1. Eaha te haapiiraa e matara ra i roto i te Koheleta 3:1, 7?

 I ROTOPU ia tatou, mea paraparau roa vetahi. Area te tahi atu, e mamû noa ïa. Mai ta te irava tumu o teie haapiiraa e haamatara ra, e taime to te parau e e taime to te mamû noa. (A taio i te Koheleta 3:1, 7.) E hinaaro râ paha tatou eiaha vetahi ia paraparau rahi roa, area te tahi atu, oia ïa!

2. Tei ia vai ra te tiaraa ia faaoti eaha te taime tano no te parau e eaha te huru paraparau maitai?

² Ua ho mai Iehova i te vaha ia nehenehe te taata e paraparau. (Exo. 4:10, 11; Apo. 4:11) I roto i ta ˈna Parau, te tauturu mai ra Iehova ia faaohipa maitai tatou i tera ô. I roto i teie haapiiraa, e hiˈopoa tatou i te tahi mau hiˈoraa Bibilia o te tauturu mai ia taa eaha te taime tano no te parau e te taime tano no te mamû noa. E ite atoa tatou eaha to Iehova manaˈo i ta tatou huru paraparau ia vetahi ê. Na mua, e hiˈo anaˈe eaha te taime tano no te parau.

3. Ia au i te Roma 10:14, mai te aha to tatou huru ia paraparau tatou no nia ia Iehova e te Faatereraa arii?

³ E pee tatou i te hiˈoraa o Iesu ia ineine noa tatou i te paraparau no nia ia Iehova e te Faatereraa arii. (Mat. 24:14; a taio i te Roma 10:14.) Te tahi tumu i haere mai ai Iesu i te fenua nei, no te faaite ïa i te parau mau no nia i to ˈna Metua. (Ioa. 18:37) Mea titauhia râ ia haamanaˈo e mea faufaa roa ta tatou huru paraparau. Ia faahiti tatou ia vetahi ê i te parau no nia ia Iehova, e mea tia ia na reira tatou “ma te mǎrû e te faatura rahi” a tâuˈa atoa ˈi i to te taata manaˈo e ta ˈna e tiaturi ra. (Pet. 1, 3:15) I tera taime, eita noa tatou e paraparau, e haapii atu râ tatou a tamata  atoa ˈi i te haaputapû i te aau o te taata.

4. Ia au i te Maseli 9:9, e nafea ta tatou huru paraparau e tauturu ai ia vetahi ê?

⁴ Eiaha te mau matahiapo ia taiâ i te parau ia titauhia ia aˈo i te tahi taeae aore ra tuahine. E maiti râ ratou i te taime tano no te parau ia ore tera taata ia huru ê. E tiai paha ratou i te hoê taime o ratou anaˈe. E tutava te mau matahiapo i te paraparau i tera taata ma te faatura. E faaohipa ratou i te mau aratairaa Bibilia o te nehenehe e tauturu i teie taata. (A taio i te Maseli 9:9.) No te aha e titauhia te itoito no te faahiti i te parau i te taime tano? E hiˈo mai tatou e piti hiˈoraa. Te hiˈoraa matamua, o te hoê ïa metua tane o te titauhia ia aˈo i ta ˈna na tamaiti. E te piti, no nia ïa i te hoê vahine o te titauhia ia paraparau i te tahi taata o te riro mai ei arii.

5. I teihea taime i titauhia ˈi ia parau te vaha o te tahuˈa rahi Eli?

⁵ E piti tamaiti ta te tahuˈa rahi Eli e mea here roa na ˈna ia raua. E hopoia faufaa ta teie nau tamaiti, te tavini ra raua ei tahuˈa i te sekene. Ma te haama ore, aita raua i faatura ia Iehova a pûpûhia ˈi te mau tusia na Iehova e ua rave atoa i te peu taotoraa tia ore. (Sam. 1, 2:12-17, 22) Ia au i te ture a Mose, e au ia raua te pohe. Ua faatia noa Eli i te hinaaro o ta ˈna na tamaiti a vaiiho noa ˈtu ai ia tavini raua i te sekene. (Deut. 21:18-21) Eaha to Iehova manaˈo ia Eli? Ua parau atu te Atua: “E rahi aˈe hoi to oe faatura i to na tamarii ia ˈu nei.” Faaoti ihora Iehova e haapohe ia raua.—Sam. 1, 2:29, 34.

