Te huru tauiui noa o te “Kerisetianoraa”—E farii anei te Atua?

A FERURI na e ua faaau outou i te hoê taata aravihi e peni i to outou hohoˈa. Ia oti ta ˈna ohipa, e oaoa roa outou; hoê â roa te hohoˈa e o outou. E feruri outou i to outou mau tamarii, mau mootua, e mau hina e hiˈo ra i te hohoˈa ma te teoteo rahi.

Tau ui râ hoi i muri aˈe, e manaˈo hoê o to outou huaai e e ere te upoo pahure i nia i te hohoˈa i te mea nehenehe, no reira, e rave oia e ia penihia ˈtu te rouru. Eita te tahi atu e au i te huru o te ihu, no reira, e rave oia e taui atu. E ravehia te tahi atu â mau “haamaitairaa” e te mau ui no muri mai, e i te pae hopea, e iti roa te auraa o te hohoˈa e o outou. Mai te peu e ua ite outou e e tupu iho â te reira, eaha ïa to outou manaˈo? E riri mau â outou.

Te mea peapea, oia hoi, hoê â roa te aamu o teie hohoˈa e te aamu o te ekalesia e parau ra e e Kerisetiano ratou. Te faaite ra te tuatapaparaa e aita i maoro i muri aˈe i te poheraa o te mau aposetolo a te Mesia, ua haamata te tiaraa matauhia o te “Kerisetianoraa” i te taui, mai ta te Bibilia iho â i tohu.—Mataio 13:24-30, 37-43; Ohipa 20:30. *

Parau mau, e tano ia faaauhia te mau faaueraa tumu Bibilia i nia i te mau taˈere e te mau tau rau. E ohipa ê roa râ te tauiraa i te mau haapiiraa Bibilia no te faatano atu i te manaˈo o te taata. O te reira mau â hoi tei tupu. A hiˈo mai na i te mau tauiraa i ravehia i roto i te tahi mau tuhaa faufaa.

Te tahoêraa te ekalesia i te hau

Ua faaite Iesu e tei te raˈi ta ˈna faatereraa, aore ra Basileia, e e haamou oia i te mau faatereraa taata atoa, i te hora mau ra, e e faatere oia i te fenua taatoa. (Daniela 2:44; Mataio 6:9, 10) Eita oia e faatere na roto i te mau faanahonahoraa politita a te taata. “E ere i to teie nei ao to ˈu basileia,” o ta Iesu ïa i parau. (Ioane 17:16; 18:36) No reira, noa ˈtu e e auraro ratou i te ture, eita te mau pǐpǐ a Iesu e faaô i roto i te politita.

Teie râ, i te tau o te emepera Roma Constantin i te senekele 4, e rave rahi feia e parau ra e e Kerisetiano ratou tei fiu i te tiai i te hoˈiraa mai o te Mesia e te haamauraa o te Basileia o te Atua. Ua taui mǎrǔ noa ˈtura to ratou huru i nia i te politita. “Hou ia Constantin,” o ta te buka ra Europe—A History ïa e parau ra, “aita roa ˈtu te mau Kerisetiano e imi ra e rave i te mana [politita] ei ravea no te paturu i ta ratou ohipa. I muri aˈe ia Constantin, ua tahoê te Kerisetianoraa e te feia politita rarahi.” Ua riro maira te Kerisetianoraa i tauihia ei haapaoraa “na te ao atoa nei,” aore ra “Katolika,” a te Hau emepera Roma.

Te na ô ra te buka ite rahi Great Ages of Man e no teie tahoêraa a te ekalesia e a te hau, “i te matahiti  385 A.D. [T.T.], e 80 noa ïa matahiti i muri aˈe i te hamani-ino-raa rahi hopea o te mau Kerisetiano, te haamata maira te ekalesia iho i te haapohe i te mau hairesi, e te faaohipa ra te mau ekalesiatiko i te hoê mana fatata i te aifaito i to te mau emepera.” Ua haamata ïa te hoê anotau i reira te ˈoˈe i te monoraa i te haapapuraa manaˈo ei ravea faatauiraa haapaoraa, e te pǔpǔ ekalesiatiko e tiaraa e e mana to ratou i te raveraa i te parahiraa o te feia poro haehaa no te senekele matamua. (Mataio 23:9, 10; 28:19, 20) Ua papai te taata tuatapapa o H. G. Wells no nia i “te mau taa-ê-raa rarahi i rotopu” i te Kerisetianoraa no te senekele 4 “e te haapiiraa a Iesu no Nazareta.” Ua taui atoa teie “mau taa-ê-raa rarahi” i te mau haapiiraa tumu no nia i te Atua e te Mesia.

