E ueue te hoê taata hamani titia mata i te huero

Nafea te mau tutavaraa a te hoê taata hamani titia mata i Lviv, i Ukraine, e taaihia ˈi e te hoê amuiraa reo Rusia a te mau Ite no Iehova tei haamauhia i Haïfa, i Iseraela, fatata e 2 000 kilometera i te atea i te mau fenua e rave rahi? E aamu teie o te haapapu e mea tano te irava bibilia o te Koheleta 11:6: “Ei te poipoi a ueue ai i ta oe huero, e ei te ahiahi eiaha e parahi noa, aore hoi oe i ite i tei tupu.”

E HAAMATA ta tatou aamu i te matahiti 1990, te faaea ra o Ella, te hoê vahine ati Iuda apî, i Lviv. Te faaineine ra o Ella e to ˈna utuafare i te reva i Iseraela. Na mua iti noa ˈˈe i to ratou revaraa, ua farerei o Ella i te hoê taata hamani titia mata, e Ite no Iehova oia. I taua taime ra, mea opanihia te ohipa a te mau Ite no Iehova i Ukraine. Noa ˈtu râ, ua faaite te taata hamani titia mata i ta ˈna mau tiaturiraa niuhia i nia i te Bibilia ia Ella. Ua maere o Ella i to ˈna  parauraa e e iˈoa to te Atua. Ua faatupu te reira i te anaanatae o Ella, e ua noaa mai te hoê aparauraa bibilia maitai.

Ua au roa o Ella i te aparauraa, e ua ani ia tauaparau faahou raua i te hebedoma i muri mai, e i muri aˈe atoa. Te rahi ra te anaanatae o Ella, te vai ra râ te hoê fifi. Ua fatata roa te utuafare i te reva i Iseraela. Mea rahi â te mau mea e tia ia Ella ia haapii! No te faaohipa hope roa i te taime e toe ra, ua ani oia i te hoê haapiiraa bibilia i te mau mahana atoa e tae noa ˈtu i to ˈna revaraa. Noa ˈtu e aita o Ella i rave faahou i ta ˈna haapiiraa i to ˈna taeraa ˈtu i Iseraela i te taime matamua, ua aˈa aˈena te huero o te parau mau i roto i to ˈna aau. I te hopea o te matahiti, te haapii faahou ra oia i te Bibilia ma te haapao maitai.

Ua tupu te tamaˈi i te Golfe Persique, e ua topita to Irakia ia Iseraela. E pinepine te reira i te faahitihia. I te hoê mahana i roto i te hoê fare toa rahi, ua faaroo o Ella i te hoê utuafare parau Rusia i tae apî mai i te paraparauraa. Noa ˈtu e te haapii noa ra oia i te Bibilia, ua haafatata ˈtu o Ella i te utuafare e ua faaite atu i te parau tǎpǔ bibilia o te hoê ao hau. Ei faahoperaa, ua apiti atu o Galina te mama ruau, o Natasha te mama, o Sasha (Ariel) te tamaiti, e o Ilana te tamahine i te haapiiraa bibilia a Ella.

O Sasha te melo matamua o te utuafare tei bapetizohia—noa ˈtu te mau fifi e rave rahi. Noa ˈtu e e taurearea haapii aravihi oia, ua tiavaruhia oia i rapaeau i te haapiiraa no te mea aita oia i faaô i roto i te faaineineraa a te nuu, e tuhaa titauhia hoi o te porotarama haapiiraa, no to ˈna manaˈo haava Kerisetiano. (Isaia 2:2-4) Ua haavahia o Sasha e te Tiripuna Teitei no Iseraela i Ierusalema, o tei faaue ma te au ia aruehia e ia faahoˈihia o Sasha ia nehenehe oia e faaoti i ta ˈna tau haapiiraa. Ua atutu teie parau na te fenua taatoa. Mea na reira te mau Iseraela e rave rahi iteraa eaha te mau tiaturiraa a te mau Ite no Iehova. *

I muri aˈe i to ˈna faatuiteraahia i te haapiiraa teitei, ua rave o Sasha i te taviniraa taime taatoa a te mau Ite no Iehova. I teie mahana, e pionie taa ê oia e e matahiapo o te amuiraa. Ua rave atoa to ˈna tuahine o Ilana i te taviniraa taime taatoa. E mau Ite bapetizohia to raua mama e to raua mama ruau. Te hotu noa râ te huero ta te taata hamani titia mata i ueue!

