1-2. (1) Eaha ta te Maseli 16:31 e parau ra no te feia ruhiruhia? (2) Eaha te mau uiraa ta tatou e pahono i roto i teie tumu parau haapiiraa?

 TE VAI ra te hoê vahi i Marite e pue noa te taiamani na raro. Aita râ tera mau taiamani i taraihia ˈtura. No reira, ia hahaere te taata na ǒ, eita ratou e haapao eaha to raro i to ratou avae. E haere afaro noa ratou.

² E nehenehe to tatou feia ruhiruhia e faaauhia i teie mau taiamani. Mea faufaa roa ratou. I roto i te Bibilia, e hei upoo te rouru hinahina. (A taio i te Maseli 16:31; 20:29) E ara anaˈe râ, eiaha roa ˈtu ratou e moˈehia ia tatou. E faufaahia te mau taurearea o te haafaufaa ra i te feia ruhiruhia. I roto i teie tumu parau haapiiraa, e pahono mai tatou i teie na toru uiraa: No te aha Iehova e haafaufaa ˈi i te feia ruhiruhia? Eaha te parahiraa ta Iehova e horoa ra ia ratou i roto i ta ˈna faanahonahoraa? E eaha ta tatou e rave ia faufaahia tatou i to ratou hiˈoraa?

3. No te aha mea faufaa to tatou mau taeae e tuahine ruhiruhia no Iehova? (Salamo 92:12-15)

³ Mea faufaa roa te feia ruhiruhia no Iehova. Te ite ra o ˈna ia ratou e te haafaufaa ra o ˈna i ta ratou e rave nei. Mea au roa na ˈna ia ite i te feia ruhiruhia ia haapii i te mau taurearea i to ratou ite tei noaa mai ia ratou i te roaraa o to ratou mau matahiti taviniraa. (Ioba 12:12; 32:9; Mas. 1:1-4) Te haafaufaa atoa ra Iehova i to ratou faaoromai tamau. (Mal. 3:16) Noa ˈtu ua faaruru ratou i te tahi  mau fifi i roto i to ratou oraraa, ua tapea noa ratou i te faaroo puai ia Iehova. Mea puai aˈe to ratou tiaturiraa i teie mahana i te omuaraa, i to ratou haapiiraa i te parau mau. E mea here na Iehova ia ratou no te mea te tamau ra ratou i te poro i to ˈna iˈoa noa ˈtu te matahiti rahi.—A taio i te Salamo 92:12-15.

4. Eaha te mau parau o te nehenehe e tamahanahana i to tatou mau taeae e tuahine ruhiruhia?

⁴ Te paari noa ˈtu ra paha oe. Ia papu maitai râ ia oe e te haamanaˈo ra Iehova i te ohipa ta oe i rave na mua ˈˈe. (Heb. 6:10) Ua poro oe ma te itoito rahi e ua faaoaoa oe i te aau o Iehova. Ua faaruru oe i te fifi e te ati rahi atoa paha. Ua paturu oe i te mau ture aveia Bibilia tia roa. Ua amo oe i te hopoia e ua faaineine oe ia vetahi ê i roto i te faanahonahoraa a Iehova. Ua tutava oe i te pee maite i te mau tauiuiraa i ravehia i roto i te faanahonahoraa a Iehova. Ua turu e ua faaitoito oe i te mau taeae e tuahine i roto i ta ratou taviniraa taime taatoa. No to oe taiva ore, mea here roa na Iehova ia oe. Ua parau oia “eita oia e faarue i tei ore i taiva ia ˈna.” (Sal. 37:28) Te haapapu mai ra oia: “E hinahina noa ˈtu to outou upoo, e amo noa vau ia outou.” (Isa. 46:4) Eiaha roa ˈtu e manaˈo aita faahou ta oe e tuhaa i roto i te faanahonahoraa a Iehova, e parahiraa iho â to oe i roto i te amuiraa!