Te tauiraa i te huru o te Atua

Ua haapii te Mesia e ta ˈna mau pǐpǐ e ‘hoê noa Atua, o te Metua,’ o te taa ê maoti to ˈna iˈoa o Iehova e itehia fatata e 7 000 taime i roto i te mau papai Bibilia matamua. (Korinetia 1, 8:6; Salamo 83:18) Na te Atua i poiete ia Iesu; o oia “tei fanau hia na mua roa i te mau meaˈtoa i poiete hia ra,” o ta te huriraa Bibilia Katolika V.C.J.S. ïa e parau ra i roto i te Kolosa 1:15. No reira Iesu, ei mea ora poietehia, i parau maite ai e: “E rahi hoi tau Metua ia ˈu.”—Ioane 14:28.

I te senekele 3 râ, ua haamata te tahi mau ekalesiatiko mana tei au i te haapiiraa o te Toru Tahi a te philosopho Heleni etene o Platon, i te taui i te huru o te Atua no te faatano atu i te Toru Tahi. I roto i te mau senekele i muri mai, ua faateitei teie haapiiraa ia Iesu ma te au ore atu i te Bibilia e ia aifaito oia ia Iehova e ua faariro i te varua moˈa o te Atua, aore ra puai ohipa, ei taata.

No nia i te fariiraa te ekalesia i te haapiiraa etene o te Toru Tahi, te na ô ra te New Catholic Encyclopedia e: “Aita te parau ra ‘hoê Atua i roto e toru taata’ i haamau-papu-hia, e papu maitai aita i ohipa maitai i roto i te oraraa Kerisetiano e ta ˈna faaiteraa faaroo, hou te hopea o te senekele 4. O taua parau ra râ hoi tei faahua na mua e rave i te upoo parau ra Haapiiraa o te Toru Tahi. I roto i te mau Metua Aposetolo, aita hoê aˈe mea e au rii noa i te reira manaˈo.”

Oia atoa, te na ô ra te Encyclopedia Americana e: “Aita na senekele haapiiraa i te Toru Tahi e maha i faahohoˈa maitai i te haapiiraa Kerisetiano matamua no nia i te huru o te Atua; area râ, ua riro ei ruri-ê-raa i te reira.” Te parau ra te Oxford Companion to the Bible i te Toru Tahi e hoê o te mau rahiraa “faahitiraa tiaturiraa no muri aˈe.” Teie râ, e ere o te Toru Tahi anaˈe te haapiiraa etene i faaôhia i roto i te ekalesia.

Te tauiraa i te nephe

E tiaturi te rahiraa e e nephe pohe ore to te taata o te ora mai i muri aˈe i te poheraa o te tino. Ua ite râ anei outou e ua amui-atoa-hia mai teie haapiiraa a te ekalesia i muri aˈe? Ua haapapu Iesu i te parau mau Bibilia e ‘aita a te feia i pohe ra e parau itea,’ e mai te huru ra e te taoto ra ratou. (Koheleta 9:5; Ioane 11:11-13) E faahoˈihia mai te ora maoti te tia-faahou-raa—‘te hoê tia-faahou-raa mai’ mai te taoto o te pohe. (Ioane 5:28, 29) Ahiri e te vai ra te nephe pohe ore, eita ïa e hinaarohia te tia-faahou-raa, aita hoi e pohe i roto i te pohe-ore-raa.

