E ore te feia e tamaˈi i te Atua e manuïa!
E ore te feia e tamaˈi i te Atua e manuïa!
“E tamaˈi mai hoi ratou ia oe, e ore râ e [manuïa].”—IEREMIA 1:19; MN.
1. Eaha tei faauehia ia Ieremia e rave, e eaha te maororaa o to ˈna raveraa i ta ˈna ohipa?
UA FAAUE o Iehova i te taata apî ra o Ieremia e riro ei peropheta no te mau nunaa. (Ieremia 1:5) Ua tupu te reira a faatere ai te Arii maitai ra o Iosia ia Iuda. Ua tamau noa te taviniraa peropheta a Ieremia i te roaraa o te area tau arepurepu hou o Babulonia a haru ai ia Ierusalema e a hopoi tǐtǐ ai i te nunaa o te Atua.—Ieremia 1:1-3.
2. Nafea to Iehova haapuairaa ia Ieremia, e eaha te auraa e tamaˈi i taua peropheta ra?
2 Papu maitai e e faatupu te mau poroi haava e tia ia Ieremia ia faaite haere, i te patoiraa. No reira te Atua i faaitoito ai ia ˈna no te mau mea e tiai maira ia ˈna. (Ieremia 1:8-10) Ei hiˈoraa, ua faaitoitohia oia e teie mau parau: “E tamaˈi mai hoi ratou ia oe, e ore râ e [manuïa no te mea] ei pihai atoa iho vau ia oe ei faaora ia oe, te parau maira Iehova.” (Ieremia 1:19; MN) O te tamaˈi ia Ieremia, e tamaˈi ïa i te Atua. I teie mahana, e pǔpǔ tavini e au i te hoê peropheta ta Iehova o te rave ra i te hoê ohipa e au i ta Ieremia. Mai ia ˈna, te faaite ra ratou ma te mǎtaˈu ore i te parau tohu a te Atua. E ohipa teie poroi i nia i te mau taata e te mau nunaa atoa no to ratou maitai aore ra no to ratou ati, tei to ratou huru noa ïa. Mai i te tau o Ieremia, te vai ra te taata e tamaˈi ra i te Atua na roto i te patoiraa i ta ˈna mau tavini e ta ratou mau ohipa i faataahia e ana.
Te arohia ra te mau tavini a Iehova
3. No te aha te mau tavini a Iehova i arohia ˈi?
3 Te arohia ra te nunaa o Iehova mai te omuaraa mai o te senekele 20. I roto e rave rahi fenua, ua imi te tahi mau taata manaˈo ino i te tapea—oia, i te haamamû—i te faaite-haere-raa i te parau apî maitai o te Basileia o te Atua. Na to tatou Enemi rahi, te Diabolo, e turai ra ia ratou, te ‘hahaere nei oia mai te liona uuru ra i te imiraa i te taata e pau ia ˈna.’ (Petero 1, 5:8) I te hoperaa “to te Etene anotau” i te matahiti 1914, ua nomino te Atua i ta ˈna Tamaiti ei Arii apî o te fenua, e faaue atura ia ˈna e: “E arii hoi oe i rotopu i to mau enemi ra.” (Luka 21:24; Salamo 110:2) Ma te faaohipa i to ˈna mana, ua tiahi te Mesia ia Satani mai te raˈi mai e ua huri mai ia ˈna i te hiti o te fenua. Ua ite oia e maa taime poto to ˈna e toe ra, no reira oia e faahoˈi ai i to ˈna riri rahi i nia i te mau Kerisetiano faatavaihia e to ratou mau hoa. (Apokalupo 12:9, 17) Eaha te faahopearaa o te mau aroraa tamau a taua feia tamaˈi i te Atua ra?
4. Eaha te mau fifi ta te nunaa o Iehova i faaruru i te tau o te Tamaˈi Rahi Matamua, eaha râ tei tupu i te mau matahiti 1919 e 1922?
