Mai te peu e ere te mauiui no ô mai i te Atua, no te aha te rahi noa ˈtu ra te oˈe, te veve, te tamaˈi, te maˈi e te ati natura? Te faaite ra te Parau a te Atua e toru tumu no to te huitaata mauiui:

1. Te miimii, te nounou e te feii. “Ta te taata nei faaheporaa ˈtu i te taata e pohe atura ei pohe no ˈna iho.” (Koheleta 8:9) Te tamau nei te mau taata i te mauiui no te mea te faaruru ra ratou i te huru taata tia ore, te miimii e te ino rahi o te mau taata.

2. Te tau e te mau tupuraa taue. E tamau te taata i te mauiui no te mea “e tau râ e te tiaia noa to te taata atoa ra.” (Koheleta 9:11) E mauiui te taata no te mau tupuraa manaˈo-ore-hia, no te mau ati e tupu taue mai aore ra mea haapao ore te taata e te hape ra ratou.

3. Te arii ino o teie nei ao. Te haapapu maitai ra te Bibilia no te aha te mauiui nei te taata. Te na ô ra: “Te vai nei râ to te ao atoa i raro aˈe i te mana o te varua ino.” (Ioane 1, 5:19) “Te varua ino,” o Satani ïa te Diabolo. E varua puai mau. I na mua ˈtu, e melahi oia a te Atua, “aita [râ] oia i mau papu i roto i te parau mau.” (Ioane 8:44) Ua apiti te tahi atu mau melahi ia Satani e ua orure hau ratou i te Atua no te haamâha i to ratou mau hinaaro miimii, a riro atu ai ei demoni. (Genese 6:1-5) Mai te orureraa hau mai â, te haa nei o Satani e ta ˈna mau demoni ma te puai e te ino i roto te mau ohipa a teie nei ao. O ta ratou iho â râ e rave nei i to tatou nei tau. I teie mahana, e riri rahi to te Diabolo e “te haavare nei i to te ao atoa nei” e “ua ati . . . to te fenua.” (Apokalupo 12:9, 12) Papu maitai, e faatere ino mau o Satani. Mea au roa na ˈna ia mauiui te taata. O Satani te tumu o te mau mauiui atoa, e ere o te Atua.

A FERURI NA: O te hoê faatere ino e te aroha ore anaˈe te nehenehe e haamauiui i te feia hapa ore. Taa ê roa ˈtu i te reira, te parau ra te Bibilia: “E here te Atua.” (Ioane 1, 4:8) Mai te reira iho â te Atua. Oia hoi, “eiaha roa te parau ino ra e hurihia ˈtu i te Atua! eiaha roa te Puaihope ia parauhia i te rave parau ino ra!”—Ioba 34:10.

Tera râ, e ui paha oe: “Afea te Atua Mana hope e faaore ai i te faatereraa ino mau a Satani?” Mai ta tatou i ite na, mea riri na te Atua te ino e te mauiui nei oia a ite ai i to tatou oto rahi. Hau atu, ta haapapu ra ta ˈna Parau: “A huri . . . i to outou mau ahoaho atoa i nia ia ˈna, no te mea te tâuˈa mai ra oia ia outou.” (Petero 1, 5:7) Te here ra te Atua ia tatou e e puai rahi to ˈna no te faaore roa i te mauiui e te mau ohipa parau-tia ore, mai ta to muri nei tumu parau e faataa mai. a