TE HUITAATA

Ta te Bibilia e parau ra: Aita te Atua “i hamani i te [fenua] mai tera noa, ua hamani râ ia parahihia e te taata.”​—ISAIA 45:18.

TE FENUA

Ta te Bibilia e parau ra: “Te haere atu nei te tahi uˈi, e te haere mai nei te tahi uˈi, e vai noa râ te fenua e a muri noa ˈtu.”​—KOHELETA 1:4.

TE AURAA: Ia au i te Bibilia, eita te fenua e haamouhia e e parahi noa te taata i reira. Eaha ïa te auraa ia parauhia e mou teie nei ao?

A FERURI: Te faaau ra te Bibilia i te hopea o teie nei ao i tei tupu i te tau o Noa. I tera ra tau, “ua î te fenua i te haavîraa uˈana.” (Genese 6:13) Ua haapao noa râ Noa i te mau aratairaa a te Atua. Ua paruru ïa te Atua ia ˈna e to ˈna utuafare e ua haamou i te feia ino na roto i te hoê diluvi. Te parau ra te Bibilia no nia i tera tupuraa e ua mou “te ao o taua tau ra i te diluviraahia te reira.” (Petero 2, 3:6) Mea na reira te ao o te tau o Noa i te mouraa. Eaha tei haamouhia? E ere te fenua, o te feia ino râ i nia i te fenua. No reira, ia parau te Bibilia e mou teie nei ao, e ere ïa te haamouraa o te fenua, o te haamouraa râ o te feia ino i nia i te fenua e to te faanahoraa o te ao ta ratou i haamau.

TE MAU FIFI E TE INO

Ta te Bibilia e parau ra: “Tau taime â, e aita faahou te feia ino. E hiˈo oe i to ratou vahi, eita râ oe e ite ia ratou i reira. E fatu râ te feia mǎrû i te fenua, e e au roa ratou i te rahi o te hau.”​—SALAMO 37:10, 11.

TE AURAA: Aita te diluvi i te tau o Noa i haamou roa i te ino. I muri aˈe i te diluvi, ua fa faahou mai te feia ino. Fatata roa râ te Atua i te haamou roa i te ino. Mai ta te papai salamo i parau: “Aita faahou te feia ino.” E haamou te Atua i te ino maoti ta ˈna Faatereraa arii, te hoê faatereraa i te raˈi o te faatere i te feia parau-tia i nia i te fenua.

A FERURI: E farii maitai anei te mau tia mana o te fenua i te Faatereraa arii a te Atua? Eita, te faaite ra te Bibilia e patoi ratou i te reira. (Salamo 2:2) Eaha ïa to ratou hopea? E haamou te Faatereraa arii a te Atua i te mau hau faatere atoa o te fenua “e o ˈna anaˈe te vai mai e a muri noa ˈtu.” (Daniela 2:44) No te aha mea titauhia ia faaorehia teie mau huru faatereraa?

Ta te Bibilia e parau ra: “Aita e tiaraa to te taata e haere ra ia aratai i to ˈna mau taahiraa.”​—IEREMIA 10:23.

TE AURAA: Aita te taata i poietehia no te faatere ia ratou iho. Aita ratou e faatere maitai ra i te taata e aita atoa e haere ra ia ratou ia faaafaro i te mau fifi.

A FERURI: Ia au i te Britannica Academic, aita ta te mau faatereraa taata e ravea i mua i te veve, te pohe poia, te maˈi, te mau ati natura, te mau tamaˈi e te haavîraa. Te na ô ra te Britannica Academic: “Te tiaturi ra vetahi e na te hoê pǔpǔ faatereraa amui anaˈe e nehenehe e hopoi mai i te ravea no te faaafaro i teie mau fifi.” Noa ˈtu râ e amui te mau faatereraa, na te taata tia ore noa iho â e faatere i te fenua e eita iho â e haere ia ratou ia faaafaro i te mau fifi faahitihia na mua ˈtu. O te Faatereraa arii a te Atua anaˈe te nehenehe e faaore roa i te mau fifi atoa e vai ra i nia i te fenua.

Eiaha râ te feia maitai e mǎtaˈu ia mou teie nei ao, oia hoi te faanahoraa o te ao. E parau apî oaoa teie inaha e monohia teie ao ino i te ao apî maitai roa ta te Atua i fafau!

Afea te reira e tupu ai? E pahonohia teie uiraa i roto i te tumu parau i muri mai.