Te faatia ra te feia poro i te Basileia

Te iteraa i te Atua î i te here

I TE 16raa o to ˈna matahiti, ua faaea aˈena te hoê taurearea no Beresilia, o Antônio te iˈoa, i te tiaturi i te oraraa. Ua aratai te mau manaˈo haafaufaa ore ia ˈna ia rave hua i te raau taero e ia inu hua i te ava. Ua opua pinepine oia e haapohe ia ˈna. Tei taua mau taime ra to ˈna haamanaˈoraa i teie parau a to ˈna metua vahine: “E aroha . . . te Atua.” (Ioane 1, 4:8) Teihea râ teie Atua î i te here?

I to ˈna tamataraa e faaea i te rave i te raau taero e te ava, ua imi Antônio i te tauturu a te mau perepitero o te paroita no to ˈna vahi. Noa ˈtu e ua itoito roa mai Antônio i roto i te Ekalesia Katolika, e rave rahi â uiraa ta ˈna. Ei hiˈoraa, ua haamaere teie mau parau a Iesu ia ˈna: “E ite ïa outou i te parau mau, e na te parau mau outou e faatiamâ.” (Ioane 8:32) Eaha te tiamâraa ta Iesu i tǎpǔ? Aita te ekalesia i nehenehe e horoa i te mau pahonoraa i ta ˈna mau uiraa e mauruuru ai oia. I te pae hopea, ua faaatea ê atu Antônio e ua hoˈi faahou i ta ˈna mau peu tahito. Inaha, ua ino roa ˈtu â ta ˈna mau peu matau maha ore.

I taua area taime ra, ua haamata te vahine a Antônio, o Maria te iˈoa, i te haapii i te Bibilia e te mau Ite no Iehova. Noa ˈtu e aita oia i patoi i ta ˈna haapiiraa, ua faaino Antônio i te mau Ite ei “haapaoraa Marite o te haapao i te mau faufaa a te faatereraa Marite faahepo.”

Ma te ore e haaparuparu, ua vaiiho haere Maria na roto i te fare i te mau Pare Tiairaa e te mau A ara mai na! e mau tumu parau to roto ta ˈna e manaˈo e e anaanatae o Antônio. I te mea e mea au na Antônio e taio, ua hiˈo rii oia i te mau vea ia haere ta ˈna vahine. A tahi roa oia, i roto i to ˈna oraraa, e ite ai i te mau pahonoraa i ta ˈna mau uiraa Bibilia. “Ua haamata atoa vau i te tapao i te here e te maitai ta ta ˈu vahine e te mau Ite e faaite maira ia ˈu,” ta ˈna ïa e haamanaˈo ra.

I ropu i te matahiti 1992, ua faaoti Antônio e e hinaaro atoa oia e haapii i te Bibilia e te mau Ite no Iehova. Teie râ, ua tamau noa oia i te rave hua i te raau taero e i te inu hua i te ava. I te hoê maororaa po a hoˈi mai ai oia i te fare e te hoê hoa na te hoê oire veve, ua tapeahia raua e te mutoi. I to te mutoi iteraa i te tahi cocaïne i nia ia Antônio, ua haamata ratou i te taparahi ia ˈna. Ua taora hoê mutoi ia ˈna i roto i te vari e ua tuu atu i te muaraa o te pupuhi i pihai iho i to ˈna mata. “A haapohe ia ˈna!” ta te tahi atu ïa mau mutoi i tuô.

A vai noa ˈi Antônio i roto i te vari, ua haamanaˈo aˈera oia i to ˈna oraraa. O to ˈna utuafare e o Iehova anaˈe te mau mea maitatai ta ˈna i nehenehe e haamanaˈo. Ua pure poto noa oia a ani ai i te tauturu a Iehova. No te hoê tumu ite-ore-hia, ua vaiiho te mau mutoi ia ˈna. Ua hoˈi oia i te fare, ma te tiaturi e ua paruru Iehova ia ˈna.

Ua haamata Antônio i te haapii i te Bibilia e te hoê ito apî. Ma te haere mǎrû noa, ua faatupu oia i te mau tauiraa no te faaoaoa ia Iehova. (Ephesia 4:22-24) Na roto i te faahoturaa i te hitahita ore, ua haamata oia i te faatitiaifaro i to ˈna fifi e te raau taero. Noa ˈtu râ, e hinaaro oia i te tauturu a te taote. A vai ai oia e piti avaˈe i roto i te hoê fare maˈi no te faaea i te inu e te raau taero, ua nehenehe oia e taio e rave rahi mau papai Bibilia, tae noa ˈtu i te buka Te ite e aratai i te ora mure ore. I muri iho, ua faaite Antônio i te mea ta ˈna i haapii i roto i taua mau buka ra i te tahi atu feia maˈi.

I muri aˈe i to Antônio faarueraa i te fare maˈi, ua tamau oia i ta ˈna haapiiraa Bibilia e te mau Ite. I teie mahana, te tavini nei Antônio, Maria, ta raua e piti tamahine, e te metua vahine o Antônio ia Iehova mai te hoê utuafare oaoa e te tahoê. Te na ô ra Antônio e: “I teie nei, te taa ra ia ˈu te auraa mau o teie parau ‘e aroha te Atua.’”

[Hohoˈa i te api 8]

Pororaa i Rio de Janeiro