A tausani matahiti i teie nei, aita hoê aˈe taata i ite i te pahonoraa i taua uiraa ra. I roto i tera area taime, ua pohe tau mirioni taata no te maˈi pee. Ua itea mai râ i te mau aivanaa te parau mau aore ra te pahonoraa. Ua haapapu ratou e o te mau tirotiro aore ra te mau bateria te tumu o e rave rahi maˈi. Maoti taua itearaa, ua nehenehe e rave rahi taata e paruru ia ratou iho aore ra e fanaˈo i te rapaauraa. Ua ora maoro aˈe tau mirioni taata e ua maitai atu â ratou i te pae o te ea.

Te vai ra te tahi atu mau uiraa faufaa roa. No oe, nafea te pahonoraa i teie mau uiraa e tauturu ai ia oe?

• O vai te Atua?

• O vai o Iesu Mesia?

• Eaha te Faatereraa arii a te Atua?

• Eaha te tupu a muri aˈe?

Ua ite tau mirioni taata i te pahonoraa i taua mau uiraa ra e ua haamaitai ratou i to ratou oraraa. E nehenehe atoa oe e faufaahia maoti te reira.

E na ô paha oe, ‘E nehenehe anei au e ite i te parau mau no nia i te mau mea atoa?’ E au ra e, e ere i te mea ohie ia ite i te parau mau no nia i te tumu parau e rave rahi. No te aha?

E rave rahi taata o te ore e tiaturi ra i te mau hau faatere, te mau tapihooraa aore ra i te mau ravea haaparareraa parau. No ratou, e ere i te mea ohie ia ite e mea papu anei te tahi parau, te faaite noa ra anei te taata i to ratou iho manaˈo, te huna ra anei ratou i te tahi mau haamaramaramaraa aore ra te haavare ra anei ratou. I roto i teie nei ao papu ore o te haaparare i te mau parau haavare, mea taa ê to te taata mau manaˈo no nia i te mea papu e te mea haavare.

Noa ˈtu teie mau fifi, e nehenehe oe e ite i te pahonoraa i te mau uiraa faufaa roa ˈˈe o te oraraa. Nafea ïa? Maoti te mau ravea ta oe e faaohipa ra i te mau mahana atoa.

I te mau mahana atoa, e imi paha oe i te pahonoraa i te tahi mau uiraa. A tapao na i te tupuraa o Jessica. Te parau nei oia: “E maˈi tatiraa aratita to ta ˈu tamahine. Mai te peu e amu oia i te tahi noa ˈˈe maa aratita nainai roa, e nehenehe oia e pohe.” E mea tia ia ite Jessica te vai ra anei maa aratita i roto i te maa ta ˈna e hoo mai no te paruru i ta ˈna tamahine. Ua na ô oia: “Te ohipa matamua roa ta ˈu e rave, e taio vau i tei papaihia i nia i te puohu no te ite mea tano anei te tahi maa no ta ˈu tamahine. I muri iho, te rave nei au hau atu â maimiraa ma te ani i te totaiete hamaniraa aita anei te maa i anoihia e te aratita ma te opua ore. Te imi atoa nei au i te tahi atu mau haapapuraa no te ite e nehenehe anei au e tiaturi i taua totaiete ra.”

E ere paha ta oe maimiraa i te parau mau i te mau mahana atoa i te mea faufaa roa, mai te tupuraa o Jessica. Mai ia ˈna râ, e nehenehe oe e faaohipa i to muri nei mau ravea no te ite i te pahonoraa i ta oe mau uiraa:

• A hiˈopoa i te mau haamaramaramaraa.

• A rave hau atu â maimiraa.

• A haapapu e mea mau iho â te mau haamaramaramaraa ta oe i fanaˈo.

Ma te na reira, e nehenehe oe e ite i te pahonoraa mau i te mau uiraa faufaa roa ˈˈe o te oraraa. Nafea ïa?

A imi ai i te mau pue parau mau Bibilia, ua faaohipa Jessica hoê â ravea i ta ˈna i faaohipa a maimi ai oia no nia i te maˈi tatiraa o ta ˈna tamahine. Ua parau Jessica e ua ite oia i te mau pue parau mau Bibilia maoti te taio-maite-raa e te mau maimiraa i rave-maite-hia. Mai ia ˈna, ua haapii tau mirioni taata eaha ta te Bibilia e parau mai ra no nia i to muri nei mau uiraa:

• No te aha tatou e ora ˈi?

• Eaha te tupu ia pohe tatou?

• No te aha tatou e mauiui ai?

• Eaha ta te Atua e rave no te faaore i te mau mauiui atoa?

• Eaha te rave no te fanaˈo i te oraraa utuafare oaoa?

E nehenehe oe e ite i te mau pahonoraa papu i taua mau uiraa ra e i te tahi atu ma te taio i te Bibilia e ma te rave i te mau maimiraa hau i nia i te www.dan124.com.