Te faatia ra te feia poro i te Basileia

Pîpîraa i te mau huero o te parau mau i Tireni

I TE medebara i Tireni apatoerau, e nehenehe e mairi ehia rahiraa matahiti hou te ûa e topa mai ai. Ia tae mau mai râ te reira, e riro te repo ofafai e te mǎrô ei vauvau tahua î i te mau tiare û rau. E aratai mai teie mataitairaa faahiahia mau i te mau ratere na te fenua taatoa mai.

Teie râ, te tupu ra te hoê ohipa anaanatae roa ˈtu â i roto i te nunaa o Tireni. Te tahe ra te pape o te parau mau Bibilia i te mau poro fenua atoa, e e rave rahi taata aau rotahi teie e “uaa mai” nei ei pǐpǐ a Iesu Mesia. Hoê ravea i faaohipahia no te haaparare i teie pape o te parau mau, o te niuniu paraparau ïa. Te faaite ra te mau aamu i muri nei i te mau faahopearaa maitatai e noaa mai ra maoti teie huru pororaa.

• Ua titauhia te hoê poro evanelia taime taatoa o Karina te iˈoa e faaite nafea ia poro na roto i te niuniu paraparau i te hoê tairururaa haaati. Aita râ Karina i rave aˈenei i teie tuhaa o te ohipa pororaa. No te tauturu ia ˈna ia apiti i roto i te porotarama o te tairururaa, ua hiˈo faahou te hoê matahiapo e ta ˈna vahine atoa e o Karina i te tahi mau manaˈo nafea ia poro na roto i te niuniu paraparau. Ua faaitoito atoa raua ia ˈna e pure ia Iehova e aratai mai i roto i teie tuhaa. Ua na reira oia e i te pae hopea, ua opua aˈera e tamata i te taniuniu.

Ua maiti Karina i te hoê numera niuniu no te hoê oire rii tapiri. Ua pahono mai te hoê vahine haapao niuniu, e ua faataa ˈtu Karina eaha te tumu i taniuniu ai oia. Ua farii maitai te vahine haapao niuniu, e ua faanaho raua e paraparau faahou e toru mahana i muri aˈe. Maoti te taniuniu-faahou-raa, ua noaa mai te hoê haapiiraa Bibilia ma te faaohipa i te buka rairai ra Eaha ta te Atua e titau ra ia tatou? Mai reira mai, ua fanaˈo raua i te mau haapiiraa anaanatae e te oraora, e ua hapono Karina i te mau papai no te pahono i te mau uiraa a te vahine.

• Ua faaohipa o Bernarda i te taime maitai no te poro atu i te hoê taata tei hape i to ˈna pateraa mai i ta ˈna numera niuniu. Aita oia i riri atu, ua faaite atu râ oia e e Ite no Iehova oia e ua pûpû atu oia i te tauturu. Tupu atura te hoê tauaparauraa, e ua faaroo maira te taata ia faataa ˈtu oia nafea te Basileia o te Atua e fatata ˈi i te faaore i te parau-tia ore. Ua horoa mai te taata i ta ˈna numera niuniu, e ua rave o Bernarda i te mau taniuniu-faahou-raa. I te hoê o ta raua mau aparauraa, ua taio atu oia i te hoê tuhaa o te buka Te ite e aratai i te ora mure ore. Ua ui te taata nafea e roaa ˈi hoê ia ˈna, e ua hapono atu o Bernarda hoê e te hoê Bibilia atoa na ˈna. Ua ravehia te mau faanahoraa ia haere te hoê taeae no to ˈna vahi e hiˈo ia ˈna e te tamau noa râ oia i te “pîpî” i teie “raau” e tupu maitai ra.

Oia, i roto i te repo mǎrô i te pae varua o teie nei ao, te tiai ra te mau huero huna ia uaa mai ia raea ratou e te pape ora o te parau mau. Te tamau ra te mau tausani feia poihâ i te ‘tupu mai’ e te “uaa mai” ei tavini haapao maitai a te Atua ra o Iehova.—Isaia 44:3, 4.