‘E ora oe e te feia atoa e faaroo mai ia oe ra’

“E ara [noa] ia oe, e ta oe e haapii ra . . . Tei te na reira hoi e ora ˈi oe e te feia atoa e faaroo mai ia oe ra.”—TIMOTEO 1, 4:16; MN.

1, 2. Na te aha e turai ra i te mau Kerisetiano mau ia rave tamau i ta ratou ohipa faaoraraa?

 I ROTO i te hoê oire iti moemoe i te pae apatoerau o Thaïlande, te tamatamata ra te tahi nau taata faaipoipo Ite no Iehova i to raua aravihi i te reo i noaa apî mai i nia i te mau melo o te hoê opu taata o te aivi. No te faaite i te parau apî maitai o te Basileia o te Atua i te feia o te oire iti, ua haapii raua aita i maoro aˈenei i te reo Lahu.

² “Mea fifi ia faataa i to mâua oaoa e te mauruuru i te pororaa i teie mau taata anaanatae mau,” ta te tane ïa e faataa ra. “I to mâua manaˈo, ua apiti mau â mâua i roto i te tupuraa o te Apokalupo 14:6, 7, oia hoi te pororaa i te parau apî maitai “i te mau fenua atoa, e te mau opu atoa, e te mau reo atoa.” Mea iti te mau tuhaa fenua aita i porohia ˈtura te parau apî maitai, e oia mau, teie te hoê o te reira. Fatata e mea rahi aˈe te mau haapiiraa Bibilia i ta mâua e nehenehe e faatere.” Papu maitai, te tiaturi ra teie nau hoa faaipoipo e e ora mai raua e te feia atoa e faaroo mai ia raua. Ei mau Kerisetiano, aita anei tatou paatoa e tiaturi ra e na reira atoa?

“E ara noa ia oe”

3. Ia ora atoa vetahi ê, eaha ta tatou e rave na mua, e tia ˈi?

³ Ua aˈo te aposetolo Paulo ia Timoteo e, “E ara [noa] ia oe, e ta oe e haapii ra,” e e au te reira i te mau Kerisetiano atoa. (Timoteo 1, 4:16; MN) Oia mau, no te tauturu ia vetahi ê ia noaa te faaoraraa, e tia ia tatou ia ara na mua ia tatou iho. Nafea ïa? A tahi, e tia ia tatou ia vai ara i te tau ta tatou e ora nei. Ua horoa Iesu i te hoê tapao tuhaa rau ia ite ta ˈna mau pǐpǐ afea “te hopea o te faanahoraa o te mau mea” e tae mai ai. Ua parau atoa râ Iesu e eita ratou e ite afea mau te hopea e tae mai ai. (Mataio 24:3, MN, 36) Eaha ïa to tatou huru e tia ˈi?

4. (a) Eaha to tatou huru i mua i te taime e toe ra i roto i teie faanahoraa? (b) Eaha te huru e tia ia tatou ia ape?

⁴ E nehenehe tatou taitahi e uiui e, ‘Te faaohipa ra anei au i te taime atoa e toe ra no teie faanahoraa ia faaorahia vau e te feia e faaroo mai ia ˈu? Aore ra te manaˈo ra anei au e, “I te mea e aita tatou i ite afea mau te hopea e tae mai ai, eita ïa vau  e tâuˈa i te reira”?’ Mea atâta teie manaˈo hopea. Aita roa ˈtu te reira e tuati ra i te aˈoraa a Iesu: “Ia parahi ineine noa outou; ei te hora manaˈo-ore-hia e outou na e tae mai ai te Tamaiti a te taata nei.” (Mataio 24:44) Papu maitai, e ere teie te taime no te ere i to tatou anaanatae i te taviniraa a Iehova aore ra no te fariu i nia i te ao no te ite i te ino ore aore ra te oaoa.—Luka 21:34-36.

