Turaihia ia tavini

EAHA te mea e turai i na feia apipiti faaipoipo e 24 i te taime faahiahia roa ˈˈe o te oraraa ia faarue i to ratou fetii, to ratou mau hoa, e te mau mea e haaati ra i to ratou utuafare no te rave i te ohipa mitionare i te mau fenua ěê? No te aha ratou e oaoa ˈi i te haere i te mau vahi mai ia Papua e ia Taïwan, e oia atoa te mau fenua i Afirika e i Marite Latino? No te hinaaro anei i te oraraa faatureirei? E ere. Ua turaihia râ ratou e te here mau i te Atua e i te taata-tupu.—Mataio 22:37-39.

O vai teie mau taata? O te feia faatuitehia o te 109raa o te piha a te Haapiiraa Bibilia no Gileada a te Watchtower. I te Mahana maa 9 no Setepa 2000, ua putuputu mai te hoê taatoaraa e 5 198 taata i te Fare Haapiiraa a te Watchtower, i Patterson, New York, e i te mau vahi e haaati ra no te faaroo i te mau aˈoraa î i te here o te tauturu i te feia faatuitehia ia riro ei mitionare o te manuïa.

Te peretiteni o te porotarama, o Stephen Lett ïa, melo o te Tomite no te Haapiiraa a te Tino Aratai a te mau Ite no Iehova. Ua niu oia i ta ˈna mau parau omuaraa i nia i te Mataio 5:13, “O outou te miti no te fenua.” Ua faataa Taeae Lett e e au mau te mau parau a Iesu i te feia haapii e faatuitehia ra. Ei hiˈoraa, e au i te miti ia faataota maitai i te mau mea. Oia atoa ïa, na roto i ta ratou ohipa pororaa aravihi, e riro te mau mitionare mai te miti ei auraa parau.

Horoaraa i te faaitoitoraa

Ua faahaere mai nei Taeae Lett i te tahi mau tavini a Iehova taime roa tei vauvau i te mau oreroraa parau Bibilia poto e te puai râ. O John Wischuk o te tavini i te Tuhaa Papairaa, te matamua. Ua niuhia ta ˈna tumu parau, “Te faaitoito ra te salamo poto roa ˈˈe i te huru feruriraa mitionare,” i nia i te Salamo 117. I teie mahana, te vai ra te hinaaro na te ao atoa e poro i te “mau nunaa” e “te mau taata atoa” no nia ia Iehova e to ˈna Basileia. Ua faaitoitohia te feia haapii ia faatupu i ta te Salamo 117 e parau ra na roto i te aˈoraa ia vetahi ê ia “Halelu Ia.”

I muri iho, ua faahaere mai te peretiteni ia Guy Pierce no te Tino Aratai. Ua paraparau oia i te tumu parau ra “A riro ei mea faaau maitai e te etaeta râ.” Mea paari te Parau a te Atua. Te parauhia ra te Atua ra o Iehova te Mato i roto i te Deuteronomi 32:4, teie râ, te faatia ra ta ˈna Parau i te faaau-maitai-raa i te mea e ua papaihia no te mau reo e te mau taˈere atoa—oia, no te huitaata taatoa. Ua aˈohia te feia haapii e poro i te Parau a te Atua, a vaiiho ai e na ta ˈna poroi e haaputapû i te mafatu e te manaˈo haava o te taata. (Korinetia 2, 4:2) “Ia etaeta outou no te mau faaueraa tumu, ia riro râ ei mea faaau maitai. Eiaha e vahavaha i te feia no ta outou tuhaa taviniraa no te mea mea ê ta ratou taˈere,” o ta Taeae Pierce ïa i aˈo.

