1. E nafea ia noaa ia tatou te paari e e tauturu mai te reira ia aha?

 O IEHOVA te tumu o te paari e e horoa noa oia i te reira i te taata. Te na ô ra te Iakobo 1:5: “Ia ere noa ˈtu hoê o outou i te paari, ia tamau noa ïa oia i te ani atu i te Atua, e horoa noa mai hoi oia i te taata atoa ma te ore e faahapa.” Te tahi ravea ia noaa mai te paari, o te fariiraa i te aˈo a Iehova. E tauturu mai hoi te reira ia ore e rave i te mea ino e ia vai piri noa ia Iehova. (Mas. 2:10-12) E noaa atoa mai ïa ia tatou te ora mure ore.—Iuda 21.

2. E nafea tatou e ite ai mea maitai te aˈo a te Atua?

² Ia aˈohia tatou, e ere i te mea ohie ia farii aore ra ia hiˈo i te reira ei maitai no tatou. Te tumu, no to tatou huru tia ore e peneiaˈe, no te haapiiraa i horoahia mai i te tamariiraa. Ia ite râ tatou i te mau maitai o te aˈo a te Atua i roto i te oraraa, e taa ia tatou ua na reira o Iehova no to ˈna here ia tatou. Te na ô ra te Maseli 3:11, 12: “Eiaha oe e inoino, e tau tamaiti, i te aˈo a Iehova.” Te parau atoa ra te irava i muri iho: “O tei herehia e Iehova ra, o ta ˈna ïa e aˈo mai.” Te imi noa ra ïa o Iehova i to tatou maitai. (A taio i te Hebera 12:5-11.) O te Atua tei ite mau i to tatou huru, e horoa mai ïa o ˈna i te aˈo tano i te taime e titauhia. I roto i teie haapiiraa, e hiˈopoa tatou e maha tuhaa o te aˈo: (1) Te faatitiaifaroraa ia tatou iho, (2) ta te metua aˈo i ta ratou tamarii, (3) te aˈo na roto i te  amuiraa e (4) te mauiui ino roa ˈtu â ia ore te aˈo e fariihia.

3. E nafea te tamarii e haapii ai ia faatitiaifaro ia ˈna iho? A horoa i te tahi hiˈoraa.

³ Ia faatitiaifaro tatou ia tatou iho, e haavî tatou i to tatou huru e manaˈo. E titauhia râ ia haapii i te na reira. A hiˈo na i te hoê tamarii o te haapii i te faatere i te pereoo tataahi. I te haamataraa, na te metua e faaafaro i te pereoo tataahi. I muri mai, e haapii te tamarii eaha te rave ia ore o ˈna ia topa e e nehenehe te metua e vaiiho rii ia ˈna maa taime. Ua papu anaˈe râ i te metua ua ite maitai te tamarii i te faatere i te pereoo tataahi, e vaiiho roa ˈtu oia. Ma te haapii atu “i te aˈo e te faaararaa a Iehova,” e tauturu te mau metua i te tamarii ia faatitiaifaro ia ˈna iho e ia riro ei taata feruriraa paari.—Eph. 6:4.

4, 5. (a) No te aha mea faufaa ia faatitiaifaro ia tatou iho no te ahu i “te huru taata apî”? (b) No te aha eiaha ia haaparuparu ia hape noa ˈtu tatou?

⁴ Hoê â raveraa no te hoê taata paari o te haamata i te haapii o vai o Iehova. E ite paha oia e nafea ia faatitiaifaro ia ˈna iho, aita râ i noaa ˈtura ia ˈna te feruriraa paari o te hoê Kerisetiano. E naea râ ia ˈna tera faito ia haamata oia i te ahu i “te huru taata apî” e te haa mai te Mesia. (Eph. 4:23, 24) Ma te faatitiaifaro ia tatou iho, e haapii tatou i te “haapae i te haerea ino e oia atoa te mau hinaaro o teie nei ao, e ia ora ma te manaˈo paari e te parau-tia e te haamori i te Atua anaˈe i roto i teie nei faanahoraa o te ao nei.”—Tito 2:12.