5. Eaha te mau hiˈoraa ta te mau ite no Iehova hou te Kerisetianoraa i vaiiho mai?

⁵ Te faaoromairaa ma te haapao maitai ei Kerisetiano, o te tahi atu ïa ravea e faaite ai tatou e te ara ra tatou ia tatou. Ua faaoromai noa te mau tavini a te Atua i mutaa ihora, noa ˈtu e ua tiai ratou i te faaoraraa oioi aore ra aita. I muri aˈe i to ˈna faahitiraa i te mau hiˈoraa o te mau ite hou te Kerisetianoraa mai ia Abela, Enoha, Noa, Aberahama, e Sara, ua tapao Paulo e: “Aita i noaa [ia ratou te tupuraa o te mau tǎpǔ], ua hiˈo râ ratou i taua mau mea ra i te atea ê, e ua faaroo papu e ua farii maite, e ua faˈi hua e, e taata ěê ratou e te purutia i teie nei ao.” Aita ratou i hinaaro i te hoê oraraa ohie, aita atoa ratou i hema i te mau faaheporaa tia ore i te pae morare e haaati ra ia ratou, tera râ, ua tiai ratou i “te tupuraa o te mau tǎpǔ.”—Hebera 11:13; MN; 12:1.

6. Nafea te manaˈo o te mau Kerisetiano no te senekele matamua no nia i te faaoraraa, i te ohiparaa i nia i to ratou huru oraraa?

⁶ Ua faariro atoa te mau Kerisetiano no te  senekele matamua ia ratou mai te mau “taata ěê” i roto i teie nei ao. (Petero 1, 2:11) Tae noa ˈtu i muri aˈe i to ratou oraraa mai i te haamouraahia Ierusalema i te matahiti 70 T.T., aita te mau Kerisetiano mau i faaea i te poro aore ra i te faataa ê mai ia ratou i te huru oraraa o te ao. Ua ite ratou e te tiai maira te hoê faaoraraa rahi i te feia e ore e taiva. Inaha, i te matahiti 98 T.T., ua papai te aposetolo Ioane e: “Te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.”—Ioane 1, 2:17, 28.

7. Nafea te mau Ite no Iehova i faaite ai i te faaoromai i teie nei tau?

⁷ I teie nei tau, ua tamau maite atoa te mau Ite no Iehova i te rave i te ohipa Kerisetiano, noa ˈtu e ua faaruru ratou i te hamani-ino-raa ino mau. Ua faufaa ore anei to ratou faaoromai? Aita roa ˈtu, inaha, te haapapu maira Iesu e: “Area te mau papu e tae noa ˈtu i te hopea ra, oia te ora,” te hopea o te faanahoraa tahito anei aore ra te hopea o te oraraa o te hoê taata. I te tia-faahou-raa, e haamanaˈo e e haamaitai Iehova i ta ˈna mau tavini haapao maitai atoa i pohe.—Mataio 24:13; Hebera 6:10.

8. Nafea tatou e faaite ai e te mauruuru nei tatou i te faaoromai o te mau Kerisetiano i mutaa ihora?

⁸ Hau atu â, te oaoa nei tatou e aita te mau Kerisetiano haapao maitai i mutaa ihora i haapao noa i to ratou iho faaoraraa. Papu maitai e te mauruuru nei tatou i te haapii i te parau o te Basileia o te Atua maoti ta ratou mau tutavaraa, e ua tamau maite ratou i te rave i te ohipa faauehia e Iesu: “E teie nei, e haere outou e faariro i te mau fenua atoa ei pǐpǐ, . . . ma te haapii atu ia ratou i te haapao i te mau mea atoa ta ˈu i parau atu.” (Mataio 28:19, 20) A matara noa ˈi te ravea na tatou, e nehenehe tatou e faaite i to tatou mauruuru na roto i te pororaa ia vetahi ê aita i faaroo atura i te parau apî maitai. Tera râ, e taahiraa matamua noa te pororaa e tae atu ai i te faariroraa i te taata ei pǐpǐ.

