Te hoê maimiraa maoro tei hoona

“IEHOVA? O vai o Iehova?” Ua ite o Silvia, e vau matahiti, i te iˈoa i roto i te hoê Bibilia Aramenia, te hoê taoˈa maitai a te hoê utuafare i faaitehia ˈtu e te tahi atu tamahine iti. Ua uiui haere oia i te taata, aita râ hoê aˈe i Yerevan, i Aramenia, i reira oia i noho ai, i nehenehe e faaite ia ˈna o vai o Iehova—aita to ˈna mau metua, aita to ˈna mau orometua haapii, aita atoa te mau ekalesiatiko o te ekalesia o taua vahi ra.

Ua paari mai o Silvia, ua oti ta ˈna haapiiraa, e ua noaa ta ˈna ohipa, aita râ oia i ite atura o vai o Iehova. Ei taata paari apî, ua titauhia oia e horo ê mai Aramenia ˈtu, e ia maoro rii, ua tae oia i Polonia, i roto i te hoê piha iti e te tahi atu feia tei horo ê. Ua farii tamau hoê o to ˈna mau hoa i roto i te piha i te tahi mau taata. “O vai ma ta oe mau manihini?” ta Silvia ïa i ui atu. “E mau Ite no Iehova ratou, e haere mai ratou e haapii ia ˈu i te Bibilia,” o tei pahonohia mai ïa.

Ua reˈareˈa te aau o Silvia i to ˈna faarooraa i te iˈoa o Iehova. I te pae hopea, ua haamata oia i te haapii o vai o Iehova e e Atua î i te here mau oia. Aita râ i maoro, te titauhia ra ia faarue oia ia Polonia. Ua imi oia i te haapuraa i Danemata, i te tahi pae mai o te Miti Baltique. Tau tauihaa rii noa ta ˈna i taˈitaˈi, i roto râ i te reira, te vai ra te mau papai Bibilia i neneihia e te mau Ite no Iehova. I nia i te api hopea o te hoê papai, ua itea mai ia Silvia te hoê tabula o te mau vahi nohoraa o te mau amaa a te Taiete Watch Tower. O te reira hoê o ta ˈna mau taoˈa faufaa roa ˈˈe—ta ˈna taairaa ora e o Iehova!

I Danemata, ua hopoihia Silvia i roto i te hoê puhapa feia i horo ê, e ua haamata oioi oia i te imi i te mau Ite no Iehova. Maoti ta ˈna tabula vahi nohoraa, ua ite oia e tei te oire o Holbæk te amaa a te Taiete Watch Tower no Danemata. Teihea râ hoi te reira? Ua hopoihia Silvia i roto i te tahi atu puhapa na nia i te pereoo auahi, e ua na roto atu ratou ia Holbæk i te tere! Ua ouˈauˈa faahou atura to ˈna aau i te oaoa.

Aita i maoro i te hoê mahana mea maitai te mahana, ua rave Silvia i te pereoo auahi no te hoˈi i Holbæk e ua haere avae oia i te amaa ra. Te haamanaˈo ra oia e: “I to ˈu tomoraa ˈtu i roto i te aua, ua parahi au i raro i nia i te hoê parahiraa roa e ua na ô aˈera vau ia ˈu iho e, ‘E paradaiso teie!’” Ua fariihia oia ma te mahanahana i te amaa e ua nehenehe atura oia e fanaˈo i ta ˈna iho haapiiraa Bibilia.

Ua tupu râ tau tauiuiraa puhapa. I tera e tera puhapa feia i horo ê, ua tia ia Silvia ia imi i te mau Ite no Iehova e ia haamata apî noa i ta ˈna haapiiraa Bibilia. Noa ˈtu râ, i muri aˈe e piti matahiti, ua navai to ˈna ite no te pûpû ia ˈna iho na Iehova. Ua bapetizohia oia e aita i maoro i muri aˈe, ua rave oia i te taviniraa taime taatoa. I te matahiti 1998, ua horoa te feia mana toroa no Danemata i te haapuraa no ˈna.

E 26 matahiti to Silvia i teie nei e te tavini ra oia i te vahi tei haamanaˈo ia ˈna te paradaiso, te amaa a te mau Ite no Iehova i Danemata. “Eaha ta ˈu e nehenehe e parau?” ta ˈna ïa e tapao ra i teie nei. “Ua imi au ia Iehova mai to ˈu tamahine-rii-raa mai â. I teie nei, ua itea mai oia ia ˈu. Ua moemoeâ vau e horoa i to ˈu oraraa i roto i ta ˈna taviniraa, e inaha tei ǒ nei au i te Betela. Te pure nei au e ia riro teie vahi ei nohoraa no ˈu no te mau matahiti e rave rahi i mua nei!”