Te mau peu i te Noela—E mau peu Kerisetiano anei?

UA TAE mai te anotau o te Noela. Eaha ïa te auraa no outou, to outou utuafare e to outou mau hoa? E taime no te pae varua anei, aore ra e anotau arearearaa e oaoaraa noa anei? E taime no te feruri i te fanauraa o Iesu Mesia anei aore ra no te ore e haapeapea i te mau ture Kerisetiano?

A hiˈopoa ˈi outou i teie mau uiraa, a haamanaˈo e e rau te mau peu tutuu i te Noela, tei te vahi ïa e noho ai outou. Ei hiˈoraa, i Mehiko e i te tahi atu mau fenua Marite Latino, mea ê atoa te iˈoa. Teie râ, e au te iˈoa ra La Navidad, aore ra La Nativité, mai te parauhia i taua mau fenua Marite Latino ra, i te fanauraa o te Mesia. A rave na maa taime iti no te hiˈopoa i te tahi mau peu i Mehiko. E tauturu paha te reira ia hamani outou i to outou iho manaˈo no nia i teie anotau oroa.

Te Posadas, “na feia paari e toru,” e te Nacimiento

E haamata te mau oroa i te 16 no Titema e te posadas. Te parau ra te buka Mexico’s Feasts of Life (Te mau oroa o te oraraa i Mehiko) e: “O te anotau tera o te posadas, e iva mahana popou rahi o te aratai atu i te Po Noela, o te haamanaˈo i to Iosepha e o Maria oereraa raua anaˈe i roto i te oire o Betelehema e te taime i itea mai ai ia raua i te pae hopea te hamani maitai e te haapuraa. E amui tahi te mau utuafare e te mau hoa i te po no te hauti i te mau mahana na mua ˈtu i te fanauraa o te Mesia.”

E peu matauhia e te hoê pǔpǔ taata e taˈitaˈi i te mau hohoˈa o Maria e o Iosepha i te hoê fare e ani i te haapuraa aore ra posadas na roto i te himene. E pahono mai te mau taata i roto i te fare na roto i te himene e ia farii-roa-hia ˈtu te feia ratere e tomo atu. E haamata ˈtu ai te hoê arearearaa i reira te tahi pae—ma te taamuhia te mata e ma te raau i roto i te rima—e tamata ˈi te tahi i muri aˈe i te tahi i te tuparari i te piñata, te hoê farii repo rahi faaunaunahia e tarere ra i nia i te hoê taura. Ua parari anaˈe, e haaputuputu te feia arearea i te mea e vai ra i roto (te monamona, te hotu, e te reira mau mea). I muri mai ïa e tupu ai te amuamuraa e te inuraa, te upaupa e te ori. I teie nei tau, e pinepine te himeneraa e te mau hohoˈa i te haapaehia—e toe noa mai te arearearaa. E faatupuhia e vau posadas mai te 16 e tae atu i te 23 no Titema. I te 24, e faatupuhia te Nochebuena (te po Noela), e e faaitoito te mau utuafare i te haaputuputu no te hoê tamaaraa ahiahi taa ê.

Eita e maoro, e tae mai te Oroa Matahiti Apî o te faatupuhia ma te mau arearearaa maniania roa. I te ahiahi 5 no Tenuare, te tiaturihia ra e e afai mai na Tres Reyes Magos (“toru feia paari”) i te mau taoˈa hauti na te mau tamarii. Te taime rahi roa ˈˈe, o te hoê ïa arearearaa i te 6 no Tenuare, ia operehia te hoê rosca de Reyes (faraoa monamona menemene mai te hoê hei). A amuhia ˈi teie faraoa monamona, e itea mai i te hoê taata te hoê pêpe haavare iti i roto i ta ˈna tâpû o te faahohoˈa i te aiû ra o Iesu. Mea faahepohia te reira taata e faanaho i te hoê arearearaa hopea i ǒ ˈna i te 2 no Febuare. (I te tahi mau vahi, e toru pêpe haavare iti o te faahohoˈa i “na feia paari e toru.”) Mai ta outou e ite ra, e haere noa te arearearaa i taaihia i te Noela.

