O Iehova—Te Atua puai rahi

“No to ˈna ra puai rahi e te mana rahi ra, i ore ai te hoê i toe ai i te haere mai.”—ISAIA 40:26.

1, 2. (a) Ua taaihia tatou pauroa i teihea tumu ito materia? (b) A faataa na no te aha o Iehova iho â te Tumu o te ito atoa.

 TE PUAI, o te hoê ïa mea aita te rahiraa e tâuˈa ˈtura. Ei hiˈoraa, aita tatou e feruri rahi ra e maoti te uira e fanaˈo ai tatou i te maramarama e te mahanahana aore ra i te ohieraa i te patia ˈtu i ta tatou mau huru matini uira atoa. Ia pohe noa te uira ma te manaˈo-ore-hia e taa ˈi ia tatou e aita anaˈe e uira, e mau ïa te mau oire a te taata. No roto mai te rahiraa o te uiraa ta tatou e hinaaro ra i te pu ito papu roa ˈˈe o te fenua—te mahana. * I te mau tetoni atoa, e tutui teie matini hamani ito e pae mirioni tǎne mori atomi, a ninii atu ai i nia i te fenua i te ito faufaa roa no te ora.

² Nohea mai teie ito mahana atoa? Na vai i hamani i teie pu hamaniraa ito i nia i te raˈi? Na te Atua ra ïa o Iehova. Te na ô ra te Salamo 74:16 no nia ia ˈna e: “Na oe iho hoi i rave i te maramarama e te mahana!” Oia mau, o Iehova te Tumu rahi o te ito atoa, e te Tumu o te ora atoa. (Salamo 36:9) Eiaha roa ˈtu tatou e haafaufaa ore i to ˈna puai. Na roto i te peropheta Isaia, te faahaamanaˈo maira Iehova e hiˈo i te mau taoˈa i nia i te raˈi, mai te mahana e te mau fetia, e e feruri maite nafea to ratou faraa mai. “A nânâ na i to outou mata i nia; a hiˈo ai i tei hamani i te reira, te aratai ra oia i taua mau nuu ra i rapae ma te taiohia; e ua mairi-anaˈe-hia to ratou mau iˈoa e ana: no to ˈna ra puai rahi e te mana rahi ra, i ore ai te hoê i toe ai i te haere mai.”—Isaia 40:26; Ieremia 32:17.

3. Nafea tatou e faufaahia ˈi i te mau faaiteraa i te puai o Iehova?

³ I te mea e mea puai roa o Iehova, e nehenehe tatou e tiaturi e e tamau noa te mahana i te horoa mai i te maramarama e te mahanahana faufaa roa no to tatou ora. E turui râ tatou i nia i te puai o te Atua eiaha noa no to tatou mau hinaaro faufaa i te pae tino. To tatou faatiamâraahia i te hara e te pohe, to tatou tiaturiraa no te tau a muri aˈe, e to tatou tiaturi ia Iehova, ua taai-roa-hia ïa i ta ˈna  faaohiparaa i te puai. (Salamo 28:6-9; Isaia 50:2) Mea rahi te mau hiˈoraa i roto i te Bibilia e haapapu ra i te puai o Iehova no te poiete e te faatiamâ, no te faaora i to ˈna nunaa e te haamou i to ˈna mau enemi.

Te itehia ra te puai o te Atua i roto i te poieteraa

4. (a) Eaha te huru o Davida ia mataitai oia i te raˈi i te po? (b) Eaha ta te mau taoˈa i nia i te raˈi e faaite ra no nia i te puai o te Atua?

