1. Eaha ta Iehova i rave no oe?

 MEA nafea oe i te riroraa mai ei Ite no Iehova? Ua faaroo paha oe i te parau apî oaoa i to oe nau metua ra, hoa ohipa, hoa haapiiraa aore ra maoti te pororaa i tera e tera fare. (Mar. 13:10) Mea na reira to oe haapiiraa i te Bibilia na muri i te hoê Ite no Iehova. Tupu ihora to oe here ia Iehova e haapii atura oe mea here na ˈna ia oe. Ua aratai Iehova ia oe i te parau mau e i teie nei, ei pǐpǐ na Iesu Mesia, te tiaturi ra oe e ora e a muri noa ˈtu. (Ioa. 6:44) Auê oe i te mauruuru ia Iehova i te faaohiparaa i te tahi Ite no Iehova no te haapii ia oe i te parau mau e i te fariiraa ia oe ei tavini na ˈna.

2. Eaha ta tatou e hiˈo mai i roto i teie tumu parau haapiiraa?

² I teie nei, ua ite tatou i te parau mau. E te hinaaro ra tatou e aratai atoa ia vetahi ê i nia i te eˈa o te ora. Mea ohie paha no outou ia poro i tera e tera fare, ia pûpû râ e ia faatere i te haapiiraa, mea fifi rii. E horoa mai teie tumu parau haapiiraa i te tahi mau manaˈo tauturu. E hiˈo mai tatou eaha te turai ra ia tatou ia faariro i te taata ei pǐpǐ. E hiˈo atoa mai tatou eaha te tauturu ia tatou ia ore e taiâ i te faatere i te hoê haapiiraa Bibilia. Na mua râ, e hiˈo mai tatou no te aha e titauraa ia poro e ia haapii i te parau apî oaoa i te taata.

3. No te aha tatou e poro ai?

³ A ora ˈi Iesu i nia i te fenua, e piti faaueraa ta ˈna i horoa  i ta ˈna mau pǐpǐ. A tahi, ua faaue o ˈna ia ratou ia poro i te parau apî oaoa o te Faatereraa arii a te Atua e ua faaite atu e nafea. (Mat. 10:7; Luka 8:1) Ei hiˈoraa, ua faaite Iesu i ta ˈna mau pǐpǐ eaha te rave ia farii te taata i taua poroi e ia ore ratou e farii. (Luka 9:2-5) Ua tohu atoa oia, “e porohia te parau apî oaoa o te Faatereraa arii e ati aˈe te fenua ia ite te mau nunaa atoa.” (Mat. 24:14; Ohi. 1:8) Noa ˈtu eaha te huru o te taata i mua i te poroi, e faaite te mau pǐpǐ a Iesu eaha tera Faatereraa arii e eaha ta te reira e rave.

4. Ia au i te Mataio 28:18-20, eaha te piti o te faaueraa ta Iesu i horoa i ta ˈna mau pǐpǐ?

⁴ Te piti o te faaueraa ta Iesu i horoa i ta ˈna mau pǐpǐ, ia haapii ïa i te taata ia haapao i te mau mea atoa ta ˈna i faaue. E parau paha vetahi: “No te mau Kerisetiano i te senekele matamua noa teie faaueraa a Iesu ia poro e ia haapii i te taata.” Ia au râ i ta Iesu i parau, e tamau noa tera ohipa i teie mahana “e tae noa ˈtu i te anotau hopea o te ao nei.” (A taio i te Mataio 28:18-20.) E au ra e ua horoa atoa Iesu i teie mau faaueraa i to ˈna faraa ˈtu i mua hau atu 500 pǐpǐ. (Kor. 1, 15:6) E i roto i te mau tupuraa ta Iesu i faataa ia Ioane, ua haapapu maitai o ˈna e titauhia i ta ˈna mau pǐpǐ atoa ia haapii i te taata o vai o Iehova.—Apo. 22:17.

5. Ia au i te Korinetia 1, 3:6-9, ua faaau Paulo i te pororaa e te haapiiraa i te taata i te aha?

⁵ Ua faaau te aposetolo Paulo i te ohipa faariroraa i te taata ei pǐpǐ i te ohipa faaapu. I to ˈna parauraa i to Korinetia: “Ua tanu vau, ua pîpî Apolo i te pape. . . . O outou te aua ta te Atua e faaapu ra,” ua faaite Paulo eita e navai noa ia tanu i te huero. (A taio i te Korinetia 1, 3:6-9.) Ei rave ohipa i roto i “te aua ta te Atua e faaapu ra,” e tanu ïa tatou i te huero ma te poro e e pîpî atoa tatou i te pape ma te haapii i te taata. (Ioa. 4:35) Ua ite râ tatou na te Atua e faatupu i te huero, na ˈna e faafatata ˈtu i te taata ia ˈna ra.