Ua haapapu atoa Iesu i te haapiiraa Bibilia o te tia-faahou-raa na roto i te faatia-faahou-raa mai i te taata mai te pohe mai. A rave na i te hiˈoraa o Lazaro, tei pohe e maha mahana i te maoro. I to Iesu faatia-faahou-raa mai ia ˈna, ua haere mai Lazaro i rapae i te menema ei taata ora e huti ra i te aho. Aita e nephe pohe ore i hoˈi mai i ǒ mai i te oaoaraa rahi i nia i te raˈi ra i roto i te tino o Lazaro i to ˈna araraa mai mai te pohe. Ahiri e te reira iho â, e ere roa ˈtu ïa i te hoê haamaitairaa to Iesu faatia-faahou-raa mai ia ˈna!—Ioane 11:39, 43, 44.

Nohea mai ïa te haapiiraa niu ore o te nephe pohe ore? Te na ô ra te Westminster Dictionary of Christian Theology e “no ô mai” te haapiiraa “i te philosophia Heleni ra eiaha râ i te faaiteraa a te Bibilia.” Te faataa ra te Jewish Encyclopedia e: “E tumu parau philosophia aore ra maimiraa i te pae faaroo feruri-noa-hia te tiaturiraa e e ora noa te nephe i muri aˈe i te tahutiraa o te tino, eiaha râ i te hoê ohipa faaroo mau, e no reira aita roa ˈtu e haapiihia ra i roto i te mau Papai Moˈa.”

 E pinepine te hoê parau hape i te aratai atu i nia i te tahi, e mai te reira mau â no te haapiiraa o te nephe pohe ore. Ua faatupu te reira i te manaˈo etene no te haamauiuiraa mure ore i roto i te po auahi ama. * Te faaite maite ra râ te Bibilia e “e utua te pohe no te hara”—eiaha râ te haamauiuiraa mure ore. (Roma 6:23) No reira te King James Version e faataa ˈi i te tia-faahou-raa mai teie: “Ua tuu maira te miti i te feia i pohe e vai ra i roto ia ˈna; e ua tuu maira te pohe e te po auahi i te feia i pohe e vai ra i roto ia raua.” Oia atoa, te na ô ra te Bibilia a Douay e “ua tuu maira te miti . . . e te pohe e te po auahi i to ratou feia pohe.” Ei faaohieraa, ua pohe te feia e vai ra i roto i te po auahi, te “taoto” ra, mai ta Iesu i parau.—Apokalupo 20:13.

Te tiaturi ra anei outou e e aratai mai te haapiiraa o te faautuaraa mure ore i roto i te po auahi i te taata i te Atua ra? Mea fifi roa. I roto i te feia parau-tia e te î i te here, e manaˈo riaria tera! Area te Bibilia ra, te haapii ra ïa e “e aroha te Atua” e mea faufau na ˈna te huru taehae, i nia atoa i te animala.—Ioane 1, 4:8; Maseli 12:10; Ieremia 7:31; Ioane 4:11.

Te tauiraa i te “hohoˈa” i teie tau

Te tamau noa râ te tauiraa i te huru o te Atua e o te Kerisetianoraa i teie mahana. Aita i maoro aˈenei to te hoê taata haapii haapaoraa faataaraa i te aroraa i roto i ta ˈna ekalesia Porotetani ei aroraa “i rotopu i te mana o te mau Papai e te tiaturiraa, e te mana o te mau manaˈo tauturu i te taata taa ê roa, e i rotopu i te taai-maite-raa o te ekalesia i te tiaraa Fatu o te Mesia, e te faaapîraa i te Kerisetianoraa e te faaauraa ˈtu i te huru feruriraa o te tau. O teie mau ïa te tumu parau: Na vai e haamau i te tabula na te ekalesia . . . Na te mau Papai Moˈa aore ra na te manaˈo rahi o te tau?”

Ma te peapea mau, te upootia noa râ “te manaˈo rahi o te tau.” E ere i te parau huna, ei hiˈoraa, e ua taui te mau ekalesia e rave rahi i to ratou manaˈo no nia i te mau tumu parau rau ia itehia e te haere ra ratou i mua e mea ǒaǒa ore to ratou feruriraa. I roto iho â râ i te mau tumu parau morare, ua riro mai te mau ekalesia ei mea faatia haere noa, mai tei faaitehia i roto i te tumu parau omuaraa. Te haapapu ra râ te Bibilia e e hara ino te taiata, te faaturi, e te peu mahu i te aro o te Atua e “e ore” te feia e rave i taua mau hara ra “e parahi i te basileia o te Atua.”—Korinetia 1, 6:9, 10; Mataio 5:27-32; Roma 1:26, 27.