⁴ Ua faataa te aposetolo Paulo e ‘e itea-papu-hia te mana hope’ o to tatou Atua poiete i roto i ‘te mau mea ta ˈna i hamanihia.’ (Roma 1:20) E mau senekele na mua ˈtu, eita e ore e ua nânâ pinepine te papai salamo ra o Davida, te hoê tiai mamoe, i to ˈna mata i nia i te raˈi i te po, e ua ite oia i te rahi o te ao materia e te puai o Tei hamani i te reira. Teie ta ˈna i papai: “Ia hiˈo vau i te mau raˈi i te ohipa a to rima ra; te marama e te mau fetia ta oe i faaau ra, Eaha te taata nei i manaˈo mai ai oe ia ˈna? e ta te taata nei tamaiti i haapao mai ai oe ia ˈna?” (Salamo 8:3, 4) Noa ˈtu to ˈna ite taotiahia i te mau taoˈa i nia i te raˈi, ua taa ia Davida e mea faufaa ore roa oia i pihai iho i te Atua poiete o to tatou ao materia rahi. I teie mahana, ua ite hau atu â te feia tuatapapa i te reva teitei i te rahi o te ao materia e te puai e tapea maite ra i te reira. Ei hiˈoraa, te faaite maira ratou e ia tuu to tatou mahana i te ito i te mau tetoni atoa, e tuea ïa i te paainaraa o na mirioni tǎne TNT 100 000 mirioni. * Mea iti roa o taua ito ra te tapae mai i te fenua nei, e navai noa râ no te atuatu i te ora atoa i nia i to tatou palaneta. Tera râ, e ere roa ˈtu o to tatou mahana te fetia puai roa ˈˈe i nia i te raˈi. Te horoa nei te tahi mau fetia i roto noa hoê tetoni i te ito ta te mahana e tuu maira i roto hoê mahana taatoa. A feruri na ïa i te puai o Tei poiete i taua mau taoˈa i nia i te raˈi ra! Ua tano mau â o Elihu i te parauraa e: “I te Puaihope ra! e ore e itea e tatou; aore ïa e faito i te mana.”—Ioba 37:23.

5. Eaha ta te mau ohipa a Iehova e faaite maira no nia i to ˈna puai?

⁵ Ia ‘imi tatou i te mau ohipa a te Atua’ mai ia  Davida, e ite ïa tatou i to ˈna puai i te mau vahi atoa—i roto i te mataˈi e te mau are, i roto i te patiri e te uira, i roto i te mau tahora rarahi e te mau mouˈa teitei. (Salamo 111:2; Ioba 26:12-14) Hau atu â, mai ta Iehova i faahaamanaˈo ia Ioba, te haapapu ra te mau animala i To ˈna puai. Te vai ra te Behemota, aore ra te hippopotame. Ua parau Iehova ia Ioba e: “Tei to ˈna tauupu to ˈna etaeta . . . E au to ˈna mau ivi i te maa veo paari ra.” (Ioba 40:15-18) Mea matau-maitai-atoa-hia te puai riaria o te puaatoro oni oviri i te mau tau Bibilia, e ua pure o Davida ia ora oia i ‘te vaha o te liona, e te tara o te reema ra.’—Salamo 22:21; Ioba 39:9-11.

6. I roto i te mau Papai, te faataipe ra te puaatoro i te aha, e no te aha? (A hiˈo i te nota i raro i te api.)

⁶ No to ˈna puai, ua faaohipahia te puaatoro oni i roto i te Bibilia no te faataipe i te puai o Iehova. * I roto i te orama o te terono o Iehova ta te aposetolo Ioane i ite, te vai ra e maha mea ora,  mai te kafa te huru o te hoê. (Apokalupo 4:6, 7) Papu maitai e hoê o na ateributi rahi e maha o Iehova tei faahohoˈahia e teie mau kerubi, o te puai ïa. Te toea, o te aroha ïa, te paari, e te parau-tia. I te mea e tuhaa faufaa te puai o te huru o te Atua, maoti ïa te taa-maitai-raa i to ˈna puai e ta ˈna huru faaohiparaa i te reira e piri roa ˈtu ai tatou ia ˈna e e tauturuhia ˈi tatou ia pee i to ˈna hiˈoraa na roto i te faaohipa-maitai-raa i te puai atoa e vai ra ia tatou ra.—Ephesia 5:1.

