No te feia tatou i noaa te faaroo

Pororaa i te Basileia i nia i te Altiplano i Peru

I ROTOPU i te anairaa hitia o te râ e te anairaa tooa o te râ o te mau mouˈa Andes—i te vahi e tuati ai Bolivia e Peru—te vai ra te Altiplano. Te auraa o to ˈna iˈoa, o “vahi papu teitei.” Tei Bolivia te rahiraa o te reira.

Hoê hanere kilometera te aano o te Altiplano e e hau atu i te 1 000 kilometera i te roa, e e 3 700 metera i te teitei au noa i nia ˈˈe i te miti. Na nia i te hoê manureva e tere atu i reira mai te oire pu atu o Peru i te pae miti, oia o Lima, e na nia ˈtu outou i te El Misti, te hoê mouˈa auahi tapoˈihia i te hiona, e puta ˈtu te mau ata e e raea i te faito e 5 822 metera. E hau atu i te 6 000 metera te teitei o te mau tupuai tapoˈihia i te hiona o Nevado Ampato e Nevado Coropuna. E fa taue mai te hoê vahi papu teitei aano—te Altiplano no Peru apatoa.

O Puno te oire pu o te Altiplano no Peru, tei te hopea apatoerau tooa o te râ o te roto Titicaca, te roto rahi roa ˈˈe o te ao e nehenehe e tere na nia. No te mea tei nia taua vahi ra hau atu i te 3 000 metera i te teitei, e titauhia maa taime iti e matau ai te feia ratere i te mataˈi varavara. O te mau Indien Quechua e Aymara te faaea i pihai iho i te roto Titicaca. Ma te ahu i te mau ahu uteute, matie aore ra ninamu pura maitai, e itehia ratou e rave ra i te ohipa i roto i ta ratou mau chacras, aore ra fare faaapu iti. Noa ˈtu e o te reo Paniora te reo rahi i Peru, e paraparau-atoa-hia te Quechua e te Aymara i nia i te Altiplano.

Aratairaa i te ohipa pororaa

Aita i maoro aˈenei to te feia e rave rahi, te haehaa e te rave puai i te ohipa o te parau i te reo Quechua e Aymara, iteraa i te parau mau Bibilia. Te tumu rahi o te reira, o te haamaitairaa rahi ïa a Iehova i te mau tutavaraa itoito a te feia poro taime taatoa a te Basileia o te tavini ei pionie taa ê.

Ei hiˈoraa, ua tonohia na pionie taa ê o José e o Silvia i te oire o Putina, fatata e 50 kilometera i te atea i te roto Titicaca. I roto e piti avaˈe, te faatere aˈera o Silvia 16 haapiiraa Bibilia i te fare, e o José 14 ïa. I roto noa e ono avaˈe, ua maraa te numera o te feia poro o te amuiraa mai te 23 i nia i te 41. I roto i taua taime ra, ua maraa te feia i tae mai i te mau putuputuraa mai te 48 i nia i te faito rahi roa ˈˈe 132.

“I to matou haamataraa i te mau putuputuraa a te amuiraa i roto i taua mau oire rii atea ra,” o ta José ïa e parau ra, “ua manaˈo matou e mea ohie aˈe e haamata na roto i te Putuputuraa no te taatoaraa e te Haapiiraa buka a te amuiraa. Mea ohie aˈe ïa no te feia no anaanatae noa maira e haamata i te haere mai i te mau putuputuraa.”

Na na tuahine e piti—e pionie hoê—i afai na mua mai i te parau apî maitai i te oire rii atea o Muñani, fatata e 20 kilometera i te atea ia Putina. I reira, ua haamata raua i te hoê haapiiraa Bibilia e te hoê matapo o Lucio te iˈoa. * Ua titau oia i to ˈna teina o Miguel, e mitionare Katolika raita e raatira oire no te hoê vahi tapiri. I to te hoê hoa uiraa ia Miguel no te aha oia i haere ai i Muñani i te mau hebedoma atoa, ua parau oia e no te haapii no nia ia Iehova e ta ˈna Parau. Ua hiti mai nei teie uiraa: “No te aha tatou e ore ai e haapii i te Bibilia i ǒ nei?” No te anaanatae o te mau taata no te oire o Miguel, aita i maoro, ua faanaho aˈera te mau Ite i te mau putuputuraa i ǒ.