4 Ua faaruru te faaroo o te mau tavini faatavaihia a Iehova e rave rahi tamataraa i roto i te Tamaˈi Rahi Matamua. Ua faaooohia, ua faainohia, ua auauhia ratou e te mau nahoa, e ua tairihia. Mai ta Iesu i tohu, ua ‘ririhia ratou e te mau nunaa atoa.’ (Mataio 24:9) I roto i te horuhoru o te tamaˈi, ua faaohipa te mau enemi o te Basileia o te Atua i te hoê ravea i faaohipa-ê-na-hia i nia ia Iesu Mesia. Ua pari hape ratou i te nunaa o Iehova ei nunaa orure hau, e ua tairi i te pu iho o te faanahonahoraa ite-mata-hia a te Atua. I te avaˈe Me 1918, ua horoahia te mau parau mana a te hau no te haru i te peretiteni o te Taiete Watch Tower, o J. F. Rutherford, e e hitu o to ˈna mau apiti piri roa ˈˈe. Ua faautuahia teie na taata e vau i te fare tapearaa teimaha e ua afaihia ratou i te fare tapearaa a te hau i Atlanta, i Géorgie, i te mau Hau Amui no Marite. E iva avaˈe i muri aˈe, ua tuuhia ratou. I te avaˈe Me 1919, ua parau te tiribuna hororaa haaati e aita te feia tei parihia i haavahia ma te faatia pae tahi ore, no reira ˈtura te haavaraa i faaorehia ˈi. Ua haava-faahou-hia ratou, i muri aˈe râ, ua faaore te faatereraa i te mau hororaa e te mau pariraa haavare ia Taeae Rutherford e to ˈna mau apiti. Ua rave faahou ratou i ta ratou mau ohipa, e ua faanahohia te tahi mau tairururaa i Cedar Point, i Ohio, i te mau matahiti 1919 e 1922, mea na reira te haamata-faahou-raa te ohipa pororaa i te Basileia.
5. Eaha ta te mau Ite no Iehova i farerei i Helemani Nazi?
5 Ua fa mai te mau faatereraa haavî i te mau matahiti 1930, e ua tahoê te mau fenua Helemani, Italia, e Tapone no te riro ei mau hau o te Axe. I te omuaraa o taua ahuru matahiti ra, ua hamani-ino-mau-hia te nunaa o te Atua, i te fenua Helemani Nazi iho â râ. E mau opaniraa tei haamauhia. Ua paheruhia te mau fare, e ua haruhia te feia e faaea ra i roto. E mau tausani tei hurihia i roto i te mau aua tapearaa no to ratou patoiraa i te haapae i to ratou faaroo. Te tumu o te aroraa i te Atua e to ˈna nunaa, no te faaore roa ïa i te mau Ite no Iehova i taua tuhaa fenua haavî ra. * I to te mau Ite tiaraa ˈtu i mua i te mau tiribuna i Helemani no te paruru i to ratou mau tiaraa, ua faaineine te Faatereraa hau o te Haavaraa a te Reich i te hoê parau roa ia ore ratou e manuïa. Te na ôhia ra e: “Eiaha roa ˈtu te mau tiribuna e tuu i te rima i raro no te tahi noa mau hohoˈa parau mana; ia imi râ i te mau ravea noa ˈtu eaha te mau fifi rapaeau noa, no te amo i ta ratou mau hopoia teitei.” Te auraa ra, e nehenehe te haavaraa tia e ore e tupu. Ua parau noa te mau Nazi e mea ino, aore ra mea au ore, te mau ohipa a te mau Ite no Iehova e ‘te faahuehue ra i te tiaraa mai o te faatereraa Nazi.’