Ua paraparau o Karl Adams, hoê o te mau orometua haapii no Gileada, fatata e 53 matahiti to ˈna taviniraa i te pu rahi, i te tumu parau haaferuri ra “E haere outou ihea mai i ǒ nei  atu?” Parau mau, e tonohia na feia apipiti faaipoipo e 24 i roto e 20 fenua taa ê na te ao nei, teie râ te uiraa i uihia, Ua tae anaˈe outou i ǒ e ua ite atu anaˈe outou, eaha ˈtu ai ïa? Te ora nei tatou i roto i te hoê ao eita e faaea noa. E hinaaro te taata e haere i te mau vahi apî e e rave i te mau mea apî ei tutavaraa i te faaoaoa ia ratou iho. I te tahi aˈe pae, ua tonohia te feia haapii e Iehova i te vahi ta ˈna e hinaaro ra ia tae ratou no te haapao i ta ˈna mau “mamoe” ma te miimii ore. Eiaha ratou ia riro mai to Iseraela i tahito ra tei ere i te ravea ia faaohipahia e Iehova no te haamaitai i te huitaata no to ratou miimii. Eiaha, ia pee râ ratou ia Iesu Mesia, tei rave noa i te hinaaro o to ˈna Metua ma te miimii ore e tei auraro i roto i te mau huru tupuraa atoa ta ˈna i farerei.—Ioane 8:29; 10:16.

“A poihere i te mau mea hohonu a te Atua,” o te tumu parau ïa a Wallace Liverance, te papai parau a te Haapiiraa no Gileada. Ma te tamau, e parau te mau Papai e e mau taoˈa rahi, e mau ofai maitatai faufaa, e mau metara faahiahia, e e mau mea moni rahi e te imi-rahi-hia te Parau a te Atua. Te faaite ra te Maseli 2:1-5 e no te itea mai “te ite i te Atua,” e tia ia tatou ia imi atu mai “te taoˈa hunahia ra.” Ua faaitoito te taeae orero i te feia haapii ia tamau i te ô i roto i te mau mea hohonu a te Atua a tavini ai ratou i roto i ta ratou tuhaa taviniraa apî. Ua haaferuri Taeae Liverance e: “Mea maitai te reira no te  mea e patu i te faaroo e te tiaturi ia Iehova e e haapaari i ta outou faaotiraa e faaea noa i roto i ta outou tuhaa taviniraa. E tauturu te reira ia outou ia paraparau ma te tiaturi papu e ia riro ei orometua haapii aravihi atu â ia faataa outou i te mau opuaraa a te Atua ia vetahi ê.”

Na roto i te hoê faanahoraa piha haapiiraa, ua haamanaˈo te tahi atu orometua haapii no Gileada nafea to Iehova haamaitairaa i te ohipa pororaa i tera e tera fare a te feia haapii i te roaraa o na avaˈe e pae i mairi. Ua haamataratara o Lawrence Bowen i te mau parau a Paulo i roto i te Ohipa 20:20 no nia i ta ˈna taviniraa i mua i te taata i Ephesia, a haapapu ai e ua rave Paulo i te mau taime maitai atoa no te poro. Ua faaite te mau aamu a te feia haapii e, mai te aposetolo Paulo, eita roa ˈtu te feia i turaihia e te here i te Atua e i te taata-tupu i to tatou nei tau e tapea ia ratou iho i te paraparau i te parau mau e te tauturu ia ohipa te Parau a te Atua i nia ia vetahi ê. E horoa mai te reira i te mau haamaitairaa faufaa rahi a Iehova.

Te paraparau nei te feia ua noaa te paari

I te roaraa o ta ratou tau haapiiraa, ua fanaˈo taa ê te feia haapii no teie piha a Gileada i te auhoaraa e te mau melo Tomite Amaa no na fenua e 23, tei tae atoa mai i te Fare Haapiiraa i Patterson no te hoê haapiiraa taa ê. Ua faatere o Leon Weaver e o Merton Campbell no te Tuhaa o te Taviniraa i te mau uiuiraa manaˈo i te tahi mau melo Tomite Amaa, e feia faatuitehia te tahi pae no Gileada. Mea tamahanahana no te feia haapii e to ratou fetii ia faaroo atu i teie mau mitionare ua noaa te paari.