I taua area taime ra, e ite-rahi-hia te nacimiento (faahohoˈaraa o te Nativité). Eaha to roto? Oia  hoi, i te mau vahi taata e i roto atoa i te mau fare pure e te mau fare, e faanahohia te mau faahohoˈaraa e te mau hohoˈa (rarahi aore ra nainai) hamanihia i te repo tunu, te raau, aore ra te araea. E faahohoˈa te reira ia Iosepha e ia Maria e tuturi ra i mua i te hoê phatene e aiû apî to roto. E pinepine, te vai ra te mau tiai mamoe e Los Reyes Magos (“te feia paari”). Tei roto te reira i te hoê fare animala, e i te tahi mau taime, e faahopehia te faahohoˈaraa e te tahi mau animala. O te aiû fanau apî râ te hohoˈa faahiahia roa ˈˈe, e parauhia oia na roto i te reo Paniora el Niño Dios (te Tamaiti Atua). E tuuhia teie hohoˈa rahi i te Po Noela.

Te hoê hiˈopoa-maite-raa i te mau peu tutuu o te Nativité

No nia i te oroa Noela mai tei matauhia na te ao atoa, te na ô ra The Encyclopedia Americana e: “E ere te rahiraa o te mau peu i taaihia i teie nei i te Noela i te mau peu tumu o te Noela, e mau peu râ no mua ˈtu i te Kerisetianoraa e e ere i te Kerisetiano, tei fariihia e te ekalesia Kerisetiano. O te mau Saturnales, te hoê oroa Roma faatupuhia i ropu o te avaˈe Titema, te hohoˈa no te mau peu arearearaa e rave rahi o te Noela. Ei hiˈoraa, no roto mai i teie oroa te tamaaraa haapeu rahi, te opereraa ô, e te tutuiraa i te mau mori hinu.”

I Marite Latino, e haapaohia teie mau peu tumu o te Nativité, e te tahi atu â. ‘Nohea mai râ ïa te reira,’ o ta outou paha ïa e ui maere. Oia mau, te farii ra te rahiraa o te hinaaro e pee i te Bibilia e aita te tahi mau peu i ê atu i te mau peu faaroo a te mau Aztèque. Teie te manaˈo o te hoê vea no te oire o Mexico, El Universal: “Ua faaohipa te tahi mau monahi no te mau pǔpǔ rau i te mea e e tuea te mau oroa o te tarena Indien e te tarena o te lituria Katolika, no te paturu i ta ratou ohipa pororaa evanelia e mitionare. Ua mono ratou i te mau oroa haamanaˈoraa i te mau atua no te tau hou te mau Paniora e te mau oroa na te mau atua Kerisetiano, ua faaô mai ratou i te mau oroa e te mau ohipa no Europa mai e ua faaohipa atoa i te mau oroa Indien, e ua horoa mai te reira i te hoê anoiraa taˈere no reira mai te mau parau no Mehiko noa iho.”

 Te faataa ra The Encyclopedia Americana e: “Ua riro oioi te mau hautiraa i te Nativité ei tuhaa o te oroa Noela . . . Te parauhia ra e ua haamata te faahohoˈaraa i te crèche [te faahohoˈaraa o te phatene] na roto ia Francis Peata.” I ravehia na teie mau hautiraa i te fanauraa o te Mesia i roto i te mau fare pure i te omuaraa o te aihuaraauraa ia Mehiko. Ua faanahohia te reira e te mau monahi Franciscain no te haapii i te mau Indien no nia i te Nativité. I muri aˈe, ua matau-aˈe-hia te mau posadas. Noa ˈtu eaha te tumu o te reira i te omuaraa, te faaite ra te huru e faatupuhia ˈi te mau posadas i teie nei eaha mau na to te reira natura. Mai te peu e tei Mehiko outou i taua anotau ra, e ite atu outou aore ra e taa ia outou ta te hoê papai vea na El Universal i haamataratara i roto i ta ˈna parau: “Ua riro te mau posadas, te hoê ravea no te haamanaˈo i te hahaereraa o te mau metua o Iesu e imi i te haapuraa i reira te Tamarii Atua e fanauhia ˈi, i teie mahana, ei mau mahana inuraa ava, faahuaraa, amu-hua-raa i te maa, faateiteiraa, e ohipa ino o te rahi noa ˈtura.”