6. Eaha te haapiiraa faufaa e huti mai i te hiˈoraa o Eli?

⁶ E haapiiraa faufaa ta tatou e huti mai i te hiˈoraa o Eli. Ia ofati noa ˈtu te hoê hoa aore ra fetii i te ture a te Atua, e mea tia ia haamanaˈo ia ˈna i te mau ture aveia a Iehova. E ara atoa tatou e ua fanaˈo mau o ˈna i te tauturu a te mau matahiapo. (Iak. 5:14) Eiaha roa tatou e rave mai ia Eli. O Iehova ta tatou e faatura na mua, eiaha râ te hoa aore ra fetii. E titauhia te itoito no te aˈo i te hoê taata. I teie nei, e hiˈo mai tatou i te hiˈoraa o te hoê vahine Iseraela o Abigaila te iˈoa.

7. No te aha Abigaila i haere ai e farerei ia Davida?

⁷ E vahine o Abigaila na Nabala, te hoê fatu fenua taoˈa rahi. A horo ê ai Davida  e to ˈna mau taata no te arii Saula, ua tauturu ratou i te mau tiai mamoe ia paruru i ta Nabala nǎnǎ mamoe. Ua faaite anei Nabala i te mauruuru no te ohipa i ravehia? Aita. A ani ai Davida i te tahi maa e pape na to ˈna mau taata, ua riri e ua faaino maira Nabala ia ratou. (Sam. 1, 25:5-8, 10-12, 14) Opua ˈtura Davida e haapohe i te utuafare taatoa o Nabala. (Sam. 1, 25:13, 22) Aita râ i tupu, no te aha? No te mea ua taa ia Abigaila e taime tano tera no te parau. Ma te itoito ua haere atu oia e farerei ia Davida e i na 400 faehau tei riri roa e tei pohe i te poia.

8. Eaha ta tatou e haapii mai i te hiˈoraa o Abigaila?

⁸ A farerei ai ia Davida, ua paraparau atu Abigaila ma te itoito, te faatura e te papu atoa. Noa ˈtu e ere o ˈna te tumu o te fifi, ua ani Abigaila ia Davida ia faaore i ta ˈna hara. Ua papu ia Abigaila e taata maitai o Davida e ua tiaturi atoa e tauturu atu iho â Iehova ia ˈna. (Sam. 1, 25:24, 26, 28, 33, 34) Mai ia Abigaila, e titauhia te itoito no te aˈo i te hoê taata o te haere ra na nia i te eˈa e hapa ˈi oia. (Sal. 141:5) E titauhia ia faaite i te faatura, ia ore atoa râ e taiâ i te parau. Ia aˈo tatou ma te here ia vetahi ê, te haapapu ra tatou e hoa mau tatou no ratou.—Mas. 27:17.

9-10. Eaha te titauhia i te mau matahiapo ia haamanaˈo a aˈo ai ratou ia vetahi ê?

⁹ Mea faufaa roa ˈtu â ia paraparau te mau matahiapo ma te itoito i te mau taeae e tuahine e haere ra na nia i te eˈa e hapa ˈi ratou. (Gal. 6:1) Ma te haehaa, ua ite te mau matahiapo mea tia ore ratou e e hinaaro atoa ratou i te aˈoraa. Eita râ te reira e tapea ia ratou ia aˈo ia vetahi ê. (Tim. 2, 4:2; Tito 1:9) I te taime a na reira ˈi ratou, e faaohipa maite te mau matahiapo  i to ratou vaha no te haapii atu ma te aravihi e te faaoromai. E aˈo ratou no to ratou here i te mau taeae. (Mas. 13:24) Ta ratou haapeapearaa matamua, e faahanahana ïa ia Iehova ma te paturu i ta ˈna mau ture aveia e ma te paruru i te amuiraa.—Ohi. 20:28.

¹⁰ Ua ite mai nei tatou eaha te taime tano no te parau. I te tahi râ taime, e titauhia ia mamû noa. E ere râ i te mea ohie ia na reira noa.

