1. Eaha to outou manaˈo i te parau mau?

 MEA faatura roa te mau tavini a Iehova i te parau mau o te Bibilia. Ua niu tatou i to tatou faaroo i nia i te reira. (Roma 10:17) Ua papu ia tatou e na Iehova i haamau i te amuiraa ei “pou e te paturu o te parau mau.” (Tim. 1, 3:15) E te auraro nei tatou ma te aau tae i “te mau aratai” i rotopu ia tatou. E na reira tatou ia faataa ratou i te parau mau Bibilia e ia horoa mai i te aratairaa ia au i te hinaaro o te Atua.—Heb. 13:17.

2. Ia au i te Iakobo 5:19, eaha te nehenehe e tupu noa ˈtu ua farii tatou i te parau mau?

² Noa ˈtu ua farii tatou i te parau mau e te aratairaa a te faanahonahoraa a te Atua, e nehenehe tatou e atea ê i te parau mau. (A taio i te Iakobo 5:19.) E oaoa roa Satani ia faaea tatou i te tiaturi i te Bibilia aore ra i te pee i te aratairaa no ǒ mai i te faanahonahoraa.—Eph. 4:14.

3. No te aha e titauhia ˈi ia mau papu ia tatou te parau mau? (Ephesia 6:13, 14)

³ A taio i te Ephesia 6:13, 14. Fatata Satani i te haaparare i te poroi haavare no te turai i te mau nunaa ia patoi ia Iehova. (Apo. 16:13, 14) Ua ite atoa tatou e imi Satani i te mau ravea atoa no te haavare i te mau tavini a Iehova. (Apo. 12:9) No reira, e titauhia ia taa ia tatou te taa-ê-raa i rotopu i te parau mau e te haavare, e ia faaroo  i te parau mau. (Roma 6:17; Pet. 1, 1:22) Mea faufaa te reira no te ora ˈtu i te ati rahi.

4. Eaha ta teie tumu parau e faataa mai?

⁴ E faataa mai teie tumu parau e piti huru maitatai faufaa, o te tauturu mai ia taa eaha te parau mau no roto i te Bibilia e ia farii i te aratairaa no ǒ mai i te faanahonahoraa. I muri iho, e hiˈo mai tatou e toru manaˈo tauturu e nafea ia mau papu i te parau mau.

HURU MAITATAI NO TE TAA EAHA TE PARAU MAU

5. E nafea te mǎtaˈu ia Iehova e tauturu mai ai ia taa eaha te parau mau?

⁵ Te mǎtaˈu ia Iehova. Te auraa e mǎtaˈu ia Iehova, e here puai ïa ia ˈna a ore roa ˈtu ai tatou e rave i te tahi mea o te haamauiui ia ˈna. E hinaaro iho â tatou e ite eaha te taa-ê-raa i rotopu i te mea maitai e te mea ino, i te parau mau e te haavare, no te fanaˈo i ta Iehova farii maitai. (Mas. 2:3-6; Heb. 5:14) Eiaha roa ˈtu tatou e vaiiho i te mǎtaˈu i te taata ia rahi aˈe i to tatou here ia Iehova. Inaha pinepine ta te taata e au, mea au ore ïa na Iehova.

