EAHA to outou huru ia papai mai te tahi hoa piri i te hoê rata? Ua tae atu te hoê rata mai tera ia Timoteo no ǒ mai i te aposetolo Paulo, o te Timoteo 2 ïa i roto i te Bibilia. Eita e ore ua imi Timoteo i te vahi aita e maniania no te taio i te rata a to ˈna hoa here. Peneiaˈe, ua uiui Timoteo, ‘Eaha te huru o Paulo? E faaitoitoraa anei ta ˈna no ta ˈu mau hopoia, te taviniraa aore ra no te tauturu ia vetahi ê?’ Na roto i ta Paulo rata, aita noa Timoteo i ite i te pahonoraa i tera mau uiraa, ua fanaˈo atoa râ i te tahi mau aratairaa faufaa mau. O ta tatou ïa e hiˈo mai.

A taio ai i te parau “ta ˈu tamaiti here,” ua taa oioi ia Timoteo i to Paulo here ia ˈna. (Tim. 2, 1:2) A tae atu ai teie rata i te matahiti 65, e 30 paha matahiti to Timoteo, ua riro ê na o ˈna ei matahiapo feruriraa paari. Mea rahi hoi ta ˈna i haapii i na ahuru matahiti taviniraa e o Paulo.

Ua itoitohia Timoteo i te iteraa ua faaoromai tamau Paulo noa ˈtu te mau ati ta ˈna i faaruru. Tei roto Paulo i te mau fifi auri i roto i te fare tapearaa i Roma e ua fatata atoa i te pohe. (Tim. 2, 1:15, 16; 4:6-8) Ua ite Timoteo i te itoito o te aposetolo a parau ai oia: “No reira ïa vau e faaoromai noa ˈi i te mau mea atoa.” (Tim. 2, 2:8-13) Mai ia Timoteo, e nehenehe atoa tatou e itoitohia i te faaoromai tamau o Paulo.

Ua faaitoito Paulo ia Timoteo ia haafaufaa i ta ˈna hopoia i roto i te taviniraa a te Atua. Ua hinaaro Paulo ia atuatu Timoteo i “te ô a te Atua” e vai ra i roto ia ˈna. (Tim. 2, 1:6) Te auraa o te taˈo Heleni karisema hurihia i te parau “ô,” o te hoê ïa ô e horoa-noa-hia noa ˈtu eita e au i te hoê taata ia fanaˈo i te reira. Ua horoahia ia Timoteo tera ô i to ˈna maitiraahia no te hoê taviniraa taa ê i roto i te amuiraa.—Tim. 1, 4:14.

 Ua faaitoitohia ia Timoteo ia atuatu i tera ô “mai te hoê auahi ra.” Ua manaˈo paha Timoteo i te arahu o te auahi e vai ra i roto i te mau fare. Ua titauhia ia atuatu i te auahi ma te puhipuhi i nia i te mau arahu ia ura faahou mai te auahi e ia mahanahana te fare. Ia au i te hoê titionare, te auraa o te taˈo Heleni anazopureo ta Paulo i faaohipa, o te faaura-faahou-raa ïa i te auahi, oia atoa te faaitoitoraa i te rave i te hoê ohipa. Mai te huru ua parau Paulo ia Timoteo: “A faaitoito i te rave maite i ta oe hopoia!” Hoê â atoa aˈoraa no tatou i teie mahana, e faaitoito anaˈe i roto i ta tatou taviniraa!

I roto i ta ˈna rata, ua faahiti Paulo i te tahi atu mea o te tauturu ia Timoteo i roto i ta ˈna taviniraa. Ua na ô Paulo: “A faaherehere i teie mau mea maitai roa tei tuuhia ia oe ra na roto i te varua moˈa e vai ra i roto ia tatou.” (Tim. 2, 1:14) Eaha teie mau mea maitai roa tei tuuhia ia Timoteo? I roto i te irava na mua ˈtu, ua faahiti Paulo i “te parau maitatai,” oia hoi te parau mau faaitehia i roto i te mau Papai. (Tim. 2, 1:13) Ei tavini na te Atua, ua titauhia ia haapii Timoteo i te parau mau i roto e i rapae i te amuiraa. (Tim. 2, 4:1-5) Ua faatoroa-atoa-hia Timoteo ei matahiapo no te aupuru i te nǎnǎ a te Atua. (Pet. 1, 5:2) Ua nehenehe Timoteo e faaherehere, aore ra e haafaufaa, i te parau mau ta ˈna e haapii atu ma te turui i nia i te varua moˈa o Iehova e ta ˈna Parau.—Tim. 2, 3:14-17.

I teie mahana, te haapii atoa nei tatou ia vetahi ê i te parau mau i tuuhia mai ia tatou. (Mat. 28:19, 20) E haafaufaa tatou i tera ô faahiahia mau ma te tamau i te pure e i te haapii i te Bibilia. (Roma 12:11, 12; Tim. 1, 4:13, 15, 16) Te vai ra vetahi o te tavini atoa ra ei matahiapo aore ra ma te taime taatoa. No tera haamaitairaa taa ê, e titauhia ia faahaehaa e ia ani i ta te Atua tauturu. E faaherehere ïa tatou i tei tuuhia mai ma te haafaufaa i te parau mau e ma te turui i nia ia Iehova no te haapao maite i te reira.

E faufaahia vetahi ê na roto i te taviniraa a Timoteo. No reira Paulo i faaitoito ai ia Timoteo: “E te mau parau ta oe i faaroo ia ˈu . . . o ta oe ïa e tuu atu i te mau tane haapao maitai, a ite atoa ˈtu ai ratou i te haapii maitai ia vetahi ê.” (Tim. 2, 2:2) Ua titauhia ia haapii Timoteo i te tahi atu mau taeae te mau mea atoa ta ˈna i haapii. Mea faufaa ia na reira te mau tiaau atoa i teie mahana. Eita te hoê tiaau maitai e tapea noa te ite i noaa ia ˈna, e opere râ o ˈna i te reira ia amo atoa vetahi ê i te hopoia. Eita o ˈna e mǎtaˈu ia aravihi aˈe ratou ia ˈna. Eita atoa te hoê tiaau e haapii noa i te mau tuhaa rii, e tauturu râ o ˈna ia vetahi ê ia faatupu i te feruriraa paari. Mea na reira “te mau tane haapao maitai” tei haapiihia e riro ai ei faaitoitoraa no te amuiraa.

Mea papu, ua haafaufaa mau Timoteo i te rata ta Paulo i faatae atu. Eita e ore ua taio e ua feruri oia i te reira e rave rahi taime no te ite e nafea ia rave maite atu â i ta ˈna mau hopoia.

E haafaufaa atoa anaˈe i tera mau faaitoitoraa. E riro anaˈe ei auahi i roto i ta tatou taviniraa, e faaherehere anaˈe i te parau mau i tuuhia mai e e opere anaˈe i te ite i noaa ia tatou. E ‘rave faahope roa ïa tatou i ta tatou taviniraa.’—Tim. 2, 4:5.