I to te aposetolo Paulo papairaa i te mau parau i faahitihia i nia nei, ua î roa te ao Heleni e Roma e haaati ra ia ˈna i te mau huru ino atoa. E nehenehe Paulo e feruri mai teie ahiri i tia: ‘Parau mau, ua faariro te Atua ia Sodoma e ia Gomora ei rehu no te mau hara ino i te pae taatiraa, ua tupu râ hoi te reira a 2 000 matahiti aˈenei! Papu maitai, eita te reira e au i teie anotau maramarama.’ Aita râ oia i faatia i te mea hape; ua patoi oia i te taviriraa i te parau mau Bibilia.—Galatia 5:19-23.

A hiˈo i te “hohoˈa” tumu

Ua parau atu Iesu i te mau aratai haapaoraa ati Iuda no to ˈna tau e “mea faufaa ore” ta ratou haamoriraa ‘no te mea te haapii ra ratou i tei tuuhia mai e te taata anaˈe ra.’ (Mataio 15:9) Hoê â te ohipa ta teie mau ekalesiatiko i rave i nia i te Ture ta Iehova i horoa na roto ia Mose e te ohipa ta te pǔpǔ ekalesiatiko o te Amuiraa faaroo Kerisetiano i rave, e e rave noa râ, i nia i te haapiiraa a te Mesia—ua faahî ratou i te “peni” o te tutuu i nia i te parau mau a te Atua. Ua tamâ râ Iesu i te mau hape atoa no te maitai o te feia aau haavare ore. (Mareko 7:7-13) Ua faahiti Iesu i te parau mau, mea au anei na te taata aore ra aita. Ua riro noa iho â te Parau a te Atua ei mana na ˈna.—Ioane 17:17.

Auê ïa taa-ê-raa rahi o Iesu i te rahiraa o te feia e parau e e Kerisetiano ratou! Oia mau, ua tohu te Bibilia e: “E nounou te taata i te mau parau apî roa ˈˈe e e haaputu ratou . . . i te feia haapii ia au i to ratou iho hinaaro; e e fariu ê ratou i te tariˈa i te parau mau, a farii atu ai i te fabula.” (Timoteo 2, 4:3, 4, Bible de Jérusalem) E tuino teie  mau “fabula” ta tatou i hiˈopoa aˈenei te hoê tuhaa, i te pae varua, area te parau mau o te Parau a te Atua ra, e patu ïa, e e aratai i te ora mure ore. O te parau mau teie ta te mau Ite no Iehova e faaitoito ra ia outou ia hiˈopoa.—Ioane 4:24; 8:32; 17:3.

[Nota i raro i te api]

[Tumu parau tarenihia/Hohoˈa i te api 7]

Te tumu o te iˈoa Kerisetiano

Hoê ahuru aˈe matahiti i muri aˈe i te poheraa o Iesu, te parauhia ta ta ˈna mau pǐpǐ e melo o “Te Eˈa, MN.” (Ohipa 9:2; 19:9, 23; 22:4) No te aha? No te mea ua niuhia to ratou oraraa i nia i te faaroo ia Iesu Mesia, o oia hoi “te eˈa, e te parau mau, e te ora.” (Ioane 14:6) E, maa taime iti i muri aˈe i te matahiti 44 T.T., i Anetiohia i Suria, ua ‘mairihia to te mau pǐpǐ a Iesu iˈoa e Kerisetiano.’ (Ohipa 11:26) Ua matau-oioi-hia teie iˈoa, e tae noa ˈtu i roto i te feia toroa a te hau. (Ohipa 26:28) Aita te iˈoa apî i taui i te oraraa Kerisetiano, tei tamau noa i te faaauhia ˈtu i to te Mesia.—Petero 1, 2:21.

[Hohoˈa i te api 7]

Na roto i ta ratou taviniraa i mua i te taata, e aratai te mau Ite no Iehova i te taata i nia i te Parau a te Atua, te Bibilia

[Faaiteraa i te fatu o te hohoˈa i te api 4]

Te toru mai te pae aui mai: Te mau Nunaa Amui/Hohoˈa na Saw Lwin