6. Mea nafea te mǎtaˈu i te taata i te turairaa i na ahuru raatira Iseraela ia taviri i te parau mau?

⁶ Ia rahi aˈe to tatou mǎtaˈu i te taata, e nehenehe tatou e atea ê i te parau mau. A hiˈo na i na 12 raatira tei hiˈopoa haere i te fenua ta Iehova i fafau e horoa no te nunaa Iseraela. No hoê ahuru o ratou, ua rahi aˈe to ratou mǎtaˈu i to Kanaana i to ratou here ia Iehova. Ua parau ratou i te nunaa Iseraela: “Eita tatou e nehenehe e pauma e aro i tera nunaa, mea puai aˈe hoi ratou ia tatou.” (Num. 13:27-31) I te hiˈoraa a te taata, mea puai aˈe iho â to Kanaana. Tera râ, ua tuu ratou ia Iehova i te hiti i to ratou  manaˈoraa mai tera. Aita tera na ahuru mata huna i tiatonu i ta Iehova i hinaaro ia rave te nunaa. Aita atoa ratou i feruriruri i ta ˈna i rave mai nei no ratou. Aita ˈtura ïa i taa ia ratou eita te puai o to Kanaana e û i te puai hope o Iehova. O Iosua râ raua Kaleba, ua hinaaro ïa i ta Iehova farii maitai. Ua parau raua i te nunaa: “Ia mauruuru Iehova ia tatou, e aratai mau â oia ia tatou i tera fenua e e horoa mai oia i te reira no tatou.”—Num. 14:6-9.

7. E nafea to tatou mǎtaˈu ia Iehova e puai noa ˈi? (A hiˈo atoa i te hohoˈa.)

⁷ Ia puai noa to tatou mǎtaˈu ia Iehova, e titauhia ia manaˈo ia ˈna i te mau taime atoa e rave ai tatou i te faaotiraa. (Sal. 16:8) Ia taio oe i te mau faatiaraa Bibilia, a ui: ‘Eaha te faaotiraa ta ˈu e rave i roto i tera tupuraa?’ A feruri na to ǒ oe e faaroo ra i na ahuru raatira Iseraela e parau ra eita e noaa ia ratou ia haru tera fenua. E vare anei oe i ta ratou parau, a mǎtaˈu atu ai i te taata? Aore ra e puai aˈe to oe here ia Iehova e to oe hinaaro e faaoaoa ia ˈna? Aita te hoê uˈi taatoa Iseraela i tiaturi ia Iosua raua Kaleba. Ei faahopearaa, aita ratou i tomo i te Fenua tǎpǔhia.—Num. 14:10, 22, 23.

8. Eaha te huru maitai e titauhia ia tutava tatou i te faatupu, e no te aha?

⁸ Te haehaa. E faaite Iehova i te parau mau i te feia haehaa. (Mat. 11:25) Ua farii tatou ma te haehaa ia tauturuhia tatou ia taa i te parau mau. (Ohi. 8:30, 31) E vai ara râ tatou eiaha tatou ia teoteo. Aita anaˈe, e nehenehe tatou e manaˈo te tuati ra to tatou iho manaˈo i te mau faaueraa tumu Bibilia e te aratairaa no ǒ mai i te faanahonahoraa a Iehova.

9. E nafea ia vai haehaa noa?

⁹ Ia vai haehaa noa tatou, mea faufaa ia haamanaˈo mea haihai tatou ia faaauhia ia Iehova. (Sal. 8:3, 4) E nehenehe atoa tatou e ani ia Iehova ia tauturu mai ia haehaa ˈtu â tatou, a farii noa ˈi i ta ˈna haapiiraa. E tauturu mai o ˈna ia haafaufaa aˈe i to ˈna mau manaˈo no roto mai i ta ˈna Parau e ta ˈna faanahonahoraa. A taio ai oe i te Bibilia, a imi i te mau haapapuraa mea faufaa roa no Iehova te haehaa, e mea hae na ˈna te teoteo, te faaoru e te faateitei. E ia horoahia mai te tahi haamaitairaa taa ê i roto i te amuiraa, a rohi atu â i te vai haehaa noa.

E NAFEA IA MAU PAPU I TE PARAU MAU?