‘E ara i ta oe e haapii ra’

9. Nafea te hoê manaˈo maitai e tauturu mai ai ia haamata tatou i te mau haapiiraa Bibilia?

⁹ Ta tatou hopoia, e ere noa ïa te pororaa, oia atoa râ te haapiiraa ˈtu. Ua faaue mai Iesu e ia haapii atu tatou i te taata ia haapao i te mau mea atoa ta ˈna i faaue mai. Parau mau, i roto i te tahi mau tuhaa fenua, e au ra e mea iti o te hinaaro ra e haapii no nia ia Iehova. E nehenehe râ te hoê manaˈo paruparu no nia i te tuhaa fenua e haafifi i ta tatou mau tutavaraa e haamata i te tahi mau haapiiraa Bibilia. Ua ite o Yvette, te hoê tuahine pionie i roto i te hoê tuhaa fenua ta vetahi i parau e mea hotu ore, e ua haamata te tahi mau ratere i taua vahi ra i te tahi mau haapiiraa Bibilia i te fare o te taata, aita hoi to ratou e manaˈo paruparu. I muri aˈe i to ˈna raveraa i te hoê manaˈo maitai aˈe, ua farerei atoa o Yvette i te mau taata i hinaaro e haapii i te Bibilia.

10. Eaha ta tatou tuhaa faufaa ei feia o te horoa i te haapiiraa Bibilia?

¹⁰ E taiâ paha te tahi mau Kerisetiano ia pûpû i te haapiiraa Bibilia i te feia e anaanatae ra no te mea e te manaˈo ra ratou e eita e maraa ia ratou ia faatere i te hoê haapiiraa. Parau mau, e ere hoê â faito aravihi to tatou. Tera râ, aita e faufaa ia riro ei taata aravihi roa no te haapii atu ma te manuïa i te Parau a te Atua. Mea puai te poroi viivii ore o te Bibilia, e ua parau Iesu e ua ite te feia e au i te mamoe i te reo o te Tiai mamoe mau ia faaroo ratou i to ˈna reo. No reira ta tatou ohipa, o te faataeraa ïa i te poroi a te Tiai mamoe Maitai, o Iesu, ma te maramarama maitai e nehenehe.—Ioane 10:4, 14.

11. Nafea outou e aravihihia ˈtu â ˈi i te tautururaa i te hoê taata e haapii ra i te Bibilia?

¹¹ Nafea outou e nehenehe ai e faatae i te poroi a Iesu ma te aravihi atu â? Na mua, a maimi i ta te Bibilia e parau ra no nia i te tumu parau e tuatapapahia ra. E tia ia taa ia outou iho te tumu parau hou a haapii atu ai ia vetahi ê. A tamata atoa i te faatupu noa i te hoê huru tupuraa tura e te auhoa i roto i te haapiiraa. E haapii maitai aˈe te feia haapii, tae noa ˈtu te feia apî roa, mai te peu e aita ratou e haapeapea ra e te faaite ra te taata e horoa ra i te haapiiraa i te faatura e te hamani maitai.—Maseli 16:21.

12. Nafea outou e ite papu ai e ua taa i te taata ta outou e haapii atu ra ia ˈna?

¹² Eita outou, te taata e horoa ra i te haapiiraa, e hinaaro noa e hohora i te mau mea ia horoa mai te taata haapii i te mau pahonoraa oti noa. A tauturu  atu ia taa ia ˈna te mea ta ˈna e haapii ra. E nehenehe te haapiiraa i fanaˈohia e te hoê taata haapii, to ˈna oraraa e to ˈna matauraa i te Bibilia e ohipa i nia i to ˈna maramarama i ta outou e parau ra. No reira, a uiui e, ‘Te taa ra anei ia ˈna te auraa o te mau irava i faahitihia i roto i te buka?’ E nehenehe outou e haaparaparau ia ˈna maoti te tahi mau uiraa o te ore e pahonohia na roto noa i te hoê e aore ra eita, o te titau râ i te hoê tatararaa. (Luka 9:18-20) I te tahi aˈe pae, te taiâ nei te tahi feia haapii ia ui i te taata e horoa ra i te haapiiraa. Eita paha e taa maitai ia ratou ta ratou e haapii ra. A faaitoito i te taata haapii ia ui i te mau uiraa e ia faaite mai ia ore o ˈna e taa maitai i te tahi manaˈo.—Mareko 4:10; 9:32, 33.

