Fatata roa te Faatereraa a te Atua i te raˈi i te faatere i te huitaata. E riro ïa te fenua ei vahi oaoa, i reira te taata e ora ˈi ma te amui e ma te rave i te ohipa au e te oaoa. Ua maiti te Atua ia Iesu Mesia no te faatere i te fenua. I teie mahana, mea rahi te feia faatere o te ore e tâuˈa ra i te huiraatira. Mea taa ê râ Iesu, e rave noa hoi o ˈna i te mea maitai roa ˈˈe no te taata. Ua niuhia ta ˈna huru faatereraa i nia i te here. E e riro o ˈna ei Arii tia, aroha e te hamani maitai.​—Isaia 11:4.

Eita te taata e amaha faahou no to ratou nunaa. E hoê te taata atoa. (Apokalupo 7:9, 10) E here te taata atoa i te Atua e to ratou taata tupu e e ohipa amui ratou ma te hau no te faatupu i te opuaraa a te Atua, oia hoi ia haapao i te fenua.​—Salamo 115:16.

Ia haamata te Faatereraa arii i te raˈi i ta ˈna ohipa, na te Atua e haapao i te huru o te reva. (Salamo 24:1, 2) I te haereraa mai Iesu i nia i te fenua, ua faaite o ˈna i te mana ta te Atua i horoa ia ˈna ma te tamaˈi i te mataˈi e ia mania te miti. (Mareko 4:39, 41) I raro aˈe i te faatereraa a te Mesia, eita tatou e mǎtaˈu faahou i te mau ati natura. I raro aˈe i te Faatereraa arii a te Atua, e ora tatou ma te hau e te mau animara e eita tatou e tuino faahou i te natura.​—Hosea 2:18.

E maitai roa te ea o te taata atoa. Eita tatou e maˈi-faahou-hia, eita tatou e ruau-faahou-hia a pohe atu ai. (Isaia 35:5, 6) E oaoa te taata i te vahi mâ e te nehenehe ta te taata matamua i fanaˈo i roto i te ô o Edene. Mai i Edene, e tupu rahi mai te maa i roto i te ao apî e eita te taata e ere faahou i te reira. (Genese 2:9) Mai ia Iseraela, te nunaa o te Atua i tahito ra, “e tamaa maitai” te taata atoa i roto i te paradaiso.​—Levitiko 26:4, 5.

I raro aˈe i te faatereraa a te Atua, e hau noa te taata e e hamani maitai ratou te tahi i te tahi. Aita faahou e tamaˈi, aita faahou e haavîraa, e aita faahou e haapeapearaa no te mau mea o te oraraa. Te fafau ra te Bibilia: “E parahi ratou tataitahi i raro aˈe i ta ratou tumu vine e ta ratou tumu suke, e eita hoê e faariaria ia ratou.”​—Mika 4:3, 4.

E fanaˈo te mau utuafare atoa i te hoê fare e eita ratou e mǎtaˈu faahou e tuuhia ratou i rapae. E oaoa ratou i te mau ohipa atoa ta ratou e rave. Mai ta te Bibilia e parau ra, eita te feia o te ora i roto i te ao apî “e rohi faufaa ore noa.”​—Isaia 65:21-23.

Te fafau ra te Bibilia: “E î te fenua i te ite ia Iehova.” (Isaia 11:9) E haapii te taata o te ora i raro aˈe i te Faatereraa arii a te Atua i te paari faito ore o to ratou Atua poiete ra o Iehova e no nia i te mau mea atoa ta ˈna i hamani. Eita ratou e faaohipa i to ratou aravihi no te hamani i te mauhaa tamaˈi e no te hamani ino i te tahi atu mau taata. (Isaia 2:4) E haapii râ ratou ia ora hau noa e vetahi ê e ia haapao i te fenua.​—Salamo 37:11.

Ua faaineine maitai te Atua i te fenua ia oaoa tatou i te ora i reira i te mau mahana atoa. Tera ta ˈna opuaraa no te taata. (Salamo 37:29; Isaia 45:18) Ia tupu te reira, “e horomii oia i te pohe e a muri noa ˈtu.” (Isaia 25:8) Te fafau ra te Bibilia: “E ore roa te pohe, e ore atoa te oto e te auê e te mauiui.” (Apokalupo 21:4) E horoa te Atua i te tiaturiraa e ora e a muri noa ˈtu i te taata atoa, oia hoi te taata o te ora ˈtu i te haamouraa e te taata o te faahoˈihia mai i te ora.​—Ioane 5:28, 29; Ohipa 24:15.

 I teie nei â, te faaineine ra e mirioni taata ati aˈe i te ao nei no te ora i raro aˈe i te Faatereraa arii a te Atua o tei piri roa mai. Noa ˈtu mea tia ore ratou, te tutava nei ratou i te faatupu te huru taata ta te Atua e hinaaro ra i roto i te ao apî. E nafea? Ma te haapii ïa o vai te Atua ra o Iehova e ta ˈna i tono mai, o Iesu Mesia.—Ioane 17:3.

No te ite atu â eaha te rave no te ora ˈtu i te hopea o teie nei ao a fanaˈo atu ai i te hoê oraraa maitai roa, a farii i te hoê aparauraa Bibilia e te hoê Ite no Iehova ma te faaohipa i te buka Ia ora oe e a muri noa ˈtu!