5. Eaha ta te feia ruhiruhia e haamanaˈo?

⁵ Mea rahi ta te feia ruhiruhia e nehenehe e rave i roto i te faanahonahoraa a Iehova. Noa ˈtu mea paruparu rii ratou i teie nei, mea rahi to ratou ite. E nehenehe Iehova e tamau i te faaohipa ia ratou mai ta teie mau hiˈoraa i muri nei e faaite atu.

6-7. A horoa i te hiˈoraa o te tahi mau tavini ruhiruhia a Iehova tei haamaitaihia no to ratou taiva ore.

⁶ I roto i te Bibilia, te vai ra te hiˈoraa o te tahi mau tane e vahine tei tavini ia Iehova noa ˈtu to ratou matahiti rahi. Te vai ra te hiˈoraa o Mose. A piri ai o ˈna i te 80 matahiti, ua haamata o ˈna i te tavini  ei peropheta na Iehova e ei tia no te nunaa o Iseraela. O Daniela atoa, noa ˈtu ua hau atu i te 90 matahiti to ˈna, ua tamau noa Iehova i te faaohipa ia ˈna ei auvaha no ˈna. Ua hau atoa i te 90 matahiti to te aposetolo Ioane a aratai ai Iehova ia ˈna ia papai i te buka Apokalupo.

⁷ Mea rahi atoa te tavini a Iehova tei ore i matau-maitai-hia. Mea ohie roa ia haamoˈe ia ratou. Tera râ, te tâuˈa ra Iehova ia ratou e te haamaitai ra oia i to ratou taiva ore. Te vai ra te hiˈoraa o Simeona, te hoê taata parau tia e tei mǎtaˈu i te Atua. Hoê noa taime o ˈna i te faahitiraahia i roto i te Bibilia. Ua ite râ Iehova ia ˈna. Ua faaite Iehova ia ˈna i te aiû o Iesu e ua rave atoa o ˈna ia tohu Simeona no nia i te tamaiti e to ˈna metua vahine. (Luka 2:22, 25-35) A feruri atoa na i te peropheta vahine ra o Ana. E 84 matahiti to ˈna. Tera râ, te parau ra te Bibilia “i haere noa na oia i te hiero.” Ua haamaitai Iehova i to ˈna haapao maitai ma te faaite ia ˈna ia Iesu ei aiû. Mea papu, mea faufaa no Iehova o Simeona raua Ana.—Luka 2:36-38.

8-9. Eaha ta te tahi mau tuahine e tamau nei i te rave noa ˈtu ua pohe ta ratou tane?

⁸ I to tatou tau, mea rahi atoa te feia ruhiruhia tei riro ei hiˈoraa maitai roa no te mau taurearea. Teie te hiˈoraa o tuahine Lois Didur. E 21 matahiti to ˈna i to ˈna haamataraa i te tavini ei pionie taa ê i Kanada. I muri aˈe i to ˈna faaipoiporaa i te taeae John, ua tavini raua e rave rahi matahiti i roto i te tuhaa haaati. I muri aˈe, ua tavini raua 20 matahiti i te Betela o Kanada. I te 58raa o to ˈna matahiti, ua titau-manihini-hia Lois raua John no te haere e tavini i Ukraine. Ua manaˈo anei raua mea paari roa raua no te tavini i te hoê vahi ê? Aita roa ˈtu! Ua farii raua i te titau-manihini-raa e ua tavini John ei mero o te Tomite amaa. Ua pohe John 7 matahiti i muri aˈe. Ua faaoti râ Lois e tamau noa i roto i ta ˈna taviniraa. I teie mahana, e 81 matahiti to Lois e te tavini noa ra o ˈna ei mero o te Betela no Ukraine.

⁹ Eita paha te mau tuahine mai ia Lois e haapao-faahou-hia i muri aˈe i te poheraa o ta ratou tane. Tera râ, te haafaufaa noa ra Iehova ia ratou no te mea ua turu ratou i ta ratou tane e rave rahi matahiti e te tamau noa ra ratou i te tavini ia ˈna ma te taiva ore. (Tim. 1, 5:3) Ua riro atoa ratou ei faaitoitoraa mau no te mau taurearea.