6. Eaha te mau tutavaraa i ravehia ia mau ta tatou ohipa i te roaraa e i muri aˈe i te Piti o te Tamaˈi Rahi?
6 I roto i te Piti o te Tamaˈi Rahi, ua faaruru te nunaa o te Atua i te mau opaniraa e te mau taotiaraa i Auteralia, Kanada, e i te tahi atu mau fenua no te Commonwealth Beretane—i Afirika, Asia, e te mau motu o te mau Antilles e no Patitifa. I te mau Hau Amui no Marite, ua faatia te mau enemi mana e te mau taata manaˈo hape i ‘te hamani ino ia au i te ture.’ (Salamo 94:20) Tera râ, ua haavahia te mau tupuraa no nia i te faaturaraa i te reva e te mau faatureraa e opani ra i te pororaa na te mau fare, e ua faatia te mau faaotiraa maitatai i ravehia i te mau Hau Amui no Marite i te hoê pare o tei paruru i te tiamâraa o te haamoriraa. Maoti o Iehova i ore ai i manuïa te mau tutavaraa a te enemi. A hope ai te tamaˈi i Europa, ua iritihia te mau opaniraa. Ua tuuhia te mau tausani Ite i mau na i roto i te mau aua tapearaa, aita râ te aroraa i oti atura. I muri iti noa ˈˈe i te Piti o te Tamaˈi Rahi, ua tupu te Tamaˈi Toetoe. Ua faahepo faahou te mau nunaa no Europa Hitia o te râ i te nunaa o Iehova. Ua ravehia te tahi mau ohipa haamanahia no te haafifi e no te tapea i ta tatou ohipa pororaa, no te tapea i te taeraa mai o te mau papai Bibilia, no te faaore i ta tatou mau tairururaa huiraatira. Mea rahi tei tapeahia aore ra tei afaihia i te mau aua raveraa ohipa.
Ua haamata faahou te ohipa pororaa!
7. Eaha ta te mau Ite no Iehova i faaruru i Polonia, Rusia, e te tahi atu mau fenua i te mau matahiti i mairi aˈenei?
7 A mairi noa ˈi te mau ahuru matahiti, ua faatiahia te ohipa pororaa i te Basileia. Ua faatia te fenua Polonia, noa ˈtu e tei raro aˈe noa oia i te faatereraa Communiste, e ia faatupuhia te mau tairururaa hoê mahana i te matahiti 1982. Ua faatupuhia i reira te mau tairururaa o te mau nunaa atoa i te matahiti 1985. E mau tairururaa rarahi o te mau nunaa atoa tei faanahohia i te matahiti 1989, e mau tausani taata no Rusia e Ukraine tei tae mai. I taua matahiti ra to te mau fenua Hongrie e Polonia haamanaraa i te mau Ite no Iehova. I te tau auhune o te matahiti 1989, ua vavahihia te Patu o Berlin. Tau avaˈe i muri aˈe, ua haamanahia tatou i Helemani Hitia o te râ, e i muri iti noa ˈˈe, ua tupu te hoê tairururaa o te mau nunaa atoa i Berlin. E i te omuaraa o te mau ahuru matahiti hopea o te senekele 20, ua tutavahia i te farerei roa ˈtu i te mau taeae i Rusia. Ua farereihia te tahi mau taata toroa i Moscou, e i te matahiti 1991, ua haamanahia te mau Ite no Iehova. Mai reira mai, ua parare rahi roa te ohipa i Rusia e i te mau repubilita no te mau hau amui Soviétique tahito.
8. Eaha tei tupu i nia i te mau Ite no Iehova i te roaraa o na 45 matahiti i muri aˈe i te hoperaa te Piti o te Tamaˈi Rahi?
8 Mai te peu e ua mau te hamani-ino-raa i te tahi mau vahi, ua rahi ïa i te tahi atu mau vahi. I te roaraa o na 45 matahiti i muri aˈe i te hopea o te Piti o te Tamaˈi Rahi, mea rahi te mau fenua tei patoi i te haamana i te mau Ite no Iehova. Hau atu â, ua faaruru tatou aore ra ta tatou mau ohipa i te mau opaniraa i roto e 23 fenua i Afirika, e 9 i Asia, e 8 i Europa, e 3 i Marite Latino, e e 4 i te tahi mau nunaa o te mau motu.
9. Eaha ta te mau tavini a Iehova i faaruru i Malawi?
9 Ua faaruru te mau Ite no Iehova i Malawi i te hamani-ino-raa aroha ore mai te matahiti 1967 mai. No to ratou tiaraa amui ore ei mau Kerisetiano mau, aita to tatou mau taeae i hoo mai i te mau tareta o te pǔpǔ politita. (Ioane 17:16) I muri aˈe i te hoê putuputuraa a te Pǔpǔ o te Apooraa no Malawi i te matahiti 1972, ua tupu faahou te hamani-ino-raa. Ua tiahihia te mau taeae i rapae i to ratou fare e ua tihatihia ratou. E mau tausani tei faarue i te fenua ia ore ratou e haapohehia. Ua manuïa anei râ te feia tamaˈi i te Atua e i to ˈna nunaa? Aita roa ˈtu! I muri aˈe i te tauiraa te tupuraa, ua tapaohia te hoê numera faahiahia e 43 767 taata poro i te Basileia i Malawi i te matahiti 1999, e hau atu i te 120 000 tei tae i te mau tairururaa mataeinaa i reira. Ua hamanihia te hoê amaa apî i te oire pu.
