No te feia tatou i noaa te faaroo

Te pûpûraa i te hoê poroi tamahanahana i Italia

E “ATUA o te tamahanahanaraa atoa, MN” o Iehova. Ma te haapii i te pee i to ˈna hiˈoraa, te “haamahanahana” nei ta ˈna mau tavini “i te feia i roohia i te pohe ra.” (Korinetia 2, 1:3, 4; Ephesia 5:1) Teie ïa hoê o te mau tapao faufaa o te pororaa i ravehia e te mau Ite no Iehova.

Te tautururaa i te hoê vahine e fifihia ra

I te mau matahiti iho â ra i mairi aˈenei, e rave rahi, no te veve anei, te tamaˈi, e te hinaaro ia noaa te hoê oraraa maitai aˈe, tei haere e faaea i te mau fenua ona aˈe. E ere râ hoi i te mea ohie ia faaau atu i te mau mea apî e haaati ra. Te faaea ra Manjola i Borgomanéro e te mau hoa no Albanie. I te mea e te faaea ra oia i Italia ma te tia ore i mua i te ture, ua feaa oia i te paraparau atu ia Wanda, te hoê Ite no Iehova. I te pae hopea râ, ua faanaho Wanda e hoˈi faahou e farerei ia Manjola, tei faaite oioi i te anaanatae rahi e haapii i te Parau a te Atua, noa ˈtu te fifi o te reo. I muri aˈe i vetahi mau farereiraa, aita Wanda i ite faahou i te taata i te fare. Eaha tei tupu? Ua faaroo Wanda e ua horo ê te mau melo atoa o te fare no te mea te imihia ra hoê o ratou—te hoa tane o Manjola—tei taparahi pohe i te hoê taata!

E maha avaˈe i muri aˈe, ua farerei faahou Wanda ia Manjola. “Ma te huru maheahea e te pararai, e au oia i te hoê taata e taime fifi iho â to ˈna,” ta Wanda ïa e haamanaˈo ra. Ua faataa Manjola e tei te fare tapearaa to ˈna hoa tane tahito e ua inoino roa o ˈna i te mau hoa ta ˈna i fariu atu no te tauturu. No to ˈna ïa hepohepo i pure ai oia i te Atua no te tauturu. I reira, haamanaˈo ihora oia ia Wanda, tei paraparau atu no nia i te Bibilia. Auê te oaoa to Manjola ite-faahou-raa ˈtu ia ˈna!

Ua rave-faahou-hia te hoê haapiiraa Bibilia, e aita i maoro i haamata ˈi Manjola i te haere i te mau putuputuraa Kerisetiano. Ua noaa mai ia ˈna te parau faatia e faaea i Italia. Hoê matahiti i muri aˈe, ua riro mai Manjola ei Ite bapetizohia. Ma te tamahanahanahia maoti te mau tǎpǔ a te Atua, ua hoˈi oia i Albanie no te tufa ˈtu i te poroi tamahanahana o te Bibilia i to ˈna mau hoa no to ˈna fenua.

Te pororaa i te hoê vahi tarahuraa puhapa no te feia no te fenua ê

E rave rahi mau amuiraa i Italia tei faanaho e poro i te feia no te fenua ê mai ia Manjola. Ei hiˈoraa, ua faanaho te hoê amuiraa i Florence e haere tamau i te  hoê vahi tarahuraa puhapa no te feia no te fenua ê. Te farerei ra te feia e faaea ra i te puhaparaa—mea rahi no Europa Hitia o te râ, Makedonia, e Kosovo—i te mau fifi e rave rau. E mau fifi e te raau taero aore ra e te ava to vetahi. Te imi nei e rave rahi i to ratou iho ora na roto i te eiâ haihai.

E tautooraa te pororaa i te poroi tamahanahana o te mau Papai i taua vahi ra. I te pae hopea râ, ua farerei Paola, te hoê poro evanelia ma te taime taatoa, i te hoê vahine no Makedonia o Jaklina te iˈoa. I muri aˈe i vetahi mau aparauraa, ua faaitoito Jaklina i to ˈna hoa ra o Susanna ia hiˈopoa i te Bibilia. I to ˈna aˈe pae, ua paraparau Susanna i te tahi atu mau fetii. Aita i maoro, e pae melo o te utuafare fetii e haapii tamau ra i te Bibilia, e haere ra i te mau putuputuraa Kerisetiano, e e faaohipa ra i te mea ta ratou e haapii ra. Noa ˈtu te mau fifi ta ratou e faaruru nei, te huti nei ratou i te tamahanahanaraa no ǒ mai ia Iehova ra e i ta ˈna Parau.

Te farii nei te hoê paretenia i te tamahanahanaraa no ǒ mai ia Iehova ra

Tei te oire no Formia to Assunta, te hoê poro evanelia ma te taime taatoa, paraparauraa ˈtu i te hoê vahine e haere ra ma te fifi rii. E paretenia te vahine no te hoê faanahonahoraa faaroo e tauturu ra i te feia maˈi e tae noa ˈtu te mau huma i te mau fare maˈi e i te mau fare o te taata.

Teie ta Assunta i parau i te paretenia: “Te mauiui atoa ra oe, e ere anei? Tera noa râ, te faaruru nei tatou paatoa i te mau fifi.” Taˈi ihora te paretenia e ua faataa aˈera e e maˈi rahi to ˈna. Ua faaitoito Assunta ia ˈna ma te parau e e nehenehe te Atua o te Bibilia e tamahanahana ia ˈna. Ua farii te paretenia i te mau vea niuhia i nia i te Bibilia ta Assunta i pûpû atu na ˈna.

Tei to raua aparauraa i muri iho to te paretenia, o Palmira te iˈoa, faˈiraa e e mauiui rahi to ˈna. Ua faaea maoro oia i te hoê pu faaterehia e te mau paretenia. I to ˈna râ revaraa no te hoê taime poto no to ˈna maˈi, aita oia i faatiahia ia hoˈi mai. Ua manaˈo râ Palmira e ua taaihia oia e te Atua maoti te mau euhe ta ˈna i rave ei paretenia. Ua imi oia i te “rapaauraa” a te feia faaora maˈi, teie râ, ua turori oia i tei tupu. Ua farii ihora Palmira e haapii i te Bibilia, e ua haere oia i te mau putuputuraa Kerisetiano hoê matahiti i te maoro. I muri iho, ua haere oia i te hoê vahi ê, e aita te Ite i farerei faahou ia ˈna. E piti matahiti tei mairi a ite faahou mai Assunta ia ˈna. Ua farerei Palmira i te patoiraa uˈana a to ˈna utuafare fetii e te pǔpǔ ekalesiatiko. Noa ˈtu râ, ua rave faahou oia i ta ˈna haapiiraa Bibilia, ua haere i mua i te pae varua, e ua bapetizo ia ˈna ei Ite no Iehova.

Oia, te faaitoitohia ra e rave rahi maoti te poroi o ‘te Atua no ˈna te mahanahana.’ (Roma 15:4, 5) No reira, ua faaoti papu te mau Ite no Iehova i Italia e pee tamau i te hiˈoraa o te Atua ma te pûpû atu i ta ˈna poroi tamahanahana faahiahia mau ia vetahi ê.