6. Ia haapii tatou i te taata, eaha te titauhia ia rave?

⁶ Te imi nei tatou i “te taata aau farii i te ora mure ore.” (Ohi. 13:48) Ia riro ratou ei pǐpǐ, e tauturu tatou ia ratou ia taa, ia farii e ia faaohipa i ta ratou e haapii ra i roto i te Bibilia. (Ioa. 17:3; Kol. 2:6, 7; Tes. 1, 2:13) E nehenehe te amuiraa taatoa e tauturu i te mau piahi Bibilia, ma te faaite i te here e ma te farii maitai ia ratou i te mau putuputuraa. (Ioa. 13:35) E rave te taata haapii i te taime no te tauturu i te piahi ia faarue i te mau tiaturiraa e peu hape tei aˈa roa i roto i te feruriraa o te piahi. (Kor. 2, 10:4, 5) E titauhia paha e rave rahi avaˈe no te tauturu i te hoê taata ia rave i te mau tauiraa i roto i to ˈna oraraa e tae roa ˈtu i te bapetizoraa. E hoona râ te taime!

7. No te aha tatou e poro e e haapii ai i te taata?

⁷ No te aha tatou e poro e e faariro ai i te taata ei pǐpǐ? A tahi, no to tatou here ia Iehova. Ia tutava tatou i te poro e i te faariro i te taata ei pǐpǐ, te faaite ra ïa tatou i to tatou here i te Atua. (Ioa. 1, 5:3) A feruri na, no to oe here ia Iehova ua haamata oe i te poro i tera e tera fare noa ˈtu e ere mea ohie. Ua taiâ paha oe i te taime matamua a poro ai oe. Ua ite râ oe tera te ohipa ta Iesu i faaue e ua rave iho â oe i ta ˈna i faaue. I te roaraa o te tau, ua iti mai to oe taiâ no te poro. E no te  haapii i te Bibilia i te taata, te taiâ atoa râ paha oe? Ia ani râ oe i te itoito ia Iehova no te pûpû atu i te hoê haapiiraa Bibilia, e tauturu mai o ˈna.

8. Ia au i te Mareko 6:34, eaha te turai ra ia tatou ia haapii i te taata?

⁸ A piti, na to tatou here i te taata e turai ia tatou ia haapii ia ratou i te parau mau. I te hoê mahana, ua poro Iesu e ta ˈna mau pǐpǐ e rave rahi hora. I te pae hopea ua rohirohi roa ratou. Ua hinaaro ïa ratou e faafaaea rii. I te iteraa râ Iesu i te hoê nahoa rahi, aroha roa ˈtura o ˈna ia ratou e “haapii atura oia ia ratou e rave rahi parau mau.” (A taio i te Mareko 6:34.) Noa ˈtu ua rohirohi roa o ˈna, ua haapii atu Iesu i tera nahoa rahi. Ua feruri o ˈna ia ratou, ua hinaaro o ˈna e tauturu ia ratou no te mea ua ite o ˈna i to ratou mauiui e to ratou hinaaro i te tiaturiraa. E fifi atoa to te taata i teie mahana e te hinaaro ra ratou i te tiaturiraa. Noa ˈtu ia hiˈohia ˈtu mea oaoa e e oraraa maitai to ratou, e au ratou i te mau mamoe e overe hanoa ra e aita e tiai no te aratai ia ratou. Ua parau Paulo no tera mau taata e aita e Atua e aita e tiaturiraa to ratou. (Eph. 2:12) Tei nia ratou i “te eˈa e tae atu ai i te haamouraa.” (Mat. 7:13) Ia feruri tatou i te taata i roto i ta tatou tuhaa fenua, aita ratou i ite o vai Iehova. E turai to tatou here e to tatou aumauiui ia tauturu ia ratou. Te ravea maitai roa ˈˈe no te tauturu ia ratou, o te pûpûraa ïa i te hoê haapiiraa Bibilia.