11. Eaha te faahohoˈaraa ta Iakobo i horoa e no te aha mea tano roa te reira?

¹¹ E ere iho â i te mea ohie ia haavî i to tatou vaha. E faahohoˈaraa tano roa ta Iakobo i horoa no te faataa i te reira. Ua papai oia: “Ia ore te hoê taata ia hapa i te parau, e taata tia roa ïa, e e vî atoa ia ˈna to ˈna tino taatoa.” (Iak. 3:2, 3) I roto i teie irava, ua faaohipahia te parau “vî” ma te manaˈo i te tavaha e tuuhia i nia i te afii e i roto i te utu o te hoê puaarehenua. E faaohipa te taata faahoro i te tavaha no te aratai aore ra no te tapea i te puaarehenua. Ia ore te taata faahoro e tapea maite i te tavaha, e horo hanoa te puaarehenua ma te haapaoraa ore a pepe atu ai te animara aore ra te taata faahoro. Ia ore atoa tatou e haavî i to tatou vaha, e fifi rahi te nehenehe e tupu! No reira, e hiˈopoa anaˈe i teihea taime e titauhia ia haavî i to tatou vaha aore ra ia mamû.

12. I teihea taime e titauhia ia haavî i to tatou vaha e ia mamû?

¹² Mai te aha to outou huru i nia i te mau taeae aore ra tuahine tei ite i te tahi parau e ore e tia ia faaitehia? Ia farerei outou i te hoê taeae e ora ra i te fenua ua opanihia ta tatou ohipa, e ani anei outou ia ˈna mea  nafea ratou e rave ai i ta ratou taviniraa i ǒ? E manaˈo maitai paha to outou. Te here e te haapeapea ra outou no te mau taeae o tera fenua e te hinaaro ra outou e faahiti ia ratou i roto i ta outou mau pure. I roto râ i tera tupuraa, mea maitai aˈe ia haavî i to tatou vaha e ia mamû. Ia onoono atu tatou, aita tatou e faaite ra i te here mau. E nehenehe hoi te taviniraa a te mau taeae e tuahine o tera fenua e haafifihia. Ua teimaha ê na ratou no te opaniraa, eiaha ïa tatou ia faateimaha roa ˈtu â! I te tahi aˈe pae, eiaha atoa te taeae aore ra tuahine e ora ra i tera fenua ia faaite mea nafea te mau Ite no Iehova e rave ai i ta ratou pororaa, putuputuraa e te tahi atu ohipa Kerisetiano.

13. Ia au i te Maseli 11:13, eaha te titauhia i te mau matahiapo ia haamanaˈo e eaha te tumu?

¹³ Mea faufaa roa ˈtu â ia haapao te mau matahiapo i te faaueraa tumu e matara mai ra i roto i te Maseli 11:13. (A taio.) E ere râ paha i te mea ohie no te matahiapo faaipoipohia ia tapea i “te parau moe.” No te aha? Ia puai noa te here i rotopu i na hoa faaipoipo, e titauhia ia paraparau te tahi i te tahi ma te faaite iho â râ i to raua mau manaˈo, huru e haapeapearaa. Ia haamanaˈo râ te matahiapo eiaha oia ia faaite i “te parau moe” no nia i te mau taeae e tuahine o te amuiraa. Ia ore oia ia haapao i tera tuhaa, eita vetahi ê e tiaturi faahou ia ˈna e e ino to ˈna roo. Hoê o te mau titauraa no te feia faatoroahia i roto i te amuiraa, eiaha ïa to ratou ei “vaha piti,” aore ra haavarevare. (Tim. 1, 3:8; nota) Te auraa, eiaha ratou ia faahuru ê aore ra ia afaifai i te parau. Eita te matahiapo o te here ra i ta ˈna vahine e faateimaha ia ˈna ma te faaite atu i te tahi parau e ore e tia ia faaitehia!

14. E nafea te vahine a te hoê matahiapo e turu ai i ta ˈna tane ia maitai noa to ˈna roo?

¹⁴ E nehenehe te vahine e turu i ta ˈna tane matahiapo ia maitai noa to ˈna roo. Ei hiˈoraa, eita oia e onoono atu ia faaite mai ta ˈna tane i te tahi mea e ore e tia ia ˈna ia parau. Ia haapao oia i tera tuhaa, eita noa te vahine e turu i ta ˈna tane, e faatura atoa râ oia i te feia tei tiaturi i ta ˈna tane. Te mea faufaa roa ˈtu â, e oaoa Iehova no te mea te tapi ra oia i te mau mea e faatupu i te hau e o te tahoê i te amuiraa.—Roma 14:19.