Te imi ra ratou i te hoê pariraa
10. Mai ta Daniela i faaruru, eaha ta te feia patoi no teie tau i te nunaa o te Atua i rave?
10 Mea riri roa na te mau apotata, te pǔpǔ ekalesiatiko, e vetahi atu mau taata i ta tatou poroi i roto i te Parau a te Atua. Ma te faahepohia e te tahi mau tuhaa o te Amuiraa faaroo Kerisetiano, te imi ra te feia patoi i te hoê ravea i parau-noa-hia e ravea haamanahia no te faatia i ta ratou aroraa ia tatou. Eaha te tahi mau ravea e faaohipahia ra i te tahi mau taime? Inaha, eaha ta te feia opuaraa ino i rave no te aro i te peropheta Daniela? I roto i te Daniela 6:4, 5, te taio nei tatou: “Ua imi ihora te mau auvaha e te mau tavana i te tahi pariraa ˈtu ia Daniela i taua basileia ra; aita aˈera râ i itea ia ratou te pariraa ˈtu, e te ino; no te mea e parau haavare ore ta ˈna, e aore roa e hapa e te ino i itea ia ˈna. Ua na ô aˈera taua mau taata ra, Aita roa a tatou e pariraa e itea i teie nei taata ia Daniela nei, maori râ ei te ture a to ˈna iho Atua e noaa ˈi.” I teie mahana atoa, te imi ra te feia patoi i te hoê pariraa. Te faahapa ra ratou i “te mau pǔpǔ faaroo atâta” e te faaau ra i te reira i te mau Ite no Iehova. Na roto i te mau parau hape, te mau parau haavare omoe, e te haavare, te faahapa nei ratou i ta tatou haamoriraa e to tatou ati-maite-raa i te mau faaueraa tumu a te Atua.
11. Eaha te tahi mau parau haavare a te tahi feia patoi no nia i te mau Ite no Iehova?
11 I te tahi mau fenua, aita te tahi mau tuhaa i te pae faaroo e i te pae politita e farii ra e te rave nei tatou i te haamoriraa “paieti mau e te ino ore i mua i te aro o te Atua.” (Iakobo 1:27) Noa ˈtu e te ravehia ra ta tatou mau ohipa Kerisetiano i roto e 234 fenua, te parau ra te feia patoi e e ere tatou i te hoê “haapaoraa matauhia.” Na mua iti noa ˈˈe i te hoê tairururaa o te mau nunaa atoa i tupu i te matahiti 1998, ua faahiti te hoê vea no Ateno i te parau a te pǔpǔ ekalesiatiko Orthodoxe Heleni oia hoi “e ere [te mau Ite no Iehova] i te hoê ‘haapaoraa matauhia,’” noa ˈtu e e ere te reira ta te Tiribuna Europa o te mau Tiaraa o te Taata i haapapu. Tau mahana i muri aˈe, ua faahiti te tahi atu vea o taua noâ oire ra i te parau a te hoê afai parau o te Ekalesia: “E ere [te mau Ite no Iehova] i ‘te hoê ekalesia Kerisetiano,’ no te mea aita to ratou e tuatiraa e te faaroo Kerisetiano i te taata ra o Iesu Mesia.” Mea maere mau â te reira, no te mea aita ˈtu pǔpǔ faaroo e tuu ra i te tapao i nia i te faufaaraa ia pee i te hiˈoraa o Iesu, maoti râ te mau Ite no Iehova!