“O Iehova sabaota ra, o Tei Puai”

7. Nafea tatou e papu ai e e upootia mai te maitai i nia i te ino?

⁷ I roto i te mau Papai, te parauhia ra o Iehova mai “te Atua maha hope,” e tiaraa teie o te faahaamanaˈo maira e eiaha roa ˈtu tatou e haafaufaa ore i to ˈna puai aore ra e feaa i ta ˈna ravea no te haamou i to ˈna mau enemi. (Genese 17:1; Exodo 6:3) E au ra paha e mea aueue ore te faanahoraa ino o te mau mea a Satani, i mua râ i te aro o Iehova “e au te mau fenua nei mai te topata iti no roto i te bakete, e ua haapaohia mai te huˈa repo i nia i te faito ra.” (Isaia 40:15) Maoti te tauturu a taua puai o te Atua ra, aita ïa e feaaraa e e upootia te maitai i nia i te ino. I teie nei tau e ua parare roa te ino, e nehenehe tatou e ite i te tamahanahanaraa i roto i te mea ra e e faaore “o Iehova sabaota ra, o Tei Puai i Iseraela” i te ino e a muri noa ˈtu.—Isaia 1:24; Salamo 37:9, 10.

8. Eaha te mau nuu i te raˈi ta Iehova e faatere ra, e eaha te haapapu maira e mea puai ratou?

⁸ Te parau ra “o Iehova sabaota ra,” o te itehia ra e 285 taime i roto i te Bibilia, o te tahi atu ïa faahaamanaˈoraa i te puai o te Atua. Te taˈo ra “sabaota” i ǒ nei, o te nuu ïa o te mau mea ora varua e arataihia ra e Iehova. (Salamo 103:20, 21; 148:2) I te hoê noa po, hoê anaˈe o teie mau melahi tei haapohe 185 000 faehau Asura e haamǎtaˈu ra ia Ierusalema. (Te mau arii 2, 19:35) Ia farii tatou i te puai o te mau nuu a Iehova i nia i te raˈi, eita ïa tatou e mǎtaˈu ohie noa i te feia patoi. Aita te peropheta Elisaia i haapeapea i to ˈna haaatiraahia e te hoê nuu taatoa o te imi ra ia ˈna, no te mea ua nehenehe oia, eiaha ta ˈna tavini, e ite ma te mata o te faaroo i te hoê nuu rahi i nia i te raˈi e turu ra ia ˈna.—Te mau arii 2, 6:15-17.

9. No te aha tatou e tiaturi ai, mai ia Iesu, i te paruru a te Atua?

⁹ Ua ite atoa Iesu i te turu a te mau melahi i to ˈna faarururaa i te hoê nahoa taata e ˈoˈe e e omore ta ratou i roto i te ô i Getesemane ra. I muri aˈe i to ˈna faaueraa ia Petero e faahoˈi i ta ˈna ˈoˈe i roto i to ˈna vairaa, ua na ô Iesu ia ˈna e e nehenehe Ta ˈna e tau i to ˈna Metua, ia titauhia ra, ia horoa mai oia i “te melahi e ia ahuru noa ˈtu te legeona e ia piti tiahapa e ia rahi atu â.” (Mataio 26:47, 52, 53) Ia na reira atoa tatou i te hiˈo i te mau nuu a te Atua i nia i te raˈi, e tiaturi roa atoa ïa tatou i te turu a te Atua. Ua papai te aposetolo Paulo e: “E nahea hoi tatou i teie nei mau parau? No tatou te Atua ra, e tia ia vai ia mârô mai?”—Roma 8:31.