I roto i te mau aˈoraa i te piha e faatuitehia ra no te tauturu ia ratou ia faaau atu ia ratou iho i ta ratou tuhaa taviniraa, te vai ra te mau parau mai teie: “Ei manaˈo maitai to outou. Ia farerei outou i te hoê mea mea ê roa na outou aore ra aita e taa ra ia outou, eiaha e faarue. A turui i nia ia Iehova”; “a haapii i te oaoa i te mea e vai ra, e a tiaturi e e horoa Iehova i te mau mea e titauhia i roto i to outou oraraa.” Ua onoono te tahi atu mau manaˈo i nia i te tautururaa i te feia haapii ia tapea i te oaoa i roto i ta ratou tuhaa taviniraa. Teie te tahi mau parau: “Eiaha e faaau i ta outou tuhaa taviniraa e te vahi no reira mai outou”; “a haapii i te reo no taua vahi ra e a paraparau i te reira ma te tano ia nehenehe outou e aparau e te taata”; “a haapii i te mau peu e te taˈere a te taata, no te mea e tauturu te reira ia outou ia faaea noa i roto i ta outou tuhaa taviniraa.” Ua faaitoito rahi mau teie mau parau i te mau mitionare apî.

I muri aˈe i te mau uiuiraa manaˈo, ua vauvau o David Splane, te hoê mitionare tahito i faatuitehia i roto i te 42raa o te piha haapiiraa no Gileada e tavini ra i teie nei ei melo o te Tino Aratai a te mau Ite no Iehova, i te oreroraa parau tumu ia au i te tumu parau o te huti maitai i te ara-maite-raa “Feia haapii aore ra feia faatuitehia?” Ua ui oia i te piha e faatuitehia ra e: “Nafea outou ia hiˈo ia outou iho ia haere outou i roto i ta outou taviniraa mitionare? Ei feia faatuitehia o te ite i te mau mea atoa no nia i te ohipa mitionare aore ra ei feia haapii mea rahi â te toe ra i te haapii?” Ua haamataratara Taeae Splane e e hiˈo te taata faatuitehia e te paari ia ˈna iho mai te hoê taata haapii. E tia i te mau mitionare ia manaˈo e e nehenehe ta te taata atoa ta ratou e farerei i roto i ta ratou taviniraa mitionare e haapii mai ia ratou i te hoê mea. (Philipi 2:3) Ua faaitoitohia te feia haapii ia haa amui maitai e to ratou mau hoa mitionare, te amaa, e te amuiraa no taua vahi ra. “Ua manuïa outou i ta outou mau hiˈopoaraa hopea, aita râ outou i faaea i te riro ei feia haapii. A haapapu maitai i te taata atoa e tei reira outou no te haapii,” o ta Taeae Splane ïa i aˈo.

I muri aˈe i teie oreroraa parau, ua noaa i te feia haapii ta ratou parau tuite, e ua faaitehia ta ratou tuhaa taviniraa i te feia e faaroo ra. E taime putapû mau to muri iho no te feia haapii e faatuitehia ra i te taioraa te hoê tia no te piha haapiiraa i te hoê faaotiraa e paraparau ra no nia i te hinaaro mau o te feia faatuitehia e vaiiho ia turai te mea ta ratou i haapii i roto i te Parau a te Atua ia ratou ia rahi atu â te mau ohipa taviniraa moˈa.

E farii iho â ïa te feia atoa i tae mai e ua haapaari te mau aˈoraa i horoahia i te faaotiraa a te feia faatuitehia e faaite i te here i te Atua e i te taata-tupu. Ua haapaari atoa ˈtu â te reira i ta ratou faaotiraa e tauturu i te taata i te pae varua i roto i ta ratou taviniraa mitionare.

[Tumu parau tarenihia i te api 25]

Tabula o te piha haapiiraa

Rahiraa fenua e tia to ratou: 10

Rahiraa fenua e terehia ˈtu: 20

Rahiraa feia haapii: 48

Faito matahiti au noa: 33,7

Rahiraa matahiti au noa i roto i te parau mau: 16,2

Rahiraa matahiti au noa i roto i te taviniraa taime taatoa: 12,5

[Hohoˈa i te api 26]

Te 109raa o te piha faatuitehia a te Haapiiraa Bibilia no Gileada a te Watchtower

I roto i te tapura iˈoa i muri nei, a taio i te mau anairaa mai mua e haere atu i muri, e te mau iˈoa mai te pae aui e haere atu i te pae atau.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.