10. Mea na roto ia vai ma i horoa ˈi Iehova i ta ˈna aratairaa i to ˈna nunaa?

¹⁰ A pee noa i te aratairaa no ǒ mai i te faanahonahoraa a Iehova. Mea na roto ia Mose e ia Iosua i muri iho i horoa ˈi Iehova i ta ˈna mau aratairaa i to ˈna nunaa. (Ios. 1:16, 17) Ua haamaitaihia te nunaa a auraro ai ratou i teie na tia o Iehova. E hanere matahiti i muri aˈe, a haamauhia ˈi te amuiraa matamua, mea na roto ïa i na 12 aposetolo i horoahia ˈi te aratairaa. (Ohi. 8:14, 15) Ua apiti te tahi atu mau matahiapo i Ierusalema i taua mau tane haapao maitai ra. Ma te pee i ta ratou aratairaa, “mau papu noa ˈtura ïa te mau amuiraa i roto i te faaroo e rahi noa maira te mau mero o te mau amuiraa i te mau mahana atoa.” (Ohi. 16:4, 5) O tatou atoa te haamaitaihia ia pee tatou i te aratairaa no ǒ mai i te faanahonahoraa a Iehova. Eaha râ to Iehova huru ia ore tatou e auraro i te mau  tane ta ˈna i faatoroa? E hiˈo mai ïa tatou i te ohipa i tupu a haere ai te nunaa Iseraela i te Fenua tǎpǔhia.

11. Eaha tei tupu i nia i te ati Iseraela o tei patoi ia Mose ta Iehova i maiti ei aratai? (A hiˈo atoa i te hohoˈa.)

¹¹ I roto i to ratou tere i te Fenua tǎpǔhia, ua patoi te tahi mau taata mana Iseraela ia Mose e i te hopoia ta Iehova i horoa na ˈna. Teie ta ratou i parau: “Te amuiraa taatoa mea moˈa [eiaha o Mose noa], pauroa ratou, e to rotopu Iehova ia ratou.” (Num. 16:1-3) O “te amuiraa taatoa” iho â te mea moˈa no te Atua. Tera râ, o Mose ta ˈna i maiti ei aratai i to ˈna nunaa. (Num. 16:28) A faaino ai tera mau orure hau ia Mose, o Iehova ta ratou e faaino ra. Aita ratou i tâuˈa i te hinaaro o Iehova. Ua hinaaro ratou i te tiaraa faahiahia ˈtu â. Ua haapohe Iehova ia ratou, oia atoa e tausani taata o tei turu ia ratou. (Num. 16:30-35, 41, 49) Papu roa, eita Iehova e haamaitai i te feia aita e faatura ra i te aratairaa no ǒ mai i ta ˈna faanahonahoraa.

12. No te aha tatou e nehenehe ai e tiaturi noa i te faanahonahoraa a Iehova?

¹² E nehenehe tatou e tiaturi noa i te faanahonahoraa a Iehova. Ia titauhia ia faatano i ta tatou faataaraa i te tahi parau mau Bibilia aore ra i ta tatou huru taviniraa ia Iehova, eita te mau taeae aratai e haamarirau i te na reira. (Mas. 4:18) E hinaaro ratou e faaoaoa ia Iehova. E tutava atoa ratou i te niu i ta ratou mau faaotiraa i nia i te Parau a te Atua, ta te taatoaraa o te mau tavini a Iehova e pee maite nei.

13. Eaha “te hohoˈa o te mau parau maitatai,” e eaha te titauhia ia rave?

¹³ “A tapea noa i te hohoˈa o te mau parau maitatai.” (Tim. 2, 1:13) “Te hohoˈa o te mau parau maitatai,” o te mau haapiiraa ïa e vai ra i roto i te Bibilia.  (Ioa. 17:17) O tera mau haapiiraa te niu o ta tatou mau tiaturiraa atoa. Ua haapii mai te faanahonahoraa a Iehova ia tapea noa i te reira. E haamaitai mai Iehova ia na reira tatou.

