EAHA ta oe e rave ia hinaaro oe e ite eaha te hora? E hiˈo paha ïa oe i te uati a ite atu ai e ua hora hoê mairi i te 30 minuti i te avatea. E nafea oe ia pahono atu i te hoê hoa o te ani mai eaha te hora i teie nei?

Ia au i te vahi tei reira oe, e pahono atu paha oe: “Ua hora hoê e te afa.” I te tahi atu vahi, e parau paha oe: “Afa hora toe e hora piti ai.”

Mea nafea te taata ia faahiti i te hora i te tau Bibilia? Ua rau atoa ta ratou faanahoraa no te faaite i te hora. I roto i te mau Papai Hebera, e itehia te mau parau “poipoi,” “avatea” e “ahiahi.” (Gen. 8:11; 19:27; 43:16; Arii 1, 18:26) I te tahi atu râ taime, e faahiti te Bibilia i te mau parau taa maitai no te faaite i te hora.

I tahito ra, te vai ra te taata tiai, i te po iho â râ. Ua tatuhaa te mau Iseraela i te po ei toru “araraa.” (Sal. 63:6) I roto i Te mau tavana 7:19, te faahitihia ra “te araraa i ropu.” I te tau i fanauhia ˈi Iesu, e maha araraa ta te ati Iuda i te po mai ta te nunaa Heleni e Roma.

E rave rahi taime to te mau evanelia faahitiraa i tera mau araraa o te po. A hiˈo na, ua haere Iesu i te poti o ta ˈna mau pǐpǐ na nia i te miti i “te maha . . . o te araraa o te rui.” (Mat. 14:25) I roto i te tahi atu faahohoˈaraa, ua parau Iesu: “E oaoa taua mau tavini ra ia roohia mai ratou e te fatu te ara ra ratou! . . . Ia haere mai oia i te piti o te araraa, i te toru atoa, a ite atu ai e te ara ra ratou, e oaoa ïa ratou!”—Luka 12:37, 38.

Ua faahiti Iesu e maha araraa a faaue ai oia i ta ˈna mau pǐpǐ ia ara no te mea aita ratou “i ite afea te fatu fare e haere mai ai, peneiaˈe i te ahiahi, i te tuiraa po, i te aahiata, i te poipoi roa.” (Mar. 13:35; nota) O te “ahiahi” te araraa matamua, e haamata ïa i te taperaa mahana e tae roa ˈtu i te hora iva i te po. Te piti, o te “tuiraa po” ïa, mai te hora iva e tae roa ˈtu i te hora 12 i te po. Te toru o te araraa, o te “aahiata” aore ra “ia totereo te moa,” mai te hora 12 ïa i te po e tae roa ˈtu i te hora toru i te aahiata. I tera paha taime araraa te moa i te totereoraa i te po a haruhia ˈi Iesu. (Mar. 14:72) Te maha o te araraa, o te “poipoi roa,” mai te hora toru ïa i te aahiata e tae roa ˈtu i te hitiraa mahana.

Noa ˈtu e aita e uati ta te taata i tahito mai to teie mahana, e faanahoraa iho â ta ratou no te faaite eaha te hora.