12. I roto i ta tatou tamaˈi pae varua, eaha te tia ia rave tatou?
12 Te imi nei tatou i te faatia e i te haapapu i te parau apî maitai maoti te mau ravea e au i te ture. (Philipi 1:7) Hau atu â, eita tatou e haapiˈo aore ra e faaiti i to tatou ati-maite-raa i te mau ture parau-tia a te Atua. (Tito 2:10, 12) Mai ia Ieremia, e ‘tatia tatou i to tatou tauupu, a parau atu ai i ta Iehova i faaue mai,’ ma te ore e vaiiho e ia haamǎtaˈu mai te feia tamaˈi i te Atua. (Ieremia 1:17, 18) Ua faataa maitai te Parau Moˈa a Iehova i te haerea maitai ta tatou e pee. Eiaha roa ˈtu tatou e hinaaro e turui i nia i te “rima taata” paruparu aore ra e “tiaturi i te mǎrû ra ia Aiphiti,” oia hoi teie nei ao. (Paraleipomeno 2, 32:8; Isaia 30:3; 31:1-3) I roto i te tamaˈi pae varua, e tia ia tatou ia tamau i te tiaturi ia Iehova ma to tatou mafatu atoa, ia vaiiho e na ˈna e aratai i to tatou mau haerea, e eiaha e tiaturi i to tatou iho maramarama. (Maseli 3:5-7) Ia ore Iehova e turu e e tiai ia tatou, e “faufaa ore” ïa ta tatou ohipa atoa.—Salamo 127:1.
I hamani-ino-hia, aita râ i fati
13. No te aha e nehenehe ai e parau e aita te aroraa a Satani ia Iesu i manuïa?
13 Te hiˈoraa faufaa roa ˈˈe o te taairaa fati ore ia Iehova, o Iesu ïa, o tei pari-hape-hia i te tiarepu orure hau e te faahuehue i te nahonaho-maitai-raa. I muri aˈe i to ˈna hiˈopoaraa i te tupuraa o Iesu, ua ineine Pilato i te tuu ia ˈna. Tera râ, ua pii hua te nahoa, i turaihia e te mau aratai haapaoraa, ia patǐtǐhia Iesu i nia i te pou, noa ˈtu e aita ta ˈna e hara. Ua ani ratou e o Baraba te tuuhia—te hoê taata tei tapeahia no te tiarepu orure hau e te taparahi taata—eiaha o Iesu! Ua tamata faahou Pilato i te faataui i te manaˈo o te feia patoi maamaa, i te pae hopea râ, ua farii oia i te manaˈo o te nahoa. (Luka 23:2, 5, 14, 18-25) Noa ˈtu e ua pohe o Iesu i nia i te hoê pou, aita roa ˈtu te aroraa riaria mau a Satani i te Tamaiti hapa ore a te Atua i manuïa, no te mea ua faatia mai Iehova ia Iesu e ua faateitei ia ˈna i To ˈna rima atau. E i te mahana o te Penetekose o te matahiti 33 T.T., na roto ia Iesu tei faahanahanahia, ua niniihia mai te varua moˈa, o te haamau ïa i te amuiraa Kerisetiano—“te hoê poieteraa apî.”—Korinetia 2, 5:17, MN; Ohipa 2:1-4.
14. Eaha te faahopearaa i to te mau aratai haapaoraa ati Iuda aroraa i te mau pǐpǐ a Iesu?
14 I muri iti noa ˈˈe, ua haamǎtaˈu te mau aratai haapaoraa i te mau aposetolo, aita râ taua mau pǐpǐ a te Mesia ra i faaea i te faaite i te mau mea ta ratou i ite e i faaroo. Ua pure te mau pǐpǐ a Iesu e: “E hiˈo mai oe, e te Fatu, i ta ratou nei haamǎtaˈuraa mai; e faaitoito mai i to mau tavini ia parau noa i to parau ma te mǎtaˈu ore.” (Ohipa 4:29) Ua pahono Iehova i ta ratou taparuraa na roto i te faaîraa ia ratou i te varua moˈa e te haapuairaa ia ratou ia tamau i te poro ma te mǎtaˈu ore. Aita i maoro, ua faaue-faahou-hia te mau aposetolo e faaea i te poro, ua pahono râ Petero e te tahi atu mau aposetolo e: “O te Atua ta matou e faaroo e tia ˈi eiaha te taata.” (Ohipa 5:29) Aita te mau haamǎtaˈuraa, te mau haruraa, e te mau tairiraa i tapea ia ratou ia ore ratou e rave i ta ratou pororaa i te Basileia.