13. Nafea outou e nehenehe ai e tauturu i te taata haapii ia riro mai ei taata o te haapii atu ia vetahi ê?

¹³ Te hoê tapao faufaa ia faaterehia te hoê haapiiraa Bibilia, o te tautururaa ïa i te taata haapii ia riro mai ei taata o te haapii atu ia vetahi ê. (Galatia 6:6) No reira, ei haamanaˈoraa i ta outou haapiiraa, e nehenehe outou e ani ia ˈna ia faataa mai i te hoê manaˈo na roto i te mau parau ohie, mai te mea ra e te faataa ra oia i te hoê taata a tahi ra oia e faaroo ai i te reira. I muri aˈe, ia nehenehe oia e apiti i roto i te taviniraa, e nehenehe outou e ani ia ˈna ia apiti mai e o outou i roto i te aua pororaa. Eita paha oia e huru ê i te poro e o outou, e na ta ˈna e ite i roto i te pororaa e tauturu ia tiaturi oia ia ˈna iho e tae noa ˈtu i te taime e ineine ai oia i te faaoti o ˈna iho e haere i roto i te taviniraa.

A tauturu i te taata haapii ia riro ei hoa no Iehova

14. Eaha ta outou tapao matamua ei taata e horoa i te haapiiraa, e na te aha e turu ia naeahia te reira tapao?

¹⁴ Te tapao matamua a te mau Kerisetiano atoa e horoa ra i te haapiiraa, o te tautururaa ïa i te taata haapii ia faahoa ˈtu ia Iehova. E ere noa na roto i ta outou mau parau e tauturu ai outou, na roto atoa râ i to outou hiˈoraa. E mana puai to te haapiiraa na roto i te hiˈoraa i nia i te mafatu o te feia haapii. Mea aravihi aˈe te mau ohipa i te mau parau, ia tia iho â râ ia outou ia faaô i te mau huru maitatai i te pae morare e ia faahotu i te itoito i roto i te mafatu o te taata haapii. Ia ite oia e no roto mai ta outou mau parau e mau ohipa i te hoê taairaa piri e o Iehova, e turaihia ˈtu â paha oia ia faahotu i te hoê â taairaa.

15. (a) No te aha mea faufaa ia faaohipa te taata haapii i te tumu maitai e tavini ai oia ia Iehova? (b) Nafea outou e tauturu ai i te taata haapii ia haere noa oia i mua i te pae varua?

¹⁵ E hinaaro outou e ia tavini te taata haapii ia Iehova, eiaha noa no te mea aita oia e hinaaro ra ia haamouhia oia i Aramagedo no to ˈna râ here ia ˈna. Na roto i te tautururaa ia ˈna ia faahotu i te hoê manaˈo maitai, e patu ïa outou e te mau tauihaa ama ore i te auahi o te upootia i nia i te mau tamataraa i nia i to ˈna faaroo. (Korinetia 1, 3:10-15) Eita te hoê manaˈo tano ore, mai te hoê hiaai uˈana e pee ia outou aore ra i te tahi atu taata, e horoa ia ˈna ra i te puai no te patoi i te mau ohiparaa e ere i te Kerisetiano e te itoito no te rave i te mea tia. A haamanaˈo, eita outou e haapii noa ia ˈna e a muri noa ˈtu. Ia nehenehe outou, a faaitoito ia ˈna i te haafatata ˈtu â ia Iehova na roto i te taioraa i te Parau a te Atua i te mau mahana atoa e ia feruri i te reira. Mea na reira oia e apo noa mai ai i “te hiroa parau [faaora]” no roto mai i te Bibilia e te mau papai Bibilia e maoro i muri aˈe i te hoperaa ta orua haapiiraa.—Timoteo 2, 1:13; MN.

16. Nafea outou e haapii ai i te taata haapii ia pure ma te aau rotahi?

¹⁶ E nehenehe atoa outou e tauturu i te taata haapii ia haafatata ˈtu â ia Iehova na roto i te haapiiraa ˈtu ia ˈna ia pure ma te aau rotahi. Nafea ïa? Peneiaˈe, e huti outou i to ˈna ara-maite-raa i nia i te hohoˈa pure a Iesu, e te mau pure aau rotahi e rave rahi i papaihia i roto i te Bibilia, mai ta te mau salamo. (Salamo 17, 86, 143; Mataio 6:9, 10) Hau atu â, ia faaroo te taata haapii ia outou ia pure i te omuaraa e i te hopea o te haapiiraa, e ite oia eaha to outou mau manaˈo hohonu no Iehova. Ia faaite noa ïa ta outou mau pure i te haavare ore e te huna ore, e te faito-noa-raa i te pae varua e te pae horuhoru.