I taua taime atoa ra, ua tamau noa o Ella i te haere i mua i te pae varua e aita i maoro, ua poro oia na tera e tera fare. I ta ˈna fare matamua, ua farerei o Ella ia Faina, no tae noa maira oia mai Ukraine mai. Te hepohepo ra o Faina. Ua faaroo o Ella i muri aˈe e na mua iti noa ˈˈe oia i patoto ai i te opani, i pure na te vahine hepohepo ra o Faina i te Atua: “Aita vau i ite o vai oe, mai te peu râ e te faaroo mai ra oe ia ˈu, a tauturu mai ïa.” E aparauraa anaanatae mau ta raua o Ella. Mea rahi te mau uiraa a Faina e ua feruri maitai oia i te mau pahonoraa e horoahia ra. I muri aˈe, ua papu aˈera ia ˈna e te haapii ra te mau Ite no Iehova i te parau mau o te Bibilia. Ua faatanotano oia i ta ˈna porotarama haapiiraa tuatoru ia nehenehe oia e amui hau atu â e te amuiraa e e rave i te ohipa pororaa. I te avaˈe Me 1994, ua bapetizohia o Faina. Ua rave atoa oia i te taviniraa pionie, e te hoê  ohipa afa mahana i te pae roro uira ei imiraa na ˈna.

I te avaˈe Novema 1994, i roto i te pororaa, ua paruparu taue roa o Ella. Ua haere atura oia i te fare maˈi e ia au i te mau hiˈopoaraa, e maˈi aai tahetahe to to ˈna aau. I te po, ua topa to Ella faito hémoglobine i nia i te 7,2. Ua horoa te hoê matahiapo o te amuiraa a Ella, te peretiteni o te Tomite tuatiraa e te fare maˈi (CLH na roto i te reo Farani) i te tahi mau haamaramaramaraa no nia i te mau ravea rapaauraa e rave rahi aita e toto, na te mau taote. * Ua manuïa te tâpûraa aita e pâmuraa toto, e ua maitai roa o Ella.—Ohipa 15:28, 29.

Ua maere roa o Karl, to Ella taote no te vahine, e ati Iuda oia tei fanauhia i Helemani. I muri iho, ua haamanaˈo oia e i matau na to ˈna mau metua, tei ora mai i te Taparahiraa ati Iuda, i te mau Ite no Iehova i roto i te mau aua faatîtîraa. Ua ui o Karl e rave rahi uiraa. Noa ˈtu e mea ohipa roa oia i roto i to ˈna toroa, ua rave o Karl i te taime no te haapii tamau i te Bibilia. I te matahiti i muri mai, ua haere oia i te mau putuputuraa Kerisetiano tahebedoma.

Eaha te faahopearaa o te huero i ueuehia e te taata hamani titia mata? Ua ite aˈena tatou eaha tei tupu i nia ia Sasha e to ˈna utuafare. No Ella, e pionie taa ê oia. Te rave ra ta ˈna tamahine o Eina, no faatuite-noa-hia ˈtura oia i te haapiiraa teitei, i to ˈna toroa pionie. E pionie taa ê atoa o Faina. No Karl, to Ella taote no te vahine, e Ite bapetizohia e e tavini tauturu oia i teie nei, o te opere ra i te mana faaora o te parau mau bibilia na ta ˈna mau taata maˈi e vetahi ê.

I teie nei, ua riro te pǔpǔ iti o te feia parau Rusia no te fenua ê tei haamata ei melo no te Amuiraa Hebera no Haïfa, ei amuiraa Rusia itoito e hau atu i te 120 feia poro i te Basileia. Te tupu ra teie maraaraa maoti te tuhaa a te hoê taata hamani titia mata i Lviv tei faaohipa i te taime maitai no te ueue i te huero!

[Nota i raro i te api]

[Hohoˈa fenua i te api 29]

(Hiˈo i te papai)

UKRAINE

ISERAELA

[Faaiteraa i te tumu]

Mountain High Maps® Copyright © 1997 Digital Wisdom, Inc.

[Hohoˈa i te api 30]

O Ella e ta ˈna tamahine o Eina

[Hohoˈa i te api 31]

Te hoê pǔpǔ Ite oaoa parau Rusia i Haïfa. Mai te pae aui e tae atu i te pae atau: o Sasha, Ilana, Natasha, Galina, Faina, Ella, Eina, e o Karl