10. No vai ma e faaohipa ˈi Iehova i to ˈna puai?

¹⁰ E rau ïa te tumu e tiaturi ai tatou i te paruru a Iehova. E faaohipa noa oia i to ˈna puai no te maitai e ia au i te tahi atu o to ˈna mau huru maitatai—te parau-tia, te paari, e te aroha. (Ioba 37:23; Ieremia 10:12) E pinepine te feia mana i te taataahi i te feia veve e te riirii no to ratou iho maitai, area o Iehova ra e ‘faateitei ïa i tei haehaa no raro mai i te repo’ e e ‘puai rahi to ˈna no te faaora.’ (Salamo 113:5-7; Isaia 63:1) Mai ta Maria, te metua vahine riirii e te haehaa o Iesu, i taa, te faaohipa nei “Tei puai” ma te miimii ore i to ˈna mana no te maitai o te feia e mǎtaˈu ra ia ˈna, ma te faahaehaa i tei teoteo e ma te faateitei i tei haehaa.—Luka 1:46-53.

Te faaite ra Iehova i to ˈna puai i ta ˈna mau tavini

11. Eaha te faaiteraa i te puai o te Atua ta te mau ati Iseraela i ite mata i te matahiti 1513 H.T.T.?

¹¹ E rave rahi taime to Iehova faaiteraa i to ˈna mana i ta ˈna mau tavini. Ua na reira oia i te Mouˈa Sinai i te matahiti 1513 H.T.T. I taua matahiti ra, ua ite aˈena te mau ati Iseraela i te faaiteraa faahiahia i te puai o te Atua. Hoê ahuru ati ino mau tei faaite mai i te rima puai o Iehova e te puai ore o te mau atua Aiphiti. I muri iti noa ˈˈe, ua horoa te haere-semeio-raa na roto i te  Miti Uteute e te haamouraa o te nuu a Pharao i te tahi atu â haapapuraa i te puai o te Atua. E toru avaˈe i muri aˈe, i raro i te Mouˈa Sinai, ua titau manihini o Iehova i te mau ati Iseraela ia riro ei “taoˈa here rahi” na ˈna “i te mau taata atoa ra.” Ua tǎpǔ aˈera ratou e: “Te mau parau atoa ta Iehova i parau, e rave ïa matou.” (Exodo 19:5, 8) I muri iho, ua faaite â o Iehova ma te oraora i to ˈna puai. I roto i te patiri e te uira e te oto puai o te pu, ua au auahi e ua aueue te Mouˈa Sinai. Ua riaria roa te nunaa e tia noa ra i te hoê vahi. Ua na ô râ Mose ia ratou e e tia i teie ohipa ia haapii ia ratou i te mǎtaˈu no ǒ mai i te Atua ra, te hoê mǎtaˈu o te turai ia ratou ia auraro i to ratou Atua mau hoê e te puai roa ra o Iehova.—Exodo 19:16-19; 20:18-20.

12, 13. Eaha te mau tupuraa i aratai ia Elia ia vaiiho i ta ˈna ohipa, nafea râ to Iehova faaitoitoraa ia ˈna?

¹² E rave rahi senekele i muri aˈe, i te tau o Elia, ua tupu te tahi atu â faaiteraa i te puai o te Atua i nia i te Mouˈa Sinai. Ua ite aˈena te peropheta i te ohiparaa te puai o te Atua. E toru matahiti e te afa i te maoro, ua “opani” te Atua “i te raˈi” no te taivaraa o te nunaa Iseraela. (Paraleipomeno 2, 7:13) I te roaraa o te paˈurâ i tupu, na te mau oreba i faatamaa ia Elia i te pape o Kerita, e i muri aˈe, ua faanavai-semeio-hia te hue faraoa ota e te farii hinu a te hoê vahine ivi ia nehenehe oia e tamaa. Ua horoa atoa Iehova i te mana ia Elia no te faatia mai i te tamaiti a te vahine ivi. I te pae hopea, i roto i te hoê tamataraa maere i te Atuaraa i nia i te Mouˈa Karemela, ua mairi mai te auahi mai te raˈi mai e pau ihora te tusia a Elia. (Te mau arii 1, 17:4-24; 18:36-40) I muri iti noa ˈˈe râ, ua mǎtaˈu e ua paruparu roa o Elia i te parau faariaria a Iezebela e haapohe ia ˈna. (Te mau arii 1, 19:1-4) Ua horo ê oia, ma te manaˈo e ua oti ta ˈna ohipa ei peropheta. No te tamǎrû e te faaitoito ia ˈna, ua faaite roa ˈtu o Iehova iho ma te mǎrû i to ˈna puai.