Ua fa mai te manaˈo o te nacimiento i te tau aihuaraauraa mai roto mai i te mau faahohoˈaraa oraora matamua i roto i te mau fare pure. Noa ˈtu e te manaˈo ra te vetahi e mea anaanatae roa te reira, e faahohoˈa anei te reira ma te tano i ta te Bibilia e parau ra? E uiraa faufaa roa teie? I to tei parauhia na feia paari e toru—e feia hiˈohiˈo mau â hoi ratou—haereraa e hiˈo ia Iesu, aita oia e to ˈna utuafare e faaea faahou ra i roto i te hoê fare animala. Ua mairi te tau, e te noho ra te utuafare i roto i te hoê fare. E anaanatae outou i te iteraa i teie parau rii i roto i te aamu faauruahia o te Mataio 2:1, 11. E nehenehe atoa outou e tapao e aita te Bibilia e parau ra ehia rahiraa feia hiˈohiˈo e vai ra. *

I Marite Latino, o na feia paari e toru te mono i te Papa Noela. I teie nei â, mai i te tahi atu mau fenua, e rave rahi mau metua o te huna i te mau taoˈa hauti i roto i te fare. E, i te poipoi 6 no Tenuare, e imi te mau tamarii i te reira, mai te mea ra e na na feia paari e toru i hopoi mai. E taime teie e noaa rahi ai te moni i te feia hoo taoˈa hauti, e ua moni-roa-hia te tahi pae maoti te hoê mea ta te feia mafatu haavare ore e rave rahi i ite e e aai noa. Te ere ra te aamu o na feia paari e toru i te tiaturi o te taata huru rahi, e tae noa ˈtu o te mau tamarii rii. Noa ˈtu e aita te vetahi e au ra i te mea e te ere ra teie aamu i te tahi feia tiaturi, eaha ta te taata e nehenehe e tiai i te hoê aai faaoraora-noa-hia no te tutuu aore ra no te maitai o te tapihooraa?

Aita te Noela, aore ra te Nativité, i faatupuhia na e te mau Kerisetiano matamua. Te na ô ra te hoê buka ite rahi no nia i te reira e: “Aita te oroa e haapaohia ra e te ekalesia Kerisetiano i te mau senekele matamua, i te mea e te peu Kerisetiano matauhia, te haamanaˈoraa ïa i te pohe o te feia faahiahia eiaha râ i to ratou fanauraa.” E taai te Bibilia i te haapaoraa i te mau mahana fanauraa i te mau etene, eiaha râ i te feia haamori mau i te Atua.—Mataio 14:6-10.

E ere iho â ïa te auraa e e ere i te mea maitai ia haapii e ia haamanaˈo i tei tupu mau i te fanauraa o te Tamaiti a te Atua. Te horoa maira te aamu Bibilia o te mau tupuraa i te ite hohonu e te mau haapiiraa faufaa na te feia atoa e hinaaro e rave i te hinaaro o te Atua.

 Fanauraa o Iesu ia au i te Bibilia

E ite mai outou i te haamaramaramaraa papu no nia i te fanauraa o Iesu i roto i te mau Evanelia a Mataio e a Luka. Te faaite ra te reira e ua haere mai te melahi Gaberiela e hiˈo i te hoê vahine apî faaipoipo ore o Maria te iˈoa i te oire o Nazareta i Galilea. Eaha te poroi ta ˈna i hopoi mai? “E inaha, e tô oe, e fanau ta oe tamaiti, e na oe e mairi i te iˈoa ia Iesu. E rahi oia, e e parauhia i te Tamaiti na te Teitei: e na te Fatu ra na te Atua e horoa mai i te terono o to ˈna ra metua o Davida no ˈna: ei ia ˈna te hau i te fetii o Iakoba e a muri noa ˈtu; e e ore roa to ˈna basileia e mure.”—Luka 1:31-33.