⁵ E taata hara râ tatou paatoa. (Koh. 7:20) Ua hape anaˈe tatou, te auraa anei aita tatou i ite i te faatitiaifaro ia tatou iho? E ere. A hiˈo na i te parauhia ra i roto i te Maseli 24:16: “E hiˈa te parau-tia e ia taihitu noa ˈtu i te hiˈaraa, e e tia faahou mai.” Eaha râ te tauturu ia “tia faahou mai”? E ere to tatou iho puai, to te varua moˈa râ. (A taio i te Philipi 4:13.) Ua riro te haavîraa ia tatou iho ei tuhaa o te hotu a te varua, e tuati te reira i te faatitiaifaroraa ia tatou iho.

6. E nafea tatou e au roa ˈi i te haapii i te Parau a te Atua? (A hiˈo i te hohoˈa matamua.)

⁶ E tauturu mai te pure, ta tatou iho haapiiraa Bibilia e te feruriruriraa ia faatitiaifaro ia tatou iho. E mai te peu e ere i te mea ohie aore ra eita outou e au ia haapii i te Bibilia? Eiaha e haaparuparu! A farii râ i ta Iehova tauturu “ia hiaai outou” i ta ˈna Parau. (Pet. 1, 2:2) A ani i ta ˈna tauturu no te faatitiaifaro ia outou iho a nehenehe atu ai outou e faaherehere i te taime no te haapii i te Bibilia. E haamata paha outou i te haapii tau minuti noa. Mea ohie aˈe ïa ia rave i ta outou haapiiraa e e riro te reira ei taime oaoa. E au roa atoa outou i te taime ta outou e faataa no te feruriruri i te mau manaˈo faufaa roa no ǒ mai ia Iehova ra.—Tim. 1, 4:15.

7. Ma te faatitiaifaro ia tatou iho, e nafea e naea ˈi ia tatou te mau fa no te tavini atu â ia Iehova?

⁷ Ma te faatitiaifaro ia tatou iho e naea ˈi te mau fa no te tavini atu â ia Iehova. A hiˈo na i te hiˈoraa o te tahi metua tane o tei tapao e ere oia i te mea itoito faahou i roto i te taviniraa. Haamau ihora oia i te fa e riro ei pionie tamau. Eaha tei tauturu atu ia faatitiaifaro ia ˈna iho? Ua taio oia i te mau tumu parau no nia i te taviniraa  pionie i roto i ta tatou mau vea e ua ani i te tauturu na roto i te pure. Ua piri atu â to ˈna auhoaraa e o Iehova. I te tahi taime, ua rave atoa oia i te taviniraa pionie tauturu. Aita oia i vaiiho i te hoê noa ˈˈe mea e tapea ia ˈna, ua tiatonu noa râ i nia i ta ˈna fa. Aita i maoro i muri aˈe, riro mai nei to tatou taeae ei pionie tamau.

8-10. Eaha te tauturu i te mau metua ia haapii i ta ratou tamarii ia tavini ia Iehova? A horoa i te tahi hiˈoraa.

⁸ Ua horoa o Iehova i te mau metua i te hopoia ia haapii i ta ratou tamarii i “te aˈo e te faaararaa a Iehova.” (Eph. 6:4) E ere roa ˈtu râ i te mea ohie ia na reira i roto i teie nei ao. (Tim. 2, 3:1-5) Aita te tamarii i ite i te faataa ê i te mea maitai i te mea ino, aita â to ratou manaˈo haava i haapiihia ˈtura. E titauhia ïa te aˈo no te na reira. (Roma 2:14, 15) Ua faataa te tahi aivanaa Bibilia, o te tupuraa o te tamarii atoa te auraa o te taˈo Heleni no te parau “aˈo.” Na roto i te aˈo a te metua, e haapiihia ïa te tamarii ia riro ei taata feruriraa paari i muri aˈe.