9. Ia au i te Philipi 2:13, e nafea Iehova e tauturu ai ia tatou?

⁹ Te taiâ ra paha oe i te pûpû i te hoê haapiiraa Bibilia no te mea e titauhia ia oe te taime no te faaineine e no te faatere i te haapiiraa. A haamahora ïa i to oe aau ia Iehova. A ani ia ˈna ia tauturu ia oe ia faatupu i te hinaaro e faatere i te hoê haapiiraa Bibilia. (A taio i te Philipi 2:13.) Te haapapu ra te aposetolo Ioane e pahono te Atua i te mau pure e tuati ra i to ˈna hinaaro. (Ioa. 1, 5:14, 15) E nehenehe ïa tatou e tiaturi e tauturu mai Iehova ia faatupu i te hinaaro e haapii i te taata.

10-11. Eaha te tapea ra ia vetahi ia faatere i te hoê haapiiraa Bibilia?

¹⁰ Mea faufaa roa ia pee i te faaueraa ia haapii i te taata, noa ˈtu te mau fifi e tapea ra ia tatou ia rave hau atu â i roto i te ohipa faariroraa i te taata ei pǐpǐ. E ite mai tatou vetahi o tera mau fifi e eaha te tauturu mai ia tatou.

¹¹ To tatou tupuraa. Mea maˈimaˈi aore ra mea paari paha tatou. A feruri na i te taime a tupu ai te COVID-19. Ua ite tatou e nehenehe ta tatou e faatere i te haapiiraa maoti te mau ravea apî. Haamata ˈtura ïa tatou i te faatere i te haapiiraa ma te faaea noa i to tatou nei fare. Hau atu â, i te taime a nehenehe noa ˈi tatou e poro i tera e tera fare, ua hinaaro vetahi e haapii i te Bibilia, aita râ ratou i vata no te mea mea maitai aˈe no ratou ia ravehia te reira i te poipoi roa aore ra i te po. E nehenehe anei ta oe e faatere i te haapiiraa i tera mau taime? Ua hinaaro Nikodemo ia haapii Iesu ia ˈna i te po, te taime maitai roa hoi no ˈna.—Ioa. 3:1, 2.

12. No te aha eiaha tatou e manaˈo e ere tatou i te mea aravihi no te faatere i te hoê haapiiraa Bibilia?

¹² Te manaˈo e ere tatou i te mea aravihi no te faatere i te haapiiraa Bibilia. Te manaˈo ra paha tatou e titauhia ia rahi atu â to tatou ite hou tatou a nehenehe ai e  faatere i te hoê haapiiraa. Eiaha e manaˈo mai tera! No te aha? A tahi, no Iehova, ua ineine tatou no te haapii i te taata. (Kor. 2, 3:5) A piti, ua horoahia ia Iesu te mana atoa i te raˈi e i te fenua e na ˈna e faaue mai ra ia tatou ia haapii i te taata. (Mat. 28:18) E a toru, e nehenehe tatou e pee i te hiˈoraa o vetahi ê. Ua paraparau Iesu mai ta to ˈna Metua i faaue ia ˈna, e nehenehe atoa ïa tatou e pee i to ˈna hiˈoraa. (Ioa. 8:28; 12:49) Hau atu â, e nehenehe tatou e ani i te tiaau o ta tatou pǔpǔ pororaa, te hoê pionie aore ra te tahi taata poro aravihi, ia tauturu ia tatou ia haamata i te hoê haapiiraa Bibilia. Ma te apiti atu i roto i ta ratou mau haapiiraa Bibilia, e aravihihia tatou.

13. No te aha tatou e haamatau ai i te mau ravea apî?

¹³ Te faaohiparaa i te mau mauhaa e ravea apî. Ua taui te huru faatereraa o te hoê haapiiraa Bibilia. I teie nei, te faaohipa ra tatou i te buka Ia ora oe e a muri noa ˈtu! Mea taa ê te faaineineraa e te faatereraa o te haapiiraa i ta tatou i matau na. Mea iti te paratarafa e taiohia e mea rahi aˈe te tauaparauraa i rotopu ia tatou e te piahi. I roto i te haapiiraa, mea rahi atu â te video ta tatou e faaite e mea rahi atoa te ravea apî ta tatou e faaohipa nei, mai te JW Library^®. Mai te peu aita oe e taa ra nafea ia faaohipa i teie mau ravea, a ani i te tahi ia haapii ia oe e nafea ia faaohipa i te reira. E ere iho â i te mea ohie no tatou paatoa ia taui i te mau raveraa ta tatou i matau noa na. Maoti râ te tauturu a Iehova e te tahi atu feia poro, e ohie aˈe ïa ia haamatau i tera mau ravea apî, e e anaanatae aˈe ïa oe no te haapii i te taata i te Bibilia. Mai ta te hoê pionie e parau ra: “Mea au roa tera mau ravea apî no te piahi e no te taata haapii atoa.”