Ua maere roa Maria i teie poroi. I te mea e aita oia i faaipoipohia, ua parau oia e: “Eaha ïa e tia ˈi aore hoi au i ite i te taata?” Ua pahono maira te melahi e: “E pou mai te [varua moˈa] i nia iho ia oe, e na te mana o te Teitei e tamǎrû i nia iho ia oe, e parauhia ˈi hoi tena na tamaiti moˈa, o te Tamaiti na te Atua.” Ua parau atura Maria a taa ˈi ia ˈna e o te hinaaro o te Atua tera: “Inaha ei tavini au no [Iehova], ia na reirahia mai au mai ta oe i parau na.”—Luka 1:34-38; MN.

Ua faaite te hoê melahi ia Iosepha no nia i te fanauraa semeio eiaha oia ia faataa ia Maria, te opua ra hoi oia e na reira i to ˈna faarooraa e ua hapu oia. Ua tae atura to ˈna aau e amo i te hopoia e haapao i te Tamaiti a te Atua.—Mataio 1:18-25.

Ua faahepo ihora te hoê ture a Kaisara Auguso ia Iosepha e ia Maria e haere mai Nazareta i Galilea ˈtu e i Betelehema i Iudea, te oire o to raua tupuna, ia tapaohia to raua iˈoa. “E i to raua parahiraa i reira, hope roa aˈera o ˈna pue mahana e fanau ai oia ra. Fanau ihora oia i ta ˈna tamaiti matahiapo, vehî ihora i te ahu, tuu atura i roto i te Phatene, no te mea aore atura raua i ô i roto i te fare tipaeraa.”—Luka 2:1-7.

Te faataa ra te Luka 2:8-14 [MN] e: “E tiai mamoe tei taua fenua ra e tia i roto i te mau aua, i te tiairaa i ta ratou mau nana i te mau araraa i te po. E inaha, ua tia maira te hoê melahi a [Iehova] i pihai iho ia ratou, ua ati ihora ratou i te maramarama i te anaana o [Iehova], e rahi roa ˈˈera to ratou mǎtaˈu. Ua parau maira râ te melahi ia ratou, Eiaha e mǎtaˈu inaha hoi e parau maitai ta ˈu e hopoi mai ia outou nei, o te riro ïa ei oaoaraa no te taata atoa. I nauanei hoi i fanau ai te Ora no outou i te oire o Davida, oia hoi te Mesia ra o te Fatu. Teie hoi te tapao e ite ai outou ia ˈna: e ite outou i taua tamaiti ra i te vai-noa-raa i roto i ta te puaa vairaa maa, ua vehîhia i te ahu. E i reira ra atihia maira taua melahi ra e te hoê tiria rahi no te raˈi i te haamaitairaa i te Atua, i te na ôraa e, Ia haamaitaihia te Atua i nia i te raˈi teitei, ei hau to [te feia manaˈo tae i] teie nei ao.”

Te feia hiˈohiˈo

Te parau ra te aamu a Mataio e ua haere mai te feia hiˈohiˈo no Hitia o te râ mai i Ierusalema e imi i te vahi i fanauhia ˈi te Arii o te ati Iuda. Te anaanatae roa ra te arii Heroda i te reira—eiaha râ ma te mau opuaraa maitatai. “Ua tono atura ia ratou i Bete-lehema, na ô atura, A haere a maimi maite i taua tamaiti iti ra; e ia itea ˈtu ia outou, e hoˈi mai e faaite ia ˈu, ia haere atoa vau e tahopu ia ˈna.” Ua itea mai i te feia hiˈohiˈo te tamarii iti e “ua iriti aˈera i ta ratou taoˈa, hopoi atura i te ô na ˈna, i te auro, e te tapau libano e te mura.” Aita râ ratou i hoˈi ia Heroda ra. “I aˈo faaheitaotohia mai ratou e te Atua eiaha e hoˈi ia Heroda ra.” Ua faaohipa te Atua i te hoê melahi no te faaara ia Iosepha no nia i te mau opuaraa a Heroda. Ua maue ihora Iosepha e o Maria i Aiphiti e to raua tamaiti. I muri aˈe, ei tutavaraa i te faaore i te Arii apî, ua faaue te arii ino roa o Heroda ia taparahi-pohe-hia te mau tamarii tamaroa i te tuhaa fenua o Betelehema. Teihea mau tamarii tamaroa? To raro mai i te piti matahiti.—Mataio 2:1-16.

Eaha ta tatou e haapii mai na roto i teie aamu?