Ua haamata o Miguel i te faaite i ta ˈna e haapii ra ia vetahi ê. Eaha râ ïa no nia i to ˈna tiaraa mitionare Katolika raita e tavana tepute? I te hoê apooraa i te fare oire, ua faaara oia e te faarue ra oia i to ˈna tiaraa mitionare Katolika. E nominohia anei te tahi atu taata? Ua parau aˈera te hoê taata o te apooraa e: “No te aha tatou e hinaaro ai i te tahi atu mitionare, inaha te haapii nei tatou i te parau mau?” Te parau ra iho  â ïa oia no te mau mea i haapiihia e te mau Ite no Iehova. Ua parau atoa te tahi atu taata e: “Aita matou e hinaaro ra e o oe anaˈe te faarue. No te aha e ore ai e o tatou paatoa te faarue?” Ua tuô paatoa aˈera te apooraa ma te hoê e: “E faarue anaˈe tatou paatoa!”

Ua tauaparauhia no nia i te mau idolo e te mau satauro i roto i te hoê apooraa oire i muri iti noa ˈˈe. Ua titau te hoê taata ia taio te feia atoa i tae mai i te Deuteronomi 7:25, e na ô ra e: “E tahu outou i to ratou mau atua taraihia ra i te auahi: eiaha oe e nounou i te ario e te auro i nia iho ia ratou, eiaha oe e rave i te reira, o te fifi hoi oe; e mea faufau hoi te reira i to Atua ra ia Iehova.”

Ua ani atura te taata ra e ia tuu te feia e farii ia tutuihia te mau idolo atoa i te auahi i te rima i nia. Ua maraa oioi maira te mau rima atoa i nia. (Ohipa 19:19, 20) I teie nei, e 23 o na 25 utuafare o te oire o te haapii ra i te Parau a te Atua. E piti taata teie e tavini nei ei feia poro bapetizo-ore-hia, e hoê ahuru feia apitipitihia o te opua ra e faatiamâ na roto i te faaipoiporaa ia tia ratou ma te mâ i mua ia Iehova.—Tito 3:1; Hebera 13:4.

Haapiiraa maoti te mau ripene

I te mea e aita to te Altiplano i haere rahi i te haapiiraa, e tauturu rahi ïa te mau ripene taˈi e video na roto i te mau reo no taua vahi ra—tae noa ˈtu no te faatere i te mau haapiiraa Bibilia. Maoti te hoê ripene taˈi, e faatere te hoê pionie taa ê o Dora te iˈoa i te mau haapiiraa i nia i te buka rairai ra Eaha ta te Atua e titau ra ia tatou? E faataˈi oia hoê noa paratarapha i te hoê haereraa, e ui atu ai i te taata haapii Bibilia i te mau uiraa no nia i te tumu parau no faaroo-noa-hia ˈtura.

E haapuroro te hoê pu radio no taua vahi ra i te mau tuhaa o te buka rairai ra Titau na roto i te reo Quechua. E na reira atoa no te mau tuhaa o te vea ra A ara mai na! na roto i te reo Paniora. No reira, e rave rahi o te ite ra i te poroi a te Basileia e o te hinaaro e haapii hau atu â ia haere atu te mau Ite no Iehova i to ratou ra fare.

Mea atea te Altiplano no te ao eiaha râ no te mata o te Atua. Auaa to Iehova aroha i te huitaata, e rave rahi taata e faaea ra i nia roa i te Altiplano o te mau Andes o te riro mai ra ei melo o te nahoa e faahanahana ra i to ˈna fare teitei o te haamoriraa mau.—Hagai 2:7.

[Nota i raro i te api]