15. O vai o Gamaliela, e eaha te aˈoraa ta ˈna i horoa na te mau aratai haapaoraa patoi i te mau pǐpǐ a Iesu?
15 Eaha te huru o te mau aratai haapaoraa? Ua “putapû atura to ratou aau, e feruri noa ihora i te ravea e pohe ai [te mau aposetolo] ia ratou.” Tei reira râ te hoê haapii ture o Gamaliela te iˈoa, te hoê Pharisea, e mea au na te taata atoa ia ˈna. I muri aˈe i to ˈna faahaereraa i te mau aposetolo i rapaeau i te piha o te Sunederi no te hoê taime, ua aˈo oia i taua mau aratai haapaoraa patoi ra e: “E te mau taata o Iseraela nei, e ara ia outou i ta outou raveraa ˈtu i tena na mau taata. . . . Teie ta ˈu parau ia outou, Eiaha e hauti noa ˈtu i tena na mau taata, e vaiiho noa ˈtu; na te taata teie parau e teie nei ohipa, e morohi noa ïa; na te Atua râ, eita ïa e morohi ia outou; o te riro noa ˈtu hoi outou ei feia tamaˈi atu i te Atua.”—Ohipa 5:33-39.
E ore e manuïa te mauhaa i hamanihia no te aro ia tatou
16. Nafea outou iho e faataa ˈi i te haapapuraa ta Iehova e horoa ra na to ˈna nunaa?
16 E aˈoraa tano maitai ta Gamaliela, e te mauruuru nei tatou ia turu vetahi pae ia tatou. Ua ite atoa tatou e ua turuhia te tiamâraa o te haamoriraa maoti te mau faaotiraa i ravehia e te mau haava pae tahi ore. Parau mau, aita te pǔpǔ ekalesiatiko a te Amuiraa faaroo Kerisetiano e te tahi atu mau aratai a Babulonia Rahi, te hau emepera o te haapaoraa hape na te ao nei, e au ra i to tatou ati-maite-raa i te Parau a te Atua. (Apokalupo 18:1-3) Noa ˈtu e te aro ra ratou e te feia ta ratou e arato ra, ia tatou, teie ta tatou haapapuraa: “Te mauhaa ra na oe i hamanihia ˈi ra, e ore ïa e [manuïa]; e te mau vaha atoa e patoi ia oe i te haavaraa ra, e hapa ïa ia oe. O te tufaa teie o te mau tavini o Iehova; e tei ia ˈu te faatia ia ratou, te na reira maira Iehova.”—Isaia 54:17; MN.
17. Noa ˈtu e e aro mai te feia patoi, no te aha tatou e faaitoito ai?
17 Te aro ra to tatou mau enemi ia tatou aita hoi e tumu, eiaha râ tatou e haaparuparu. (Salamo 109:1-3) Eiaha roa ˈtu tatou e vaiiho e ia haamǎtaˈu mai te feia e riri rahi ra i ta tatou poroi Bibilia e ia haapiˈo tatou i to tatou faaroo. Te tiaturi nei tatou e e uˈana ta tatou aroraa i te pae varua, ua ite râ tatou i te faahopearaa. Mai ia Ieremia, e ite tatou i te tupuraa o teie mau parau tohu: “E tamaˈi mai hoi ratou ia oe, e ore râ e [manuïa no te mea] ei pihai atoa iho vau ia oe ei faaora ia oe, te parau maira Iehova.” (Ieremia 1:19; MN) Oia, ua ite tatou e e ore te feia tamaˈi i te Atua e manuïa!
[Nota i raro i te api]
^ A hiˈo i te tumu parau “Haapao maitai e mǎtaˈu ore i mua i te faaheporaa Nazi,” mau api 24-28.
Nafea outou ia pahono?
• No te aha te mau tavini a Iehova i arohia ˈi?
• Nafea to te feia patoi tamaˈiraa i te nunaa o Iehova?
• No te aha e papu ai ia tatou e e ore te feia tamaˈi i te Atua e manuïa?
[Uiraa haapiiraa]
[Hohoˈa i te api 17]
Ua papu ia Ieremia e ei pihai iho Iehova ia ˈna
[Hohoˈa i te api 18]
Te feia i ora mai i te aua tapearaa
[Hohoˈa i te api 18]
Te haavîraa a te nahoa i te mau Ite no Iehova
[Hohoˈa i te api 18]
J. F. Rutherford e to ˈna mau apiti
[Hohoˈa i te api 21]
I roto i te tupuraa o Iesu, aita te feia tamaˈi i te Atua i manuïa