¹³ A tapuni ai Elia i roto i te hoê ana, ua ite oia i te hoê faaiteraa maere mau i na puai e toru e vî ia Iehova: te mataˈi rahi, te aueueraa fenua, e te auahi i te pae hopea. I to Iehova râ paraparauraa ia Elia, e “reo iti haihai” mǎrû to ˈna. E ohipa â ta ˈna i horoa na ˈna e ua faaara ˈtura ia ˈna e e 7 000 â taata haapao maitai o te haamori ra ia Iehova i te fenua. (Te mau arii 1, 19:9-18) Ia paruparu noa ˈtu tatou mai ia Elia, no te ereraa i te mau faahopearaa maitatai i roto i ta tatou taviniraa, e nehenehe tatou e ani ia Iehova i “te puai i hau aˈe i tei matauhia”—e puai o te nehenehe e faaitoito mai ia tamau noa tatou i te poro i te parau apî maitai ma te tuutuu ore.—Korinetia 2, 4:7, MN.

Te haapapu ra te puai o Iehova e e tupu ta ˈna mau tǎpǔ

14. Eaha ta te iˈoa iho o Iehova e faaite ra, e nafea to ˈna puai e taaihia ˈi i to ˈna iˈoa?

¹⁴ Ua taai-roa-atoa-hia te puai o Iehova i to ˈna iˈoa e te tupuraa o to ˈna hinaaro. Te faaite ra te iˈoa otahi ra o Iehova, oia te auraa “Na ˈna e faariro,” e te faariro ra oia ia ˈna ei Atua o te faatupu i ta ˈna mau tǎpǔ. Aita hoê aˈe mea aore ra taata e nehenehe e tapea ia ore te Atua e faatupu i ta ˈna mau opuaraa, tera râ, e nehenehe te tahi mau taata feaa faahua e manaˈo e oia. Ua parau hoi Iesu i mutaa ihora i ta ˈna mau aposetolo e, ‘e tia te mau mea atoa nei i te Atua.’—Mataio 19:26.

15. Nafea to Aberahama e Sara faahaamanaˈoraahia e aita e mea e ore e tia ia Iehova ia rave?

¹⁵ Ei hiˈoraa, ua tǎpǔ Iehova i mutaa iho ia Aberahama raua Sara e e faariro oia i ta raua huaai ei nunaa rahi. Tera râ, ua vai noa raua ma te tamarii ore e rave rahi matahiti i te maoro. Mea paari roa raua i to Iehova parauraa ia raua e ua fatata te tǎpǔ i te tupu e ua ata o Sara. Ua na ô aˈera te melahi e: “Te vai atura anei te hoê mea e ore e tia ia Iehova ia rave?” (Genese 12:1-3; 17:4-8; 18:10-14) E maha senekele i muri aˈe, i to Mose haaputuputuraa i te huaai o Aberahama—te hoê nunaa rahi i teie nei—i te mau Vahi papu no Moabi, ua faahaamanaˈo oia ia ratou e ua faatupu te Atua i ta ˈna tǎpǔ. Ua parau o Mose e: “E no te mea i aroha oia i to hui metua na, ua rave iho nei oia i to ratou ra huaai i muri aˈe ia ratou ra; e ua aratai mai oia ia oe i rapae i mua i to ˈna iho mata i to ˈna ra mana rahi puai, mai Aiphiti maira; ia tiahi ê atu oia i te  mau fenua rarahi, e te puai rahi to ratou i to oe i mua ia oe ra, e ia aratai oia ia oe i nia iho i to ratou fenua, e ia horoa mai oia i to ratou fenua no oe ei parahiraa, mai tei teie nei mahana.”—Deuteronomi 4:37, 38.