⁹ Ia aˈo te metua ma te here, te paruru ra oia i ta ˈna tamarii. Eaha tatou e parau  ai mai tera? E haapii hoi te tamarii, e tiamâraa to ˈna, te vai ra râ te otia. E tauturu atoa te reira ia ˈna ia taa, e ooti iho â o ˈna i ta ˈna e ueue. Ia au i te vahi ratou e ora ˈi, e taui hanoa te manaˈo o te taata no nia i te huru haapiiraa e horoa i te tamarii. Area te mau metua o te faaroo i te Atua, eita ratou e haapii ma te turui i nia i te manaˈo taata aore ra e ui eaha te tia ia rave.

¹⁰ E nehenehe tatou e haapii mai i te hiˈoraa o Noa. I to Iehova parauraa ˈtu ia hamani i te araka, aita roa o Noa i ite e nafea ia rave i te reira. Ua titauhia ia turui o ˈna i nia ia Iehova e ia rave noa mai ta Iehova i faaue atu. Ua na reira anei o Noa? E, te na ôhia ra: “Ta ˈna ïa i rave maite.” (Gen. 6:22) Maoti te reira i ora ˈi o Noa e to ˈna utuafare! Hou i te diluvi, e ere atoa i te mea ohie no te mau metua ia haapii i ta ratou tamarii. Noa ˈtu râ, ua riro o Noa ei metua tane maitai. Eaha te tumu? Ua vaiiho o ˈna i te paari o te Atua ia aratai ia ˈna no te aˈo i ta ˈna mau tamarii e no te faaite i te hiˈoraa maitai.—Gen. 6:5.

11. No te aha ia tutava maite te mau metua i te haapii i ta ratou tamarii?

¹¹ E te mau metua, e nafea ia “rave maite” i ta outou hopoia? A faaroo ia Iehova e a farii i ta ˈna aratairaa no te haapii i ta outou tamarii. A faaohipa i te mau aˈoraa i roto i ta ˈna Parau e no ǒ mai i ta ˈna faanahonahoraa. Eita e ore e haamauruuru atu ta outou tamarii i muri aˈe! Teie ta te tahi taeae i papai: “E mauruuru rahi to ˈu ia papa e mama no te haapiiraa ta raua i horoa mai. Ua tutava noa raua i te haaputapû i to ˈu aau.” Ua parau tera taeae na to ˈna mau metua i tauturu ia ˈna ia riro ei hoa piri no Iehova. Noa ˈtu e rave maite te mau metua i ta ratou hopoia, e nehenehe te tamarii e faaoti i te faarue ia Iehova. Ua rave anaˈe râ te metua i ta ratou tuhaa, eita te manaˈo haava e faahapa ˈtu. Hau atu â, e tamau ratou i te tiaturi e hoˈi mai te tamarii ia Iehova i te hoê mahana.

12, 13. (a) Ia tiavaruhia ta ratou tamarii, e nafea te mau metua ia faaite o te Atua ta ratou e faaroo? (b) Eaha te mau maitai ta te tahi utuafare i fanaˈo a faaroo ai na metua ia Iehova?

¹² E tupuraa fifi no te tahi mau metua ia tiavaruhia ta ratou tamarii e e tamata te reira i to ratou faaroo. Ua tiavaruhia e ua faarue te tamahine a te tahi tuahine i te fare. Te faatia ra tera tuahine: “Ua imi au i roto i ta tatou mau papai i te mau parau ei otoheraa no te farerei i ta ˈu tamahine e ta ˈu mootua.” Tera râ, ua tauturu atu ta ˈna tane ma te mǎrû ia farii ua amo raua i ta raua hopoia e e titauhia i teie nei ia faaite eita raua e taiva ia Iehova.

