Te ere ra anei te taˈo ra “Kerisetiano” i to ˈna auraa?

EAHA te auraa e riro ei Kerisetiano? Nafea outou e pahono ai? Ua uiuihia te hoê pǔpǔ taata maiti-haere-noa-hia i roto i te tahi mau fenua taa ê i teie uiraa, e teie te hoê hiˈoraa o ta ratou mau pahonoraa:

“Te peeraa ia Iesu e te faahohoˈaraa ia ˈna.”

“Te riroraa ei taata maitai e te opereraa na vetahi ê.”

“Te fariiraa i te Mesia ei Fatu e ei Faaora.”

“Te haereraa i te pureraa, te faahitiraa i te Rotario, e te fariiraa i te Euhari Moˈa.”

“Eita vau e tiaturi e mea titauhia ia haere i te fare pure e riro ai ei Kerisetiano.”

Te horoa atoa maira te mau titionare i te hoê panairaa faataaraa huru ê. Oia mau, i roto i te hoê buka, te vai ra hoê ahuru tuhaa i raro aˈe i te taˈo ra “Kerisetiano,” mai te “tiaturiraa aore ra te riroraa i te haapaoraa a Iesu Mesia” e tae atu i te “hoê taata haerea aore ra huru rapaeau maitai.” E ere i te mea maere ia manaˈo te taata e rave rahi e mea fifi ia faataa eaha te auraa e riro ei Kerisetiano.

Te hoê huru feruriraa faatia haere noa

I teie mahana, i roto i te feia e parau ra e e Kerisetiano ratou—tae noa ˈtu i roto i te feia hoê â paroita—e nehenehe e itehia mai te hoê panairaa rahi manaˈo no nia i te mau tumu parau mai te faauruaraa o te Bibilia e te Atua, te haapiiraa niu ore e e tauiui noa te mau mea ora, te faaôraa te ekalesia i roto i te politita, e te faaiteraa i te faaroo ia vetahi ê. E riro pinepine te mau tumu parau morare mai te haamaruaraa tamarii, te peu mahu, e te faaearaa ma te faaipoipo ore, ei aimârôraa uˈana. Aita e haperaa, te huru feruriraa, o te faatia-haere-noa-raa ïa.

Ei hiˈoraa, ua maiti te hoê tiribuna a te ekalesia Porotetani, aita i maoro aˈenei, e faatia i te hoê paroita “e maiti i te hoê matahiapo o te faaite roa e e mahu oia ei melo o te pǔpǔ aratai,” o ta te vea ra Christian Century ïa i faatia. Ua parau atoa te tahi feia maimi i te pae faaroo e e ere i te mea faufaa roa te faaroo ia Iesu e noaa ˈi te ora. Te tiaturi nei ratou e “e nehenehe” te ati Iuda, te Mahometa, e vetahi atu â “e tae i te raˈi [mai te mau Kerisetiano atoa ra],” ia au i te hoê parau faataa a te vea ra The New York Times.

A feruri na mai te peu e e nehenehe ta outou, i te hoê taata i pee ia Marx e paruru ra i te faanahoraa ona aore ra i te hoê taata no te pae hau manahune e paturu ra i te faatereraa haavî aore ra i te hoê taata paruru i te natura e faaitoito ra i te hahuraa i te mau uru raau. “E ere mau â taua taata ra i te hoê i pee ia Marx aore ra no te pae hau manahune aore ra o te paruru i te natura,” o ta outou ïa e parau—e e tano roa outou. Teie râ, ia hiˈo outou i te huru rau o te mau manaˈo o te feia e parau e e Kerisetiano ratou i teie mahana, te ite ra outou i te mau tiaturiraa taa ê roa te tahi i te tahi e mea pinepine o te ore roa ˈtu e tuati i ta te Taata i haamau i te Kerisetianoraa, o Iesu Mesia, i haapii. Eaha ta te reira e faaite ra no nia i te huru mau o ta ratou Kerisetianoraa?—Korinetia 1, 1:10.

Mea roa te aamu o te hinaaroraa e taui i te mau haapiiraa Kerisetiano no te faatano atu i te huru feruriraa o te tau, mai ta tatou e ite mai. Eaha te manaˈo o te Atua e o Iesu Mesia i teie mau tauiraa? E nehenehe anei te mau ekalesia o te paturu i te mau haapiiraa aita i niuhia i nia i te Mesia e parau ma te tano e e Kerisetiano ratou? E tauaparauhia teie mau uiraa i roto i te tumu parau i muri nei.