I ROTO i te mau haapaoraa na te ao, mai te ekalesia Katolika no Roma, e rave rau pǔpǔ o te ekalesia Kerisetiano no hitia o te râ, te feia e pee ra ia Bouddha e te vai atu â, e titauhia eiaha ia faaipoipo no te riro ei aratai faaroo. No te taata e rave rahi râ, tera te tumu o te mau peu faufau o te itehia i rotopu i te mau tia haapaoraa.

Mea tano ïa ia ui, e titauhia anei ia faaea taa noa no te tavini ei tiaau i roto i te amuiraa? Eaha ta te Bibilia e haapii ra? No te pahono, e hiˈo anaˈe mea nafea tera haapiiraa i te haamataraa e te parareraa. Oti anaˈe, e hiˈopoa tatou i te manaˈo o te Atua.

Eaha te oraraa taa noa? Ia au i te tahi buka, “o te oraraa ma te ore e faaipoipo, e te oreraa atoa ïa e taoto i te apiti. (Encyclopædia Britannica) E pinepine, tera te itehia no te feia e amo i te tahi tiaraa i roto i te haapaoraa aore ra tei faataa ia ratou no te Atua.” I roto i ta ˈna poroi i te pǔpǔ taata i roto i te apooraa no Roma i 2006, ua parau te pâpa Benoît ua riro te titauraa eiaha ia faaipoipo ei “haapiiraa no te tahi tau piri atu i te tau o te mau aposetolo.”

Aita roa ˈtu râ te mau Kerisetiano o te senekele matamua i faariro i te oraraa taa noa ei titauraa no te tavini i te Atua. Ua faaara te aposetolo Paulo, tei ora i te senekele matamua, e haaparare vetahi taata i te mau parau haavare e te haapiiraa o “te faaore [aore ra opani] hoi i te faaipoiporaa.”—Timoteo 1, 4:1-3.

I te roaraa o te senekele piti, ua haamata tera peu i te rahi mai i roto i te mau haapaoraa Kerisetiano no tooa o te râ. Ia au i te buka Oraraa taa noa e peu tumu a te haapaoraa (Beretane), ua parare roa tera peu no te mea “ua farii aˈena te rahiraa i te  mau vahi faaterehia e te hau Roma i te haapae i te taoto i te apiti.”

Eaha tei itehia i te mau senekele i muri aˈe no nia i tera titauraa eiaha te feia toroa o te haapaoraa ia faaipoipo? Ua tamau to te mau apooraa a te ekalesia Katolika e tei piihia te pǔpǔ o te mau orometua i te turu i te reira. No ratou, e viivii te taata i te taotoraa i te apiti e eita e tano ia ˈna ia amo i te hopoia a te mau aratai haapaoraa. Te faaite ra râ te tahi buka, “e rave rahi â perepitero e epikopo i te senekele ahuru e vahine ta ratou.”—Encyclopædia Britannica.

I te apooraa Latran tei tupu i Roma i 1123 e 1139, ua riro te titauraa eiaha ia faaipoipo ei faaheporaa no te amo i te hopoia. Aita te reira i taui i roto i te ekalesia Katolika no Roma e tae roa mai i teie mahana. Na mua ˈˈe, e tutuu na te mau perepitero faaipoipohia i te faufaa a te ekalesia i ta ratou tamarii. Na roto râ i te faanahoraa i ravehia i na apooraa, ua faaea te faufaa rahi a te ekalesia i te mahere i te taata ê.

Ua faaite-maitai-hia te manaˈo o te Atua i roto i ta ˈna Parau, te Bibilia. Ua faahiti Iesu i te feia o tei maiti i te oraraa taa noa mai ia ˈna “no te basileia o te ao.” (Mataio 19:12) Ua faahiti atoa te aposetolo Paulo i te mau Kerisetiano o tei faaoti i te pee i to ˈna hiˈoraa ma te faaea taa noa “no te evanelia.”—Korinetia 1, 7:37, 38; 9:23.

Aita râ Iesu e Paulo i faaue i te mau tavini o te Atua eiaha ia faaipoipo. Ua parau Iesu e ere pauroa ta ˈna mau pǐpǐ te nehenehe e farii i te oraraa taa noa. E ô hoi te reira, e mea “horoahia” mai. I to Paulo papairaa no nia i te feia o tei ore i faaipoipo aˈenei, aore ra te paretenia, ua parau tia roa ˈtu oia: “Aita a ˈu parau no ǒ i te Fatu ra; e tuu atu râ vau i to ˈu manaˈo.”—Mataio 19:11; Korinetia 1, 7:25.

Hau atu â, te faaite ra te Bibilia e rave rahi Kerisetiano faaipoipo o tei amo i te hopoia tiaau i te senekele matamua mai te aposetolo Petero. (Mataio 8:14; Mareko 1:29-31; Korinetia 1, 9:5) Ua faaipoipo anaˈe te tiaau, ua papai Paulo, “ei taata vahine hoê” oia e te tia ia tapea i “ta ˈna tamarii i te auraro-maite-raa ia ˈna.” Ua na reira Paulo i te parau no te rahi o te mau peu taotoraa tia ore i Roma.—Timoteo 1, 3:2, 4.

E ere teie mau Kerisetiano i te feia o tei faaipoipo e te ore e taoto i ta ratou vahine. Aita hoi te Bibilia i huna i te parau ia “horoa te tane i te mea tia i te vahine.” I te feia faaipoipo, ua na ô atoa: “Eiaha orua e faataa [aore ra faaere] ia orua iho” no te haamâha i te mau hinaaro o te tahi e te tahi. (Korinetia 1, 7:3-5) Mea papu, aita te Atua e titau ra i te taata ia faaea taa noa. E ere atoa i te mea tano ia faahepohia te tiaau Kerisetiano eiaha ia faaipoipo.

Mai te peu aita i faahepohia, no te aha Iesu e Paulo i parau ai e mea maitai ia faaea taa noa? No te mea, e nehenehe tei farii i te reira e poro atu â i te parau apî oaoa. E taime rahi atu â to te feia taa noa, eita hoi ratou e tapitapi no te mau mea e haapeapea ra i te feia faaipoipo.—Korinetia 1, 7:32-35.

A hiˈo na ia David o tei faarue i ta ˈna ohipa aufau-maitai-hia i Mexico no te haere i Costa Rica no te haapii i te Bibilia i te taata. No David, ua tauturu te oraraa taa noa ia ˈna ia na reira. Te na ô ra oia: “E ere i te mea ohie ia haamatau i te peu tumu ê e te huru oraraa apî. Auaa e Kerisetiano faaea taa noa vau, mea ohie aˈe ïa.”

Ua haere atoa Claudia, te hoê vahine Kerisetiano taa noa, i te mau vahi e hinaarohia te feia poro evanelia. Te na ô ra oia: “Ua oaoa roa vau i ta ˈu taviniraa. Ua puai atu â to ˈu faaroo e ua piri atu â vau i te Atua. Ua taa mau vau na ˈna i aupuru maite ia ˈu.”

Eiaha te oraraa taa noa ia riro ei mea teimaha. Ua parau â Claudia: “Mea faaipoipohia oe aore ra aita, te mea faufaa, o te horoaraa i te mea maitai roa ˈˈe i te Atua ra o Iehova. I reira hoi oe e oaoa ˈi.”—Salamo 119:1, 2.