ra, ua titauhia i te mau Kerisetiano i Iudea ia faarue i to ratou fare, ohipa e fetii e ere i te Kerisetiano no te horo “i te mau mouˈa.” (Mat. 24:16) I taua taime ra, mea faufaa roa no ratou ia tauturu te tahi i te tahi. Mai te peu ua matau ratou i te  faaohipa i te aˈoraa a Paulo e tufa i ta ratou mau mea na vetahi ê, mea ohie aˈe ïa no ratou ia oaoa noa i to ratou huru oraraa apî.

¹⁴ Aita paha te mau taeae e tuahine e faaite roa ˈtu eaha ta ratou e hinaaro mau nei. Ei hiˈoraa, ua pohe paha te vahine a te hoê taeae e ua mauiui roa o ˈna. E hinaaro anei to tatou taeae i te tauturu no te tunu i te maa, no te haere i te hoê vahi aore ra no te tamâ i to ˈna fare? Aita paha o ˈna e ani mai i te tauturu no te mea aita o ˈna e hinaaro e haapeapea ia tatou. Tera râ, e oaoa o ˈna mai te peu e rave tatou i te faanahoraa no te horoa i te tauturu hinaarohia. Eiaha e manaˈo e na te tahi e aupuru ia ˈna aore ra e parau mai iho â te taeae ia hinaaro o ˈna i te tauturu. A ui râ ia outou iho: ‘Mai te peu o vau tera, eaha te tauturu ta ˈu e hinaaro e fanaˈo?’

15. Eaha te mea tia ia rave ia hinaaro tatou e tauturu ia vetahi ê?

¹⁵ A riro ei taata mea ohie ia ani atu i te tauturu. Papu maitai, ua ite tatou o vai i roto i te amuiraa o te oioi noa i te tauturu ia vetahi ê e o te oaoa i te na reira. Ua papu ia tatou e tauturu mai iho â ratou. Te hinaaro nei tatou e pee i to ratou hiˈoraa. Ua hinaaro Alan, te hoê matahiapo e 45 matahiti to ˈna, ia riro ei taata mea ohie ia ani atu i te tauturu. A feruri ai i to Iesu hiˈoraa, ua parau Alan: “Noa ˈtu mea rahi te ohipa a Iesu, aita te taata i haama i te ani atu i te tauturu noa ˈtu eaha to ratou matahiti. Ua matau ratou ia ˈna mai te hoê taata o te tâuˈa mau ra ia ratou. Te hinaaro mau nei au e riro mai ia Iesu, oia hoi te hoê taata mea ohie ia ani atu i te tauturu, mea mǎrû e mea tâuˈa roa ia vetahi ê.”

16. E nafea te faaohiparaa i te Salamo 119:59, 60 e tauturu mai ai ia pee maite i to Iesu hiˈoraa?

 ¹⁶ Eiaha tatou e toaruaru aita anaˈe tatou e pee ra ia Iesu ma te tia roa. (Iak. 3:2) Ei hiˈoraa, aita te hoê piahi e nehenehe e pee ma te tia roa i to ˈna orometua. E haapii râ o ˈna i ta ˈna mau hape e e rave o ˈna i te maraa ia ˈna no te pee i te hiˈoraa o to ˈna orometua. A na reira ˈi, e aravihi atu â te piahi. Hoê â huru mai te peu e faaohipa tatou i ta tatou i haapii i roto i te Bibilia e e tamau tatou i te haamaitai i to tatou huru. E pee maite atu â tatou i te hiˈoraa o Iesu.​—A taio i te Salamo 119:59, 60.

17-18. A pee ai i to Iesu hiˈoraa ma te tauturu ia vetahi ê, eaha te mau haamaitairaa ta tatou e ite?

¹⁷ Ia ineine tatou i te tauturu ia vetahi ê, e hinaaro paha ratou e na reira atoa. Te parau ra Tim, te hoê matahiapo: “E rave rahi taeae apî tei riro ei tavini tauturu no te mea ua ite ratou ia vetahi ê tei ineine i te tauturu e ua pee i to ratou hiˈoraa maitai. Te tutava ra tera mau taeae apî i te tauturu i te amuiraa e i te turu i te mau matahiapo.”

¹⁸ Mea rahi te taata miimii i roto i teie ao. Mea taa ê râ te nunaa o Iehova. Ua putapû roa to tatou aau a ite ai i te huru feruriraa haapae o Iesu e te hinaaro papu nei tatou e pee i to ˈna hiˈoraa. Aita tatou e nehenehe e pee ia ˈna ma te tia roa. Tera râ, e “pee maite [ta]tou i to ˈna mau taahiraa avae.” (Pet. 1, 2:21) A rave ai i te maraa ia tatou no te pee i to Iesu hiˈoraa, e oaoa tatou no te mea te faaoaoa ra tatou ia Iehova.