15. Eaha to Iehova manaˈo ia Eliphaza, Biladada e Zophara e eaha te tumu?

¹⁵ Mea rahi atoa ta tatou e haapii mai i roto i te buka Ioba no te ite eaha te taime tano no te parau e e nafea ia na reira. I muri aˈe i te mau ati ino mau ta Ioba i faaruru, ua haere mai e maha taata ia ˈna ra. Mea maoro ratou i te mamûraa. Ua faaite râ te mau parau ta Eliphaza, Biladada e Zophara i faahiti i muri aˈe, aita ratou i faaohipa i te taime i mamû ai ratou no te imi i te ravea no te tauturu ia Ioba. Ua feruri râ e nafea ia haapapu e hara ta Ioba i rave. I te tahi taime, ua faahiti ratou i te tahi mau parau tano, mea rahi aˈe râ te parau hape e te ino no nia ia Ioba e ia Iehova tei matara mai na roto i to ratou vaha. Ua haava ratou ia Ioba ma te etaeta mau. (Ioba 32:1-3) Eaha to Iehova manaˈo i teie na taata e toru? Ua riri roa oia e ua faariro atoa ia ratou ei feia maamaa. Ua faaue Iehova ia ratou ia ani ia Ioba ia pure no ratou.—Ioba 42:7-9.

16. Eaha te haapiiraa e huti mai i te hiˈoraa o Eliphaza, Biladada e Zophara?

¹⁶ E rave rau haapiiraa ta tatou e huti  mai i te hiˈoraa o Eliphaza, Biladada e Zophara. A tahi, eiaha e haava i to tatou mau taeae. (Mat. 7:1-5) E faaroo maite anaˈe râ ia ratou hou a paraparau ai. I reira noa tatou e taa ˈi i te fifi ta ratou e faaruru ra. (Pet. 1, 3:8) A piti, e feruri maite anaˈe mea tano e mea mahanahana anei te mau parau ta tatou e faahiti. (Eph. 4:25) A toru, te tâuˈa ra Iehova i te mau parau e matara mai na roto i to tatou vaha.

17. Eaha te haapiiraa ta tatou e huti mai i te hiˈoraa maitai o Elihu?

¹⁷ O Elihu te maha o te taata tei haere ia Ioba ra, e fetii oia no Aberahama. A paraparau ai Ioba e na taata e toru, ua faaroo maite noa Elihu i ta ratou mau parau atoa. No reira oia i faahiti ai i te parau mahanahana, oia atoa râ i te parau o tei faatitiaifaro i te manaˈo o Ioba. (Ioba 33:1, 6, 17) Te haapeapearaa matamua a Elihu, o te faahanahanaraa ïa ia Iehova, eiaha râ ia ˈna iho aore ra i te tahi atu taata. (Ioba 32:21, 22; 37:23, 24) E hiˈoraa maitai ta Elihu i horoa mai, ua taa maitai hoi ia ˈna eaha te taime tano no te mamû e no te faaroo noa. (Iak. 1:19) Te haapii atoa mai ra oia ia horoa tatou i te aˈoraa, e titauhia ia faahanahana ia Iehova, eiaha râ ia tatou iho!

18. E nafea tatou ia faaite te haafaufaa ra tatou i te ô ta Iehova i ho mai?

¹⁸ Ua ho mai Iehova i te vaha no te paraparau. E haafaufaa tatou i tera ô ma te haapao i te mau aratairaa Bibilia no te ite eaha te taime tano no te parau e e nafea ia faaohipa maitai i to tatou vaha. Ua aratai te varua moˈa o Iehova i te arii Solomona ia papai i teie aˈoraa paari: “Mai te lemoni [aore ra apara] auro i roto i te vairaa ario ra, o te parau ïa ia parauhia i te taime mau ra.” (Mas. 25:11) E taata paraparau rahi tatou aore ra aita, ia faaroo maite tatou ia vetahi ê a feruri atoa ˈi hou a paraparau ai, e riro ta tatou mau parau mai te apara auro ra te huru. E faahiti hoi tatou i te parau faufaa mau e te nehenehe o te faaitoito ia vetahi ê. (Mas. 23:15; Eph. 4:29) E mauruuru roa ïa Iehova ua haafaufaa tatou i te ô ta ˈna i ho mai!