Te haaraa i te faaora i ta outou mau tamarii

17. Nafea te mau metua e tauturu ai i ta ratou mau tamarii ia haere noa na te eˈa e tae atu ai i te ora?

¹⁷ Parau mau e i rotopu i te feia ta tatou e hinaaro ia ora ˈtu, o te mau melo ïa o to tatou utuafare. Mea rahi roa te mau tamarii a te mau metua  Kerisetiano, mea haavare ore ratou e e “faaroo turori ore” to ratou. Area te tahi atu ra, aita ïa te parau mau i aˈa roa i roto i to ratou mafatu. (Petero 1, 5:9; Ephesia 3:17; Kolosa 2:7) Mea rahi o teie mau taata apî o te faarue nei i te eˈa Kerisetiano ia paari mai ratou. Mai te peu e e metua outou, eaha ta outou e nehenehe e rave no te arai i teie huru faahopearaa? Na mua, e nehenehe outou e haa i te faatupu i te hoê huru tupuraa utuafare maitatai. Na te hoê oraraa utuafare maitai e haamau i te niu o te hoê manaˈo maitai no nia i te tiaraa upoo, te mauruuru i te mau mea faufaa maitai roa, e te mau taairaa oaoa e o vetahi ê. (Hebera 12:9) No reira, e nehenehe te mau taairaa piri i roto i te utuafare e riro ei tumu e rahi mai ai te auhoaraa o te hoê tamarii e o Iehova. (Salamo 22:10) E rave amui te mau utuafare puai i te mau ohipa mai te hoê pǔpǔ—noa ˈtu e e tia i te mau metua ia haapae i te taime ta ratou e nehenehe e faaohipa no to ratou iho maitai. E nehenehe outou na roto i te hiˈoraa e haapii i ta outou mau tamarii ia rave i te mau faaotiraa maitatai i roto i te oraraa. E te mau metua, te mea ta ta outou mau tamarii e hinaaro roa ˈˈe, e ere ïa te mau faufaa materia, o outou râ—to outou taime, to outou puai, e to outou here. Te horoa ra anei outou i teie mau mea na ta outou mau tamarii?

18. Teihea mau uiraa e tia i te mau metua ia tauturu i ta ratou mau tamarii ia pahono?

¹⁸ Eiaha roa ˈtu te mau metua Kerisetiano e manaˈo e e riro atoa mai iho â ïa ta ratou mau tamarii ei Kerisetiano. Teie ta Daniel, e matahiapo oia e e pae tamarii ta ˈna, e parau ra: “E tia i te mau metua ia rave i te taime no te faaore i te mau manaˈo  feaa e te faahinaaro ra ta ratou mau tamarii i te fare haapiiraa e i te tahi atu mau vahi. E tia ia ratou ia tauturu ma te faaoromai i ta ratou mau tamarii ia ite i te mau pahonoraa i teie mau uiraa: ‘Te ora mau ra anei tatou i te anotau hopea? Hoê anaˈe anei haapaoraa mau? No te aha te hoê hoa haapiiraa e au ra e mea maitai o ˈna, e ere ïa i te hoê hoa maitai? Mea ino noa anei ia taati i te pae tino hou te faaipoiporaa?’” E nehenehe outou, te mau metua, e tiaturi e e haamaitai Iehova i ta outou mau tutavaraa, no te mea te anaanatae atoa ra oia i te maitai o ta outou mau tamarii.

19. No te aha mea maitai aˈe e na te mau metua iho e haapii i ta ratou mau tamarii?

¹⁹ Te manaˈo ra paha te tahi mau metua e eita e maraa ia ratou ia haapii i ta ratou iho mau tamarii. Eiaha outou e manaˈo mai te reira, no te mea aita ˈtu taata e tano aˈe no te haapii i ta outou mau tamarii, maori râ o outou. (Ephesia 6:4) Na roto i te haapiiraa e ta outou iho mau tamarii e ite roa ˈtu ai outou eaha to roto i to ratou mafatu e to ratou feruriraa. Mea haavare ore anei ta ratou mau parau aore ra mea faatia ture noa? Te tiaturi mau ra anei ratou i ta ratou e haapii ra? E ihotaata mau anei Iehova no ratou? E ite outou i te mau pahonoraa o teie mau uiraa faufaa e vetahi atu ia haapii outou iho e ta outou mau tamarii.—Timoteo 2, 1:5.

