Ua faaite mai te mau tumu parau na mua ˈtu fatata roa te Atua i te haamou i teie ao ino e te mau fifi atoa. E tupu mau iho â te reira no te mea ua fafau te Atua i roto i ta ˈna Parau te Bibilia:

“Fatata atoa teie nei ao i te mou.”​—IOANE 1, 2:17.

Ua papu ia tatou e ora ˈtu vetahi, teie hoi ta te Bibilia e parau ra:

“Te taata e rave i te hinaaro o te Atua, e vai noa mai ïa e a muri noa ˈtu.”

No reira, mai te peu e hinaaro tatou e ora ˈtu i te hopea o teie ao, mea titauhia ia rave i te hinaaro o te Atua. No te ite eaha te hinaaro o te Atua, mea faufaa roa ia ite o vai o ˈna.

Ua parau Iesu: “No te fanaˈo i te ora mure ore, ia ite ïa ratou o vai oe te Atua mau hoê roa.” (Ioane 17:3) No te ora e a muri noa ˈtu, mea titauhia ia ‘ite o vai’ te Atua. E ere noa i te tiaturiraa i te Atua, aore ra i te iteraa i te tahi mau parau no nia ia ˈna. E titauhia ia riro ei hoa no ˈna. Ia puai te hoê auhoaraa, mea titauhia ia faataa i te taime no to tatou mau hoa. Mai tera atoa e te Atua! Teie te tahi mau parau ta te Bibilia e haapii ra o te tauturu ia tatou ia faatupu i te hoê auhoaraa piri e te Atua.

E pohe tatou ia ore tatou e tamaa. Tera râ, ua parau Iesu: “Eita te taata e ora i te maa anaˈe, i te mau parau atoa râ no roto mai i te vaha o Iehova.”​—Mataio 4:4.

I teie mahana, tei roto i te Bibilia te mau parau a Iehova. A hiˈopoa ˈi oe i teie buka moˈa, e haapii mai oe i te tahi mau parau faufaa roa no nia i te mau mea ta te Atua i rave i tahito ra, ta ˈna e rave ra i teie nei e e ite mai oe eaha ta ˈna e rave a muri aˈe.

Te hinaaro ra paha oe e faaroo i te Atua. Mea fifi râ ia faaea i te rave i te mau peu ta ˈna e ore e au. E nafea ïa? Ia matau maitai oe i te huru o te Atua, e tauturu rahi mai te reira.

Teie te aamu o te hoê vahine ta tatou e pii Sakura. E oraraa tano ore to ˈna na mua ˈtu. I te haamataraa Sakura i te haapii i te Bibilia, ite atura o ˈna i te faaueraa a te Atua ia “maue ê atu i te mau peu taotoraa tia ore.” (Korinetia 1, 6:18) Ua pure Sakura ia Iehova ia horoa mai i te puai e ua haere ia ˈna ia faaea i te rave i teie mau peu viivii. Te aro noa nei râ o ˈna i te reira. Te parau ra o ˈna: “Ia puta mai te mau manaˈo viivii i roto i to ˈu feruriraa, e pure au ia Iehova. Ua ite au eita vau e upootia mai te peu o vau anaˈe. Ua faafatata ˈtu vau ia Iehova maoti te mana o te pure.” Mai ia Sakura, e mirioni taata te haapii ra o vai te Atua. Te horoa nei o ˈna i te puai ia ratou no te taui i to ratou huru oraraa a ora ˈtu ai ratou ia au i to ˈna hinaaro.—Philipi 4:13.

Hau atu â oe i te ite no nia i te Atua, hau atu â ïa te Atua i te faariro ia oe ei hoa no ˈna. (Galatia 4:9; Salamo 25:14) E nehenehe ïa oe e ora i roto i te ao apî. Mai te aha râ te ao apî? Tera ta te tumu parau i muri mai e faataa.