Ua parau te Atua ia Adamu: “Ei te mahana e amu ai oe i [to te raau ra], e pohe ïa oe.” (Genese 2:17) Mai te peu ua poietehia te Atua ia Adamu ia ruhiruhia oia e ia pohe, aita ïa O ˈna e horoa ˈtu i tera faaueraa. Ua taa ia Adamu e mai te peu aita oia e amu i to teie tumu raau, aita ïa o ˈna e pohe.

Aita e titauhia ia Adamu raua Eva ia amu i to tera tumu raau no te ora. E rave rau tumu raau e hotu i roto i te ô i Edene. (Genese 2:9) Ma te ore e amu i to tera tumu raau, e faaite na hoa faaipoipo matamua i to raua auraroraa i Tei horoa ia raua i te ora. Oia atoa i to raua fariiraa e tiaraa to te Atua no te parau ia raua eaha te mea tia ia rave.

No te ite no te aha Adamu raua Eva i pohe ai, e titauhia ia hiˈopoa i te hoê aparauraa e faahopearaa to te reira i nia ia tatou pauroa. Ua faaohipa te Diabolo ra o Satani i te hoê ophi no te haaparare i te hoê parau haavare. Te faataa ra te Bibilia: “E paari rahi to te ophi i to te mau manu avae maha atoa o te fenua, i ta te Atua ra ta Iehova i hamani ra; e ua na ô maira oia i te vahine, Oia ïa, ua parau mai te Atua e, Eiaha orua e amu i to te mau raau atoa o te ô nei?”—Genese 3:1.

Ua pahono atura o Eva: “E amu mâua i to te mau raau atoa o te ô nei; maori râ o to taua raau i ropu i te ô nei, ua parau mai ïa te Atua e, Eiaha orua e amu i to reira; eiaha hoi orua e rave noa ˈtu; a pohe orua.” I muri iho, ua parau te ophi ia ˈna: “E ore roa orua e pohe: ua ite hoi te Atua e, ua amu anaˈe orua i to reira, e araara ïa to orua mata, e e riro orua mai te atua ra te huru, i te ite i te maitai e te ino.” Ua haapapu ïa o Satani e Atua haavare o Iehova, o te ore e hinaaro ia fanaˈo Adamu raua Eva i te hoê mea maitai.—Genese 3:2-5.

Ua tiaturi o Eva i ta ˈna i faaroo. Ua hiˈo atura o ˈna i te tumu raau. E raau maitai roa ia hiˈo atu e te hinaaro! Ua rave atura o ˈna i to te tumu raau ra e ua haamata ˈtura o ˈna i te amu i te reira. I muri iho, te na ô ra te Bibilia: “Hopoi atura hoi i ta te tane, amu atoa ihora hoi oia.”—Genese 3:6.

Auê ohipa mauiui mau no te Atua a ite ai i ta ˈna mau tamarii here tei faaroo ore ia ˈna ma te hinaaro mau! Eaha ta ˈna i rave? Ua parau Iehova ia Adamu: “E hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.” (Genese 3:17-19) No reira “to Adamu pue mahana atoa i to ˈna ra oraraa, e iva ïa hanere, e toru ahuru i te matahiti; pohe ihora oia.”  (Genese 5:5) Aita Adamu i haere i nia i te raˈi aore ra i roto i te ao varua. Aita oia i ora hou a poiete ai Iehova ia ˈna ma te faaohipa i te repo. No reira i to ˈna poheraa, ua ere o ˈna i te ora e ua riro to ˈna tino mai te repo. Ua faaea o ˈna i te ora. Auê tupuraa peapea mau!

No to Adamu raua Eva faaroo-ore-raa ma te hinaaro mau, ua ere raua i te tia-roa-raa e te ora mure ore. Ua riro raua ei taata tia ore e te hara. E ere râ o raua anaˈe tei roo i te faahopearaa o ta raua hara e to raua faaroo-ore-raa i te Atua. Ua horoa raua i tera tiaraa taata hara i ta raua mau tamarii. Te na ô ra te Roma 5:12: “Mai te hara i ô mai i te ao nei na roto i te taata hoê ra [o Adamu] e te pohe na roto i te hara, e ua raea roa ïa te mau taata atoa i te pohe no te mea ua hara ratou paatoa.”

Te faahohoˈa ra te Bibilia i te hara e te pohe mai “te tapoˈi i tapoˈihia ˈi te mata o te taata atoa ra, e te vehî i hohorahia i nia i te mau fenua atoa ra.” (Isaia 25:7) Te tapoˈi ra te hara i te huitaata mai te hoê rupehu taero, aita hoê aˈe e nehenehe e ora mai. Papu maitai, “no Adamu hoi te taata atoa e pohe ai.” (Korinetia 1, 15:22) Mai ta te aposetolo Paulo i parau, teie ïa te uiraa te matara mai nei: “O vai te faaora mai ia ˈu i te tino e aratai ra ia ˈu i teie huru pohe?” E nehenehe anei tatou e faaorahia ˈi?—Roma 7:24.