Te haamanaˈo ra anei outou?

Ua au anei outou i te taioraa i te mau numera hopea o Te Pare Tiairaa? A hiˈo mai te peu e e nehenehe ta outou e pahono i te mau uiraa i muri nei:

• Eaha te mea faufaa ia faaafaro tatou i te hoê peapea e te tahi taata?

E tia na mua ia tatou ia farii e e hape to tatou paatoa mau manaˈo e mau haerea. I muri iho, e tia ia tatou ia hiˈo maitai e e ere anei o tatou te tumu o te fifi eiaha râ te tahi atu taata.—15/8, api 23.

• Afea e tupu ai “te tau faatia-faahou-raa o te mau mea atoa nei” i faaitehia i roto i te Ohipa 3:21, MN?

E tae mai te faatia-faahou-raa na roto e piti tuhaa. A tahi, te vai ra te hoê faatia-faahou-raa o te hoê paradaiso pae varua o tei tupu mai te matahiti 1919 mai. E tupu te tahi atu â faatia-faahou-raa ia faarirohia to tatou fenua ei paradaiso pae tino.—1/9, mau api 17, 18.

• Eaha te auraa e aita to te ro e aratai, mai tei papaihia i roto i te Maseli 6:6-8, e a horoa ˈi râ i te hoê hiˈoraa maitai no tatou?

I roto i te hoê ofaaraa ro, te vai ra te hoê arii ovahine, e arii noa râ oia no te ofaa i te huero e ei metua vahine o te ofaaraa. Mea ohipa roa te mau ro, ia na reira atoa ïa tatou i te rave puai i ta tatou ohipa, noa ˈtu e aita tatou e hiˈopoahia ra.—15/9, api 26.

• Ua tano anei te tohu a Hulada, tei papaihia i roto i Te mau arii 2, 22:20, e e pohe o Iosia “ma te hau” noa ˈtu e ua pepe pohe oia i roto i te aroraa?

Oia, ua pohe oia ma te hau oia hoi hou te ati o te mau matahiti 609-607 H.T.T. i to te mau Babulonia haaatiraa e haamouraa ia Ierusalema.—15/9, api 30.

• No te aha e haapopouraa na Solomona ia faahohoˈa oia i te hoê vahine faaipoipo mai “te hoê aili hinaarohia e te hoê puaaniho oviri nehenehe”? (Maseli 5:18, 19, MN)

E natura mǎrû e te huru ieie to te puaaniho ufa, aore ra te puaaniho oviri. Teie râ, e nehenehe oia e ora e e fanau i te mau vahi ofafai, taea ore, mea varavara te maa.—1/10, mau api 30, 31.

• O vai ma o Henry Grew e o George Storrs?

E mau taata teie o tei ora i te mau matahiti 1800 ra e o tei riro ei mau taata haapii Bibilia anaanatae. Ua haapii o Grew e e ere na te Bibilia te Toru Tahi, oia atoa te mau haapiiraa o te pohe-ore-raa o te nephe e te po auahi. Ua haroaroa o Storrs e e fanaˈo te tahi mau taata i te ora mure ore i nia i te fenua. O raua te mau taata i na mua ˈtu ia Charles Taze Russell, o tei haamata i te nenei i teie vea i te matahiti 1879.—15/10, mau api 26-30.

• Eaha te manaˈo o te mau Ite no Iehova i te mau ravea rapaauraa o te rave i to ratou iho toto?

Ma te niu i ta ratou mau tiaturiraa i nia i te Bibilia, eita ratou e haapue i to ratou iho toto e i muri aˈe, e farii ia pâmuhia te reira. Na te Kerisetiano taitahi e faaoti no ˈna iho nafea to ˈna toto ia ravehia i roto i te taime tâpûraa, hiˈopoaraa a te taote, aore ra rapaauraa au noa. Ia hiˈo ïa oia eaha ta te Bibilia e parau ra no nia i te toto e ia haamanaˈo oia e ua pûpû taatoa oia ia ˈna na te Atua.—15/10, mau api 30, 31.

• Eaha ta te mau Ite no Iehova e ati aˈe te ao nei e hinaaro rahi ra ia au i ta te hoê hiˈopoaraa i ravehia i te omuaraa o teie matahiti i faaite?

Te hinaarohia ra hau atu i te 11 000 Piha a te Basileia i te mau fenua e haere ra i mua aita i navai ta ratou moni. Te haapaohia ra te mau ô a te mau Kerisetiano i roto e rave rahi fenua no te tauturu i te paturaa i te mau piha putuputuraa e tano.—1/11, api 30.

• Eaha te tahi mau taˈo Heleni tei faaohipahia i roto i te Bibilia tei taaihia i te haamoriraa?

O lei·tour·giʹa te hoê o tei hurihia ei “taviniraa i mua i te taata.” O la·treiʹa te tahi atu taˈo tei hurihia ei “taviniraa moˈa.” (Hebera 10:11, MN; Luka 2:36, 37, MN)—15/11, mau api 11, 12.

• Eaha te haapiiraa faufaa ta tatou e nehenehe e huti mai na roto i te aamu Bibilia o Adamu e o Eva?

Mea maamaa roa ia titau i te faataa ê mai i te Atua ra o Iehova.—15/11, mau api 24-27.

• Eaha te mau irava e haapapu ra e e faaitoito te Atua i ta ˈna mau tavini?

Ua horoa o Davida, Habakuka, e te aposetolo Paulo i te mau haapapuraa atoa e ua faaitoito aore ra ua haapuai te Atua ra o Iehova ia ratou. (Salamo 60:12; Habakuka 3:19; Philipi 4:13) No reira, e nehenehe tatou e tiaturi e e ineine e e noaa i te Atua i te faaitoito ia tatou.—1/12, mau api 10, 11.