10. Eaha te hiˈoraa maitai ta Tony e horoa ra?

¹⁰ Mea faufaa roa atoa te mau taeae e tuahine ruhiruhia o te ora ra i roto i te mau fare ruau. Teie te hiˈoraa o taeae Tony. I Atete 1942, ua bapetizohia o ˈna i Marite. E 20 matahiti to ˈna i tera taime. I muri iti noa ˈˈe râ i to ˈna bapetizoraa, ua  titauhia o ˈna no ta ˈna tau faehau. Ua patoi o ˈna i tera titauraa. Tuuhia ˈtura ïa o ˈna i roto i te fare auri e piti matahiti e te afa. E piti tamarii ta raua Hilda, ta ˈna vahine faaipoipo. I te roaraa o te mau matahiti, ua tavini Tony i roto e toru amuiraa ei tiaau o te tino matahiapo e ei tiaau o te mau tairururaa haaati. Ua faatere atoa oia i te mau putuputuraa e te haapiiraa Bibilia i roto i te hoê fare auri. E 98 matahiti to ˈna i teie nei e te tamau noa ra o ˈna i te tavini ia Iehova e to ˈna mau taeae e tuahine o te amuiraa.

11. E nafea ia faaite e mea faufaa roa to tatou mau taeae e tuahine e ora ra i roto i te hoê fare ruau?

¹¹ E nafea ia faaite e mea faufaa roa to tatou mau taeae e tuahine e ora ra i roto i te hoê fare ruau? Mai te peu e nehenehe, e tauturu te mau matahiapo ia ratou ia apiti aore ra ia faaroo i te mau putuputuraa. E tauturu atoa te mau matahiapo ia ratou ia nehenehe ratou e poro. E nehenehe tatou e haere e farerei ia ratou aore ra e niuniu atu. Mea faufaa roa to tatou mau taeae e tuahine o te ora ra i roto i te hoê fare ruau mea atea i ta ratou amuiraa. Eiaha roa ˈtu tatou e haamoˈe ia ratou. E ere paha i te mea ohie no te tahi mau taeae e tuahine ruhiruhia ia faaite i to ratou oraraa. E faufaahia râ tatou i ta ratou mau faatiaraa e i te oaoa ta ratou i huti mai i roto i ta ratou taviniraa ia Iehova.

12. Eaha te mau hiˈoraa faahiahia roa ta tatou e ite nei i roto i ta tatou mau amuiraa?

¹² Te vai ra paha te tahi mau hiˈoraa faahiahia roa i roto i ta tatou amuiraa, mai te tuahine Harriette o tei tavini ia Iehova ma te taiva ore e rave rahi matahiti i roto i ta ˈna amuiraa i New Jersey i Marite. I muri iho, ua haere o ˈna e ora i te fare o ta ˈna tamahine. Ua tapiri atu te mau mero o ta ˈna amuiraa apî ia ˈna no te haamatau atu. E maoti te mau faatiaraa no nia i ta ˈna taviniraa, ua faaitoito o ˈna ia ratou. Ua haapii o ˈna i te parau mau i te area matahiti 1925. I afai noa na o ˈna i te hoê purumu niho na muri ia ˈna i roto i te pororaa. Ua na reira o ˈna mai te peu noa ˈtu e haruhia o ˈna no te afai atu i te fare auri. I 1933, e piti taime te huriraahia o ˈna i roto i te fare auri hoê hebedoma te maoro. Noa ˈtu e ere ta ˈna tane i te Ite no Iehova, ua turu noa o ˈna ia ˈna ma te haapao i te mau tamarii i te mau taime i mau ai Harriette i te fare auri. Papu, mea faufaa roa to tatou mau taeae e tuahine taiva ore mai ia Harriette.