14. Eaha te titauhia ia haamanaˈo tei roto anaˈe tatou i te hoê tuhaa fenua mea fifi ia haamata i te haapiiraa Bibilia e e nafea te Korinetia 1, 3:6, 7 e faaitoito ai ia tatou?

¹⁴ Te poro ra paha tatou i roto i te hoê tuhaa fenua mea fifi ia haamata i te haapiiraa Bibilia. Aita paha te taata e tâuˈa ra i ta tatou poroi aore ra te patoi ra ratou i te reira. E nafea râ tatou ia tapea noa i te hoê huru feruriraa maitai? A haamanaˈo e nehenehe te tupuraa o te taata e taui taue noa. Te vai ra paha vetahi o tei ore i anaanatae i ta tatou poroi na mua aˈe. I muri iho râ, ua farii ratou i te aratairaa a te Atua i roto i to ratou oraraa. (Mat. 5:3) Te vai ra vetahi o tei ore i hinaaro e taio i ta tatou mau papai na mua aˈe. Ua farii râ ratou i te hoê haapiiraa Bibilia i muri mai. Ua ite atoa tatou o Iehova te Fatu o te auhune. (Mat. 9:38) Te hinaaro ra o ˈna ia tamau tatou i te tanu e i te pîpî, na ˈna râ e faatupu. (Kor. 1, 3:6, 7) Mea faaitoito ia haamanaˈo e noa ˈtu aita e haapiiraa Bibilia ta tatou i teie nei, te ite ra Iehova i ta tatou mau tutavaraa e e haamaitai mai o ˈna ia tatou. *

15. Eaha to Iehova huru ia farii te taata i te haapii i te Bibilia a rave atu ai mai ta ratou i haapii mai?

¹⁵ Te oaoa ra Iehova ia farii te hoê taata i te parau mau e ia faaite oia i te reira ia vetahi ê. (Mas. 23:15, 16) E rahi atu â to Iehova oaoa ia ite o ˈna i ta ˈna mau tavini ia poro e ia haapii i te taata ma te  itoito. Ei hiˈoraa, noa ˈtu te COVID-19, i te roaraa o te matahiti 2020, ua faaterehia 7 705 765 haapiiraa Bibilia e ua bapetizohia 241 994 taata. I muri iho, e faatere atoa ratou i te tahi mau haapiiraa Bibilia a faariro atu ai i te taata ei pǐpǐ. (Luka 6:40) Papu roa, te faaoaoa ra tatou i te aau o Iehova ia faariro tatou i te taata ei pǐpǐ.

16. Eaha te fa ta tatou e nehenehe e haamau?

¹⁶ E titauhia te tutavaraa no te faariro i te taata ei pǐpǐ. Maoti te tauturu a Iehova, e nehenehe tatou e haapii i te taata ia here atoa i to tatou Metua i te raˈi. E nehenehe anei ta outou e haamau i te fa e haamata i te hoê haapiiraa Bibilia? Ia tamau tatou i te pûpû i te haapiiraa Bibilia i te mau taata atoa ta tatou e farerei, papu e haamaitai mai Iehova i ta tatou mau tutavaraa.

17. Eaha te mau haamaitairaa ia faatere i te hoê haapiiraa Bibilia?

¹⁷ E fanaˈoraa taa ê ia poro e ia haapii i te parau mau i te taata. E hopoi mai te reira i te oaoa mau. I Tesalonia, e rave rahi taata ta Paulo i tauturu ia riro mai ei pǐpǐ. E no to ˈna oaoa, teie ta ˈna i papai ia ratou: “O vai hoi to matou tiaturiraa, oaoaraa, aore ra hei upoo haapeuraa i mua i te Fatu ra o Iesu i te tau o to ˈna hoˈiraa mai? E ere anei o outou? O outou mau to matou hanahana e oaoaraa.” (Tes. 1, 2:19, 20; Ohi. 17:1-4) I teie mahana, mea rahi atoa te oaoa nei i te faariro i te taata ei pǐpǐ. Teie te hiˈoraa o te tuahine Stéphanie. Ua tauturu raua ta ˈna tane e rave rahi piahi Bibilia ia riro mai ei pǐpǐ. Teie ta ˈna e parau ra: “Aita ˈtu oaoa rahi aˈe no ˈu maori râ ia tauturu i te taata ia pûpû i to ratou ora ia Iehova!”