Aita te feia hiˈohiˈo ratere—noa ˈtu ehia rahiraa ratou—i haamori na i te Atua mau. Te parau ra te huriraa Bibilia La Nueva Biblia Latinoamérica (Neneiraa 1989) i roto i te hoê nota i raro i te api e: “E ere te Feia hiˈohiˈo i te mau arii, e feia taura râ e e mau tahuˈa a te hoê haapaoraa etene.” Ua haere noa mai ratou ia au i to ratou ite i te mau fetia ta ratou e haamori ra. Ahiri te Atua i hinaaro e aratai ia ratou i te tamarii apî ra,  e hopoi-tia-hia ˈtu ïa ratou i te vahi mau ma te ore e titau ia haere na mua i Ierusalema e i te aorai o Heroda ra. I muri aˈe, ua ohipa roa mai te Atua no te faahuru ê i to ratou tere ei parururaa i te tamarii.

I te tau Noela, e pinepine teie faatiaraa i te faarirohia ei aai e ei tupuraa haaputapû aau o te haapoˈi i te mea faufaa roa ˈˈe: oia hoi ua fanauhia teie aiû no te riro mai ei Arii hanahana, mai tei faaarahia ˈtu ia Maria e te mau tiai mamoe. Eita, e ere faahou o Iesu Mesia i te hoê aiû, e ere atoa i te hoê tamarii. O oia te Arii e faatere nei i te Basileia o te Atua, e fatata roa i te faaore i te feia faatere atoa e patoi nei i te hinaaro o te Atua, e e faatitiaifaro oia i te mau fifi atoa o te huitaata. O te Basileia tera ta tatou e ani nei ia tae mai i roto i te Pure a te Fatu.—Daniela 2:44; Mataio 6:9, 10.

Na roto i te parau a te mau melahi i te mau tiai mamoe, te haapii nei tatou e ua iritihia te ravea e faaorahia ˈi i te feia atoa e hinaaro nei e faaroo i te poroi o te parau apî maitai. E riro te feia e noaa ia ratou te maitai rahi o te Atua ei “feia manaˈo tae.” Te vai ra te tiairaa faahiahia i te hau na te ao atoa nei i raro aˈe i te Basileia o Iesu Mesia, e tia râ ia tae te aau o te taata e haapao i te hinaaro o te Atua. E tauturu anei te tau Noela i te reira e e faaite anei te reira i taua hinaaro ra? No te mau taata e rave rahi o te hinaaro e pee i te Bibilia, mea maramarama maitai te pahonoraa.—Luka 2:10, 11, 14.

[Nota i raro i te api]

[Tumu parau tarenihia i te api 4]

E MAERE VETAHI PAE

I roto i ta ˈna buka The Trouble With Christmas, te faataa ra te taata papai o Tom Flynn i te mau faaotiraa i raeahia i te pae hopea o te mau matahiti maimiraa no nia i te Noela:

“Mea rahi roa te mau tutuu ta tatou e taai ra i te Noela i teie nei, no roto mai ïa i te mau tutuu a te mau haapaoraa etene no te tau hou te Kerisetianoraa. No te pae totiare, taatiraa o te tino, aore ra faataaraa i te ao materia na roto i te tahutahu te tahi pueraa o te reira, o te aratai paha ïa i te feia no teie tau i noaa te ite, o te ara i te taˈere ia faarue i te mau tutuu ua taa maitai aˈe anaˈe ia ratou te mau tumu.”—Api 19.

Ia oti ia ˈna i te faaite i te hoê pueraa haamaramaramaraa paturu, te hoˈi ra o Flynn i nia i te manaˈo tumu: “Te hoê o te mau vahi huru ê rahi o te Noela, o te iti ïa o te huru Kerisetiano mau o ta ˈna mau peu. Ua taa anaˈe ia tatou teihea mau mea no te tau hou te Kerisetianoraa mai, te rahiraa o te toea, no te tau ïa i muri aˈe i te Kerisetianoraa, e ere râ no te Kerisetianoraa mau.”—Api 155.

[Hohoˈa i te api 7]

Ua haamau te faaiteraa i te fanauraa o Iesu i te niu o ta ˈna hopoia no a muri aˈe ei Arii maitihia e te Atua