14. Mea nafea to te tahi mau Kerisetiano faaearaa i te tapea noa i “te hohoˈa o te mau parau maitatai”?

¹⁴ Eaha te tupu ia faaea tatou i te tapea noa i “te hohoˈa o te mau parau maitatai”? A hiˈo na i tei tupu i te senekele matamua. Ua haaparare te tahi mau Kerisetiano i te parau ua tae mai te mahana o Iehova. Ua faahitihia teie parau i roto i te hoê rata, tei manaˈohia e na Paulo i papai. Ua vare te tahi mau Kerisetiano no Tesalonia e ua faatia haere i te reira. Aita hoi ratou i maimi e mea tano anei tera parau. E ua moˈe ia ratou ta Paulo mau haapiiraa, a parahi ai oia i ǒ ratou. (Tes. 2, 2:1-5) Ua aˈo Paulo i to ˈna mau taeae eiaha e vare i te mau parau atoa ta ratou e faaroo. Ia taa ia ratou no ǒ mai iho â ia ˈna te poroi, ua faaoti oia i te piti o ta ˈna rata i to Tesalonia mai teie: “Te faatae atu nei au, o Paulo, i to ˈu aroha ta ˈu i papai i to ˈu iho rima, o ta ˈu ïa tapao i roto i ta ˈu mau rata atoa.”—Tes. 2, 3:17.

15. E nafea ia paruru ia tatou i te mau parau haavare e au ra e parau mau? A horoa i te tahi hiˈoraa. (A hiˈo atoa i te hohoˈa.)

¹⁵ Eaha te haapii mai i ta Paulo aˈoraa i to Tesalonia? Mea faufaa te haroˈaroˈa ia faaroo tatou i te tahi parau aita e tuati ra i ta tatou i haapii i roto i te Bibilia aore ra i te tahi aamu huru ê. I Rusia tahito, ua horoa to tatou mau enemi i te mau taeae i te tahi rata, tei manaˈohia e no ǒ mai i te pu rahi. Te faaitoito ra tera rata i te tahi mau taeae ia faataa ê mai ia ratou no te haamau i ta ratou iho faanahonahoraa. Ia hiˈohia, no ǒ mai iho â tera rata i te pu rahi. Aita râ te mau taeae haapao maitai i vare. Ua taa ia ratou e aita te poroi o tera rata e tuati ra i ta ratou i haapii i roto i te Bibilia. I teie mahana, te faaohipa nei te feia patoi i te  parau mau i te natirara aore ra te reni faahoaraa no te faaamahamaha ia tatou. E nehenehe tatou e paruru ia tatou ma te hiˈopoa e te tuati ra ta tatou i faarooroo aore ra i taio i te pue parau mau ta tatou i ite ê na. Eita ïa ‘to tatou feruriraa e oioi i te feaa.’—Tes. 2, 2:2; Ioa. 1, 4:1.

16. Ia au i te Roma 16:17, 18, eaha te rave ia atea ê anaˈe vetahi i te parau mau?

¹⁶ Ia hoê noa tatou e te mau taeae taiva ore ia Iehova. Ia haamori tatou ia ˈna ma te tahoê e to tatou mau taeae e tuahine. Tera to Iehova hinaaro. A mau papu noa ˈi tatou i te parau mau, e vai hoê noa ïa tatou. E faaamahamaha te feia tei atea ê i te parau mau i te amuiraa. No reira te Atua e faaara mai ai “eiaha e amuimui faahou ia ratou.” Aita anaˈe, e nehenehe tatou e atea ê i te parau mau.—A taio i te Roma 16:17, 18.

17. Eaha te mau haamaitairaa ia taa anaˈe ia tatou eaha te parau mau e ia mau papu i te reira?

¹⁷ Mea faufaa ia taa eaha te parau mau e ia mau papu i te reira. E piri noa ïa tatou ia Iehova, a puai noa ˈi to tatou faaroo. (Eph. 4:15, 16) Eita atoa tatou e vare i te mau haapiiraa hape e te poroi haavare a Satani. E paruru Iehova ia tatou i te roaraa o te ati rahi. A mau papu i te mau mea e nehenehe e tiaturi, “ei pihai iho ïa te Atua o te hau ia outou.”—Phil. 4:8, 9.