20. Nafea te mau metua e nehenehe ai e faariro i te haapiiraa utuafare ei mea au maitai e te faufaa?

²⁰ Nafea outou e nehenehe ai e pee maite i ta outou porotarama haapiiraa utuafare a haamata ˈi outou i te reira? Teie ta Joseph, e matahiapo oia e hoê tamaroa e hoê tamahine apî ta ˈna, e parau ra: “Mai te mau haapiiraa Bibilia atoa, e tia i te haapiiraa utuafare ia tupu ma te au maitai, ta te melo taatoa ïa e tiai ra. Ia tupu te reira i roto i to matou utuafare, eita mâua e faaetaeta roa i nia i te taime. E nehenehe ta matou haapiiraa e mairi hoê hora, noa ˈtu râ i tera e tera taime hoê ahuru minuti anaˈe ta matou, e haapii iho â matou. Te hoê mea o te faariro i ta matou haapiiraa ei taime faufaa i roto i te hebedoma no te mau tamarii, ia hauti ïa matou i te mau aamu i roto i Ta ˈu Buka Aamu Bibilia. * Mea faufaa aˈe te hohonu o te putapûraa e o te maramaramaraa e noaa mai i te rahiraa paratarapha ta matou e tuatapapa.”

21. Eaha te taime e nehenehe ai te mau metua e haapii i ta ratou mau tamarii?

²¹ Parau mau, aita te haapiiraa i ta outou mau tamarii i taotiahia i te tahi noa mau area taime haapiiraa faataahia. (Deuteronomi 6:5-7) Te na ô ra te Ite i Thaïlande i faahitihia i te omuaraa e: “Te haamanaˈo maitai ra vau e mea matauhia e Papa e afai ia ˈu i roto i te pororaa na nia i to mâua nau pereoo taataahi, i te mau vahi atea o te tuhaa fenua o ta matou amuiraa. Eita e ore e na te hiˈoraa maitai o to mâua mau metua e ta ratou haapiiraa mai ia mâua i roto i te mau huru tupuraa atoa, i tauturu mai ia faaoti mâua e rave i te taviniraa ma te taime taatoa. E eita e ore e mea aravihi te mau haapiiraa. Te tavini noa ra vau i te mau vahi atea o te tuhaa fenua!”

22. Eaha te faahopearaa ia ‘ara outou ia outou e i ta outou e haapii ra’?

²² E fatata i te hoê mahana i te taime tia, e haere mai o Iesu e faatupu i te haavaraa a te Atua i nia i teie faanahoraa. E ô ïa teie ohipa rahi e tupu i roto i te tuatapaparaa o te ao atoa, tera râ, e tamau noa te mau tavini haapao maitai a Iehova i te tavini ia ˈna no te fanaˈo i te faaoraraa mure ore. Te tiaturi ra anei outou e to rotopu outou ia ratou, e ta outou mau tamarii e mau taata haapii i te Bibilia? A haamanaˈo ïa: “E ara [noa] ia oe, e ta oe e haapii ra; e tamau maite â i te reira: tei te na reira hoi e ora ˈi oe e te feia atoa e faaroo mai ia oe ra.”—Timoteo 1, 4:16; MN.

[Nota i raro i te api]

E nehenehe anei outou e faataa?

• Eaha to tatou huru e tia ˈi, i te mea e aita tatou i ite afea mau te Atua e haava ˈi?

• Nafea tatou e ‘ara ˈi i ta tatou e haapii ra’?

• Nafea outou e tauturu ai i te hoê taata haapii ia riro ei hoa no Iehova?

• No te aha mea faufaa ia rave te mau metua i te taime no te haapii i ta ratou mau tamarii?

[Uiraa haapiiraa]

[Hohoˈa i te api 15]

E faufaahia ˈtu â te haapiiraa maoti te hoê huru tupuraa tura e te auhoa

[Hohoˈa i te api 18]

Na roto i te hautiraa i te tahi mau aamu Bibilia, mai ia Solomona e haava ra i na vahine faaturi e piti, e riro ïa te mau haapiiraa utuafare ei mea au maitai