Ua naea ia Hulda ta ˈna fa
MAI te peu ua haere outou i nia i te motu o Sangir Besar i Initonetia a tau matahiti i teie nei, ua farerei paha outou e toru tuahine Ite no Iehova na tatahi. Ua matauhia ratou no ta ratou pororaa, inaha e tauturu ratou i te taata ia haapii i te Bibilia. I teie râ taime, e ohipa ê ta ratou e rave nei.
Te motu o Sangir Besar i te pae apatoerau o Initonetia
E haere ratou na roto i te miti no te tari mai i te mau ofai rarahi i tatahi. Mai te hoê popo te rahi o te tahi mau ofai. I muri mai, e faaohipa na tuahine e toru i te hamara no te faahuˈahuˈa i teie mau ofai ia riro roa te reira mai te huero moa ra te huru. Ia oti anaˈe, e tuu ratou i te reira i roto i te mau patete a tietie atu ai i to ratou nohoraa. I muri iho, e tapute ratou i te mau ofai o te faaohipahia no te hamani i te mau purumu.
Hulda e ohi ra i te mau ofai na tatahi
O Hulda hoê o na toru tuahine. Taa ê atu i te tahi mau tuahine, ua nehenehe o ˈna e ohipa hau atu â hora. E faaohipa o ˈna i te moni e noaa mai no te aupuru i to ˈna utuafare. I teie nei râ, e fa ta ˈna, e tuu o ˈna i te hiti i te tahi moni no te hoo mai i te hoê matini afaifai no te faaohipa i te JW Library®. Ua ite hoi Hulda e tauturu rahi te mau video e te tahi atu mau mea itehia i roto i te JW Library ia haamaitai i ta ˈna taviniraa e ia taa maitai atu â i te Bibilia.
Ua ohipa Hulda e piti hora i te mau poipoi atoa no te roaraa hoê avaˈe e te afa. Ua tupaipai o ˈna e rave rahi ofai e î ai te hoê pereoo pani. I te pae hopea, ua pee roa ta ˈna matini afaifai.
Hulda e ta ˈna matini afaifai
Te na ô ra Hulda: “Noa ˈtu mea rohirohi roa tera ohipa, ua oaoa roa vau i te noaaraa mai ta ˈu matini afaifai, aita ˈtura ïa vau i haamanaˈo faahou i te mauiui. Maoti teie matini, ua aravihi atu â vau i roto i te pororaa e ua ohie atu â ta ˈu faaineineraa i te putuputuraa.” Maoti atoa teie ravea, ua nehenehe o ˈna e apiti i te mau putuputuraa i roto i te tau opanipaniraa. Te oaoa nei tatou e ua naea ia Hulda ta ˈna fa.