¹³ Tau matahiti i muri aˈe, ua faahoˈihia mai ta raua tamahine i roto i te amuiraa. Te na ô ra te tuahine: “I teie nei, fatata pauroa te mahana, e niuniu aore ra e hapono mai oia i te poroi vini! Mea faatura roa na ˈna ia mâua to ˈna papa no te mea ua ite o ˈna o te Atua ta mâua e faaroo. I teie nei, mea piri roa matou i te tahi e te tahi.” Ia tiavaruhia ta outou tamarii, e haapao anei outou i te aˈoraa ia “tiaturi ia Iehova ma to aau atoa”? E faaite anei outou ia Iehova eita outou e tiaturi i to outou iho manaˈo? (Mas. 3:5, 6) Eiaha e haamoˈe, e faaite mai te aˈo a Iehova, o ˈna te mea paari aˈe e mea here na ˈna ia tatou. A feruri na, ua horoa roa o Iehova  i ta ˈna Tamaiti no te taata atoa, no ta outou atoa ïa tamarii! E hinaaro te Atua ia noaa te ora mure ore i te taata atoa. (A taio i te Petero 2, 3:9.) No reira e te mau metua, a tamau i te tiaturi o te aˈo a Iehova e ta ˈna anaˈe aratairaa te mea maitai. Noa ˈtu e ere i te mea ohie ia rave i ta te Atua e ani mai ra i te tahi taime, a faaroo i ta ˈna aˈo, eiaha e patoi atu.

14. Eaha te maitai e noaa mai i te haapiiraa a Iehova na roto mai i “te tiaau haapao maitai”?

¹⁴ Ua fafau o Iehova i te aupuru, te paruru e te haapii i te amuiraa Kerisetiano e e rave rau ravea ta ˈna e faaohipa. Ua faatoroa oia i ta ˈna Tamaiti no te aupuru i te amuiraa. Area Iesu, ua maiti ïa i “te tiaau haapao maitai” no te horoa mai i te maa pae varua o te tauturu ia tatou ia tapea i te taiva ore. (Luka 12:42) E horoa mai tera “tiaau” i te haapiiraa, aore ra aˈo, faufaa mau. Ua faaroo aˈena anei outou i te hoê oreroraa parau o tei tauturu atu ia taui i to outou huru e manaˈo? Aore ra, peneiaˈe mea na roto i te taioraa i te tahi tumu parau i roto i ta tatou mau vea. E nehenehe outou e haapopouhia i te raveraa i tera mau tauiraa. Ua vaiiho hoi outou ia Iehova ia aˈo atu.—Mas. 2:1-5.

15, 16. (a) E nafea tatou ia faufaahia i te ohipa a te mau matahiapo? (b) Eaha te rave ia oaoa te mau matahiapo i te amo i ta ratou hopoia?

¹⁵ Ua faatoroa atoa te Mesia i te mau matahiapo no te aupuru i te amuiraa. Te parauhia ra i roto i te Bibilia, e “ô” tera mau taeae. (Eph. 4:8, 11-13) E nafea tatou ia faufaahia i te ohipa a te mau matahiapo? Ma te pee i to ratou faaroo e hiˈoraa e ma te haapao i te mau aˈoraa Bibilia ta ratou e horoa mai. (A taio i te Hebera 13:7, 17.) Mea here na te mau matahiapo ia tatou e te hinaaro ra ratou ia piri atu â tatou ia Iehova. Eaha ïa ta ratou e rave ua mairi anaˈe tatou i te putuputuraa aore ra mea paruparu i roto i te taviniraa? Oioi roa ratou i te hopoi mai i te tauturu. Ma te here, e faaroo e e horoa mai te mau matahiapo i te faaitoitoraa e te aˈoraa paari no roto mai i te Bibilia. Te taa ra anei ia oe e te haapapu atu ra o Iehova i to ˈna here na roto ia ratou?

¹⁶ A haamanaˈo noa e ere i te mea ohie no te mau matahiapo ia aˈo ia tatou. A feruri na i te huru o te peropheta Natana. Ua titauhia ia ˈna ia paraparau i te arii Davida o tei huna i ta ˈna hara ino mau. (Sam. 2, 12:1-14) E te aposetolo Paulo o tei aˈo ia Petero i te hiˈo-ê-raa i te mau Kerisetiano no te nunaa ê. Ua titauhia ia Paulo i te itoito no te aˈo hoê o na 12 aposetolo a Iesu. (Gal. 2:11-14) Eaha ïa te tia ia rave ia ohie atu â no te mau matahiapo ia horoa mai i te aˈoraa? A faahaehaa, a haamauruuru atu e a farii i te aˈoraa. Na roto ia ratou, te haapapu mai ra o Iehova i to ˈna here. Ma te na reira, e faufaahia tatou e e oaoa te mau matahiapo i te amo i ta ratou hopoia.