13. Eaha ta tatou e haapii mai no nia i to tatou mau taeae e tuahine ruhiruhia?

¹³ E parahiraa faufaa roa to te mau taeae e tuahine ruhiruhia i roto i te faanahonahoraa a Iehova. I te roaraa o to ratou oraraa, ua ite ratou ia Iehova i te haamaitairaa ia ratou e oia atoa i ta ˈna faanahonahoraa. Mea rahi te haapiiraa ta ratou i huti mai i ta ratou mau hape. E “puna o te paari” ratou, a huti mai ïa i te haapiiraa i to ratou hiˈoraa. (Mas. 18:4) Ia haamatau oe ia ratou, e puaihia to oe faaroo e mea rahi te mea ta oe e haapii mai.

14. I roto i te Deuteronomi 32:7, eaha te faaitoitoraa no te mau taurearea?

¹⁴ A haere e paraparau i te feia ruhiruhia. (A taio i te Deuteronomi 32:7.) Parau mau, te mohimohi noa ˈtura to ratou mata, te paruparu noa ˈtu ra to ratou tino e te mǎrû noa ˈtura to ratou reo. Tera râ, te hinaaro noa nei ratou e horoa i te mea maitai roa ˈˈe i roto i te taviniraa e  e iˈoa maitai to ratou i mua ia Iehova. (Koh. 7:1) A haamanaˈo no te aha mea faufaa ratou no Iehova e a tamau i te faatura ia ratou. A pee i te hiˈoraa o Elisaia o tei onoono i te pee ia Elia i te mau vahi atoa e haere ai o ˈna. E toru taime to Elisaia parauraa: “Eita vau e faarue ia oe.”—Arii 2, 2:2, 4, 6.

15. Eaha ta tatou e nehenehe e ui i te feia ruhiruhia?

¹⁵ Ma te haere e paraparau i te feia ruhiruhia, te faaite ra tatou e te tâuˈa ra tatou ia ratou. (Mas. 1:5; 20:5; Tim. 1, 5:1, 2) E nehenehe tatou e ui ia ratou: “I to oe apîraa, eaha tei haapapu ia oe e ua itehia mai ia oe i te parau mau?” “I roto i teih.ea mau tupuraa oe i ite ai i te rima o Iehova i roto i to oe oraraa?” “Eaha tei tauturu ia oe ia oaoa noa i roto i ta oe taviniraa?” (Tim. 1, 6:6-8) A faaroo maitai i ta ratou mau faatiaraa.

16. Ia paraparau te hoê ruhiruhia e te hoê taurearea, e nafea raua e faufaahia ˈi?

¹⁶ Ia paraparau te hoê ruhiruhia e te hoê taurearea, o raua piti atoa ra te faufaahia. (Roma 1:12) E te feia apî, e rahi atu â to outou mauruuru ia Iehova no to ˈna hamani maitai i nia i ta ˈna mau tavini taiva ore. E ite te ruhiruhia e mea herehia o ˈna e e oaoa o ˈna ia faatia ˈtu i te mau haamaitairaa ta ˈna i fanaˈo ia Iehova ra.

17. No te aha tatou e parau ai e rahi noa ˈtu â te nehenehe o to tatou mau taeae e tuahine ruhiruhia?

¹⁷ Ia mairi te mau matahiti, e morohi te nehenehe. Eita râ te nehenehe o te mau tavini taiva ore a Iehova e morohi. E rahi atu â râ te reira a mairi ai te mau matahiti. (Tes. 1, 1:2, 3) Ua vaiiho hoi ratou i te varua o te Atua ia tarai ia ratou a nehenehe atu ai ratou e faatupu i te mau huru maitatai. Ia haamatau tatou i to tatou mau taeae e tuahine ruhiruhia, ia faatura tatou ia ratou e ia huti mai i te haapiiraa i to ratou hiˈoraa, e ite ïa tatou e faufaa rahi to ratou.

18. Eaha ta tatou e hiˈo mai i roto i to muri nei tumu parau haapiiraa?

¹⁸ E puai atu â te hoê amuiraa ia haafaufaa te mau taurearea i te feia ruhiruhia, oia atoa râ ia haafaufaa te feia ruhiruhia i te mau taurearea. I roto i to muri nei tumu parau haapiiraa, e hiˈo mai tatou e nafea te feia ruhiruhia e haafaufaa ˈi i te mau taurearea i roto i te amuiraa.