16. Nafea to te mau Sadukea haperaa i to ratou patoiraa i te tia-faahou-raa o tei pohe?

¹⁶ E mau senekele i muri aˈe, ua faahapa Iesu i te mau Sadukea aita i tiaturi i te tia-faahou-raa. No te aha ratou i patoi ai i te tiaturi i te tǎpǔ a te Atua e faahoˈi mai i tei pohe i te ora? Ua na ô Iesu ia ratou e: ‘Aita outou i ite i te parau i papaihia ra, e te mana o te Atua.’ (Mataio 22:29) Te haapapu maira te mau Papai e ‘e faaroo te feia atoa i roto i te apoo i te reo o te Tamaiti a te taata e e haere mai ratou i rapae.’ (Ioane 5:27-29) Mai te peu e ua ite tatou eaha ta te Bibilia e parau ra no nia i te tia-faahou-raa, e haapapu mai ïa to tatou tiaturi i te puai o te Atua e e faatiahia mai iho â te feia pohe. E na te Atua “e haamou roa i te pohe e a muri noa ˈtu; . . . o [Iehova] hoi teie e parau nei.”—Isaia 25:8; MN.

17. I teihea mahana a muri aˈe e tia mau â ˈi ia tatou ia tiaturi taa ê ia Iehova?

¹⁷ I te tau i mua e fatata maira, e tae i te hoê taime e tia ˈi ia tiaturi tatou pauroa i te puai faaora o te Atua ma te hoê raveraa taa ê. E aro te Diabolo ra o Satani i te nunaa o te Atua e au ra aita e paruruhia ra. (Ezekiela 38:14-16) I reira ïa te Atua e faaite ai i to ˈna puai rahi no to tatou maitai, e e tia i te taatoaraa ia ite e o o ˈna o Iehova. (Ezekiela 38:21-23) I teie nei taime ïa e patu ai tatou i to tatou faaroo e to tatou tiaturi i te Atua mana hope ia ore hoi tatou ia paruparu i taua taime faufaa roa ra.

18. (a) Eaha te mau haamaitairaa ta tatou e huti mai na roto i te feruri-maite-raa i te puai o Iehova? (b) Eaha te uiraa ta tatou e tuatapapa i roto i te tumu parau i mua nei?

¹⁸ Ma te feaa ore, mea rahi te mau tumu e feruri maite ai tatou i te puai o Iehova. A hiˈo ai tatou i ta ˈna mau ohipa, e turaihia tatou ma te haehaa ia arue i to tatou Atua poiete Rahi e ia haamauruuru i te mea ra e te faaohipa ra oia i to ˈna puai ma te paari e te aroha. Eita roa ˈtu tatou e mǎtaˈu ia tiaturi tatou ia Iehova sabaota. E ore roa to tatou faaroo i ta ˈna mau tǎpǔ e aueue. E haamanaˈo râ tatou e ua hamanihia tatou ia au i te huru o te Atua. E puai atoa ïa to tatou—noa ˈtu e mea taotiahia. Nafea tatou e nehenehe ai e pee i te hiˈoraa o to tatou Atua poiete ia faaohipa tatou i to tatou puai? E tuatapapa ïa tatou i te reira i roto i te tumu parau i mua nei.

[Nota i raro i te api]

E nehenehe anei outou e pahono i teie mau uiraa?

• Nafea te poieteraa e haapapu ai i te puai o Iehova?

• Eaha te mau nuu ta Iehova e nehenehe e faaohipa no te turu i to ˈna nunaa?

• Eaha te tahi mau taime i faaite ai Iehova i to ˈna puai?

• Eaha ta tatou haapapuraa e e faatupu Iehova i ta ˈna mau tǎpǔ?

[Uiraa haapiiraa]

[Hohoˈa i te api 10]

“A nânâ na i to outou mata i nia; a hiˈo ai i tei hamani i te reira”

[Faaiteraa i te tumu]

Photo by Malin, © IAC/RGO 1991

[Hohoˈa i te api 13]

E patu te feruri-maite-raa i te mau faaiteraa i te puai o Iehova i te faaroo i ta ˈna mau tǎpǔ