17. Mea nafea te mau matahiapo i te tautururaa i te tahi tuahine?

¹⁷ Te parau ra te tahi tuahine mea fifi no ˈna ia farii mea here na Iehova ia ˈna no ta ˈna i faaruru na mua ˈˈe. Ua hepohepo roa o ˈna i muri aˈe. Te na ô ra oia: “Ua titauhia ia paraparau vau i te mau matahiapo. Aita ratou i tamaˈi aore ra i faahapa mai, ua horoa mai râ i te aˈoraa e ua faaitoito mai ratou. I muri aˈe i te mau putuputuraa, e haere mai iho â hoê  e ani eaha to ˈu huru noa ˈtu mea ohipa roa ratou. No ˈu, eita e tano ia here te Atua ia ˈu no ta ˈu i rave na mua ˈˈe. Ehia aˈenei taime to Iehova faaohiparaa i te amuiraa e te mau matahiapo no te haapapu mai mea here na ˈna ia ˈu. E pure noa vau eiaha roa vau ia atea ê ia ˈna.”

18, 19. No te aha e mauiui roa ˈtu â tatou ia ore e farii i te aˈo? A horoa i te hiˈoraa.

¹⁸ Mea mauiui ia aˈohia tatou. Mea ino roa ˈtu râ ia ore tatou e farii i te aˈo no ǒ mai i te Atua. (Heb. 12:11) E huti mai anaˈe i te haapiiraa i te hiˈoraa o Kaina e to te arii Zedekia. I to Iehova iteraa ua hae e ua hinaaro roa Kaina e haapohe i to ˈna taeae, ua horoa ˈtu oia i teie faaararaa: “Eaha oe i riri ai; e eaha hoi i tuatua ˈi to mata na? Ia rave oe i te parau maitai ra, eita anei e itehia mai? e aore i maitai ra, te vai ra te taraehara i te uputa na. E auraro râ oia ia oe, e ei nia ˈˈe oe ia ˈna.” (Gen. 4:6, 7) Aita Kaina i farii i te aˈo a Iehova, ua haapohe atura i to ˈna teina e ua amo i te utua ino roa ˈtu â i te roaraa o to ˈna oraraa. (Gen. 4:11, 12) Ahani Kaina i faaroo i te Atua, eita ïa oia e mauiui rahi mau.

¹⁹ E arii ino e te paruparu mau o Zedekia. E fifi rahi ta to Ierusalema i faaruru i raro aˈe i ta ˈna faatereraa. Ehia taime to te peropheta Ieremia faaararaa ia Zedekia ia taui. Ua patoi râ te arii i te aˈo a Iehova e mea peapea mau tei tupu i muri aˈe. (Ier. 52:8-11) No reira, e imi noa o Iehova i to tatou maitai, eita o ˈna e hinaaro ia mauiui roa ˈtu â tatou.—A taio i te Isaia 48:17, 18.

20. Eaha te tupu no te feia e farii i te aˈo e no tei patoi i te reira?

²⁰ I teie mahana, e rave rahi i roto i teie nei ao o te vahavaha e te haafaufaa ore i te aˈo a te Atua. Fatata roa râ te utua ino mau i te topa i nia i te feia o te patoi i te reira. (Mas. 1:24-31) Area tatou, eaha te tia ia tatou ia rave? Te pahono mai ra o Iehova i roto i te irava tumu o teie haapiiraa: “E faaroo mai i te aˈo ia paari.” Te na ô atoa ra te Maseli 4:13: “E tapea etaeta i te aˈo: eiaha roa e tuua; e vaiiho maite i te reira; o to oe ïa ora.”